تتفرس وجهي وترغب في طرح سؤال لكنها لا تفضل توجيهه مباشره فتراوغرحتي مركز التجميل اللبناني اللي في الشارع اللي ورا البوتيك ارد
- نعم بعمل شعري كل فترة هناك
- دول ممتازين وكل اللي عندهم خبيرات تجميل لبنانيات
- عارفه ... واسعارهم نار!
- شفتي اخر الاخبار دول جابوا خبيرة حواجب!... بترسمها علي الطريقه اللبنانيه... الحاجب رفيع وعالي عن الجفن كده وينور !!!يخلي نظرتك لا تقاوم يا بنتي ما تسيبيش نفسك ده كل الناس بتعملها
-حاضر{اشعر بالضاله والتخلف عن الركب اللبناني المتقدم} اخرج مراة صغيره اجد حواجبي خفيفه متناثرة متعانده باهته اللون ترقد علي بشره بيضاء كالحه اللون لا شكل لها
بعد الظهر
اشاهد بعض الكليبات الميلوداويه فابدا في التركيز علي حواجب الجميلات كلها علي ذات النمط ياإلهي!!!
اين غاده رجب وانغام وعفاف راضي وامال ماهر.... هل عاندن وتمسكن بحواجبهن المصريه يبدو انها فأل سيئ عليهم!!
الصفحات الويبيه ما زالت تنبش في سيره المطربه المغدورة وحزامها الماسي والاخري التي لم تغدر بعد و ذوات الشقق الباريسيه والجبليه ونجمات اعلانات الذهب والمشروبات الغازيه كلهن قد امتلكن حاجبا لبنانيا مميزا هلي يا تري هو فأل سعدهن؟!!!
فضائيات خليجيه تعرض برامج اللبنانيات بصراحه احلي كوني اجمل.. انت اجمل...
ولا سيده مصريه تعرض برنامجا للجمال.... قلبت المؤشر علي الفضائيه المصريه سيده مصريه تعرض برنامج البلدي يوكل.... وها نرجع لاكلنا المصري الجميل.. البصارة والملوخيه الناشفه والشكشوكه ترتدي جلباب شبه السيناوي وتجمع شعرها علي طريقه{يلا بينا انهاردة تنفيض}:))
المساء
كأن انوثتي تتسرب من بين يدي وكأن هرمون الاستروجين تحول الي ندي وكأن التسترون سيخرج من تحت اظافري.... كأن كل العيون تنهشني!! وتصرخ علي طريقه افلام شاهين الحواجب لنا الحواجب لنا احنا لوحدنااا!!!
الحيرة تأكلني... وبعض يمزق بعضي يمزق بعضي... ياإ لهي حياتي تضيع وتتسرب بين يدي لااجد الان ذاتي ولا تستقر خطواتي علي الارض!! هل السبب اني انعزلت عن المسيره النسائيه التقدميه
الحيرة تأكلني... وبعض يمزق بعضي يمزق بعضي... ياإ لهي حياتي تضيع وتتسرب بين يدي لااجد الان ذاتي ولا تستقر خطواتي علي الارض!! هل السبب اني انعزلت عن المسيره النسائيه التقدميه
الو: مدام كارول خبيره التجميل موجوده... عاوزة احدد ميعاد
- اسفه يا فندم المدام مشغوله 15 يوم بعد العيد ممكن تاخدي رقم....وتشرفي تسألي بعد اسبوعين!!
هناك 26 تعليقًا:
إيه النهاية الانهزامية دي
:)
كنا عايزين أقوى من كدة وأكثر ثباتا
عصفور العزيز
-----------
ثباتا ايه؟؟ ده انا مفروض اتداري
هيهيهي
تحياتي
ليه
لسه كتير مصريات متمسكات بحواجبهن
بس انا مش عارفة مين صراحة
تصدقى بقى ان الحواجب الرفيعة اللى على شكل 8 دى بتدى سن اكبر وبتوحى بالشر
هو العيد كده فات عليه اسبوعين ولا لسه
يعنى انتى قابلتى مدام كارول دى ولا لسه حتقابليها
السنتر ده فين؟؟
فى الوطنية؟
انا بسأل عن المانيكير والباديكير متفهمنيش غلط
:)
يابنت الحلال اتمسكى بكونك ست مصريه اصيله احنا نخلينا فمحشى الكرنب والشبشب ابو ورده هههههههههه
وبعدين والله بحسهم عاملين زى الشياطين وهما معلقين حواجبهم فالهوا كدا مفيش احسن من خلقه ربنا
صورة الحاجب اللى انتى حطاها مش حلوة
مش دى الحواجب اللى تعجب الراجل :)
هو انت بجد حتروحى السنتر ده ؟
:)
لا مؤاخذة يعنى فى السؤال
:))
الصبر الصبر... الجلد الجلد..
قولوا ورايا الحواجب المصرية هتفضل غالية عليا..
يا عزيزتى تمسكى بحواجبك اللى خلقها ربنا سواء كانت جميلة أو غير ذلك... على الأقل هتبقى مميزة وواضحة ومختلفة..
