الأحد، مايو 11، 2008

مذكرات إمرأة سعيدةجدا


كل شيئ جميل ومفرح الازمه اللبنانيه اوشكت علي الانتهاء مؤقتا مجرد 25 قتيل فقط ليس الف او اتنين مثلا مجرد 25 اسره فقدت ابن او زوج او اب او حبيب طبعا افضل من ان يزيد العدد نصف الكوب مازال مليئاعلي الاقل!!

زياده أسعار البنزين مع وجود خلل فني يستدعي نص عمره للموتور شيئ ايجابي لأن يستوجب استعمال الاقدام في المشاوير القصيرة وتجميع المشاوير الطويله علي خط واحد وده شي لطيف جدا لان الرياضه في حد ذاتها شيئ هام وصحي!!
واهم شيئ ان الانسان يلاحظ ان كل مشكله لها جانب ايجابي برضه ..وده ترويض لقدراته علي التعامل مع صعوبات الحياه وزياده في ثقته في نفسه وصقل لخبراته ولذلك اشعر بسعاده بالغه.
. مصاريف المدارس تزداد العام القاد الف جنيه دفعه واحده وطبعا مفيش مشاكل نهائي دي مشكله عامه وليست فرديه!!
وليست سببا للضيق
حده ارتفاع الاسعار ليست ابدا سببا للضيق ولا من الحرمان من الاستمتاع بالخروج والسينما والغداء خارج البيت.. بالعكس ده شيئ طيب جدا لأنه يعلم الـتأقلم علي كافه الاوضاع.. وفيه تقويه للعزيمه وترويض للنفس علي التخلص من تلك المتع الزائفه.. شيئ مفرح جدا
الجميع حولي يشكون أو يشكين من العنوسه أو البطاله أو كلاهما معا.. انا لا أشعر بضيق ابدا لأن دي مشاكل مجتمعيه علي المستوي الانساني وأكيد مسيرها تفرج خالص أو ما تفرجش مش مشكله ده نصيب في الاخر ومحدش يقدر يعترض علي النصيب!!

قليل من المناوشات الزوجيه او كثير.. اشعر من خلالها بسعاده لانها دليل علي حياه صحيه خاليه من الرتابه والروتين وتزيد الحياه بهجه فالمشكلات الصغيرة مثل البهارات تزيد الحياه متعه أنا فعلا محظوظه!!

بعض الاحلام مؤجله كتغيير الشقه والسيارة وبعضها مستبعده كزيارة التبت أو فينيسا مثلا وده شيئ غير مزعج أبدا ولكن يشعرني بسعاده غامرة أني ما زلت أستطيع الحلم.. وليس المهم تحقيقه المهم هو القدرة اصلا علي الحلم وكفي وذلك ما يشعرني بفرحه شديده

البعض يطالب بشده وحده بأيجابيه اكتر عدم الركون الي اليأس اوافق اصحاب هذا الرأي وأشعر بالرغبه في فعل أي شيئ ايجابي ان لا العن الظلام فقط علي ان اوقد شمعه


المشكله أني ابحث عن الشمعه فلا أجدها لأن الظلام حالك!!

ذلك فقط ما يزعجني أني لا اجد الشمعه

هناك 53 تعليقًا:

عدى النهار يقول...

طب والشمعة اللي فى البوست دي بتعمل إيه :)

اللي بيطالب بإيجابية أكثر وعدم الركون إلى اليأس معه ألف حق لكن مالوش إنه يصيغ طلبه بشِدّة وِحِدّة. وهناك دائماً حاجة فى متناول كل شخص حتى لو كانت فتفوتة صغيرة

يمكن آن الأوان إن الناس تبتكر حلول للمشاكل اللي موجهاهم. مصاريف المدارس والدروس الخصوصية مثلاً ممكن عدد من الأسر يتفقوا على عدم تسجيل أولادهم وبناتهم للدراسة بالمدرسة ويسجلوا لإمتحان آخر السنة أو التيرم فقط و يقوموا هما بعملية التدريس فى المنازل بحيث كل أب أو أم يكون مسؤل عن تدريس أحد المواد للمجموعة كلها. كده الناس ممكن توفر معظم رسوم المدرسة والدروس الخصوصية وكمان ممكن ينظموا أنشطة جماعية ورحلات لأولادهم وبناتهم بالصورة اللي تعجبهم

فاتيما يقول...

