السبت، مايو 31، 2008

اغرب القضايا


حين عرفت امس بمقتل صائغ الزيتون وعماله المسيحيين صدفه بحته من مدونه صديقه وبحثت عن الخبر في الجزيرة والعربيه وهنا وهناك لم اجده في مقدمه الاخبار.. اتصلت بامي التي اخبرتني انها قضيه بايته دي بقالها تلات ايام انتي لسه عارفه!!

يبدو ان الابتعاد عن التلفزيون له مساوئه وحين سألت صديقتي الاليكترونيه مساء علي الماسنجر اعطتني بضع تخمينات وان كانت نفت القصد الجنائي... والايدي الخارجيه.. ضحكت حين قلت لها يبدو ان هناك من يريد زعزعه دور مصر الريادي!!

يبدو ان الصاق القضيه للحكومه او الجماعه الاسلاميه او اي كائن اخر وتخمينات اخري وتكهنات هو مابقي للناس
مثل مصرع اشرف مروان.. مصرع السندريلا.....سقوط الطائرة المصريه قبال الشواطئ الامريكيه وعليها 42ضابط مصري... اختفاء الصحفي رضاهلال...تفجيرات سيناء.. حادث الازهر.. وغيرها
تذكرت البرنامج الاذاعي الشهيراغرب القضايا الذي كان يبث عقب صلاة الجمعه علي البرنامج العام.. بعرض قضيه غامضه وترك الحل للمستمعين مع وعد بجائزة ماليه
هنا الحكومه لاتمنح جائزة للاجابه الصحيحه... تتركنا فقط للتخمينات... خوفا علينا علي ما يبدو من الحقيقه المؤلمه التي تتحمل في نبل معرفتها وحيده!!ا
===============
تحديث: برنامج اغرب القضايا كان بيذاع يوم الخميس... برنامج 747120 اذاعه هو اللي كان فيه قضيه مطلوب حلها يوم الجمعه
كما تفضل الاستاذ شقير بتصيح المعلومه لي..... شكرا

هناك 26 تعليقًا:

Empress appy يقول...

ولا عمرهم هيقولوا الحاجه الصح فين ما هو ده دورهم يفرقعوا لنا بالونه نتلهى بيها وفيها ويعملوا هما حاجات تانيه انا خلاص بقيت ببصم بالعشرة والخمستاشر والعشرين على كده

غير معرف يقول...

مصرع اشرف مروان.. مصرع السندريلا.....سقوط الطائرة المصريه قبال الشواطئ الامريكيه

من فضلك .. رفقا بنا واسألى أسئلة سهلة حتى نجيب

blackcairorose يقول...

القضايا معروفة

وكتير من القضايا الحكومة عارفة من ارتكبها

انما مسالة الاعلان او عدم الاعلان عن مرتكبيها ده اللى بيخضع لاعتبارات كتيرة

يعنى مسالة العائلتين اللتين تم قتلهما فى الصعيد

أو اختفاء رضا هلال

أو غيره من الاحداث داخل مصر

أكيد معروف للحكومة ابعادها

يمكن فقط الاحداث التى تتم فى الخارج هى التى تكون هناك تخمينات بشأنها او بشأن بعضها

Ahmed Shokeir يقول...

بنت القمر

هو بس فسه تصحيح صغير

البرنامج اللي كان بيجي يوم الجمعة وفيه قضية غير محلولة كان برنامج سبعة سبعة وأربعين مية وعشرين إذاعة أو
747120 إذاعة
وكان الحل بيجي الساعة ستة وخمسة مساء على البرنامج العام

أما برنامج أغرب القضايا فكان بيجي يوم الخميس مساء على البرنامج العام والإعادة يوم الأحد ظهرا وده كان بيجيب قضايا عالمية صعبة وغريبة ولكن كانت محلولة وكان بيخرجه عبده دياب ويتميز بموسيقاه الجادة والغامضة وكنت باخاف منه وأنا صغير وكانت بداية إذاعته في اوائل السبعينات حتى بدايات الألفية الثالثة

وجهة نظري يقول...

يعني هما لو قالوا أي حاجه الناس حتصدقهم؟ من خبرة الشعب الطويله في أخبار الجرائم عارف إن في حد حيلبسها في الأخر وغالبا حيكون مالوش دعوه بالموضوع.

محدش حيطلع يقولك إن الموساد نفذ العمليه الفلانيه، ولا إن في مصريين بالهبل بتتسرق أعضائهم علشان تتباع، ولا إن في ناس مصلحتهم إن الطوائف تخبط في بعض .

