السبت، يونيو 14، 2008

pla....pla....pla..


علي الشبكه العنكبوتيه قدر لي ان التقي ببنت عمتي التي فرقتنا الدنيا سنوات طويله الاقدار جمعتنا يوما في بيت جدتي بمصر الجديده والقت بي في الاسكندريه وبها في ماليزيا!!صدفه بحته موقف كله شجن زي لقاء اللاجئين الفلسطيني ببعض.. علاقتنا توطدت بسرعه دعمها ماضي سبق.. وصداقه تتوطد بسرعه صدفه مثل كل الصدف القدريه التي تملا حياتي والمنحنيات الحاده التي تجعلني اعيش في فيلم هندي متصل.. سعيده بلقائك يا عزيزتي

التقيت صديقه مدونه منقطعه عن التدوين من فترة لقاء هادئ وجدتها فيه اهدئ نفسا واسعد حالا سعدت جدا لكل من اراه سعيدا

اكتشفت ان اكبر عامل من عوامل اشعال الفتنه في مصر هو الشبكه الاليكترونيه كل الحزازات والنقاشات والاتهامات مكانها وشرارة انطلاقها هي الشبكه.. بين وبين صديقاتي المسيحييات لاشيئ غير كل ود ومحبه يا مشعلوا الحرائق... اتركوناااا!

الكتب خان هو مؤسسه لتوزيع الكتب وتسويقها تعرفت عليها من مدون زميل.. راسلتهم ووعدوني بارسال ما احتاج اليه في الاسكندريه الاستاذ كرم الذي يصر علي ان يرد علي في الميل بالانجليزيه واصر ان واكتب له بالعربيه.. الاستاذ كرم اثبت لي ان في مصر ناس بتهتم وبتحب شغلها تكلفه شحن الكتب هي 20 جنيه.. شكرا استاذ كرم

كتر خيرك عشان ما يتنططش علينا الجماعه المصراويه بما يقرأوه بفلوسنا ها نجيب كل حاجه ولحد البيت كمان...:))

انتظر منكم ترشيحاتكم لما اعجبكم

هناك 26 تعليقًا:

عدى النهار يقول...

معقولة إسكندرية مافيهاش كتب كفاية!! فين أفرع دار المعارف والهيئة العامة للكتاب ودار الهلال... ده يعنى لو المكتبات الخاصة شحيحة. سلسلة إقرأ لها كتب كتير ممتازة وسعرها 5 جنيه وممكن تعملى فيها إشتراك سنوى 36 جنيه فقط داخل مصر كلها. بصى الأول على سلسلة إقرأ قبل ما تكلفي نفسك مصاريف شحن من القاهرة. عندهم كتب فى كل الإتجاهات ولكل الكتاب تقريباً

Ahmed Kamal يقول...

تخيلي و أنا صغير كنت دائما أنتظر زيارة اسكندرية لأشتري كتب الصيف ، و ده لأني كنت بالف على كل المكتبات اللي في شارع صفية زغلول ، و كذلك سعد زغلول فيما بعد ، و في اسكندرية اتعرفت على كتب كتير و كتاب كبار ، و لذلك مش قادر أتخيل إن عندكم في مشكلة في توزيع الكتب ..

غير معرف يقول...

أحلاهم .. اتركونا نعيش ..

أحلى دعوة لنعيش كما عشنا مسلمون ومسيحيون .. مصر تساعنا كلنا ..

زمان الوصل يقول...

صعب جدّا ألاقى حد بيسأل عن ترشيحات كتب و أبقى فمى مغلقا :) طيب تحبّى تقرى فى إيه و أنا أقول لك ترشيحاتى؟

Askandarani يقول...

كرم دي استاذه. و بحس الكتب في الاسكندريه بقت صيفي, خفيف خفيف.

... يقول...

عجبني تعليقك علي لقاء قريبتك
حصللي موقف مشابه زمان
دراما الحياة اجدع من حسن الإمام

خمسة فضفضة يقول...

السلام عليكم ورحمة الله وبركاته

اللي يقرأ كتاب ياما يشوف واللي يقعد علي النت يشوف اكتر

سلام

عين فى الجنة يقول...

ارشح لك

لو مكنتيش قريتيها لسة

واحة الغروب

تأليف بهاء طاهر

من اروع الروايات التى كتبت بالعربية فى السنوات الاخيرة فى رأيى

تحياتى وياترى شهروزة او غادة عاملة ايه فعلا وحشتنا

Camellia Hussein يقول...

سعيدة اني اتعرفت علي مدونتك
علي فكرة الكتب خان مكتبة جميلة اوي في القاهرة في المعادي متهيالي انها هتعجبك ان شاء الله ياريت تزوريها لو نزلتي القاهرة
صحيح:كرم مديرة المكتبة ست مش راجل:)
تحياتي

hussein يقول...

فعلا كرم ست مش راجل :)
لو مقرتيش لعلاء الاسوانى (بس دى صعبه طبعا)فى رأى انه احسن كاتب مصرى و لازم كل الناس تقرالو

غير معرف يقول...

هل لى أن اتشرف برأيك فى موضوع على البوست عندى

أشكرك لكرمك

اسكندراني اوي يقول...

الاخت العزيزه

اولا مبروك لقاء الاشقاء وربنا ما يفرق لكم جمعه ابدااااااا

الصديقه المختفيه كويس انك طمنتينا عليها لاننا كنا فعلا قلقنا بركه انها بخير

معلش انا مفهمتش كويس اصل الفهامه عطلانه
احنا برضه اللي حنرشحك كتب تقرئيها

اه ياااااني

بنت القمر يقول...