ياااه
يا بنتى فكرتينى بالشمعة بتاعت بنى سويف ربنا ما يكررها مع حد تانى
بس ادينا بنتعلم أهو أن حتى الشمعة عدم وجودها فيه جانب إيجابى برضو
هونى عليكى إنت هتشيلى هم إيه و لا إيه ؟؟
بس كمان عندك حق أزاى الواحد يتجاهل كل اللى بيحصل حواليه ده و يعيش عادى و يتفاءل ببكرة ؟؟؟
ربنا يفرجها من عنده بقى
عشان العبد خلاص كل السكك اتقفلت فى وشه و دخلت على قلبه كمان
و تحياتى يا عزيزتى

boshra mohamed يقول...

" المشكله أني ابحث عن الشمعه فلا أجدها لأن الظلام حالك "

شكلها اصلا مافيهاش نور تانى
فاعملى بقى حسابك فى الشمع الفترة اللى جاية
ورأيى اننا بقى فى الحالة ديه نغير النشيد الوطنى ونخليه اغنية الست شادية
قوم ولعلك شمعة

اسامة يس يقول...

ربما من نهاية السطور تعود بنا الى بداية المشكلة فكل منا يدعي انه فقط يبحث عن شمعه فلما استيأس منها قال انها غير موجوده من الاساس...

عرض سلس وشيق ومزيج من الحرقة والتفاؤل في آن او لنقل الرغبة في التفاؤل...


دمت بكل ود..
خالص تحياتي

blackcairorose يقول...

بنت القمر

معدلك سريع فى الكتابة أو معدلى أنا بطىء فى القراءة، معلش هتعالج


غبت عنك يومين ثلاثة فوجدت كل بوست يحتاج لتركيز وتعليق لوحده

حكاياتك عمن عملن عندك محسوسة مائة بالمائة، نسمع احيانا حكايات تفتح أمامنا أبوابا لم نكن نتخيل أصلا وجودها

أما بخصوص مذكرات أمرأة سعيدة جدا
فأول خاطر بعد قرائته أنى قلت لنفسى

لازم اكتب كلمتين تشجيع وامل والكلام اياه ده من باب اللطافة يعنى مش اكتر

بس تصدقى والهى مالقيتش عندى نفس حتى اكدب

عاشــــــ النقاب ـقــــة"نونو" يقول...

بجد الكلام دة المصاريف هتزيد الف جنيه بحالهم
طيب يعني احول الواد لمزبلة حكومي اقصد مدرسة حكومي يعني
ربنا يرزق بقى ويرحمنا
تفائلي يا اختي ارجوكي انا كمان هتفائل وما ضاقت الا اما فرجت
ربنا يسعد ايامك قولي يارب
تحياتي

محمود المصرى يقول...

بسم الله الرحمن الرحيم

هو اكيد فى شمعة لكن ممكن تكون مطفأة , فتحتاج اولا للعثور عليها ثم اشعالها , محتاجة مجهود زيادة مش اكتر لكن موجودة , ب مين بقى اللى يقدر يلاقى الشمعة ويضيئها؟

someone in life يقول...

بنت القمر
انتي الشمعه و منوره
نقول غلاء و بعدين نتعود و المصري صميم بيعرف يربط على بطنه و يكبت احلامه بس المشكله البوز هايزيد و يطول بزياده كله هنتلاقيه ماشي مبوز و قرفان .. ليه سيرة المدارس و مصاريفها ؟ احنا لسه في الامتحانات انا لسه بافكر في مصاريف الصيف مع اني قررت استقيل من اول الشهر و ربنا يستر .. تحياتي

زمان الوصل يقول...