بس أستبعد تماما إن العمليه دي معموله علشان مد قانون الطوارىء، أولا لأنه مش من مصلحة الحكومه حدوث شغب طائفي، ثانيا هما مش محتاجين مبرر لمد العمل بقانون الطوارىء، هما خلاص مدوه وإحنا خلاص إتكتمنا.

صباح الخير يا مصر يقول...

بنت القمر
**********

كعادتك يا بنت القمر بتدخلينا من حاره لزقاق وفى الاخر بنلاقي نفسنا داخلين فى الحيط...انتظري قليلا و ستجديين حل القضيه ابسط مما تتخيلى !؟
وعلى رأي العزيز شريف رفقا بنفسك و رفقا بنا
تحياتى

الطائر الحزين يقول...

وموضوع المحلة كمان له دخل

Che_wildwing يقول...

هناك أسئلة كثيرة في بلادنا لاإجابة عليها
والكمة تقول
اعرف اكتر تتعب أكتر
فمن الافضل ان الواحد ميعرفش

karakib يقول...

الافيال
تتصارع
و العشب
يتحطم

--------
------
----
--
=

محمود المصرى يقول...

بسم الله الرحمن الرحيم

ما يلح على ذهنى حقيقة ليس السؤال عن مرتكبها , لكن السؤال عن سبب اثارة كل هذا الاهتمام الاعلامى , نعم هى جريمة قتل لأربعة افراد , لكن هناك عشرات بل مئات ان لم يكن الاف من جرائم القتل ترتكب كل عام فى مصر , فلماذا هذه القضية بالذات؟ ولماذا الذهاب دائما بها الى البعد الطائفى ؟ بصراحة الاهتمام الاعلامى الزائد يثبت لدى قناعة واحدة وهى ان الاقلية المسيحية فى مصر تريد ان تكون مدللة .
وجايز برضه اكون غلطان .
تحياتى

Ahmed Kamal يقول...

الحكومة عارفة كويس إننا شعب عريق عنده 7000 سنة حضارة و طيب و مطرمخ و حايقعد يضرب أخماس في أسداس لحد مايحلها ، و في الآخر الإجابة السهلة لا تفيد الطالب الشاطر ، و الناس كده كده مش حاتصدق الحكومة حتى لو القاتل إعترف إنه زبون العباسية و معاه شهادة معتمدة يعامل معاملة الأطفال . و لأن الحكومة بتعمل كده الناس كمان بقت بتتعامل باعتبار إنه مافيش حكومة من أساسه ، بلا وجع قلب .

someone in life يقول...

و الفاعل كالعادة مجنون و يودع مستشفي الامراض العقلية علشان كله بقي مجنون .. اسمي موجود عندك في الفيس بوك .. تحياتي

خمسة فضفضة يقول...

السلام عليكم ورحمة الله وبركاته

كنت هاقولها ، بس لقيتك عامله تحديث والاستاذ احمد شقير سبقني
يظهر مش انا بس اللي كنت باترعب من برنامج اغرب القضايا
:-)

بالنسبة لموضوع البوست قلتها مره قبل كده في بوست عند بيلا اننا هنا في مصر عشان نعرف الحقيقه وتتعلن رسمي علي الناس لازم نستني 20 25 سنه مع ان الجاني بيبقي واضح وظاهر وكل الناس عرفاه بس ماحدش بيقدر يشاور عليه ويقول هوه ده
يمكن ماحدش عاوز يكسب الجايزه او يمكن زي ماقلتي مافيش جايزه من اصله

سلام

عاشــــــ النقاب ـقــــة"نونو" يقول...

السلام عليكم
شفتي العاشرة مساء والست اللي اتصلت قالت ايه
قالت انه نزاع على ارض
ورجعت قالت برضه فيها شق طائفي
بقت ثقافة خلاص
اي حد مسيحي حصله دمل يبقى المسلمين هما اللي فقعوه
ربنا يستر
تحياتي

المخبر العام يقول...

الحكاية مالهاش دعوة بالطائفية ..حتى لو كانت بين مسلمين ومسيحين

فيه ناس بتحاول ..تستغل أي حدث عشان يبقى اسمها بتدافع عن الناس بتاعتها

وفيه ناس _زينا_هنلاقي مبرر للطوارئ

اسكندراني اوي يقول...

