الثلاثاء، يناير 15، 2008

حول كثلكة العالم


حين اطلت الدكتورة عبله الكحلاوي علي دريم بثوبها الابيض ووجهها الملائكي تتحدث عن الوحده الوطنيه وكيف اننا نعبش معا من الالاف السنين وكيف ان الامر لم يخلو احيانا من التلاسن واستشهدت بأغنيه واحد اتنين سرجي مرجي .. التي فسرتها بسير جرجس ومار جرجس

حين تحدثت عن رأب الصدع الحتمي بين ابناء الوطن حتي لانصبح جميعا لقمه سائغه وسهله لاعدائنا

ازاي راحت بورسعيد لاحتواء فتنه علي وشك الاشتعال من بعض الزعلانين بعد احداث كنيسه اسكندريه

وازاي عملت زيارات لاهالي بورسعيد

وان 138عالم مسلم توجههوا الي رؤساء الكنايس في العالم في اوروربا وامريكا رساله سلام ومحبه وان كلنا بنعبد رب واحد ولازم ننسي خطايا الماضي والالام الحاضر عشان نقدر نعبش

المبادرة الاسلاميه دي بقياده الشيخ النايض وهو ليبي وضمت وجوه اسلاميه مثل الحبيب علي الجفري وغيره

ان رؤساء الكنايس في امريكا وغيرها حوالي 300 عالم ردوا برساله جميله خالص برضه واعتذروا عن الحروب الصليبه والحرب الحاليه ضد الارهاب

واننا الحمدلله اتصافينا وبقينا سمنه علي عسل مش عارفه كنت مبسوطه اوي

الحمدلله احنا اتصافينا وخلاص ها نعيش في محبه وسلام وسمنه علي عسل

واكيد الباباهات بتوع الكنايس دول ها يأثروا علي حكوماتهم ونبقا فله ولا حروب ولا بتاع
والحكايه بقا اخر زقططه وجرجس ومحمد بقوا اخوات ومينا وعمر رجعوا صحاب الحقيقه ان الدكتورة عبله الكحلاوي كانت مؤيده جدا لرساله علماء المسلمين
ووششها بينقط ملائكيه وصوتها حلو وتحس انها امك ونفسك تاخدك في حضنها وعلي الجنه حدف وحلم اخر جمال

تاني يوم اللي هو امبارح المحور تستضيف دكتورة في الادب وتاريخ الحضارة الفرنسيه د زينب عبد العزيز الدكتورة معترضه خالص علي الرساله ونصها ومحتواها وتوقيتها االدكتورة شايفه ان البابا بندكنت يسعي الي تنصير العالم تحت المذهب الكاثوليكي

وانه قال في رسايله ان العالم لم يعد ييحتمل دينان كبيران الاسلام والمسيحيه وان لابد لاحدهما من الوجود والاخر للفناء وان الناس اللي راحوا ال138 دول مقصرين ومفرطين ووان ده نوع من التنازلات بتبدأواحده واحده لحد ما نخسر كل شيئ زي القضيه الفلسطينيه بالظبط

وهنا بقا بدل الدكتورة ما تلقي حجر في البحيرة رمت قتيل مرة واحده

الكتورة زينب قالت اننا مختلفين ابتداء وانتهاء
وبعدين ازاي بيقولوا بنعبد اله واحد احنا بنعبد ربنا وهما بيعبدوا بسوع والتثليث دا في القرن الرابع بعد مجمع نيقيه 325

وان فكرة التثليث مخالفه كليه وجزئيه للعقيدة الاسلاميه وكلام كتير عن طبيعه السيد المسيح وان الاناجيل فيها كيت وكيت

واستشهدت بنصوص انجيليه من العهد الجديد تحث علي تنصير الاخرين كاثوليكيا حسب بندكت

وان بقيه الكنايس الغير الكاتوليكيه والمذاهب اللي بتوصل في امريكا بس الي 30 الف مذهب لازم وحتما ها تتوحد تحت لواء الفاتيكان برضاها اوبعدمه وان دا مشروع البابا بندكت السادس عشر الاعظم

والحقيقه الست كتر خيرها كرت الكلام ده كله في رساله وبعتتها للبابا يقوم المذيع العبيط بسألها والبابا رد عليكي تقوم تقوله: لا!!ا

مش فاهمه سؤال ده ولا استهبال يعني ها يرد عليها يقولها ايه ولا يرد ليه اصلا ويقولها اه يا زينب انا ها انصر العلم كاتوليكيا ها وريني ها تعملي ايه بقا؟؟

وان البابا كمان عاوز يضم لعرشه العالم الاسلامي طوعااو كرها واو عمليات التبشير علي قدم وساق في افريقيا وبتستعمل فيها مبالغ رهيبه وبعد الدكتورة ما رمت القتيل اتصل بالاب جريش المتحدث الرسمي باسم الكنيسه الكاتوليكيه في مصر والراجل بكل هدوء اعصاب طنش كلامها بتاع تحريف الاناجيل وطبيعه يسوع وكل ده والحقيقه اعصابه كانت فولاذيه

ورد علي سؤال التبشير بس وقال: اه بنبشر حسب المذهب الكاثليكي وايه يعني؟؟

مش عيب اللي عاوز يجي هو حر واللي مش عاوز هو حر

ما احنا طول النهار بنتبشر بالاسلام بنسمع التواشيح الجميله 5 مرات في النهار بقصد الاذان طبعا
و وولادنا بيدرسوا نصوص قران في المدارس هو ده مش تبشير بالاسلام برضه؟؟
وايه يعني لما احنا بقا نبشر؟؟

وهنا بقا خلص الحوار

الله دا جرجس ومحمد قلبوا تاني

والحلم قلب كابوس والعالم ده مش مكان امين نعبش فيه
وعبله الكحلاوي طلعت بتحلم
وانا صدقت

والحروب ها تفضل والسكاكين مسنونه
وومفيش سلام ولا محبه ولا زقططه ورجعنا لنقطه الصفرتاني

هناك 52 تعليقًا:

Gid-Do - جدو يقول...

شوفى يابنت الحلال وكلام من الاخر ـ لو حد قلك ان الطب مهنة انسانية قولى له وانا المسؤل ـ انت كداب ـ الطب بزنس سلعة زى اى سلعة تباع وتشترى ولابد من تحقيق ربح وبدون الربح تبور السلعة وتقفل العيادات والمستشفيات ـ هذة حقيقة وان كانت مرة وغير قابلة للتصديق من اول وهلة ـ الدين - كلامى هنا ينطبق على كل الاديان - الدين نفس الشئ اصبح زى الطب بزنس بعد ان كان الدين والطب لهما معنا واحد وهو عمل الخير
لكن مع الوقت تراجع هذا المفهوم واصبح الدين بزنس ووسيله لتحقيق هدف ما

عين فى الجنة يقول...

الحرب السرية والمعلنة ضد الدين الاسلامى الحنيف على قدم وساق ليس فقط من جانب بينديكت باب الكاثوليك ولكن ايضا من جانب الهندوس وطبعا متخيلين عددهم فى الهند وحدها الى جانب العلمانيين والشيوعيين الملاحدة ومن لف لفهم
وقد تكونى سمعتى الدكتور محمد عمارة ذات مرة يتحدث عن الاناجيل المطبوعة بغلاف مشابه تماما لاغلفة القرآن وترسل الى المسلمين البسطاء اى ان الحرب ليست شريفة وكل واحد حر كما يقولون
وكلنا يتذكر كيف تم تنصير المسلمين قهرا فى اسبانيا بعد سقوط الاندلس ومذابح التطهير العرقى فى البوسنة والهرسك فى القرن العشرين
هذا فى الوقت الذى تختصر فيه المناهج فى الازهر وتبسط وتحارب مدارس تحفيظ القرآن فى باكستان وافغانستان بضغوط من الغرب المسيحى وكيف ان اسرائيل جميل جدا ان تكون دولة يهودية اى على اساس دينى وان تكون معظم الاحزاب فى اوروبا لها مسميات دينية و اجندة سياسية على اساس دينى اى ان الدين مسيس والسياسة متدينة والدليل رفض قبول تركيا المسلمة فى الاتحاد الاوروبى فقط لانها مسلمة ولان الثقافة الاوروبية مسيحية
وهنا فى بلادنا نرفع شعار لا سياسة فى الدين ولا دين فى السياسة اى اننا ملكيون اكثر من الملوك انفسهم
لماذا يحاربون الدين الاسلامى؟
الهندوس عندهم طبقة منبوذة محرومة من تحول الروح الى النرفانا ولا امل لهم فى الخلاص من الدنيا لان ارواحهم مكبلة مرة فى جسم انسان منبوذ من العبيد او عندما يموت تعود فى جسم حشرة او حيوان فى تناسخ لا نهائى للارواحهم ، وعندما يسمعون عن الدين الاسلامى يدخلون فيه افواجا وهذا ما يغضب الهندوس
وبابا الكاثوليك قد يأس من الاوربيين فهم يهجرون الكنائس ويعلنون الحادهم ويتعبدون فى ملاعب كرة القدم وباقى وقتهم اما يعملون كالعبيد فى الالة الراسمالية الجهنمية او يعاقرون الخمر و يمارسون الجنس بانواعه ثم انهم يرفضون انجاب الاطفال فى عالمهم الموحش هذا، وليس امام الباب بينديكت اذن الا افريقيا والدول الاسلامية الفقيرة والا سوف تنتهى الكثلكة بمرور الوقت
السبب الذى يحارب من اجله الاسلام فى كل مكان ومن كل جانب هو انه لا يتماشى مع افكار العولمة التى تعبد الين والدولار فكيف بالله عليكى يبيعون الخمور فى عالم يعتنق الاسلام وكيف يتاجرون فى الرقيق الابيض فى عالم يعتنق دين العفة وكيف يسوقون خطوط المودة التى تتغير فى فساتين النساء كل عام فى عالم الحجاب والنقاب؟ وكيف تعمل البنوك الربوية ؟ وكيف وكيف ؟
وفى عالم اليوم لا احترام الا للقوة والمادة والمسلمين ولا اقول الاسلام فى مرحلة جزر ولذلك فالحرب شرسة ولا هوادة فيها ولا شرف فيها
فتمسكوا بدينكم الحنيف واقبضوا عليه حتى ولو كنتم كالقابضين على الجمر
واحب ان انوه الى ضرورة الحفاظ على العلاقات الحسنة والتعايش مع اقباط مصر فهم فى ذمتنا

karakib يقول...