بعض الاحلام مؤجله كتغيير الشقه والسيارة وبعضها مستبعده كزيارة التبت أو فينيسا مثلا وده شيئ غير مزعج أبدا ولكن يشعرني بسعاده غامرة أني ما زلت أستطيع الحلم.. وليس المهم تحقيقه المهم هو القدرة اصلا علي الحلم وكفي وذلك ما يشعرني بفرحه شديده



:)
بس كده !!

Empress appy يقول...

اسمعى قوم ولعلك شمعه بتاعت شاديه اللى هى مسافر دى
انا عندى شمع كتيييييييييير ومش عارفه اولعه تفتكرى العيب فيه ولا الكبريت ولا الهوا معاكسنى

بنت القمر يقول...

عدي النهار
الشمعه دي عشانكم انتوا من العم بلوجر
(((:
بالنسبه لحكايه اللي بيطالب بالايجابيه بشده وحده فده مدون زميل كل ما اقرا ليه يطالب بالايجابيه وبشده وحده والحقيقه كنت ها اضيف اللينك بتاعه بس تراجعت لحد يفتكر اني بسخر ولا حاجه
:(
حكايه يسجلوا اخر التيرم والامتحانات ماشي يا عم ما انت قاعد في كندا صحيح انت عندك اولاد؟؟!
اذا كان المدارس لوحدها مش نافعه ولازم عليها دروس تقولي نقعدهم في البيت؟
وبعدين الحمدالله مفيش مشكله في مصاريف المدارس ولا في تظبيط العربيه كل الحكايه انك بترتب اولوياتك الاهم فالمهم يعني بتضطر تتخلي عن رفاهيات وفسح ومصيف طويل لانك عارف انه جاي وراه التزام اكبر وكل شويه تلاقي بند الضروريات بيكبر وبند الرفاهيلات بيقل الي ان اوشك علي التلاشي
نورتني

بنت القمر يقول...

فاتيما
انا الحمد لله كويسه وبقول الحمد لله كل وقت بس تقريبا الاقي الشمعه وتبقا فله
:(
نورتي
ها اروح ادور علي حكايه شمعه يوسف
((:
تحياتي

بنت القمر يقول...

بحب السيما
الله يكرمك زودت تفاؤلي
اول مرة اعرف انه في اغنيه اسمها ولعلك شمعه لشاديه
ها ادور عليها دي
نورتني لحد ما الاقي الشمعه
((:

بنت القمر يقول...

اوسامه
والله انا بقول الحمد لله جدا وبحاول اشوف النصف المليئ من الكوب بس زي ما تقول احيانا لازم الواحد يقلع النضارة والوردي ويشوف الامور كما هي
نورتني
لحد ما الاقي الشمعه
(((:

بنت القمر يقول...

blackcairorose
بخصوص معدل كتاباتي فهو غير ثابت وان كانت الرغبه في البوح متزايده جدا هذه الايام
لو تحبي ممكن اساعدك في عمل ريدر يعرفك اصدقائك كتبوا ايه اول بأول
ابعتي لي علي الميل ونشوف ها نعمل ايه؟؟
لو تحبي
ولو ما فتحتيش النت كام يوم مفيش حاجه تفوتك ميلي في البروفيل
بخصوص تعليقك علي امرأه سعيده
وانك ها تكتبي شيئ من باب اللطافه فده اسعدني جدا في حد ذاته انك حسيتي انه مفيش اي لطافه ها تكون مجديه في هذه الحاله التي انا فيها
((:
نورتي الي وجود الشمعه

بنت القمر يقول...

nonoymm
الدعم اتشال من مدارس القطاع الخاص وها يتم تمويله من جيب الاهالي
واذا كانت زياده المصاريف هي 20 في الميه طبيعي فا هتكون كام بعد رفع الدعم؟؟
متحوليش الولاد مزبله حكومي
ممكن ما تروحيش مصيف
وتبيعي العربيه
وترهني الشبكه!!
كل دي رفاهيات يا عزيزتي !!
وما لهاش لزمه حتي الحكومه عاوزة تعودنا القناعه وتدبير الامور:)
وده عشان بناء شخصيه قويه للمواطن المصري:(
هييييه اقول ايه ربنا يرحمنا برحمته
نورتي الي حين وجود الشمعه

بنت القمر يقول...

