الخميس، مايو 22، 2008

كلام عن الكرامه


تحذير: البوست ده غير ساخر ولا نقدي.. عاوزة افهم حاجه بجد ... بجد... هي ليه مصر باركت لاسرائيل ب60 سنه سودا علي انشأئها ؟
الرد :اسرائيل دوله مجاورة نعترف بيها دوليا من الامم المتحده... ومرتبطين بيها باتفاقيه سلام.. ودي علاقات دبلوماسيه لازم تاخد الشكل الطبيعي وعمليه السلام ما زالت في طريقها الي الانتهاء بالسلامه
جميل .. سؤال تاني بما ان الموضوع علاقات دبلوماسيه وبروتوكولات.. هي اسرائيل بتعاملنا بالمثل؟؟!! ما هو مبدا التعامل بالمثل مبدأ دبلوماسي اساسي هل اسرائيل بتهنينا بعيدنا القومي.. او ثورة 23 /7 مثلا
حد سمع كده في التلفزيون؟؟ حد سمع ان اسرائيل هنتنا بثورة 23 قبل كده بجد.. انا مخدتش بالي... ولا عشان مصر دي قدمت وخنشّرت من ايام الفراعنه بقا وكده فا مفيش داعي ان اسرائيل تحتفل بعيد ميلاد دوله بقالها الاف السنين
طب لو اسرائيل بتهني واحنا بنهني والحكايه كلها مباركات و وحركات وظروف فيها نقطه بتترد وخلاص عشان العرف الديبلوماسي مش اكتر
طب مصر بتبارك لليمن؟؟ لجيبوتي.. لتشاد.. مش دي دول شقيقه يا في افريقيا يا في العروبه أو اللغه او الدين... واقرب من اسرائيل
ولا اسرائيل علي راسها ريشه.. حد سمع في الاخبار ان مصر هنت جيبوتي او تشاد ولا بيهنوا الدول دي في السر!!
يعني الخارجيه المصريه تبعت ليهم ايميل فيه إيموشن وورد وخلاص !! طب لو الحكايه كده ما يعملوا كده برضه مع اسرائيل يهنوها كده علي السكت وخلاص.. واللي بتديهولنا اسرائيل باليمين تاخد بالشمال ومفيش حد يقدر يحرجنا ولا يقول علينا ناس مش بتفهم في الذوق والبروتكول وكده.. حاجه غريبه ها يعملولنا ايه مثلا بجد ؟؟!!
قال ضربوا الاعور علي عينه قال خسرانه خسرانه يعني لما الحكومه تفكر توزع العيش في مصر{سله غلال العالم} ببطاقه الرقم القومي!! ايه المشكله بقا انها ما تهنيش اسرائيل!! المفروض انهم مشغولين ومش فاضيين وعندهم بلاوي 80 مليون مواطن مش عارفين يأكلوهم ولا يوظفوهم
يعملوا روحهم نسيوا ولا انا في حاجه مش فاهماها؟؟

هناك 18 تعليقًا:

.:.-=- ELGaZaLy-=-.:. يقول...

يعني الخارجيه المصريه تبعت ليهم ايميل فيه إيموشن وورد وخلاص !! طب لو الحكايه كده ما يعملوا كده برضه مع اسرائيل يهنوها كده علي السكت وخلاص.. واللي بتديهولنا اسرائيل باليمين تاخد بالشمال ومفيش حد يقدر يحرجنا ولا يقول علينا ناس مش بتفهم في الذوق والبروتكول وكده.. حاجه غريبه ها يعملولنا ايه مثلا بجد ؟؟!!
----------------

مستغربك جداا انا يا بنت القمر

يا ستى النبى وصى على سابع جار..ودول لزق فى سينا دة انا حتى سمعت ان حسنى بمناسبة العيد القومى هايديهم سينا

حتى يبقى صاحب الحرب والسلام والانكسار والمهانة...وبعدين لعلمك لعلمك حسنى طوال النهار على المسنجر يبارك لدة ويهنى دة وبعدين مش كدة يا اخوة الراجل مقطع نفسة علشانا يعنى...


بصى يا بنت القمر فى ذالك الموقف مفيش اى تعبيير ممكن يقال غير انبى تتوكس...

بس كدة

عزيزى حسنى مبارك


انبى تتوكس وتتلهى على عينك

وسعيد بكتابتك المتتالية

Hypatia يقول...