كلام كبير اوي
الا انت ما سمعتيش عن مبادرتنا
مصالحة و مصارحة ؟؟ والتي سيتم تدشينها في فبراير ودعوتكم إليها لحضور فعالياتها في القاهرة حيث سيتم الإعلان عن التفاصيل خلال فترة لن تزيد عن الأسبوعين
هارجع تاني بس عايز اقول لك
انه لازم ناخد موقف من كل ما يحدث من حولنا ... ممكن تبقي تقري شوية كلام عن مبادرتنا و اللي فيها عدد من المدونين تعرفي البعض منهم عند ابن عبد العزيز
http://www.justice4every1.blogspot.com/
قريب انا كمان هاكتب عنها

عباس العبد يقول...

انا معدى بس كده
و قلت امسى علشان تدخلك الظريف فى التدوينة الى فاتت
الاقى تدوينة صاروخية زى دى
و كمان عن الكاتوليك الى زى ما انتى عارفة انهم كريمة الكريمة و اللا انا منهم
و كمان انا لسه راجع من الشغل
و مرهق و فطسان على الاخر
ماشى
اول بس ما اظبط نفسى
حقراها كويس و اقرأ الردود
و اقول رأى
سلام مؤقت

Hannoda يقول...

بصراحة أنا بتدايق جدا من كل اللي بيتناقشوا في الهوية اللي بين المسلمين و المسيحيين على اعتبار انهم بيحاولوا يسيطروا عليها فيقعوا في حوار عن تفاصيل المسيحية أو تفاصيل الاسلام

ليه لازم نعرف تفاصيلهم و نقبلها عشان نتحد معاهم و نتسامح

العقيده محلها القلب
ولا تخص سوى صاحبها وربه
ومش من حقنا كمسلمين نناقشهم في عقيدتهم مهما كانت تحفظاتنا عليها

أنا شايفة ان المسيحيين انج مننا بكتير في مواجهة الإحتقان اللي حاصل

وانهم عندهم رؤية أكثر وعيا و أكثر تفتحا منا

بجد.. الليحاصل ده بيجرح ومش قادرة أستسغ الواقع اللي بيقول ان فعلا فعلا الإحتقان بين فأتين الشعب زاد.. .. وده كله بسبب مناقشات مش في صلب الأزمة ولا في صالحها


ربنا يحمي بلدنا

الطائر الحزين يقول...

ولن ترضى عنك اليهود والنصارى حتى تتبع ملتهم




ود كثير من اهل الكتاب لو يردوكم من بعد ايمانكم كفارا حسدا من عند انفسهم

Eman Eltaher يقول...

احم احم !!! أنا قصدى خير و الله !!! أنا جاية أزور مدونتك و أعلق و أقول كلام كبير اوى !!!

البلد دى أصلا بايظة

و نعم الكلام ! أمال ده انا فظيعة
:)))))))
هههههههه

بصى هقولك حاجة .. فيه خلافات كتير بين الأديان بس كل الناس بما فيهم احنا لازم اننا نحاول منحش سبوت عليهم عشان متكونش ظاهرة و عشان يبان المجتمع متحابب مسالم جميل !!! و ده بالظبط دور وسائل الإعلام و المساجد و الكنائس عشان ميحصلش فتنة طائفة او تطرف دينى

و الله أعلم
و السلام عليكم و رحمة الله

إيمان الطاهر
أتمنى أشوفك ف مدونتى

تحياتى

سعيد شحاتة يقول...

والله كلام جميل يحتاج النظر والقراءة المتأنية
تحياتى للمرة الاولى

mohand يقول...

السلام عليكم

رغم اني الصراحه مش فاهم موقفك من البوست اللي انتي كاتباه

بس انا شايف ان بندكت يعني مش ذكي

وبيقححم نفسه في حاجات مالوش فيها

وفي العلن كمان

انما فكرة التبشير دي فعلا موجوده في افريقيا كتير قوي

واعرف كده من مده

دا غير ان موضوع تحويل الناس لمذاهبهم في المسيحية موجوده برضه
بمقابل مادي بقي او مقابل اخر بيحصل وخلاص

تحياتي

عباس العبد يقول...

انا مشفتش الحلقة و مقدرش اقيم اقوال الفريقين
بس ممكن ارد لو تسمحيلى من خلال تدوينتك
...
بعض المقدمات قبل الدخول فى قلب الموضوع
المقدمة الاولى
الاب الى بتكلمى عليه هو ابونا \ رفيق جريش
و انا درست معاه كتاب مقدس قبل كده و حاجة اسمها " نقد "
و هو بارد و اعصابه فى تلاجة بس خلقه ضيق
الصراحة انا مش لاقى كلمة اوصفه بيها غير ان خلقه ضيق
يعنى لما بيلاقى الى قدامه بيقول اى كلام او اى حاجة
او بيسئل اسئلة ساذجة بالنسبة له طبعا او كلامه ملغبط
بيطنشه و مبيردش عليه على اساس ان كلامه ساذج ميتردش عليه
و هو ده الى عمله مع الدكتورة زينب
زى كده لما واحد ييجى يسئلك انتم ليه مبتصلوش 7 مرات فى اليوم ؟
علشان بنصلى خمسة !!!!
....
المقدمة التانية
" هما بيعبدوا بسوع والتثليث دا في القرن الرابع بعد مجمع نيقيه 325
وان فكرة التثليث مخالفه كليه وجزئيه للعقيدة الاسلاميه وكلام كتير عن طبيعه السيد المسيح وان الاناجيل فيها كيت وكيت
واستشهدت بنصوص انجيليه من العهد القديم تحث علي تنصير الاخرين حسب بندكت كاثوليكيا "

ده كلامك و نقله من عندك
انا مشفتش الحلقة علشان اعرف ارد
اولا مصطلح عبادة يسوع ده اول مرة اسمعه ... بس عجبنى
مصطلح مصكوك ... مصنوع كويس يعنى
اما حكاية التثليث فاحنا معندناش تلات الهة علشان يبقى عندنا تثليث
من اول ايه فى العهد القديم الى اخر ايه فى العهد الجديد مفيش الكلام ده
عندك فى اسفار موسى العهد القديم
" انا هو الرب الهك لا يكن لك اله غيرى "
الى رسائل يوحنا العهد الجديد
" الرب الهك اله واحد "
و ممكن تقرى رسائل يوحنا علشان تتاكدى بنفسك
و مفيش حاجة اسمها نصوص انجيلية من العهد القديم
العهد القديم هو الفترة من اول ادم الى اخر الانبياء قبل المسيح
و العهد الجديد \ الانجيل هو من اول مجىء المسيح الى اعمال الرسل
و الاثنين اسمهم الكتاب المقدس
يعنى العهد القديم هو ما يطلق عليه التوراة فى الفكر اليهودى و هى الفترة اليهودية
و العهد الجديد هى الفترة المسيحية و بالتالى استحالة تكون جابت من العهد القديم نصوص من الانجيل للتبشير بالمسيحية
ازاى جابت من الفترة اليهودية نصوص تحث على نشر المسيحية !!!؟
اما بالنسبة لطبيعة السيد المسيح بعد مجموع خلقدونية فكانت المشكلة فى فرق الالفاظ المستعمل بين المدرسة الاسكندرية و المدرسة اليونانية
حول اذا كانوا طبيعتين ام مشيئتين و فى وثيقة سنة 1981 اتمضيت بين الكنيستين تنهى الخلاف اللفظى ده رسميا بعد نهايته كفكر دينى يمكن من الف سنة تقريبا و موجودة فى كتاب اسمه " يسوع المسيح فى تقليد الكنيسة "

عباس العبد يقول...