الناس ما تصدق تشوف موضة وتجرى كلها وراها.. وفجأة تحس وكأن الستات كلهم كانوا واحدة بس ودخلوها ماكينة زيروكس وطبعوا منها دشليون نسخة!! ماتعرفش تفرق بين عيشة وأم الخير..
زمان كانوا الرجالة يقولوا لما تنطفئ الأنوار فكل النساء سواء.. دلوقتى بقوا كلهن سواء برضك بس فى وضح النهار.. !!
ده غير طبعا إن لعن الله النامصة والمتنمصة..يعنى الصراحة الواحدة مش مستاهلة تخش جهنم عشان كام شعراية
السلام عليكم ورحمة اللهوبركاته
عارفه بتدايق جدا من الناس اللي ماتصدق تلاقي تقليعه وتجري وراها
بيبقي هاين عليا ....... ولا بلاش
:)))))))))
عاشت مصر حره مستقله
:D
أنا أوّل مرّه أعرف إن الحواجب كمان بقى ليها باسبور و إشى لبنانى و إشى مصرى .. لأ جديده فعلا :)
كله كلام ملوش لازمة
مفيش احسن من الجمال الطبيعي
بدون ماكياج
مش عارف إذا كانت الست اللي بتعمل فى نفسها الحاجات الغريبة دي (الحواجب الهلب مثلاً) بتعمل كده علشان دي حاجة بتعجبها وبتستريح لها والا علشان الزن عالدماغ بإن دي الموضة حتى لو كان شكلها وحش؟
مافيش أجمل ولا أريح للنفس من الطبيعي.. حاجةأورجانك كده
:)
معلش ياموني بعيدا عن موضوع الحواجب اللبناني ثانيه واحده بس بعد اذنك
الاستاذ ميدو اللي تفضل شاكرا باعلامنا نحن مجتمع النسوة ان مش دي الحواجب تعجب الراجل ..!!
حقيقي شكرا علي المعلومه .. بس رجاء انك تاخد في الحسبان المرة الجايه يعني قبل اسداء النصيحه والتعميم .. ان مش شرط اي حاجه اي ست تعملها في نفسها او في شكلها بتبقي لمجرد انها تعجب الراجل.. وانها مش هاتحصل علي وسام او رصيدها هايزيد يعني كلما عجبت الراجل(اللي هو المفروض يعني محور الكون بتاعها طبقا لكومنتك الصغير المعبر اللي انت كاتبه ) زياده او اجتذبت اكبر عدد من الرجال المعجبين ..واذا كان البعض كدا فاكيد الكل مش كدا ..لذا ارجو عدم التعميم في التعليق ..
موني ..علي فكرة انا مش ضد الحواجب اللبناني ولا معاها .. انا يمكن بس بتغاظ لما معايير الانوثه بتقل مع الوقت وبيتم حصرها في الشكل بس
ثانيا عايزة اسألك علي البوست الجديد اللي انتي منزلاه ..يعني احنا المفروض مثلا نبعته للبلوجر سبورت باسمنا او نبعت واحد زيه عشان يشوف موضوع البلوج ولا نعمل ايه
والله مش عارفه اقولك ايه
بس
انا زيك ساعات بحتار
ربنا يهدينا ويهدى لبنان
حزينه
بكره الحواجب دى من يوم ما طلعت من كام سنة، وبصراحة عمرى ما شفتها حلوة على أى واحدة، ممكن تبقى اقل وحاشة على ناس عن ناس ولكن شكلها مقيت وفعلا زى ما قيل بتدى نوع من القسوة على الشكل
وعموما مبحبش اللعب فى الحواجب كتير، فاكرة زمان فى السبعينات كانت موضة الحواجب الرفيعة المستديرة مثل حواجب العشرينات من القرن العشرين؟ زى سعاد حسنى فى فيلم اين عقلى؟ برضه محبتهاش، والحواجب الرفيعة بشكل عام بشوفها غير مريحة
بس من ناحية تانية بشوف ان فيه الكتير اللى المصريات مفروض يتعلموه من اللبنانيات بخصوص المظهر وطريقة اللبس فى رأيى وده مش عيب ولا غلط لأن اللبنانيات بيفهموا جدا فى اللبس والموضة، واحتكاكهم بعالم الموضة والثقافة الغربية بشكل عام احتكاك اقوى بكتير من احتكاكنا كمصريين بيها
وده مينفيش برضه ان هناك فروق ثقافية واجتماعية ـ فى رأيى كبيرة ـ بين الست المصرية العادية والست اللبنانية العادية من غير تعميم بتخلى لكل ست طابعها المختلف
بس الست المصرية العادية فعلا بحس انها اتدهورت مظهرا جدا بالمقارنة بالماضى، انا بتكلم عن الست اللى ماشية فى الشارع والمتوسطة، ومبتكلمش على اوساط اجتماعية معينة، التدهور كبير قوى لدرجة انى بحس ان مفيهوش طريق رجوع
ولا ايه؟
جانا
========
لا طبعا... خبيره حواجب ليه يعني ؟؟مش للدرجه دي انا بالنسبه لي الفكرة فانتازيا مش اكتر
وعموما المركز ورا بوتيك لندن مباشره:))
انا حرة
-------
هيهيهيهي
وكمان الجلابيه ام سفرة دي من علامتنا المميزة:))
نورتيني
ميدو
======
استلقي وعدك بقا من نون النسوة:))
ولا مؤاخذه يعني اه طبعا ها اروح عشان مكونش متخلفه عن الركب المتقدم واكون في طليعه الستات او حواجب لبناني:))) نورتني
كليو
=======
الحواجب المصريه غاليه عليا
الحواجب المصريه ها تفضل غاليه عليا
الحواجب المصريه...
