الجمعة، يونيو 06، 2008

كلام عن الارهاب... في ليله البيبي دول

ليلي :مش كل الامريكان بوش
شكري ومش كل المسلمين بن لادن
شكري: انا مش ها امضي الا لما تعتبروا الاساءة للعرب والمسلمين جريمه زي معاداه الساميه
==================
حسام{محمود عبد العزيز} لليلى علوي: عارفه يعني ايه:
ناس ارضها تروح و بيوتها تتهد و رزقها يتسرق ليلي: عارف يعني ايه 3500 بني ادم في 11/9
حسام: عارفه يعني ايه مليون انسان يموتوا من سنه 48
ليلي: احنا اللي بنرسي الديموقراطيه في العالم.. ضحينا كتير
حسام: محدش بياخد دوا غصب عنه
!
===========
عوضين: انت راجل عسكري وعارف يعني ايه احترام القانون والقانون بيدي الانسان حق مقاومه الاحتلال
بيتر: وانا بؤدي واجبي وانت تحت حمايتي
عوضين:حمايتك انا مش عاوزها...

انتو مانعين حريه المقاومه مانعين حريه الاعلام هي دي امريكا؟؟
عوضين{نور الشريف} =مراسل حربي لقناه عراقيه وبيتر= مدير ابوغريب{جميل راتب}
====================
محمود الجندي : سائق عراقي كنا مستنيين امريكا ترمي علينا الحريه ما رمت علينا الاالقنابل
شكري: بس برضه حررتكم من طغيان صدام!!
السائق: الله يرحم ايام صدام ما كان في مسلم ومسيحي سني وشيعي
شكري: بس كان فيه قبور جماعيه

السائق: لكن اللي قتلهم صدام في 35 سنه قتلهم الامريكان في سنه واحده
فين الامان ما في الا الموت... وينك يا الله
===========
بيتر: انا عسكري مارينز عارف يعني ايه مارينز؟ يعني كريمه الجيش الامريكي المكلفين بحمايه الرئيس
حسام : الهي يا رب حد منهم ينشه
بيتر: فكر الاغتيالات المتخلف بتاعكم ده مش عندنا احنا دوله مؤسسات
حسام: بس متنساش ان كينيدي اتقتل ومحدش عرف لحد دلوقت مين قتله؟؟!!
حسام:محمود عبد العزيز... بيتر= مدير ابوغريب السابق
=============

شكري لليلي انتوا صرفتوا 3 تريليون دولار عشان الحرب علي الارهاب من غير نتيجه
كنتوا صرفتوها علي التعمير احسن
=================
شكري: ها تستفيد ايه لما تفجر الفندق
عوضين: لازم اخد حقي
شكري:حقك مش مع الابرياء دول ...دول ملهمش زنب
عوضين:طب مين يديني حقي.. مجلس الامن ولا محكمه العدل الدوليه
=================
ملحوظات جانبيه: فيلم مليئ بالمشاهد العنيفة من اول رصده للمجازر في غزة وفلسطين الي افران الهلوكست النازيه الي التعذيب في ابو غريب وصورة طبق الاصل من سجن ابو غريب وممثلين شبه الجنود الامريكيين المتهمين بالتعذيب
تانيا: الفيلم للكبار فقط لكمية العنف فيه... لا مشاهد حميمه بالمرة....
اعنف مشاهد التعذيب
لنور الشريف في ابو غريب... اغتصابه واقتلاع اعضائه... سحق الدبابه الاسرائيليه لراشيل كوري او ليلي خوري = غاده عبد الرازق في الفيلم ....افران الغاز في المانيا النازيه
الفيلم حاشد جدا لكل احداث العالم من 50 سنه تقريبا

هناك 22 تعليقًا:

خمسة فضفضة يقول...

السلام عليكم ورحمة الله وبركاته

من البرومو بتاع الفيلم والكلام اللي انكتب عنه وكمان الديالوجات اللي انت كتباها دي شكله فيلم كويس

مافيش الا ناقد واحد كان في الايه ار تي اللي قال ان الفيلم في المجمل مش كويس وفيه تطويل رهيب واحسن حاجه فيه هي موسيقي ياسر عيد الرحمن

عموما ان شاء الله احاول اشوفه في اقرب فرصه

سلام

.:.-=- ELGaZaLy-=-.:. يقول...

قرات اكثر من نقد لية بس بصراحة لسة مدخلتهوش...ادخلة واقول رايي

خيرالدين يقول...