المقدمة التالتة
اولا طبيعى فى الفترة الى كان فيها الديانة اليهودية هى الموجودة بس فى العالم ,
ان الله يدعو اليهود الى التبشير بالدين اليهودى الى كل حتة فى العالم لنشر كلمة الله .... متفقين ؟
و لما جه المسيح و اصبحت هناك المسيحية كان من الطبيعى انه يتم التبشير بالمسيحية فى كل حتة فى العالم
و لما جه الاسلام ... اصبح من الطبيعى انه يتم التبشير به فى كل حتة فى العالم
يعنى مسئلة التبشير دى حاجة طبيعية لا هى حكر على حد و لا هى اوبشن لحد معين و لا هى عيبة او عار ان الكنيسة مثلا تنكسف تقول انها بتبشر فبتدارى نفسها او انه فعل فاضح لأاى دين و الى حيتمسك و هو بيبشر حيعلقوه من رجله
ده فعل طبيعى و انا شخصيا مش شايف فى اى مشكلة
لكن المشكلة الحقيقية هى " ازاى نبشر ؟ "
فى جملة انا مقتنع بيها تماما و قالها محمد سليم العوا
قال ايه ... قال
" انه بدل ما بنصرف مليارات سواء اسلاميا او مسيحيا علشان كل واحد ياخد من التانى عشرة الاف من هنا يقوم التانى ياخد 5 الاف و كده
انا شايف انه من المفروض نبتدى بالناس التى بلا دين اولا يوصلها اولا كلمة الله سواء اسلاميا او مسيحيا لأن دول هم الاولى بالتبشير مش الناس الى هى فعليا تعرف الله سواء مسيحيين او مسلمين "
....
المقدمة الرابعة
ركزى بقى فى الى حقوله دلوقتى لأنه اهم حاجة
فاكرة فيلم " بحب السيما " بتاع محمود حميدة و ليلى علوى
الفيلم ده عمل مشكلة كبيرة بسبب ما يقال تشويه صورة المسيحيين
انا شفت الفيلم ده تلات مرات من حلاوته
ضحكت لما كنت حتجنن لسببين
اولا انه فيلم فانتازى عالى جدا و كمان فارس يعنى كوميديا حادة
ثانيا لأنه كان اول فيلم كوميدى بيقدم مسيحيين بس
طبعا الفيلم فانتازيا عالية جدا و اى مسيحى دخله عارف كده
ارتودوكسى يتجوز واحدة بروتستانت فى عصر البابا كيرلس و كمان يجوز بنته لواحد ارتودوكسى و يكللوا فى كنيسة بروتستانت .... يعنى فانتازيا جامدة
و كمان ارتودوكس يقعدوا فى بيت يرنموا بألات بورتستانتية ترانيم كلماتها كاتوليكية
انا مت من الضحك يخرب بيت المؤلف .... جامد موت
عمل كوكتيل رمانى على الارض من الضحك
كان فى حاجات انا كنت بضحك عليها لوحدى او اتنين تلاتة معايا فى السينما كلها و كنت بعرف انهم مسيحيين من ضحكهم لأن المسلمين الى فى سينما مفهموش الافيه لانه مسيحى خالص
عايز اقول ايه
شوفى يا ستى
الفيلم بين حاجة مهمة
و انتى قاعدة فى السينما كنتى تسمعى التعليقات و التعليقات بتبين شخصية المعلق
لو مسيحى او مسلم او متعصب مسيحى او متعصب مسلم او ملوش فى البتنجان
الى عايز اقوله
الى داخل الفيلم و فكرته المسبقة عن المسيحيين انهم وحشين حيشوف الفيلم و هو حاطط فى دماغه انهم وحشين فحيطلع فى المسيحيين القطط الفاطسة و اى مشهد فيه رمز مسيحى بحت حيعلق عليه تعليق مش كويس و يتريق او يكفر المسيحيين و يهينهم
و الى داخل الفيلم و فكرته المسبقة عن المسيحيين انهم بنى ادمين عاديين , زيه زيهم كل الفرق انهم مسيحيين , حيشوف الفيلم عادى بالعكس ده ممكن يعرف منه اختلافات او يسئل حاجات تزيده معرفه عن عاداتنا و تقاليدنا الخاصة و بنختلف عنكم فى ايه و اهم حاجة طبعا يضحك لأنه فيلم كوميدى
معنى كده , انه الفكرة المسبقة بقت تحكم قبل التفكير

عباس العبد يقول...

عايز اقول ايه من المقدمات ديه ؟
عايز اقول
انه الى بيكره المسيحيين او مش بيقبلهم او حتى بيحطهم فى اطار ثابت ضيق و مش بيقبلهم اول ما يسمع كلمة تبشير يركبه ميت عفريت
لأ دول ما يبشروش , دول قصدهم شر , يتمنعوا , دول و دول و دول و حيطلعلك القطط الفاطسة لمجرد ذكر كلمة مسيحيين بدون التفكير فى انه اساس اى دين حتى لو بوذى بيسعى اكيد للأنتشار و ان كل الاديان السماوية رسالتها الاساسية نشر كلمة الله فى العالم اى التبشير
و زى ما كانت الدعوة لأنبياء العهد اليهود بنشر اليهودية و كانت امر مباشر للرسل من قبل المسيح و دعوة بعالمية الاسلام ... فليه الصراع ؟ كان التبشير كتب لدينه فقط و المسيحيين دول مجانين بيعملا حاجة مش بتاعتهم
احلال على بلابله الدوح ... حرام للطير من كل صنف
اما بالنسبة الى الناس الى بيتعاملوا مع المسيحيين على انهم بشر عاديين مختلفين فى الديانة .... فدعوة التبشير لاوزن لها ... لأنها امر طبيعى فى اى دين
ايه رأيك لو منعوا التبشير فى اوروبا و ايه رأيك فى ما ذكره السيد راجى من مذابح عرقية فى البوسنة او معاملة سيئة للمسلمين عامة فى الغرب
طبعا حاجة تضايق و تكسف و تحرج و تخلى الدم يغلى فى العروق و خصوصا بالنسبة للمسلمين الى عايشين فى اوروبا
فحتلاقى المسيحيين حيقوللك ما احنا كمان بنتعامل وحش و عايشين نفس المشاكل دى فى الدول الاسلامية
حتردى انتى طبعا .... مفيش الكلام ده دا المسيحيين واخدين حقهم فى مصر و الدول الاسلامية بدليل كذا و كذا و كذا
حيرد عليكى الاوروبيون ان المسلمين واخدين حقهم برضه فى الدول الاوروبية بدليل كذا و كذا و كذا
و الاتنين حيقولوا نفس الكلام , واحد حيقولك ما انتم بتبنوا كنايس حيرد التانى ما انتم بتبنوا جوامع
فهمتى قصدى
سجال عمرك ما تخلصى منه ... طول ما كل واحد مش قادر يقبل الاخر
مثال
انتى قلتى
وان فكرة التثليث مخالفه كليه وجزئيه للعقيدة الاسلامي
طبعا احنا معندناش تثليث فى المسيحية لكن ممكن نقول ان فى عقائد مسيحية مخالفة كليا و جزئيا مع العقيدة الاسلامية زى ما فى عقائد اسلامية مخالفة كليا و جزئيا للعقيدة المسيحية
هل احنا بندور على مساحات الاختلاف ام المساحات المشتركة ؟
السر فى المرجعية الفكرية و مدى قبول الاخر
اى
انتى بتختارى ايه ؟
بتختارى النص الاول من تدوينتك ... ان محمد و جرجس بيحبوا بعض
و لا النص التانى ...محمد و جرجس بيتخانقوا مع بعض ؟
ذيس ايز ذا كويستشن ؟
عليكى انك تختارى
اما ان جرجس و محمد يحبوا بعض و تسعى لكده
او ان محمد و جرجس يكرهوا بعض و برضه تسعى لكده
اما انك تقبلى الاخر و تحتويه
اما انك ترفضيه و تمسكيله على الواحدة و على كل كلمة و طلعيله اى حاجة غلط
يعنى
حبيبك تبلعله الزلط و عدوك تتمناله الغلط

عباس العبد يقول...

السيد راجى
انا ضهرى وجعنى م الانحناء يا بشمهندس
انحناءة اخرى من قداستى
تعليقك سليم
" بابا الكاثوليك قد يأس من الاوربيين فهم يهجرون الكنائس ويعلنون الحادهم ويتعبدون فى ملاعب كرة القدم وباقى وقتهم اما يعملون كالعبيد فى الالة الراسمالية الجهنمية او يعاقرون الخمر و يمارسون الجنس بانواعه ثم انهم يرفضون انجاب الاطفال فى عالمهم الموحش هذا
.....
والدليل رفض قبول تركيا المسلمة فى الاتحاد الاوروبى فقط لانها مسلمة"

ما عدا فى فرنسا لأن فيها نهضة دينية قوية جدا
و اسبانيا و طبعا ايطاليا
و موضوع تركيا الى رافضه و معارضه اسبانيا و فرنسا ... طبعا انت عارف
اما بقية اورويا فهى تجنن الى ما يتجننش
اما اختلافى بقى
و ديه اول مرة اختلف مع حضرتك
" فكيف بالله عليكى يبيعون الخمور فى عالم يعتنق الاسلام وكيف يتاجرون فى الرقيق الابيض فى عالم يعتنق دين العفة وكيف يسوقون خطوط المودة التى تتغير فى فساتين النساء كل عام فى عالم الحجاب والنقاب؟ وكيف تعمل البنوك الربوية ؟ وكيف وكيف ؟ "

معتقدش انا انهم حيبشروا بالمسيحية علشان يعرفوا يبيعوا كحوليات و فساتين
جلت منك دى .... طلعت اوت
اما حكاية الفلوس و البنوك , معتقدش برضه انهم محتاجين يبشروا بالمسيحية علشان الفلوس لان العرب - و الحمد لله - هبل و عبط بما فيه الكفاية لدرجة ان فائض الاموال الناتج عن البترول بيتم تدويره فى اوروبا و امريكا " راجع كتاب زيارة جديدة للتاريخ – الفصل الاخير – لمحمد حسنين هيكل " فمش محتاجين يبشروا علشان ياخدوا فلوسنا , احنا ادينهالهم جدعنة مننا – احنا عرب يا بيه سواء مسلمين او مسيحيين
راجع احداث لبنان و فلسطين و كل الدول .... احنا اساتذه فى خراب البيوت
راجع بس الفصل ده و انا اوعدك انك حتشد فى شعرك و مش بعيد تعمل عنه تدوينه تسب و تلعن فيها
هو و كتاب صلاة الجواسيس بتاع عادل حمودة
بس كتاب هيكل اهم
مع تحياتى

بنت القمر يقول...

جدو العزيز
الدين سلعه ومش بس سلعه ده وللاسف بقا وقود سريع الاشتعال لاي حرب لاي قهر لاي احتلال لاي تسلط
الدين بدل ما يبقي دوا للبشريه ومنهج للحياه ومنارة للنفس الانسانيه تهديها اصبح وسيله سيطرة وبحث عن قوة ونفوذ
البابا بندكت الذي يري العالم لايحتمل دينان كبيران نسي ان اهم بند وشرط انك تكسب الاخر روحا وقلبا
انك تقبله وتقبله زي ماهو تدعيه وتبشره اه تهمشه وتلغيه وتلوي دراعه بالفقر مرة وبالحرب مرة
يبقي ها تخسرة
منور وخليك معانا

بنت القمر يقول...