نورتيني:))
الفكرة فانتازيا يا كليو
اكيد يعني التسترون مش بيطلع من تحت ضوافري
هيهيهيهي
خمسه فضفضه
=============
ليه يا فضفض كدهوووون
ليه تتخلفي عن الركب السائر ده ربنا كرم ومصر تقدمت وبقينا نجيب خبيرات حواجب الحمد لله احمدك يا رب
عاشت مصر حرة مستقله:D
زمزم
---------
انضمي للركب المتقدم يا قطه
الحقي نفسك يا بنتي
قبل الخبيره ما تروح:))
مهندس مصري
===========
صح تماما
لكن الزن علي الودان بقي واحنا ناقصين عقل ودين وكده فاضل بقي نبقي ناقصين حواجب:))
عاشت مصر حرة وعاشت لبنان حلوة
عدي النهار
=============
لا عشان الزن
ولما الزن بيزيد بتكرة حواجبها الاورجانك:))
وتحس انها متخلفه عن الركب المتقدم
زي الراجل اللي بيلبس بدله بنص كم وهي من ميراث الستينات
يحس نفسه غلط وهو ماشي في الشارع
وخصوصا ان الاعلام والفيديو كليبات وكده
بتروج صورة واحده خلت الستات كلها شبه بعض
بق منفوخ
وحواجب هلب وخدود محقونه رغم ان كل وش ليه تفاصيله الخاصه
لكن الموضه بتخلينا زي اليابانيات
هيهيهي
نورت... ربنا يرزقك بواحده اورجانك علي الاخر
نون
==========
البيت بيتك يا حاجه
كلمي اللي عاوزاه واتناقشي براحتك
2_ معيار الانوثه دلوقت هو الحواجب اللبناني
ها تقاوحي في ايه بس؟؟
وشويه كولاجين في البق والخدود
وسليكون في الاستدارات ومقولكيش بقا المخرجين ها يجروا وراكي:))
بخصوص ابيتاف صح
نعمل كده ونبعت للسابورت بس احنا عملنا ومحدش سال فينا:((
حزينه
=========
مفيش داعي لاي حيره... عليكي بمدام كارول:))
نورتيني
بلاك كايرو
==========
بس الست المصرية العادية فعلا بحس انها اتدهورت مظهرا جدا بالمقارنة بالماضى، انا بتكلم عن الست اللى ماشية فى الشارع والمتوسطة، ومبتكلمش على اوساط اجتماعية معينة، التدهور كبير قوى لدرجة انى بحس ان مفيهوش طريق رجوع
===
هو من ناحيه مفيش رجوع_ مفيش رجوع!!
اشكرك جدا طبعا انك فهمتي المغزي من وراء البوست... الفكرة فانتازيا وان كان هوس الصديقات بكل ما هو لبناني حقيقيا:((
انا بفضل حواجب ناديه لطفي:: في فيلم الناصر او النظارة السوداء.... وطبعا وجه سعاد حسني يحمل... التطور الطبيعي لصناعه الحواجب وموضتها في مصر
نورتيني
يا بنت القمر، شكراً على هذا الموضوع..
انا مقيمة في لبنان، و في صراع دائم لابقاء على الاقل نصف حواجبي (وهي اصلاً بغزارة الشلال وكثافة الغابات وأراها شخصياً في منتهي الجمال). خسارة انه يناقش الموضوع بمنطق لبناني مصري، مع اننا "كلنا في الهوا سوى".. وهو بالحقيقة مشكلة مع صورة منمطة للمرأة تفرضها علينا الفضائيات (وطبعاً الصبايا اللبنانيات في الطليعة!).. يعني معقول، نضطر كنساء بمجتمعاتنا انه نخوض معارك من اجل الابقاء على فردية حواجبنا! وبعدنا حتى لم نبدأ الحديث عن الكعب العالي، المكياج، عملبات التجميل، التحرش.. والله بس تشوفي بنت لبنانية ماشية بالشارع في بيروت بلا مكياج وبلا كعب عالي، بدوت صبغة شعر وعمليات تجميل، اعرفي انها ناضلت طويلا..
وصراحة، احياناً بتكون اصعب اذا مقيمة بلبنان لأنه الرجال العرب مش شايفين من لبنان واللبنانيات غير هيفا وهبه..
إرسال تعليق