أنا شفت الفيلم
بس عاوز أعرف رايك فيه
رامى عبد الرازق فى المصرى اليوم وطارق الشناوى وايهاب التركى فى الدستور
بهدلوا الفيلم
انت ايه رايك؟؟؟

someone in life يقول...

ياه انا حسيت بقشعريرة من قبل ما اشوفه الظاهر ان يوسف شاهين هو الوحيد دلوقت اللي مش بيزيف ايضا في هي فوضي لكن انا مش فاهمه اسم الفيلم علاقته ايه ؟ تحياتي

Miso soup يقول...

انا لسه شايفه امبارح ... و انا شايف انه من الناحية الفنية ضحل ... طويل زيادة عن اللزوم ... ادوار ملهاش لازمة ... ليلي علوي غير مقنعة و كمان من اسؤا ادوار نور الشريف ... بشكل عام حسيت انهم بيمثلوا

عين فى الجنة يقول...

الفيلم وحش جدا من الناحية الفنية لان الاحداث بتدور فى ليلة واحدة فالمفروض فنيا ان يكون الايقاع سريع ولاهث على خط واحد ولكن الايقاع فلت من المخرج اللى اهتم بالاحداث التسجيلية اللى كل الناس عارفاها ولكنه بدون داعى فنى اصر على تكرارها فكأننا بنشاهد الاخبار وليس فيلم سينيمائى
وحاول يكون محايد فحشر لقطات معسكرات الاعتقال النازية مع الكتابة التى يمكن لا يلاحظها احد ان المعسكرات اعتقل فيها بجانب اليهود فئات اخرى من البشر
وطبعا كثرة الفلاش باك لخبطت الدنيا وخلتنا نشعر انها موش ليلة واحدة ولكن تاريخ طويل
والفيلم احتوى على كم كبير من الجنس بشكل فج ويمكن بدون مشاهد مباشرة واعتقد ان لو المخرج مكانش قلقان من الرقابة كان نيل الدنيا
الحسنة الفنية اللى اضافها الفيلم وبرضه بدون داعى فنى هو مشهد تركيب محمود عبد العزيز فى لقطات انهيار ابراج نيويورك فى 11 سبتمبر كانت مبهرة
وكمان يمكن احسن دور هو احمد مكى سائق التاكسى
بس خلاص
واضح انك بدأتى نشاطك الصيفى بعد انتهاء الامتحانات وننتظر بوستات جديدة حلوة
ولكن

عين فى الجنة يقول...

قمر
معلش كلمة
ولكن
فى اخر التعليق زائدة وتخذف
لكى الشكر

بنت القمر يقول...

فضفضه
======= انا مقلتش انه كويس
ولا وحش؟
هو فيه حاجات كويسه و وحاجات مش حلوة
الصحيفه غير مسئوله بين الباائع والمشتري
:)
بس ها انعمل ايه الصيف جده ولازم نخرج من الخنقه بتاعه المذاكرة احسن ما تدخلي محمد سعد ولا اشرف عبد الباقي
نورتي وسايبالك سؤال علي الحمام المحشي
:)

بنت القمر يقول...

.:.-=- ELGaZaLy-=-.:.
================
هو في حاجات كويسه وحاجااات كتير وحشه
مثلا النقل بن الواقع والفلاش باك ملوش لازمه و يشتت جامد وكميه صدف غير طبيعيه
يعني نور الشريف اللي هو مراسل مصري لمحطه عراقيه بيحب ليلي خوري اللي هي بترمز لراشيل كوري الناشطه اللي سحقتها الدبابات الاسرائليه!!
ممثلين كتير ملهومش لازمه خالص الاتنين السوريين سلاف فواخرجي وجمال سليمان ادوارهم ملهاش لازمه اي بت كومبارس كان ممكن تقوم بدورها
:(
لكن اللي عجبني هي كميه الحوارات الثريه والجرأهة في الطرح الللي خلتهم طبعا ما يدخلوش مسابقه مهرجان كان
احسن ممثل الواد احمد مكي مصيبه
تحفه ادي دور سواق التاكس بامتياز
نورتني واشكرك
علي فكرة مارفل كمان كاتب عن الفيلم

بنت القمر يقول...