راجي
ما شاء الله تحليلاتك وتعليقك ينفع بوست لوحده
ده اولا
الحرب علي الاسلام مفروغ منها مرة باسم الارهاب ومرة باسم حمايه مصادر الوقود وغيرة
بس الفكرة اللي قصدتها والزاويه اللي اخترت الني اناقش الموضوع منها واللي اعتقد انها غابت عن كثير من المعلقين هي رساله ال138 عالم
واللي الدكتورة عبله هللت لها ولو حضرتك بصيت علي اللينك هتلاقي فيها اسامي تخض
المفارقه بقا
ان تاني يوم ومش عاوزة هنا اشغل نظريه المؤامره
تاني يوم يا مؤمن تيجي الدكتورة زينب تنقد المبادرة وتشف انها نوع من المحلسه والمطاطيه
من فعل يطاطي
للبابا اللي عاوز يهمش الكل جميع الاديان وتحديدا الاسلام الذي لايري العالم يعد يحتمله وخلي بالك هي جابت
ارقام واستشادات من رسايل البابا بندكت بالكلام ده
ودي ي مصيبه
لما يبقا اكبر سلطه دينينه مسيحيه تهمش الاخر وكمان عاوزة تبيده سواء الاخر ده مسلم اومسيحي من طائفه اخري
يبقا الراجل ده بيدور علي زعامه
وهنا كلام الدكتورة زينب صح
صحيح انا معجبنيش تفصيلات في كلامها زي ايه؟؟
زي اننا بنعبد الهين مختلفين
احنا بنعبد الله وهما بيعبدوا يسوع
يبقا مفيش مبادرة
طب انا مالي
اياكش يعبدوا بقرة
ليه ما ينفعش نتعايش سلميا؟؟
ليه لازم حد يقضي علي حد وده اللي خلاني اقول محمد وجرجس اتصالحوا وحسيت ان في بارقه امل وبعد كلام الدكتورة زينب حسيت ان فيه تيار تاني وكبير من الجانبين يرفض مبادرة الصلح
ناس زي زينب وناس زي بندكت اللي رفض حسب اللينك يمضي علي الوثيقه
رفض
لانه مش عاوز سلام ولا زينب شايفه انه ممكن ابتداءا وانتهاءا يكون في سلام
اشكر مرورك
بس حبيت اوضح الزاويه اللي هدفت منها اناقش الموضوع
تحياتي لشخصك الفاضل

بنت القمر يقول...

كراكيب
لا مسمعتش بس اوعدك ها ادور وابص واتايع
وطبعا لازم يكون لنا موقف بس تفتكر ايه هو الموقف
تحياتي

بنت القمر يقول...

هانوده
مش لازم ادور واعمل سبوت علي نقط الاختلاف بيني وبين الاخر والا لو ها ادور علي مساحه الاختلاف مش ها اخلص ويبق اوفر مجهودي
انتي عارفه اللي عجبني وفي نفس الوقت ضايقني من كلام الدكتورة زينب ايه؟؟
اننها بتقول مفيش فايده
مفيش فايده من اي حوار خالص بس يا تري عشان البابا مش عاوز وكتب كده في رسايله ولا عشان هي شايفه ان اختلافتنا اكبر بكتير من اننا نتفق
حقيقه مفزعه
وخيفه ان العالم بقا كدا يا انا يا انت يا تمتني يا اموتك
ان الارض متسعتاش سوا
تحياتي

بنت القمر يقول...

الطائر الحزين
إن الذين آمنوا والذين هادوا والصابئين والنصارى والمجوس والذين أشركوا إن الله يفصل بينهم يوم القيامة " الحج 17
*******************
الموضوع دلوقت مش بقا ان احنا نرجع كفار بس الحكايه بقت يا انا يا انت موقفنا من اهل الكتاب واضح وموقف القران في ايات كتير والحكم علي عقائد ومصائر الناس بيد الله
بس يا تري لحد ما ربنا يحكم بينا فعلا بقا في استحاله نعيش في سلام تابع معانا
تحياتي

بنت القمر يقول...

ايمان الطاهر ما انتي حلوة اهه وبتعرفي تقولي كلام موزون منورة وان شاء الله اجي لك
انا بحب اضحك من قلبي اجي ازورك
تؤمري يا ايمي

عين فى الجنة يقول...

الاخ الباشمندس رامز ( عباس العبد ) اولا شكرا لقداستك على الموّدة انا باعتبرها موّدة لانك بتناقش بالعقل
ثانيا انا قصدت من الفقرة الثالثة من تعليقى الحرب التى يشنها العلمانيين والملاحدة على الاسلام وبالمرة على كل الاديان التى تدعو اللى الفضيلة فهى تقدس المادة على حساب الفضيلة والعفة ولم اقصد ان التبشير هو المقصود بتسويق تلك السلع او تشجيع البنوك الربوية اعتقد كده وضحت لانى اشرت الى الملحدين والعلمانيين فى صدر التعليق
ثالثا انا لا اعتراض عندى على التبشير ولكن زى ماقداستك قلت بالضبط اعتراضى على اسلوب التبشير لما يكون غير واضح وصريح ولما تبشر بطريقة غير شريفة مثال ذلك ما ذكرته عن الاناجيل المغلفة بغلاف يشبه غلاف القران او انك تدفع فلوس للمسلمين او المسيحيين من مذاهب اخرى من الفقراء وتعالجهم مجانا مقابل التحول فى الدين او المذهب
وانا كتبت قبل كده ازاى رفضت الكنيسة المصرية عمل الارساليات الغربية فى مصر
باقى نقطة جانبية وارجو لو كان عندك معلومات عنها تقولها لنا
على حد علمى فاليهود يعتقدون انهم ابناء الله واحباؤه وان رسالة موسى خاصة بهم فهم لا يبشرون ابدا باليهودية بين الامم الاخرى
من باب التعالى على الاخرين ، ايضا ان المسيح عليه السلام ارسل ليصحح العقيدة الموسوية عند اليهود اى انه ارسل ايضا لبنى اسرائيل ليكمل ولا يغير فلم يكن من اهدافة التبشير بالمسيحية ايضا للناس من الامم الاخرى
اما التبشير بالمسيحية فكان من عمل تلاميذه واجنهاد منهم
ارجو التوضيح بعد اذن قداستك
طبعا احنا بنستأذن بنت القمر اننا نتحاور عندها بس انا باستغل كرمها واشكرها على سعة صدرها

بنت القمر يقول...

سعيد شحاته
كويس ان حضرتك لقيت في مدونتي ما بفيد
اهلا بيك وتابع معانا
تحياتي

بنت القمر يقول...

مهند
مش فاهم موقفي؟؟
ليه؟؟
موقفي اني حاسه بالاسف وزعلانه ومضايقه كنت مبسوطه لما سمعت كلام الدكتورة عبله الكحلاوي طبعا انت عارف شفافيتها ولائكيتها ولايخفي علي احد اسلوبها الامومي
طيب جميل الدكتورة قالت كلام حلو وكنت اول مرة اعرف عن المبادرة وواضح انها مبادرة كبيرة ولو حض رتك بصيت في الللينك هتلاقي اسامي تقيله اوي
لحد كده حلو ومنتهي التحضر والتسامح
طيب رد الفعل ايه التانيين اللي هما رؤساء كنايس اوروبيه وامريكيه ودول 300
ردوا رد رائع واعتذروا عن الحروب الصليببيه والحرب الحاليه علي الارهاب
يعني عداهم العيب وازح
هنا انا حسيت لوهله الله ما العالم فيه خير ورحمه واتصالحنا وتمام
تاني يوم بعد كلام الدكتورة زينب
واللي استشهدت بيه بكلام البابا بندكت ورسايله من العهد الجديد بتاع التبشير وان العالم لازم ينضوي تحت لواء الفاتيكان وان العالم لو يعد يحتمل دينان كبيران
وطبعا دي نبرة عدائيه ومتعاليع وعدوانيه جدا وعشان هو علي راس الكنيسه الاكبر زعلت
ليه الاخر امد له ايدي بالسلام يردها ليه اكون متسامحه واقابل بتعالي وعننصريه
اما كلام الدكتورة واللي قلت انها رمت بيه قتيل في البحيرة
وان هما بيعبدوا يسوع والاناجيل متحرفه وان الهنا مش واحد وان المبادرة دي نوع من التخاذل والهوان وهي ناتجه عن تقصير الازهر في القيام بمسؤلياته
حسيت انه هي بتقول هما مش قابلنا والبابا مش طايقنا وكمان احنا وهما مختلفين ومن الاول الي الاخر
ومفيش امل
انا عرفه انه في تبشير
وعارفه كتير من الاساليب
بس دي مش القضيه ولا الزاويه اللي همتني بالدرجه الاولي لان زي ما حضرتك عارف مش قضيه عدد احنا اكتر ولا هما
طب ما فيه مسلمين بالبطاقه بس والعكس
المهم عمق العقيده
اللي زعلني انه في تيار من الجانين يرفض التعايش ويعتبرة مستحيل تيار شايف انه يا انا يا انت
الارض والسما متسعناش سوي وده مؤسف جدا ومعناه ان الحروب والعداوات مقدر لها ان اتستمر الي ما لانهايه
وضحت كده
تحياتي

ذو النون المصري يقول...