محمود المصري
انا طبعا بحمد ربنا بس المشكله انك بتتنازل وتتنازل وتتنازل
وتقول مش مهم ومش فارق
ومايزعلنيش
علي المستوي الشخصي
اوالوطني او المجتمعي
وبتيجي في الاخر بتتعب
ومتلاقيش الشمعه من كثر الضلمه
نورتني الي حين وجود الشمعه
علي فكرة مدونتك مشهورة جدااا ومعروفه وبتتفصص بالرغم من قله التعليقات ما يغركش
((: مجرد بس اختلاف رؤي وتوجهات مع الاخرين
تحياتي

بنت القمر يقول...

someone in life
الله يكرمك انتي اللي زوق بس
مصاريف المدارس مدرسه بنتي طلبوا مصاريف الكتب دفعه 400 تحت الحساب الشهر ده
:(
خلي بالك وراجعي قرار الاستقاله لحد ما توضبي نفسك عشان ما تغنيش ظلموه
المصري صميم وعمال يتحمل لحد ما
ما ايه؟؟
مش عارفه((:
نورتي الي حين وجود الشمعه
مازال البحث جاريا

عين فى الجنة يقول...

لولا اخر جملة كنت افتكرت ان قمر خلاص بقت فى الطراوة

بنت القمر يقول...

زمان الوصل..
زمزم العزيزة
عجبتك
:(
فرحانه بيا وانا فرحانه
اخر فرح... قوة شخصيه برضه وايجابيه صح؟؟
مفيش اروش من كده!!
نورتي الي حين وجود الشمعه

بنت القمر يقول...

appy
والنبي اول مرة اسمع قوم ولعلك شمعه دي
بخصوص الشمع اللي معاكي
ما تولعيهوش شيليه
ينفع وقت عوزة
ربنا ينور ايامك وممكن تكون كل الاسباب مجتمعه تدعوالي عدم واشتعال الشمع
نورتي الي حين وجود الشمعه

بنت القمر يقول...

راجي
لا ده انت طيب اوي... بقا يعني انا خدعتك؟ ده البوست كله ساخر من اوله مش ممكن تكون صدقت ده حتي عنوانه يدعو الي الشك ..في ظل هذه الظروف ذات اللون الكوبيا
يلا الحمد لله
قمر مش في الطراوة لسه لكن في الطريق اليها قريبا
((:
نورتني الي حين وجود الشمعه

Ahmed Kamal يقول...

بنت القمر

أنا كنت داخل أعلق على موضوع الشمعة ده بكل براءة و إيجابية خصوصا إن أنا عندي حل فعال جدا ... :) لكن لما قرأت ردك على عدى النهار قعدت أضحك جامد .. تفتكري ليه ؟ و يا ترى عندي حق ؟

دايما منورة حتى من غير شمعة

la3lahakhier يقول...

ممكن نعمل زى واحد غبى ولع فى صباعه
او نستهبل ونعمل اننا لاقينا شمعة بس نغمض
او ندعى اننا معانا شمعة بس مفيش كبريت
او نخلص ونجيب ولاعة ونولع فى ايه بقىىىىىىىىىىىىىىىىىىى
ههههههههههه
هم يبكى
كل التحية

صاحب المضيفة يقول...

وانا مازلت أبحث عن الشمعة منذ زمن


يارب يعيننا على العثور عليها مرة أخرى


تحياتي واعجابي بمدونتك الرقيقة

عدى النهار يقول...