خخخخخخخخخخخخخخخخخخخخخخخخخ
هو انتى متعرفيش
مصر على علاقه خير شرعيه مع المعلم اسرائيل
عشان كده لازم تتدلل عليه وتميزه عن باقي المعلمين من باب الدلع والغنج والتيييييييييييييييييييت
ده انا حتى قريت عند نواره قريب ان الاردن كانت بتناغش اسرائيل من تحت الترابيزه وبتلعبله فى شعر صدره
يعني فيه صراعات على الراجل ومصر لازم تستخدم كل امكانياتها
بس يا شيخه احمدي ربنا اننا عندنا حكومه ورئاسه فيها صفوه القوادين اللى فى العالم يعني ميتضحكش علينا

على رأي الاخ الغزالى
انبي تتوكس اكتر ما انت موكوس

خيرالدين يقول...

عارفه انا بافكر بقى فى حاجه غريبه
هو طالما احنا كده وبنشحت لهم مواردنا وبنهنيهم باعيادهم ومبندخلش عليهم بايدينا فاضيه وهم كمان مستلمين حدودنا كل يوم يتسلوا على العساكر الغلابه
ليه بقى لما واحد بيتجوز اسرائيليه امن الدوله بيستلمه والخارجيه تطلع عينه والاعلام الحكومى بيتكلم عن الخونه العملاء اللى راحوا للاعداء

يخرب بيت الشيزوفرينيا

DantY ElMasrY يقول...

دى علاقة بين نظام حكم ونظام حكم آخر والنظام المصرى مش عاوزه ولادها يعرفوا نفس الكرخانة اللى بتروحها امهم علشان ميصابوش بعقد نفسية

شـمو نشـادر يقول...

انتى بتسالى ليه مبنعملش كده مع جيبوتى وبقية الدول العربيه ؟؟
السؤال ده المفروض ميتطرحش اصلا ..
انتى بتساوى مين بمين بس ..
ده احنا بنصدرلهم الغاز ببلاش يا جدعان ..
انا لله وانا اليه راجعون ..
أسامة أمين

المخبر العام يقول...

يأتي هذا في سياق رؤية القيادة الحكيمة
لطريق السلام ..ومحاولة إزالة أي حواجز نفسية قد تعرقل مسيرتنا الدؤوبة نحو السلام العادل والشامل

khobayb يقول...

مصر لم تهنئ إسرائيل

مبارك هنأ معبودته

هذا حق الرجل !

هو يعبدها ، وهي تبقيه على العرش

---

لكن حيث إن مصر مبارك !

يبقى فعلا مصر هنأت إسرائيل

Layla يقول...

بدأت اصاب بالتبلد لما اقرا اخبار من النوع ده

مصر تهنئ اسرائيل بالعيد القومي
مصر تبيع غاز مدعم لاسرائيل
مصر تكرم جون ابو زيد قائد القوات الامريكية في العراق بعد انتهاء خدمته هناك

عادي...ايه الجديد

mohandsmasry يقول...

يمكن فيه تحليل من وجهة نظرى احتمال يكون فيه شئ من الصواب . فى نظريتى ان الهاجس الامنى والتمسك بالسلطة والنفوذ لأخر نفس عند مبارك هو الاساس اللى بيحكم جميع التصرفات دى . ازاى ؟كلنا عارفين وهو طبعا اول المدركين لكدا ان النظام المصرى فى حالة احتضار بيلفظ انفاسه الاخيرة وكل اللى بيتعمل دى حلاوة روح ومعرض فى اى لحظة للسقوط طيب فى الحالة دى لو حصل انقلاب ضده او ثورة شعبية هايروح فين ولا هاينتظر لحد ما يتقبض عليه ؟؟ طبعا هايهرب هو وعيلته مع البقية الباقية من الثروات والغنائم اللى ما اتحولتش بره واقرب مكان لشرم الشيخ مين ؟ اسرائيل طبعا حتى دى اقرب ليه من القاهرة نص ساعة يكون فى ايلات هههه وما نستبعدش انه يبكون طمعان ان اسرائيل وامريكا يقوموا بدور الحماية ليه ولنظامه بتهديد اى حركة ممكن تتعمل ضده لسه فاكرين المدمرة الامريكية اللى راحت امام سواحل لبنان اثناء الاحداث الاخيرة وطبعا احنا دلوقتى ماعندناش جيش قوى يهدد أى حد ولا حتى يحمى حدود مصر انما الدول التانية اللى بتقولى عليها دى مش هاتفيده فى الحالة دى ولا حتى هاترحب بيه تحياتى

دكتور كسلان يقول...