e7na
========
انا مقلتش حلو وتحفه ولا وحش انا اقتطعت بس اجزاء من الحوار وكتبتها اول ما طلعت طب انت مقلتش رايك ليه؟؟!!
وعموما
هو في حاجات كويسه وحاجااات كتير وحشه
مثلا النقل بن الواقع والفلاش باك ملوش لازمه و يشتت جامد وكميه صدف غير طبيعيه
يعني نور الشريف اللي هو مراسل مصري لمحطه عراقيه بيحب ليلي خوري اللي هي بترمز لراشيل كوري الناشطه اللي سحقتها الدبابات الاسرائليه!!
ممثلين كتير ملهومش لازمه خالص الاتنين السوريين سلاف فواخرجي وجمال سليمان ادوارهم ملهاش لازمه اي بت كومبارس كان ممكن تقوم بدورها
:(
لكن اللي عجبني هي كميه الحوارات الثريه والجرأهة في الطرح الللي خلتهم طبعا ما يدخلوش مسابقه مهرجان كان
احسن ممثل الواد احمد مكي مصيبه
تحفه ادي دور سواق التاكس بامتياز
نورتني واشكرك
علي فكرة مارفل كمان كاتب عن الفيلم

بنت القمر يقول...

someone in life
============== شوفي يا صديقتي انا قلت في التعليقات اللي فاتت رايي لكن انتي برضه شوفي واحكمي
اسم الفيلم تجاري بحت جدا وخصوصا لما تعرفي انه دور سلاف فواخرجي كانت ها تعمله هيفا
:)
المهم محمود عبد العزيز مغترب مصري جاي يزور مراته { سلاف} في ليله راس السنه وجايب لها بيبي دول وكل احداث الفيلم تدور في هذه الليله مش اكتر
بس كده
جر رجل مش اكتر
نورتي

بنت القمر يقول...

Miso soup
=============
اهلا بحضرتك
الادوار اللي ملهاش لازمه كتير سلاف- جمال سليمان-نيكول سابا- علا غانم
انا لاحظت برضه انه طويل جدا جدا
وكميه صدف غير طبيعيه
بس ها نعمل ايه لازم نشوف الاول عشان نعرف نحكم
نورتني

بنت القمر يقول...

راجي
=======
شوف هو طويل طويل طحن وخصوصا انا دخلته حفله 10 الصبح
:)
انا اللي معجبنيش
الصدف الغريبه جدا وهنا استسمحك تقرا ردي علي الغزالي واحنا
وتانيا : انا مستنيه اشوف سلاف دي دورها ايه ؟؟
وبصراحه ملهاش اي دور غير انها طالعه بدور ست حلوة وهي مرحله سنيه مناسبه لمحمود عبد العزيز !! المشاهد وحكايه اسم الفيلم قللوا قيمه المضمون اكتر ..لانه شيئ تجاري بحت يعني هما بيغازلوا الشباك برضه
يعني يدفعوا ملايين عشان سلاف تمضي لهم وبعدين يطلعوه علي جتتنا
:)حته محارق النازي ملقتش لها لزمه ورقصه علا غانم ملهاش اي لازمه! ومش عارفه جابوها ليه ولا بترمز لايه اصلا؟!
السواق احمد مكي تحفه وادي دوره بامتياز ورسم الشخصيه صح
محمود الجندي كمان رغم انه مثل الجزء الصغير بتاعه حلو لكن مبيتكلمش عرقي حلو
وبما انهم عاملينها جامعه الدول العربيه كانوا جابوا ممثل عراقي
:(
ولا العراقيين كخه والسوريين الله عليهم!!
كنت عاوزة اقول ايييه؟؟
اه حته محارق النازي هما كتبوا فوق المشهد ان الافران اعدم فيها مسيحيين ويهود وغجر وارمن
الجزئ بقا بتاع 11-9 مشوفتوش لانه دخلت متأخره 10 دقايق الصبح
بس خلاص نورتني الاجازة بدت وانطلاااااق الجمد لله
لكن ايه معرفتش؟؟
ان شاء الله البوستات الجايه افضل منور

sara يقول...

بصي

انا مقرتش البوست
ومش هقراه الصراحه غير لما ادخل الفيلم عشان ما اتأثرش
لحد دلوقتي كل اللي دخلوة منقسمين ..ناس تقول حلو
وناس تقول زي الزفت والنصوير والاخراج بس اللي حلو

انا مرتبه اني ادخله الاسبوع دا
ادعيلي بس اعرف اسرب البنات :D

boshra mohamed يقول...