عدي النهار
=========
معقول جدا مكتبات محطه الرمل ما فيهاش الا كتب وصفات البتزا واحكام الصلاه والحج
في كتب معينه بدور عليها مش بلاقيها طبعا في بيتنا مجموعه من كتب مكتبه الاسره والطفل بس مثلا نفسي لقرا شيكاغو لعلاء الاسواني نفسي اقرا روايه الفاعل.. نفسي احصل علي نسخه من الحكي فوق مكعبات الرخام لنهي محمود
كده وحاجات تانيه مكتبه دار المعارف
كتبها قديمه وهو ده المعروض
كل زياره لهم نفسي بتتغم
عموما ها ازورهم مره اخيرة لان معايا ليسته احب احصل علي اي شيئ منها
تحياتي واشكرك

بنت القمر يقول...

احمد كمال
-------
طبعا معندناش مشكله في التوزيع بس المشكله انك تسمع عن شيئ من مدونه هنا او هناك وتحاول الحصول عليه ومتعرفش
او يكون الشخص المسئول عن البيع ما سمعش لا عن الكتاب ولا المؤلف!!
فا القاهرة طبعا الاختيارات اكتر لان السوق اكبر
نورتني
اشكرك

بنت القمر يقول...

Sherif
========
الحديث عن الفتنه بقا وقود كافي لاشعال الفتنه في حد ذاته
اهلا بيك
نورتني يا عزيزي

بنت القمر يقول...

زمان الوصل
========
في الادب روايات مش شعر
والتاريخ
والفن....
علي فكرة وحشتيني
كل دي اجازة!!
انتظر ترشيحاتك واقري ردودي الاولي
تحياتي

بنت القمر يقول...

Askandarani
============
اشكرك يا عزيزي
واسفه للسيده كرم
:)
نورتني

بنت القمر يقول...

بثينــــــة
===========
لا وما اقولكيش حياتي فيلم هندي كلها صدف ولا حسن الامام
ولا حتي بشارة واكيم
:)))))
منورة

بنت القمر يقول...

فضفوضه
=======
عندك حق وخصوصا بالنسبه للحديث عن الفتنه
باشوف عجب
وبالنسبه لبنت عمتي كنت صدفه قدريه غريبه فعلا
اول مرة الاقي حسنه حقيقيه للفيس بوك
نورتي يا دكتورة

بنت القمر يقول...

راجي
====
لا مقريتهاش
ها اسأل عنها واحاول اجيبها
اشكرك
وبالنسبه لغاده... بخير وبتهدي سلامها لكل من يسأل عنها
تعيش فترة هادئه ومستقره وسعيده
اشكرك يا باشا وسلامك يوصل لها
نورتني

بنت القمر يقول...

شريف
=======
علم وتم تنفيذة

بنت القمر يقول...

اسكندراني اوي
============
ليه بس يا اسكندراني مفيش حد كبير علي السؤال مهما قري وعرف
:))
طبعا اللي بره مصر لهم عذرهم لا مش متابعين الجديد
اما دعائك لي وقريبتي
اشكرك جدا و ربنا يتقبل
اشكر مرورك وسلامي
لحوائك العزيزة

بنت القمر يقول...

Camellia Hussein
============
اهلا بيكي يا عزيزتي
واسفه علي لخبطه الردود في التعليقات
ان شاء الله لما انزل مصر ها احاول ازورها سعيده انالمدونه عند حسن طنكم وان شاء الله دايما
نورتيني

بنت القمر يقول...

حسين
========
مدونه حضرتك محجوبه!!
تاني مرة احاول الوصول اليها !!عموما اشكرك جدا علي الترشيح وفعلا معنديش شيكاغو للاسواني
حتي يعقوبيان قريتها علي النت مقطعه
حاجه تكسف فعلا
:(
اشكرك يا عزيزي

زمان الوصل يقول...

ربنا يخلّيكى :) أنا باحاول أتغلّب على حالة التبلّد اللىّ أنا فيها و ربنا يكرم

طيب فيه روايه صدرت حديثا عن "دار الشروق" اسمها "عزازيل" .. أنا لم أقرأها بعد لكن سمعت عنها سمع خير و فيه احتمال الروايه تتصادر و هى بتتكلم عن السيره الذاتيه لراهب مصرى فى القران الرابع او الخامس الميلادى لا أذكر على وجه الدقّه .. ممكن حتى تبحثى عنها على "جوجل" عشان تشوفى ما كتب عنها

blackcairorose يقول...

كتبت فى تعليق عند شريف مرة عن المصادفات الغربية اللى وقعتنى فى ناس غابوا عنى من زمان جدا وازاى عترت فيهم على النت رغم انه لم يحصل بينا تواصل

ولكن مجرد اكتشاف مين بقى فين وبيعمل ايه كانت بالنسبة لى موضوع مسلى جدا، وبعضهم كان فيه معلومات تفصيلية عن اولادهم برضه

اسهل وأكثر معلومات ممكن الحصول عليها اذا كان الاشخاص عايشين فى الولايات المتحدة بالذات لان حجم المنشور على النت عن الناس العادية كتير جدا، ده غير لو الواحد دفع فلوس عشان يجيب المعلن والمخفى كمان

بس الحمد لله انا لسه موصلتش لدرجة انى ادفع فلوس عشان اعرف اخبار عن حد لول