ضحكت على إصرارك إصراراً المصحوب بعلامتين إستفهام وعلامة تعجٌّب.. متهيألي قريته قبل كده :) ماعنديش

بالنسبة بأه لموضوع المدرسة اللي مش نافعة لوحدها ولازم عليها دروس. هو ده السبب اللي بيخليني أقول إن المدرسة بالشكل ده مالهاش لازمة. واحد صاحبى فمصر قعّد إبنه فى ثانية وتالتة ثانوى فى البيت طبعاً بلإتفاق معاه على أساس إن الولد ماكانش مستفيد من المدرسة. والولد إمتحن ثانوية منازل. أسلوب مش سهل أنا عارف بس أعتقد إنه ممكن ينتشر مع الوقت

خمسة فضفضة يقول...

السلام عليكم ورحمة الله وبركاته

بنت القمر الجميله

مافيش فايده ياستي الشمع ثمنه غلي واحسن نوفر الفلوس يمكن نعرف نجيب بيهم رغفين عيش ولا حاجه

سلام

blackcairorose يقول...

مش مجدية
فى الحالة اللى انتى فيها
واللى انا فيها
واللى احنا فيها

.:.-=- ELGaZaLy-=-.:. يقول...

طيب والله دة شئ جميل.ز 25 واحد بس والله ناس هايلة يا جدعان

بصى يا اخت بنت...انا اكتر حاجة بتعجبنى نظرية نص الكوب المليان...صحيح سرقو ممنا الكوب بس دة مش داعى للياس خالص ..

ممكن مدام البنزين خلص وعايزيزن نوفر نستعمل العجل زى الصين الشقيقة...وبالنسبة للعالم السكة الى بيقولو حجاب وكدة..هانخلى الستات يركبو عجل مغطى يعنى مفيش حجة اهوة

بالنسبة لمشاكلة المدرسة انا شايف انك تستقلى بالاولاد عن المدرسة وتعودى لفكرة الكتاتيب ...بتاع الشيخ حلاوة...ودة هايوفر وهما الى اتعلمو خدو اية!!

بالنسبة لارتفاع الاسعار...لية منبقاش نباتيين وناخد الاولاد زيارة كل يوم جمعة للجزار علشان يشوفو الراجل القاسى بيعمل اية فى اللحمة الوحشة قوم يكرهوهوا وبالنسبة للفسح اى حديقة عامة فى الشارع وحلة محشى ومش عارف اشمعنى الممحسى هاتقوم بالواجب

المناوشات الزوجية لان اعلق عليها

موضوع الشمعة سهل جدااا


عم عبدة ايوة هو الى على اول الشارع

قوليلة ابية غزالى بيسلم عليك وهايديكى دستة شموع


على فكرة البوست جميل اوى...

بس انا شايفة دعوة للتفائل مش عارف لية

باغي الشهادة يقول...

والحادثات وإن أصابك بؤسها..فهو الذي أنباك كيف نعيمها

وقال آخر


اعلل نفسي بالآمال أرقبها..ما أضيق العيش لولا فسحة الأمل




....مروري الأول من الكويت
بعد السلام عليكم ورحمة الله

بنت القمر يقول...

احمد كمال
مش مهم انت كنت ها تقول ايه
المهم انك ضحكت وده كويس في حد ذاته
منور الي حين وجود الشمعه

بنت القمر يقول...

la3lahakhier

ربنا بستر ومفيش حاجه تولع
مفيش حاجه تستاهل
مش للدرجه دي
تحياتي

بنت القمر يقول...

صاحب المضيفه
اشكرك وشرفت المدونه
تحياتي

بنت القمر يقول...

عدي النهار
اسفه بجد علي تطفلي معلش داء بايخ
بس عشان حضرتك من الناس اللي بقالي فترة اتشرفت بمعرفتهم ومعرفش عنهم اي معلومات
طب وأنا مالي أعرف ليه؟؟
حاجه بايخه!!
اسفه بجد
تحياتي

بنت القمر يقول...

blackcairorose
((: بس

بنت القمر يقول...

.:.-=- ELGaZaLy-=-.:.
ها اعتبر التعليق هزار
لانه ما ينفعش غير كده
اشكرك

بنت القمر يقول...