فاكره حسن فايق زغلول
سؤال كمان وتكسب 75 قرش

ممكن تشوفيلنا سؤال اختياري نجاوب عليه
لحسن دول صعبين اوي اوي

تحياتي ليكي ولادم

بنت القمر يقول...

appy
====
يلهونا و يعملوا حاجه تانيه!!
الاحتمال ده موجود للاسف ماسابوش للناس غير نظريه المؤامرة
نورتي
:
:
شريف
===
مش دورنا اننا نجاوب
دي مسئوليتهم
وفي نفس الوقت حقنا
حقنا نفهم بجد

بنت القمر يقول...

bcr
======
انا متأكده يا عزيزتي انهم عارفين بس مين اداهم حق احتكار المعرفة دي؟؟
انتي متخيله الابعاد الخطيرة لاحتكار لمعرفه دي ان الناس تخبط في بعض ويزيد الاحتقان والناس تفقد الثقه بكل شيئ
:
:
:
احمد شقير
========
ميرسي يا افندم علم وتم تنفيذه
انا مكنتش بسمع البرامج دي
كانوا بيحكولي
اصلها قديمه اوي
:)))
اشكرك نورتني

بنت القمر يقول...

وجهه نظري
=======
اتفق معاك تماما
ان السناريوهات ممكن تكون ي غايه من السوء
لكن الناس كمان عندها عقل وبتخمن الايوأ يبقا ايه المشكله انهم يعرفوا
ويعرفوا الحقيقه بجد مش علي طريقه جزار بنب مزار
كبش فدا وخلاص
اهلا بيك اشكر مرورك

:
:
:
:
:
صباح الخير يا مصر
==============
دخلتكوا في الحيط!!
اسفه يا عزيزي... الحيط كلنا دخلنا فيه رغما عنا
عدم الفهم وعدم المعرفه
والتخمينات والسينا ريوهات السيئه هي اسوأ حيط فقدان الناس الامان وفقدانهم الثقه في حكومتهم اسواحيط
ها اسمع كلامك واستني بس يا ريت ميستغفلوناش علي طريقه سقاح بني مزار
نورتني يا عزيزي

بنت القمر يقول...

الطائر الحزين
======= حمد الله عالسلامه العوده من اسوان والعوده الي التعليق عندي
موضوع المحله!!
يعني ازاي؟؟
يحلو المصيبه بتاعه الغلا بمصيبه الناس ممكن تحط لها احتمال طائفي
ده يبقا الغبا بعينة
:
:
:
Che_wildwing
=========
اهلا بيك مرورك اول وان كنت
ما بحبش اكون مش فاهمه
افضل اني افهم مهما كانت الحقيقه مش علي مزاجي
العلاقه المفروض تكون كده بين اي حكومه محترمه وشعبها
احنا مش صحاب ها نخاف علي مشاعر بعض
نورتني

بنت القمر يقول...

كراكيب
========
العشب كله اتكسر بطريقه او باخري والارض بقت بور!!
:

:
:
:
محمود المصري
شوف انا فاهمه غالبا انت عاوز تقول ايه....
بس لوفي ناس ها تستغل الحادث ده عشان تقفز علي الحقايق وتحصل علي مكاسب
او تثبت واقع
ارجع اقولك مين المسئول؟؟
المسئول هي الحكومه الغير رشيده اللي سايبه الناس علي عماهم تفسر الاحداث بمزاجها اللي عاوز يستغل الوقف يستغله
الناس مسلمين ومسيحيين لازم تعرف الراجل ده علي خلاف مع اخر علي قطعه ارض
واتقتل عشان كده... وتبقا جريمه والداخليه تقبض علي المتهمين
ولا مات طائفي... وبرضه تكون جريمه وتعاقب المتهمين.. لكن ترك الامور كده غامضه ومبهمه هو اللي ها يؤدي لاي حد عاوز يستغل الموقف.. ويصطاد في الميه العكرة... ويزود الاحتقان
الحقيقه والحقيقه بس
هي اللي ها تخلي الناس علي نور والعدل ياخد مجراه لو اتقتلوا جنائي او طائفي او ناس من بره بتشد فتيل الفتنه يبقا الحكومه لازم تفهمنا وتحمينا لكن اللي بيحصل او اسوا معالجه
نورتني

بنت القمر يقول...