زي جدو ما قال تماما الانسانيه مش ممكن تكون صافيه تماما و لا توجد اي نيه لاي عمل الا و فيها مصالح
بالنسبه لموضوع الدين اعتقد ان اي حوارات لن تراب الصدوع ابدا
الناس كما قال عنهم ربهم
و لا يزالون مختلفين
الاختلاف سنه من سنن الحياة
و انا شخصيا لا اخاف ابدا من اي حملات تنصير
ايه اللي هيحصل
واحد مسلم بقي مسيحي او العكس
واحد او مليون مش فارقه مفيش حد هيتحاسب بدلا حد و انا شخصيا لازال عقلي غير قادر علي الفهم
لماذا يعتبر قادة الاديان و زعماؤها البشر كقرص التورته و يتصارعون من اجل نشر مذاهبهم باساليب غير شريفه ؟
الناس احرار كل شخص حر في ان يؤمن او يكفر بلا اي ضغوط و الحساب علي الله

بنت القمر يقول...

عباس العبد
الاول بتأسف في غلطه رهيبه هي قالت الباب بيستشهد بايات من العهد الجديد اللي هو الانجيل مش القديم ودي غلطه مني
++++++++++++++++++++++
تانيا
النقطه الاساسيه مش مين بيعبد ايه وليه ؟؟
دي مش قضيتي
اللي ضايقني وخنقني ليه وازاي البابا يتكلم كده هي استشهدت برسايله اللي البابا الفاتيكان بيطبعها له ويووزعها
ممكن تكون علي النت في موقع الفاتيكان او في كتب
هي قالت رساله كذا صفحه كذا
وغالبا انت متفق معايا ان دي نبره عدائيه جدا بتاعه ان العالم لا يحتمل دينان كبيران
وان بقيه الكنائس يجب ان تنضم تحت لواء الفاتيكان
وده فيه تهميش للاخر والغاء له
فيه يا انا يا انت العلم ما يسعناش سوا
العالم لم يعد يحتمل دينان كبيران
جمله رهيبه ومفزعه
*****************88
الدكتورة كمان شايفه اننا ما ننفعش نتفق ابتداء وانتهاء لاحظ هنا انه من الجانب الاسلامي في ناس رافضه التصالح وقالت الكلام بتاع طبيعه يسوع والالهين والمختلفين والاناجيل وان كنت اعترف ان الكلامم ده تصور مسبق عند غالبيه السلمين
مش كتير يقدروا يفهموا ولا يستوعبوا حكايه الاقانين و لا اتحاد الناسوت باللاهوت ولا يستوعبوا ان ناسوته نزل الارض وملكوت ملأ السماء
بس انت مش مطالب ابدا تفهمني ولا تفنعني لاني لا فهمت واقتنعت يبق لازم اغيردديني
وذي انا مش مطالبه اني افهمك واقنعك بان ليه عندنا قانون مواريث بشكل معين او ان عندنا طلاق وتعدد زوجات
لو اقتنعت بكل ده وان ديني جميل وحلو يبق طبيعي انك تغير
مش دورنا نشرح لبعض اكتر ما دورنا نقبل بعض ونتعايش سلميا
لكن نبرة يا انا يا انت
دي نبرة عدائيه ولو تسمح لي فيها ضيق افق
ربنا خلقنا مختلفين وهو عاوز كدا وخلقناكم شعوبا وقبائل لتعارفوا ان اكرمكم عند الله اتقاكم
لو ربنا عاوزنا لون واحد وجنس واحد ودين واحد كان عمل كده ربنا خلقنا مختلفين
والارض تساعنا كلنا ويبقا لازم نحترم اختلاف بعض انا احترم المسيحي والمسيحي كمان يحترمني
الكلام ده لو اتقال من واحد مسيحي عادي مفيش مشاكل
ها اقول عنصري وخلاص
لكن من واحد زي بندكت رئيس اعلي سلطه دينينه مسيحيه في العالم
مصيبه يبقا الراجل ده عاوز زعامه مش عاوز يجيبها البر ابدا
ولو تحت ايده جيش مش بعيد يرجع الحروب الصليبيه تاني بحجه كثلكه العالم واعتبر ده حرب مقدسه
تحياتي

عدى النهار يقول...

كنت قرأت بعد فترة من نشر الدعوة للحوار أن المسؤل المختص بشؤن الإسلام بالفاتيكان قال إنه من الصعب إجراء حوار ديني حقيقي مع المسلمين وذلك لأن "لا يقبل المسلمون أن يناقش أحد القرآن بعمق؛ لأنهم يقولون إنه كتب بإملاء من الله وأنه مع هذا التفسير الجامد يكون من الصعب مناقشة فحوى الدين". أنا لا أعتقد أن علماء المسلمين عندهم مشكلة فى التحاور حول الكتب السماوية يعنى من يؤمن أن الكتاب الذى يتبعه هو كلام الله كتب بإملاء من الله يظل على إيمانه بذلك ومن يؤمن بأن الكتاب الذى يتبعه كلام بشر ممكن تعديله يظل على إيمانه بذلك لكن أن يكون تغيير عقيدتى أولاً وبعد ذلك ننظر فى أمر الحوار فذلك يعكس عقلية ونفسية كان الله فى عون العالم من تبعاتها

الدكتورة زينب قرأت لها 3 مقالات فقط أولهم كانت عن موقف فرنسا من الحجاب وكانت مقالة قوية جداً أوضحت أشياءً كثيرة وقرأت لها رأياً عن صناعة التماثيل لم يعجبنى لتبسٌّطه خاصة أن النقش وقتها كان حامى ومقالة أخرى عن زيارة الملك عبج الله للفاتيكان وأسلوب بابا الفاتيكان فى الترحيب به والذى كان غير لائقاً. يبدو أن من يطلع على عمل المستشرقين تتكون لديه قناعة معينة عن الفكر الغربى تجاه الإسلام والمسلمين وبلادهم. والدكتورة زينب تتقن اللغة الفرنسية منذ الصغر ودراستها ومجال عملها وزوجها كما ذكرت كل ذلك شجعها على قراءة كل ما كٌتب بالفرنسية عن الإسلام. ممكن تقرأى عن نشأتها فى آخر المقال هنا

غير معرف يقول...

العزيزة بنت القمر

نتحدث عن الاديان بمنتهى الحماس والثورة

وفاتنا ان يتعلم هؤلاء درسا واحدا

كيف اكون انسانا حقيقيا

ساعتها لن يجرح احد احد ..

متى يأتى هذا اليوم؟

بنت القمر يقول...

الرجاء من الجميع الالتزام بالتعليق داخل موضوع التدوينه
اي كلام خارج موضوع التدوينه سوف اضطر اسفه الي حذفه
وتحياتي للجميع

بنت القمر يقول...

عباس العبد
تانيا
الاب رفيق جريش فعلا المتحدث باسم الكنيسه الكاثوليكيه وفعلا رجل اعصابه فولاذيه خرج من الحديث ببراعه هو بعد عن النقاش في العقيده ورد بس علي يؤال التبشير
وده ذكاء منه وقدرة علي ضبط الاعصاب اعتقد انه درب عليها ولذلك احتل المكان ده واكيد هو اتحط قبل كده في مواقف من دي
وعارف امتي يجادل وامتي يسكت
حتي المذيع عرفه بالاب رفيق جريس
فرد عليه من فضلك رفيق جريش من فضلك مش جريس
المهم عندي سؤال هو ملاحظه مش قادرة افسرها
ليه جميع المدارس اللغات الفرنسيه بالذات علي الاقل هنا في اسكندريه تحديدا
يديرها رهبان وراهبات كاتوليك
9 مدارس مدارس بنات
و2الاود
مفيش ولا مدرسه راهبتها ارتوذكس
ليه ؟؟
هل الموضوع له علاقه بالقدرة الماليه
ويا تري انتو اغني وليه؟؟
ولا دي منح خارجيه ولا
ولا
وتحياتي

بنت القمر يقول...

عدي النهار
لم اعرف الدكتورة زينب قبل ما اشوفها مع معتز الدمرداش في 90 دقيقه
مش عارفه جهل مني ولاهي مقله في الظهور اعلاميا
واشكرك جدا علي الينك
حاجه تكسف والله ان الواحد ما يعرفش حاجه عن واحده مجتهده زي دي
وعاملا ترجمه للقرآن
والحقيقه كلامها كان دبش جامد وتقيل ومش حاطه ولا محاذير ولاخطوط حمرا لاي حاجه بتقولها عشان كده كتبت انها رمت قتيل في البركه
ومش عارفه البرنامج كان رد علي استضافه دريم لعبله الكحلاوي ولا صدفه محضه
ولا نظريه المؤامرة اليومين دول شغالا معايا تمام
اشكرك واشكر مرورك القيم دايما
تحياتي

بنت القمر يقول...

شريف
نتحدث عن الاديان ونتحدث عن الانسانيه ربنا خلقنا كده عاوزنا كده مختلفين لحكمه يعلمها
لكن ان يهمش احدنا الاخر ويلغيه ان يكون العالم كله لا يسع الا طرف واحد فأين يكون الاخرين حينها
وللاسف الدين هو وقود سريع الاشتعال
لاي حرب
نظري عم بوش يا معاي يا ضدي دي مفزعه
تخيل لو قدر لها المال والسلاح لتحقيق نظريه السيطرة والزعامه
تحياتي واشكرك

بنت القمر يقول...

راجي
طبعا تحليل حضرتك قيم جدا بس لو تسمح لي اعقب تعقيب صغنن اوي
الكلام بتاع نشر المفاسد الاخلاقيه والعري والخمور والمخدرات وتكبيل الحكومات والدول والافراد بديون بنكيه ذات فوائد متركمه ومتراكبه زي ما حضرتك اشرت بالاضافه الي السيطرة علي مقدرات الدول والحكومات بالديون التراكبه دي
دي لعبه اليهود المذكورة حرفيا في برتوكولات حكماء صهيون
ايضا عمل لوبيات للسيطرة علي مراكز صناعه القرار في دوائر السياسه والمال
صناعه لوبيات في مراكز الفن والابداع هوليود مثلا التحكم في اتجاهات الفن والادب
والمال
بناء شركات عملاقه متعدده الجنسيات يسيطر عليها اليهود للسيطرة علي الاقتصاد العالمي
السيطره علي سوق السلاح العالمي اذكاء نار الحروب العرقيه والطائفيه والمذهبيه للسيطرة علي العام كله
باختصار فرق تسد
تملك تحكم
شكرا ليك منور
تححياتي والمدونه تتشرف بنقاشك مع بقيه الزوار وتتشرف بمرورك
تحياتي

عباس العبد يقول...