اول زيارة ليا لمدونتك
مدونة جميلة وهتماماتك عجبتنى اوى
خصوصا اهتمامك بوضوع النكبة

بالنسبة للبوست ده
انا هاستعير كلمة زويل صديقى
دول عالم تيييييت ولاد تيييييييييت
عتقد دى انسب كلمة لوصف الخونة اللى بيحكمونا

سلاااااااااااااااااااااااااام

بنت القمر يقول...

.:.-=- ELGaZaLy-=-.:.
او انك مقدمتليش تفسير
بس بجد ليه ايه اللي ممكن يحصل؟؟ لما هو بطل الحرب والسلام ليه بيعمل كده بيثبت ايه لمين وعلي حساب ايه؟؟
اشكر مرورك
:
:
:
:
Nsreen Bsunee
طب نتخانق عليه بأمارة بس لكن كيان عايش عواله ودخيل نهنيه بأيه وليه؟
وكمان بنصرف عليه ونديله غاز
دي خيبه الامل راكبه جمل يا بنتي
نورتي

بنت القمر يقول...

e7na
تساؤلك ينضم الي قائمه اسئلتي بلا اجابه
نورتني
:
:
:
:
DantY ElMasrY
والله اللي اعرفه ان الام لما تروح مكان مش ولا بد تتداري وانا بقول ده المفروض انه تصرف طبيعي
يعني يهنوها في السر
لكن هنا الام مستبيعه!!
ومش فارق معاها لا سمعتها ولا كرامتها ولا مشاعر ولادها...
دي ام لازم تتسحب منها الحضانه لسوء السمعه والسلوك يا دانتي

بنت القمر يقول...

شمو نشادر
اضافه الي قائمه الاستفهامات التي بلا اجويه
نورتني
:
:
:
المخبر العام:
القياده الحكيمه... طب نفهم بس وجهه نظر القياده دي ده حتي بروتوكوليا مش ماشيه
نورتني

بنت القمر يقول...

خبيب
طب هو يعبدها احنا مالنا؟!!
نورت
:
:
:
:M@RV3L
ماشي يا مارفيل ممكن نتبلد علي وضع مش قابلينه بس نفهم
انا اجيبها كده اجيبها كده مش فاهمه خااالص
حتي الشرح مستكترينه
نورتني

اسامة يس يقول...

حين تطمس البديهيات ونحتار في وجوه القيم، يبدو حين ذاك ان السؤال البديهي الاقرب الى السؤال الطفولي او الفلسفي ساذجاً يجاب عليه دائما ببديات باتت مستهلكة تبدأ دائما :
أصلك مش فاهم.
أصلك مش واخد بالك.
أصلك مش عايش في الدنيا..
اصلك الخ..

وانااقول بكل سكينة وهو كذلك....

اختي الكريمة....
اخشى ان اضيف اجابة من قبيل اصلك... فاسمحي لي ان اشاركك السؤال...
دمت بكل ود...
خالص تحياتي..

بنت القمر يقول...

بنت القمر يقول...
mohandsmasry
بجد انا مش فاهمه وحتي لو اتهمنا الحكومه بالعماله والخيانه وكل البلاوي طب ليه بتتكلم وتجاهر كده
ما يعملوا اللي عاوزينه ويداروا يحرقوا دم الشعب ليه بس؟؟
يعني لو هنوهم في السر حد ها يعرف حاجه تجن بجد نورتني
:
:
:
دكتور كسلان
هماتييت بجد...عندك حق
اهلا بيك وتشرف دايما

صباح الخير يا مصر يقول...

بنت القمر
*********

من الواضح وجود فراغ سياسى كبير بمصر كما انه من الواضح ان هناك تخبط سياسى والواضح ايضا ان البلد يحكمها الفوضي وعدم الاتزان.... فمثلا فى عز ازمة رغيف الخبز خرج الرئيس من عزلته للتحدث فى ازمة الحضري والان ومع كل ماتفعله اسرائيل من حصار للفلسطينين وقطع الامدادات و الكهرباء و غيره عن غزه نمد الغاز لاسرائيل باسعار زهيده فى الوقت الذى يعتبره الناس ذكرى للنكبه تقوم الحكومه بتهنئة اسرائيل....الا تري معى ان الحكومه فى حالة تخبط و عدم اتزان و فوضي واضحه
للغايه... انا بجد باستغرب من تصرف كهذا غير مبرر و تبريره الوحيد انه شئ مفروض عليها!!
تحياتى لمواضيعك الشائكه

كلبوزة لكن سمباتيك يقول...

يعني عايزة ماما امريكا تزعل و لا اية؟؟؟
احنا نقدر على زعل الست الكبيرة

ربنا ياخدهم الاتنين
لا التلاتة
و لا اقولك الاربعة
امين

تحياتي