"
لكن اللي عجبني هي كميه الحوارات الثريه والجرأهة في الطرح الللي خلتهم طبعا ما يدخلوش مسابقه مهرجان كان

"

انا مش حاتكلم على مستوى الفيلم عشان ان قلت كل اللى عايز اقوله فى مدونتى
بس حبيت انى اعلق على الجزء ده فى ردك

اولا الحوارات ماكانتش ثرية ابدا وتعتبر من اضعف نقاط الفيلم
كمثال يعنى : راجعى الحوار اللى دار بين غادة عبد الرازق والجندى الاسرائيلى قبل ماالدبابة تدوس عليه
والله لو بيعملوا فيلم تعليمى لاطفال فى كى جى ون مش حيبقى الحوار بالمباشرة والسذاجة ديه
النقطة التانية هى نقطة ان الجرأة فى الطرح هى اللى خلت مهرجان كان ترفض عرض الفيلم
الفيلم اترفض لمستواه الفنى وده على لسان عادل اديب نفسه , وعلى فكرة مهرجان كان ادى السعفة الذهبية قبل كام سنة لفيلم فهرناهيات بتاع مايكل مور اللى بهدل فيه بوش وفضح سياسته
وجملة للكبار فقط واضح انها بقت موضة والموضوع لاص مابقاش له علاقة ولا بعنف ولا بمناظر

بنت القمر يقول...

نون الجميله
=========
سربي الولاد وروحي
هاف انايس تايم منورة

بنت القمر يقول...

راجي
ولا يهمك منور

بنت القمر يقول...

بحب السينما
========= منور المدونه يا عزيزي
اسمح لي الحوار مش اوحش حاجه
الاوحش في وجهه نظري هي كميه الصدف المفتعله
الحوارات ممكن تكون مكتوبه حلو علي طريقه برنامج الاتجاه المعاكس
يعني عرض وجهات النظر المتقابله صحيح انها في السينما ممكن تكون مش مطلوبه في حاله انها تكون كتير
يعني لو اتكررت مرة اة اتنين تفبلها لكن لما بتزيد بتبقا مش حلوة
الحوار بتاع ليلي علوي وجميل راتب مكتوب كويس
وحوار محمود عبد العزيز و ليلي علوي كمان كويس
الحوارات علي لسن نور الشريف كلها مش مضبوطه ولا متقنه وهو من اسوأ الممثلين في الفيلم
محمود حميده حسيته متكتف جدا والمخرج مدتالوش مساحه لكن احمد مكي معجزة اخوانا السوريين الجوز ملهمش لازمه
بالنسبه لحته ان في افلام اكتر جرأه والله يمكن فيلم مور اتكرم لانه من امريكي ويمكن وجهه النظر لما تيجي من عرب متكونش مقبوله بنفس الدرجه
يمكن
كلام عادل اديب اللي انت بتقوله غريب جدا
امال هو متلافاش الاخطاء ليه لما عارف انه في اخطاء
بالنسبه لحكايه للكبار فقط
اعتقد برضه انه عنيف نوعا ما لقطه غاده عبد الرازق وسحقها الدبايه
ولقطه تعذيب نور الشريف دموييين اوي او بالنسبه لي علي الاقل
بس بما انك واحد مهتم بالسينما ممكن تشرح لي رقصه علا غانم مغزاها ايه
يعني بترمز لايه مثلا
يمكن انا مفهمتش
:(
ونورت مدونتي اهلا بيك

boshra mohamed يقول...

هى علا الغانم المفروض انها بتمثل العراق اللى بقى مستباح وكل العرب بتنهش فى لحمه
اما الشوت العظيم اللى انتحر فيه الجندى الامريكى فده بيشير الى تخلف عادل اديب
:d
على فكرة هو ماطلعش قال طبعا ان الفيلم بتاعه وحش وش كده , بس هو اعترف ان اللجنة المخول لها اختيار مجموعة الافلام اللى حتنافس على السعفة الذهبية من وسط اكتر من 300 فيلم متقدمين للمسابقة من كل انحاء العالم رفضت دخول فيلمه للمرحلة النهائية عشان كده هما عرضوه فى سوق المهرجان
وده اللى كنت اقصده بانه اعترف بنفسه ان الرفض كان لاسباب فنية مش اسباب سياسية

سلام

Dr. Eyad Harfoush يقول...

عزيزتي بنت القمر

حمستني لدخول الفيلم جدا و أنا من لم يدخل سينما يمكن من 3 سنوات
تحياتي و تقديري

abderrahman يقول...

أنا شفت الفيلم في الاسكندرية عندكوا
وهكتب عنه ان شاء الله كمان
:)

محمد العدوي يقول...

الفيلم يزهق جدا من أول عشر دقايق .. اقرب لأفلام الهزل .. رغم الجهد الواضح في التصوير .. لكن لا نص يقوم الفيلم ولا الناس اللي فيه مثلت ..