احمد كمال
========
للاسف كلامك صحيح تماما
فقدان الثقه والامان
بين الناس والحكومه
احنا عايشين للاسف مع حكومه لا بتحمينا ولا بتحترمنا
بتعاملنا علي اننا شويه خرفان حتي مش بتوفر لنا البرسيم!!
نورتني
دايما
:
:
:
سام ون ان لايف
::)
ها ادور عليكي وان كنت فاشله في الفيس بوك طحن وكمان مش بحبه مش يروح كتير هناك

بنت القمر يقول...

فضفضه
=======
وشقير عواجيز
انا مالي بقا؟؟!!
انا يختي مش من ايام دي انا كانوا بيحكولي
:))
علي فكرة عندك حق بس للاسف ان اللي مش بيتحل دلوقت مش بيتحل ولا بعد 25 سنه
القضيه بتسقط بالاهمال والنسيان والتقادم
ومضي المده
:
:
:
نونو
العزيزة اسمحيلي انقلك ردي الاستاذ محمود المصري
=====
شوف انا فاهمه غالبا انت عاوز تقول ايه....
بس لوفي ناس ها تستغل الحادث ده عشان تقفز علي الحقايق وتحصل علي مكاسب
او تثبت واقع
ارجع اقولك مين المسئول؟؟
المسئول هي الحكومه الغير رشيده اللي سايبه الناس علي عماهم تفسر الاحداث بمزاجها اللي عاوز يستغل الوقف يستغله
الناس مسلمين ومسيحيين لازم تعرف الراجل ده علي خلاف مع اخر علي قطعه ارض
واتقتل عشان كده... وتبقا جريمه والداخليه تقبض علي المتهمين
ولا مات طائفي... وبرضه تكون جريمه وتعاقب المتهمين.. لكن ترك الامور كده غامضه ومبهمه هو اللي ها يؤدي لاي حد عاوز يستغل الموقف.. ويصطاد في الميه العكرة... ويزود الاحتقان
الحقيقه والحقيقه بس
هي اللي ها تخلي الناس علي نور والعدل ياخد مجراه لو اتقتلوا جنائي او طائفي او ناس من بره بتشد فتيل الفتنه يبقا الحكومه لازم تفهمنا وتحمينا لكن اللي بيحصل او اسوا معالجه
نورتني

بنت القمر يقول...

المخبر العام
=======
ده الي بتمناة
انها متكونش طائفيه... مش ناقصين بجد
يعني يبقا مستقبل مبهم .. وغلا وطائفيه!!
الناس مش ها تقبل قانون الطوارئ القانون اتفرض عليهم زي ما اتفرض عليهم كل حاجه تانيع
اشكر مرورك
:
:
:
:
اسكندراني اوي
========
انت وفضفضه وشقير
عواجيز
انا مليش دعوة... انت كل مرة يا عم تقولي احنا من جيل
احنا من ايام!!
:))
سلامك وصل لادم
هو بيتابع كتاباتي من وقت للتاني وعرف ضيوفي
نورتني

bluestone يقول...

العزيزة بنت القمر:
اسمح لي ارد على محمود المصري لانه اثار نقطة مهمة جدا

انا عايزة اتفق معاك تماما في ان الاعلام تعامل المرة دي مع الحادث بشكل غريب جدا وبتركيز على نفي الطائفية بطريقة مثيرة ..
فانا رأيي ان الحادث جنائي على الارجح
ولكن الله واعلم
وايضا ارى ان ما حدث في دير ابو فانا في الاصل سببه غياب سيادة القانون لان الدير حصل على تملك للارض من الدولة
ولكن قبائل العرب في المنطقة لها قانونها الخاص كما نعلم ولا تحترم اي قانون
الحادث ليس طائفيا ربما تعامل معه البعض على انه طائفي

لكن خليني اسألك ايه علاقة الاقباط بالاعلام
اللي اعرفه ان الاخبار جريدة حكومية
والمصري اليوم والبديل والدستور وغيرها كلها صحف مستقلة مفيش فيها اي واحدة تابعة للكنيسة
قناة دريم مملوكة لاحمد بهجت والمحور لحسن راتب
ايه علاقة التركيز الاعلامي برغبةالاقباط في الدلع او التدليل ؟؟؟

وعلى فكرة يا محمود فيه حوار دائر في منتدى مبادرة مصارحة وصالحة
ربما يهمك مشاركتك فيه وبالتأكيد يهمنا مشاركتك ومعرفة رأيك
http://ma3an-eg.org/node/84

غير معرف يقول...

البرنامج بتاع يوم الجمعة كان اسمه 46120 إذاعة( ستة واربعين ميه وعشرين )...هذا على أيامي وأنا حالياً فوق الستين