راجى
" لما تبشر بطريقة غير شريفة مثال ذلك ما ذكرته عن الاناجيل المغلفة بغلاف يشبه غلاف القران او انك تدفع فلوس للمسلمين او المسيحيين من مذاهب اخرى من الفقراء وتعالجهم مجانا مقابل التحول فى الدين او المذهب "
.....
طبعا احنا متفقين انا و انت فى الموضوع ده
اما حكاية الغلاف فدى اعتقد ان فيها لبس ثقافى مش اكتر و ممكن يكون برضه خدعة انا مش متاكد من الموضوع ده ... الى شاف بعينه هو اكتر واحد ممكن يفيدنا
لكن انا عندى كتاب مقدس غلافه " شرقى " و عندى كتب مسيحية للكنيسة الاورتودوكسة و الكاتوليكية طبعتها الشرقية غلافها " كأنه اسلامى المظهر " من وجهة نظرك
الفكرة انها زخارف مصرية سواء اسلامية او مسيحية
اسأل اى مسيحى عن اشهر كتابين و هما بستان الرهبان و بستان القديسين و اسئله على الغلاف حيقولك انه شرقى
لو شفت كتاب بستان الرهبان حتتاكد بنفسك و ممكن ارفعهولك تشوف صورته , صورة الغلاف
فأنا اعتقد انه ممكن يكون لبس ثقافى مش اكتر و ممكن يكون برضه استغلال لتحقيق اغراض مش ولابد , انا مقدرش اجزم بس حكاية الغلاف الشرقى دى منتشرة جدا فى الكنيسة المصرية و خصوصا فى الكتب الى بتتطبع فى اديرة الصعيد
.....
اما ان حكاية الكنيسة المصرية رفضت ارساليات الغرب فده طبيعى نتيجة خلاف المذاهب و المدارس و الكراسى .... لكن الكنيسة المصرية بتبشر !
.....

عباس العبد يقول...

نخش على النقطة المهمة
شوف يا سيدى
فكرة شعب الله المختار عند اليهود هى فكرة بسيطة
ازاى ؟
زى ما الله بيختار شخص من وسط جماعة و يقيمه و يرسله كنبى فى وسطهم
فألله فى حالة " اليهود " اختار نسل ابراهيم نتيجة وعد قطعه مع ابراهيم
الى هو فى حالتنا الشعب اليهودى و اختار ليكون نموذج لشعب يعيش فى حالة تهيئة الهية و شركة مع انبياء العهد و يصبح نموذج نورانى لمن حوله من الشعب كوسيلة للهداية
اما من ناحية كان فى تبشير فكان فى , قصة يونان \ يونس .... و ملاخى و يشوع بن سيراخ فى العهد القديم , لكن شروط الانضمام لليهودية كانت صعبة لأنه كان شعب فى حالة تهيئة روحية ليرسل الى العالم و بعد خروجه من مصر ( خد بالك من الحتة دى ) , حصل سقوط عظيم للشعب فى برية سيناء بعبادة العجل الذهبى و كان الله وعد شعبه بأرض الميعاد , اورشليم , الارض التى تدر لبنا و عسلا و لكن لانه هناك من سقط و هناك من ظل على ايمانه فتحول الوعد الالهى من اورشليم الارضية الى اورشليم السمائية , مملكتى ليست من هذا العالم , و اليهود عارفين كده كويس قبلنا و عارفين كويس ان الى بيعملوه فى فلسطين نوع من انواع الاستهبال العلنى لأنه الوعد توقف و تحول الى مملكة روحية حتيجى على ايد المخلص فى السماء , من امن بى و لو مات فسيحيا ( سيحيا فى الجنة ) ,
ده بالنسبة لليهود
و من ناحية فى تبشير فكان فى تبشير و ده اكيد
طبعا انت عارف تاريخ اليهود , اجتياح الفرس و السبى و انقسام المملكة و الاحتلال الرومانى و هى دى كلها كانت نبؤات فى العهد القديم بزوال اورشليم الارضية و ان الوعد المادى انتهى و تحول الى وعد روحانى
....
و ده يقودنى لنقطة فرعية لو تسمح انى اقولها كتوضيح
انت عارف ان ثيودور هرتزل لما سعى لأقامة دولة للأسرائيلين ( اليهود ) مكنش فى البداية يسعى لأقامتها فى فلسيطن بل كانت فى حتة و من ضمن الاماكن المقترحة كانت افريقيا و استراليا
لكن بعد الحرب العالمية التانية و مع وعد بلفور و سيطرة القوى الامريكية و مشروع مارشال
اكتشف الامريكان ان اقامة دولة فى وسط الدولة العربية حيبقى ارخص لهم من انهم يحطوا قواعد عسكرية او بوارج حربية فى المحيط و البحر الابيض و ان تكلفة دعم اسرائيل ارخص بكتير من النفقات الحربية و الاتنين حيقوموا بنفس الدور ... بسط النفوذ الامريكى
و الى فهم اللعبة دى و سعى لأنه يستفيد منها ... الاتحاد السوفيتى و انت عارف ان اول دولة اعترفت بقيام دولة اسرائيل هى الاتحاد السوفييتى لكن الامريكان كانوا دخلوا الخط بالفلوس و التمويل
اقصد ان الى بيعمله الاسرائليين فى فلسطين و انها دولة اسرائيل و انهم شعب الله المختار هى خدعة يمارسها الاسرائليين لتبرير وجود و جذب لدعم و لأفراد الشعب من الخارج و هم عارفين قبلينا انهم بيكدبوا
فى جماعات يهودية متدينة و متعصبة فى جنوب افريقيا و امريكا و المغرب ضد اقامة دولة اسرائيل لأن اقامتها ضد التوراة و ضد التعليم اليهودى
........
ننتقل الى النقطة التانية
" اذهبوا و بشروا الى جميع الامم
و انا ارسلكم اثنين اثنين كخراف وسط ذئاب
اتى الى خاصته و خاصته لم تقبله "
المسيح اثناء حياته ارسل الرسل السبعين للتبشير الى جميع الامم
و كانت كلماته صريحة فى الموضوع ده
و ممكن بالذات تراجع انجيل يوحنا و انجيل لوقا
لكن الى بتتكلم عليه عن التلاميذ
فكانت المشكلة الى حصلت بين بولس و بطرس
و الى اتعملها اول مجمع فى تاريخ الكنيسة
كانت المشكلة اختلاف فى وجهات النظر
بطرس بما انه يهودى ملتزم جدا شايف ان الوثنيين الى حيخشوا المسيحية لازم يبقوا يهود الاول و يمروا بكل عهود الله و بعيدها بفترة يتعمدوا و يبقوا مسيحيين
اما بولس فكان شايف انهم يخشوا المسيحية علطول
و اختلفوا و كلام بطرس هو الى مشى بما انه صخرة الكنيسة
لكن بعدها حصل ان بطرس شاف رؤية روحية مفادها انه الى عايز يخش المسيحية علطول مفيش مشكلة
اما حكاية " جئت لأكمل لا لأنقض "
فمعناها
لأنه النبوة المسيحانية هى من نفس الاله الى صدرت منه نبوة ابراهيم و موسى فطبيعى ان الاله لا يغير كلامه بل هو فى استمرارية و ان مجىء المسيح هو تكملة و تتمة لما بدأه الله مع انبياء العهد
....
اى خدمة
....
شوفنا بقى فى عاشورا بأى مصلحة
طبق بس يكون عليه زبيب و مكسرات تمام
اى مصلحة على الشرح ده

....

عباس العبد يقول...

بنت القمر
اولا
انا مقدرش اقولك ان الكلام الى اتقال ان البابا قاله صح و لا غلط
لأنك مذكرتيش هى جابت الكلام ده منين و اسماء الرسالات الباباوية الى اعتمدت عليها
فمقدرش اقولك هو قال الكلام ده فعلا و لا لأ و لا ده تأويل و طبعا مش قصدى انى اكدبها
بس لازم اقرأ بنفسى
و انا نزلت اخر ست رسالات باباوية اترجموا و حقرأهم و اقولك ايه النظام
....
ثانيا
موضوع المدارس
الموضوع ده جى نتيجة الفرق فى الرهبانيات
الرهبانيات الاورتودوكس رهبانيات تعبدية
يعنى يقعدوا فى الدير بعيد عن المدينة و ينقطعوا للصلاة بس و الزراعة او الصناعة
حسب نشاط الدير
اما الرهبانيات الكاتوليكية فرهبانيات خدمية
طبعا بتبتدى بأنه الراهب بيقعد فترة فى الدير و بعدين ينزل خدمة
مدرسة , مستشفى , مصنع , ....
بس احنا فى مصر مفيش غير النظامين بس بتوع المدارس و المستشفيات
اما من ناحية الفلوس
فالارتودوكس بدون حسد معاهم فلوس ,,,, اللهم ما صلى على النبى ... تمام يعنى

عين فى الجنة يقول...

بنت القمر وقداسة رامز بك
العاشورة جاهزة فى اوقت اتصل ب
1900000000
توصل لك ساخنه
:)))

بنت القمر يقول...