باغي الشهاده
اهلا بمرورك الاول
من الكويت او اي مكان
ربنا يرزقنا الامل جميعا
تحياتي

بنت القمر يقول...

خمسه فضفضه
حتي الشمع ها نوفره
؟!
ماشي كملت!!
نورتي

عدى النهار يقول...

مافيش داعي خالص للأسف :) حقيقي إستفسارك ماضيقنيش بالمرّة

alexandrany يقول...

تفتكري لو لاقيتي الشمعه وقدرتي توصليلها هتقدري تشوفي علبه الكبريت
ولا معاكي ولاعه يا ترى؟

Layla يقول...

يا خوفي ليغلوا الشمع كمان.. ولا يفرضوا عليه ضريبة

على باب الله يقول...

سمعت سمع خير .. أنه في هذه الحالة يكون لعن الظلام .. حلال شرعاً

---

To a friend يقول...

كان فاضل بس كام تفصيلة كمان في الموضوع و تبقي لخصتي مذكرات أغلب الشعوب العربية السعيدة جداااا

بدل ما ندور علي الشمعة ايه رأيك ندور علي الكبريت الاول و بعدين لما نولعه اكيد حنلاقي الشمع

قصدي نقسم المشاكل و نقسم البحث علي حلول الي اصغر جزء ممكن .. عود الكبريت

bluestone يقول...

وانا برضه بقول المصريين دول شعب غريب .. بيشتكي وخلاص مع ان الحياة حلوة وجمييييييييييييلة
البنزين غلي
السولار غلي
والبلد هتولع
يعني اللي هيعوز يولع في نفسه مش هيعرف !! افتكر ده جانب إيجالي

انا مونت بنزين ب70 جنيييييه النهاردة يا بشر .. منه لله اللي كان السبب

Cleo يقول...

عزيزتى..

أكون شاكرة لو وصفتى لنا شكل الشمعة ووظيفتها.. لإانا لا أكاد أتذكر هذا الشىء..!!

Zika يقول...

طرقتك دمها خفيف جدا
بس مش عارف الحقيقه اضحك علي البوست ولا اصوت واشد في شعري
هم يضحك وهم يبكي

بنت القمر يقول...

عدي النهار
ولا يهمك
:
:
: اليكسندراني
انا لاشايفه لاده ولاده
نورتني الي حين وجود الشمعه

بنت القمر يقول...

مارفيل
اكيد ها يغلي باعتبارهم عارفين هما سودوها قد ايه
نورت
:
:
:
:
علي باب الله
أكيد لعن الظلام حلال
بس بعد ما نلعنه
ها نعمل ايه؟!!ولا حاجه
علي ما اظن..
لانه معدش متاح حاجه تتعمل
نورت

بنت القمر يقول...

فضفضه نور
انا حاولت اختصر
عشان مخنقكمش
((:
نورتي
:
:
:
:
بلو ستون العزيزة
شفت انا طيبه ازاي ومش شكايه ولابسه النضاره البمبي علي طول!!
عربيتك ايه ؟؟ انا بموّن ب46 جنيه
يلا اللي اداكي يدينا يا جميل
حبه قر بقا
(:
نورتي الي حين وجود الشمعه

بنت القمر يقول...

كليو العزيزة
الشمعه كائن بائد هدفه اشاعه جو من الحبور والسعاده ودي اشياء من مخلفات الزمن البائد
راحت واندثرت مع اندثار تلك التوصيفات الباليه:نورتي
تحياتي
:
:
:
زيكا
مشكور
اضحك لو جالك الضحك اضحك ويا بختك
وادعي لي انا كمان نورت
تحياتي

DantY ElMasrY يقول...

البوست دا جامد

بنت القمر يقول...

متشكرين يا عم دانتي جاوب علي السؤال بتاع البوست الجديد من فضلك

يا مراكبي يقول...

أنا مبسوط إن فيه شمعة من أصله .. إحمدي ربنا إن فيه عندك شمعة .. ده كتير قوي في الزمن ده .. ههههه