عباس العبد
يقال والله اعلم
والعهده علي الراويه الارتوذكسيه ان الكلام بتاع راهب خدمي وراهب تطوعي هو كلام فشنك وان الرهبنه واحده وان المدارس مشروع استثماري ولا راهب يقدر عليه ده بتموله مؤسسات وسفارات وتبرعات
الاخوة الكاتوليك لما بيعملوا مؤسسه مدرسه بتتكلف عشرة مليون مثلا ده مش من جيب الرهبان ده من التبرعات ومساعده السفارات قوم ايه
بنوا المدرسه خلاص قوم المشروع المدروس بعنايه ده يبتدي يشتغل ويدر ارباح قوم الفلوس ترجع لصحابها تاني بنسبه ربح معدومه
وبقه في مؤسسه كاثوليكيه علي ارض مصر زي المير دي ديو او سان جوزيف او الفرنسيسكان
طب المؤسسات تدي تقف علي رجلها وبعد فترة تبتدي تصرف علي روحها وكمان تكسب وتعمل فروع تانيه لان التمويل سخي
وحسب الاثوذكسيه اللي مش حسوده لا سمح الله ده غير متوفر نهائيا للاخوة الاثوذكس التابعين للكنيسه المصريه لانهم فقرا اصلا ومش لاقيين والرهبان مش بتوع مشاريع ولا بطيخ دي ناس باعت القضيه وطلعوا علي الاديرةوالجبال والصحرا ولا عايزين يعملوا مشاريع ولا يبنوا مؤسسات
همهم العباده بس
لكن لو معاهم تمويل كانوا عملوا وسووا وعلي الاقل دخلوا ولادهم مدارس رهبنتها ارثوذكسيه مش كاتوليكيه
بس

^ H@fSS@^ يقول...

بس احب اضيف معلومة بعد كل القراءات اللي قريتها للتعليقات
و هي اذا كنا كمسلمين زعلانين ان فيه تبشير مسيحي او يهودي بيحصل
و انه اذا كنا كمسلمين زعلانين جدا جدا انه في اناجيل بتتوزع و عليها ما يبدو انه غلاف زي القران حتى ينخدع المسلمين الغير عرب و لا يجيدوا العربية اجادة تامة
مش من الاحسن ان احنا نزعل و نقف ضد المصاحف اللي بتتوزع على مسلمين افريقيا و فيها تحريفات و مغالطات كبيرة سواء من ناحية التشكيل و حركات المد و التلاوة و طبعا انتوا عارفين قد ايه دول مهمين و حتى غلطات في حروف الكلنمات و اللي تغيير حرف واحد منها بيغير المعنى
و الغريب ان المصاحف دي بتتوزع من السعودية ،بلد الحرمين، و المفروض ان اميرها هو خادم الحرمين و حامى حمى الاسلام ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
تحياتي

عباس العبد يقول...

بنت القمر
مش مظبوط الكلام ده خالص
انتى عارفة مدارس الرهبانيات ابتدت ازاى ؟
كان الراهب بيعلم الاطفال مباشرة
يعنى زى الكتاب
اللاساليين و الفرنسيسكان و الدون بوسكو و الساكريه كور و الدليفراند
و الحاجات دى مبتتمولش لأن ممنوع التمويل
و ميزانية المدرسة لازم تتطلع صفر فى اخر كل سنة ...., يعنى مفيش مكسب
و انا متاكد من الكلام ده لأن واحد قريبى راهب و ماسك دير
اقرى تاريخ دون بوسكو
و الفرنسيسكان و اللاساليين
او اقرى عن جمعية مار منصور
لأن الكنيسة متتبرعش لأى نشاط دينى قبل مرور فوق ال100 سنة على تأسيسه
و لانه كمان الرهبانيات دى بدأت فى الغرب الاول و وصلت الشرق متاخرة جدا
اقدم مدرسة عمرها ما يكملش 100 سنة
فوصلت بعد ما كانت وقفت على رجليها
و بعدين لو هى بتمويل للربح
كان فتحوا مدارس اكتر فى الشرق و خصوصا مصر بدل هوجة المدارس الى طلعه دلوقتى و اهه كله بيكسب
لكن هم ميقدروش يعملوا كده
ده مدرستى لما حبوا يكملوا المبنى الجديد
قعدوا يشحتوا بتاع تلات سنين تبرعات من طوب الارض
....
اما بالنسبة للأورتودوكس
فاسألى بس عن دير انبا مقار و الزراعة بتاعته و التصدير و الدخل الى بيخشله
اسألى اى مسيحى
هو دير انبا مقار بيصدر ؟و بيصدر ايه ؟
انا مش حقولك اكتر من كده
كل الى حقولهولك بعد ما تعرفى الدخل الى بيخش للدير
اسألى الى حتسأليه السؤال الاولانى عن تصدير الدير
قوليله هو بيصرف الدخل على ابه ؟
انا عايزك بس تسمعى رقم عدد الاسر سواء المسلمة او المسيحية الى بترحلها فلوس او خدمات او مصاريف كل شهر
من الدخل ده
.....
اما حاكية تعبدية او خدمية
فموضوعه طويل و جه نتيجة الحروب فى الغرب
لأن كل الرهبانيات ابتدت تعبدية على ايدين القديس انطونيوس مؤسس الرهبنة
لكن فى الغرب و نتيجة لكثرة الحروب
فأصبح مش من الطبيعى ان الرهبان يفضلوا فى الدير و ميخدموش المجتمع
فأبتدوا بالتمريض و التعليم و اتطوروا
اقرى تاريخ الرهبانيات و انت حتعرفى
و بلاش قر بقى
......
بس عامة عايزك اقولك حاجة مهمة
و مش علشان انا خريج مدرسة منهم
لأ
المدارس دى بشهادة الجميع سواء المسلمين او المسيحيين
انضف تعليم و تهذيب و انضباط
و اعتقد انك عارفة كده

....

اسكندراني اوي يقول...

الارض واسعه وتسع كل الاديان والتجاهات والختلافات
بس في ناس من الطرفين بيحبو يولعو النار واحيانا النار دي بتخرج عن السيطره
بوست بيفتح جراحات كتير اوي
وبيقلب مواضيع كبيره
ربنا يكون في عونك
تحياتي

DantY ElMasrY يقول...

احب أنبه لنقطة وهى ان هناك فرق بين رجال الدين والمتدينين
فالمتدينين من الممكن اقناعهم والتأثير عليهم بالمبادرات والتوعية
لكن رجال الدين عندهم حصانة ضد الحاجات المفتكسة دى ليييييييييه؟
لأن رجل الدين ببساطة لا يدافع عن إيمانه ولكن يدافع عن مؤسسة كاملة بـتأكله عيش وبتعمله وضع اجتماعى مميز

بنت القمر يقول...

حفصه هانم كعب الغزال
شفتي بدلعك ازاي طب بزمتك حد دلعك كده من قيمة تلات سنين مثلا
حد اي حد يعني
طبعا انا مقصدش ادم بتاعك لا سمح الله ولا بهدي النفوس
قصدي اي كائن بشري عنده عدد اتنين ايز واتنين ليجز وعنده لسان طوووويل وبيقول كل حاجه الا الكلام العاطفي؟؟
الحلو اللي يبل الريق
ويرفع الروح المعدنيه المنحدرة والمنسحقه تحت دبابات الرزاله والغتاته والبرود المغلف لطبقات السلوك الانساني المستفز
اه كنا بنقول ايه؟؟
ايوة يا عم اشتمي في السعوديه براحتك ما انتي قاعده في قطر عدوتها اللدوده
وعندك قناة الجزيرة يا عم ماشيه معاك اخر منجهه
الا صحيح بتشوفي المذيعيين بتوع الجزيرة بيتمشوا بالليل علي الخليج وكدهو النبي سلمي عليهم واحد واحد وواحده واحده
وبوسه من هنا ومن هناك وخصوصا اللي اسمها ايمان احسن بيحبوها اوي عندنا في البيت
منورة يا حفصه وسايبالك عدد اتنين هديه عند زو النون
تحياتي

بنت القمر يقول...

عباس العبد
معلش بقا يا عباس ولو اني مش عاوزة اكون زي بتوع الضرايب ومن اين لك هذا بس كتاب ايه وعشر تلاميذ مين يا عم دا المدرسه بتاعه بناتي قد استاد القاهرة يا حاج
وبيزرعوا فيها نخل وكرنب وبرتقان
المهم المدرسه كبيرة ورهيبه والمباني علي مساحه ربع الارض والباقي فاضي يا مزروع كانها مزرعه وفيها مدرسه وكل ده طبعا بيتباع للناس جيران واولياء امور
متقوليش بقا الارض دي وكل ما عليها من زراعه ومباني نزلت من السما اه تقريبا انا بدفع للبنت الواحده حوالي 4 الالاف في السنه والاتنين 8 الالاف
طب في حوالي 2000 بنت
في المدرسه يعني دخلها حوالي
8 مليون جنيه
في مؤسسه بتدير كل ده دول يا ابني بيجيبوا مهندسيين زراعيين من القاهرة يراعوا النخل كمان الراهبات الاداريات بيتعينوا من مصر يعني في نظام وهيكل اداري ومالي للفيلم ده
منين مش مشكله من اي كان بس في هيكل تنظيمي وقوانين
بعد المصاريف بتاع المشروع ده لازم بيفض نسبه ربح مش بتكون صفر ابدا ومش عيب ابدا انهم يكسبوا
تانيا
من ملاحظتي وانا بقالي 7 سنين بتعامل معاهم
هما عندهم سلبيااات كتيير وايجابيات كتيير برضه
وده ينفع بوست لواحده بمعني هما بيهتموا اوي بالعلم والمجاميع والمنافسه الدراسيه وتلاقي البنات بتجيب في الشهادات مجاميع طحن
وتلاقي البنت من اعدادي لبست نضارة كعب كوبايه وضهرها اتحني ومكفيه علي الكتاب بتاع تمن تسع ساعات في اليوم
يعني بيبقوا امواس مذاكره
بس علي حساب طفولتهم وصحتهم العصبيه والنفسيه
ما فيش اهتمام نهائي بالرياضه ولا الانشطه الموسيقيه ولا الثقافيه العلم وبس والنتيجه ان البنت ممكن تكون موس مذاكرة بس متعرفش مين طه حسين ولا توفيق الحكيم
لانها بتكون منعزله عن الحياه للعلم
ميزة وعيب ان البنات بتتربي صح بيربوهم بنات صعايده عرفت بعد فترة ان راهبات المدرسه الاجانب مشوا من مصر من فترةوتم استبدالهم بمصريات
وبيكونوا صغيرين ومش راهبات بيقولوا عنهم مكرسات
لانه علي حد علمي انه مفيش راهبه في مصر غير500 سيده فقط والباقي في الطريق
طيب ايه تاني
اه التربيه ممتازة لكن لوبصيت علي بقيه المدارس هتلاقي انهم من الافضل بالنسبه لمنظومه الفساد التعليمي في مصر
منور
دايما

عباس العبد يقول...

اولا
انا متأكد من موضوع الميزانية ده
لأن واحد قريبى راهب و مدير مدرسة
ده انا متأكد منه
...
اما حكاية العلم و الثقافة و المعرفة
فدول اساتذة فى المعرفة و نشر الثقافة
اسألى عن الدون بوسكو و اللاساليين و الدومينيكان و الفرنسيسكان
هما بناتك فى مدرسة ايه ؟
....
اما موضوع الراهبات
فهم تم ترحيلهم من مصر
لأن الحكومة المصرية رفضت تجدد تراخيص و الاقامة بناء على شكوى من جماعات معينة
اسلامية و اورتودوكسية

بنت القمر يقول...

ذو النون المصري
اسفه يا نون وانا براجع لقيت تعليق حضرتك وفاتني الرد عليه معلش التعليقات طويله والصفحه تقلت
والويندوز اصلا تعبان
المهم
بالضبط زي راي جدو زي رايك تمام مفيش مشكله ان كل واحد ينشر دينه المهم استعمال اساليب نظيفه والاهم ان الناس تستوعب بعض واختلافنا ميكونش ضدنا والدين ما يكونش فتيل يشعل العالم
منور جدا

بنت القمر يقول...

اسكندراني اوي
يا ريت الكل كبير وصغير مسلم وغير مسلم يستوعب بس حكايه الاختلاف دي
بس ازاي دا احنا بقينا الاخ مش طايق اخوة هنطيق اللي من دين تاني ازاي
تحياتي



____________________
دانتي المصري طيب يا دانتي ازاي نخلي رجل الدين متدين؟؟
او نخلي المتدين مش رجل دين ينفع؟؟
تحياتي

بنت القمر يقول...

عباس العبد وحياه هذا الصبح المشرق اللتي ملات شمس الله تلك السموات الغاضبه من البشر
انه المدارس استثمار جهنمي
انسي انك ..... واني ..........ا
لو اتكلمنا بحياديه تامه
ال 8مليون لازم يكون فيهم مكسب لانه لو فيهم خسارة البيزنس يخسر ويقع طب لو فيه مكسب
لازم يتوزع وده مش معترضه عليه
لو تمن تصوير 3 ورقات في مكنه المدرسه جنيه لو الفصل 44 بنت يبقا 130 ورقه ب 13
جنيه اللي اتلم 44 جنيه مثل صغير
مثل تاني
لو الرحله اللي القاهرة تمنها 60 جنيه في 100 بنت
يبقا 6000 جنيه واحيانا 200 بنت لو اجازات يبقا 12 الف انت لو طلعت ميتين عيله مصر مستحيل تصرف عليهم 12 الف لو هتوريهم حتي النجوم في عز الظهر
امثله كتير جدا البيزنس يا عزيزي
وما ادراك البيزنس ومش عيب ان الرهبان يشتغلوا بيزنس خالص
السمسره في الكتب المدرسيه
كتاب تصاريف الفيربات ب60 جنيه في دار النشر الخاصه به جبته من القاهرة ب35 جنيه والباقي راح فين واذا كان مقرر علي صف رابعه وخامسه حوالي 180 بنت احسب انت
مصاريف المدرسه العاديه بناخد بيها ايصالات وبيدفع عليها ضرايب للحكومه وبتكون مراقبه لكن الامثله دي كلها يوميات سخيفه
بتخليك تتعامل مع مدرسه عاديه زي اي مدرسه استثماريه تانيه وانسي بقا الرهبان اللي ربوك بتوع زمان صدقني العالم تغير جدا والماده صبغت كل شيئ بوجهها القبيح وحولت البيزنس الي عباده ودين جديد يدين به الجميع
لو ها تقاوح اسأل اي ولي امر مسلم ارثوذكسي او كاتوليكي حتي ايه النظام وسيبك من قريبك شكله راجل طيب من مخلفات زمن القلوب الطيبه منور
تحياتي

غير معرف يقول...

أنظر تعليقات عباس العبد

(:
(:

عباس العبد يقول...

شوغى يا بنت القمر
انا معنديش مشكلة انهم يكسبوا ان شالله ملايين
لأن الفلوس مش حرام و لا تعيبهم و لا هى تهمة و بالتالى يكسبوا و لا ما يكسبوش دى مش مشكلة
لكن الى قصدى انهم يكسبوا لمين ؟
لا هم مؤسسة و لا تبع شركة و لا حتى تبع الحى و لا البلدية
حيكسبوا لمين ؟
.....
قوليلى
قلبتى المدونة ازاى عربى علشان مش عارف اعملها
....
شهروزة
يعنى ايه :
أنظر تعليقات عباس العبد

(:
(:

انتى بتسخرى منى
الله يسامحك انما انا
قلبى و بقى غضبانين عليكى ليوم الخميس

بنت القمر يقول...

عباس العبد
يكسبوا لمين معرفش
؟؟
سؤال رهيب
وفي افضل الفروض
المفروض لنك ليك حق فاكر فيلم عايز حقي
مين بيكسب ومين له حق
وكويس مبدئيا انك اعترفت انه في مكسب
وده مش مزعلني نهائيا
الماده يا عزيزي لازم تتكلم
واللي ملوش ضهر يضرب علي بطنه والفلوس ضهر اللي ملوش ضهر
اعتقد انها بتروح لانشطه خيريه وتبرعات واديرة والخ
احنا بتيجي لنا كل ورقه مطلوب فيها لمرضي الجزام متفهمش ليه عندهم هوس بالجزام
اشمعني وحتي لو التبرعات دي بتروح لمرضي وملاجئ مسيحيه يبقا كتر خيرهم خالص بدل ما يشحتوا من الدوله
بس با عتبارك كاتوليكي انصحك بجد والله سيبك من الهندسه وخش كار التعليم
والله مش تهريج بجد
في ظرف سنتين
تبقا ميه ميه
عن واقع معاش
المكسب مش عيب والطريق سهل
والمدرس الكاتوليكي مركز قوة جدا وبترقي لمدرس اول واضع امتحانات اسرع من نظيرة اللي ممن اي اتجاه وفئه تانيه صدقني ومش عيب برضه
علي الاكل تاخد نصيبك من الكعكه
منور خالص
وبالتوفيق
************************8
تقلي المدونه عربي من الصفحه اللي بتعمل فيها ساين ان
وبتحط فيها الايميل بتاعك لو عايز تعدل
هتلاقي تحت كلمه سيتينج
ولانجوتش
جوة لانجوتش هتلاقيه يقولك ان البلوجر دعم بلغات جديده وتلاقي العربي منهم اخر اختيار

بنت القمر يقول...

شهروزة
يوريه منك بوريه
بقا انا كاتبه قدامك
رساله ما جستير تيجي تقوليلي بص تعليقات عباس!! وكل اللي جالي شلل رعاش وانا بكتبه ده معجبكيش روحي منك لله
جبتيلي انحباط واكتباء قلبي غضبان برضه ليوم الجمعه بعد الصلاة
ههههههههههه
منورة

غير معرف يقول...

عباس العبد

خخخخخخخخخخخخخخخخخ

والله أبدا يا بيبس

بس تفسيراتك وتشريحك لكلام بتوع البورنامج مخمخنى
بحكم انك من العارفين
فبدل ما أنا اقول وأشرح وأعيد وأزيد
وكمان البرنامج دة فقعلى مرارتى بالأوى بالفكة السطحية اللى هم ماشيين بيها

قلت أنظر تعليقات عباس العبد

دة تأييد يا عم الحاج
خخخخخخخخخخخخخخخ

لازم نترجم يعنى؟؟

..................

بنت القمر

ماهو رسالتك برضة عجبتنى بحكم انك من الجانب الآخر يا بنوتة

طب وربنا مخمختنى الليلة كلها

رغم ان الزوبعة اللى اتعملت فىالتليفزيون اصحابها كانوا عاوزين ضرب النار

بس اقولك على حاة

كل الديانات بتبشر بنفسها
ومحدش بيضرب حد على ايده انه يتبع ديانة أخرى
يبقا المسيحييين حيتكسفوا لية لما يقولوا انهم بيبشروا؟

ماهو بعثات الدعوة والتبشير بالاسلام مالية العالم و كمان بتعمل مراكز للدعوة وبتعلن عنها

اشمعنا المسيحية بقا؟؟

وارجع واقولك محدش بيضرب حد على ايده علشان يتبعه ولا بيعلق له مشنقة ولا ماسك له كرباج
كله قبول وايجاب

زى الجواز كدة
خخخخخخخخخخخخ

وحشانى يا قطة

عدى النهار يقول...

مقال حديث مرتبط بالموضوع كتبته د.زينب عبد العزيز
هنا