الاثنين، أكتوبر 27، 2008

كل الكلمات حمقاء


ارغب ان أقول شيئا ان اتكلم ربما لا اعرف ما الذي ينبغي قوله تحديدا . اتذكر حكمه مالك كل الكلمات حمقاء !!
حقا كل الكلمات المخزونه في مكان بعيد حمقاء.... لا تصل الي الضفة الاخري من الشاطئ!!
تسبح كل الحروف الاليكترونيه علي الشبكه وقد تختفي فجأه بدون اي انذار حامله معها كل الشجن والوهج والذكريات
بدا موسم البلل والمياه الذي امقته بشده فأنا كائن ربيعي يزدهر ويتفتح في الحراره وتحت الشمس.
اول لعنات الشتاء بدأت في الاصابه بالبرد الذي يرفض ان يبارح جسدي الهزيل
مخرجا لسانه لكل الوصفات الطبيعيه كأنه في حاله تمرد وثورة لا تخمدالا بابتلاع المضادالحيوي وقد رضخت لثورته
افتح البلكونه في الصباح فتنزل قطرات الندي علي راسي الحار بفعل البرد واراقب المارة... وعلي النار يستقر البراد الذي تجف مياهه اثناء مكالمه صباحيه طويله و معتاده
العب فيها دور الابنه الباره ا والصديقه المخلصه أوالجارة اللطيفه!
في الصباح يدق صبي المكوجي الجرس طالبا المكوي افتح وفي راسي( دروخه) بفعل الدواء اقذف له بالكيس الراقد خلف باب الشقة بينما جاري يسال الولد عن من ارسله واي مغسله يتبع وعن اسم المعلم الذي يعمل عنده.
يتبرع بالتفسير عبر الكوريدور الممتد بين الشقق : يمكن حرامي محدش يضمن؟؟!!
اندهش ان الفكرة لم تخطر علي بالي
وانني ربما ابادر الاخرين بحسن الظن وليس العكس واتذكر سوء التفاهم السابق مع صديقه الذي لم احظي فيه بتلك المعامله
وكان علي ان اكون متهمه حتي اثبت برائتي
اول ما افعل في الصبح هو فتح بريدي الاليكتروني.. وغالبا ما يطلب مني الكومبيرتر الباس وورد... نادرا ما يتنازل عن طلبه المتكرر كأنه لم يألفني بعد كل تلك الساعات امامه اربت عليه واتأمله فيتشكك في ويصر علي ارضاء الشبكه والتاكد من هويتي!
انتظر بريدا اليكترونيا هاما لا ياتي ولا اعرف من اين سوف ياتي ولا ماذا يحوي لكنه حتما سيكون هاما بالقدر الذي انتظرته به... وسيكون مؤثرا بالقدر الذي اتمني ان يحدثه في حياتي
اتذكر
صديقتي اليكترونيه التي تم تزوير مدونتها واخري اختفت مدونتها واخر تم عمل مدونه اخري للتشهير به .. وجروب فيس بوكي تبخر وظهر مكانه اخر للتشهير باصحاب الجروب الاصلي.. وعده مدونات تشهيريه كانها عرض خاص فوق البيعه الاصليه... اتذكرالحديث عن الهويه الاليكترونيه الذي كتبه هشام.... كيف يجب ان اثبت من انا في الحياه وكيف اثبت انني من انا اليكترونيا؟؟
هل تلك النافذة الصغيره من الحريه البعض لا يستحقونها؟!
معضله التحقق اصبحت معضلتان... ان تتحقق علي الارض وتتحقق اليكترونيا
ان تحافظ علي هويتك من الاختفاء والتشهير والاقتباس.. ان تحظب بالمحبه والرضا والقبول من الاخرين !!
ترقد اوراق الانتساب في احد الادراج ينتظرها موظف شئون الطلبه في كليتي القديمه.
وخلف قرار مواصله الدراسه اسباب لا اعلمها انا شخصيا ولا استطيع تفسيرها لنفسي فضلا عن المحيطين ...
وقدلا يكون هناك اي اسباب سوي الخروج من رتابه دائره الاعتياد
والبحث عن ذات اخري لاتقبع خلف الشاشه.. قد تختفي صدفه اوتمحي او يسطي عليها
اتذكر كلمه كتبتها اخري (في بروفيلها) تقول عن نفسها: ما انا الا عنكبوت صغير من ملايين اخرين علي الشبكه العنكبوتيه.
.. لا ارغب ان اكون عنكبوت صغيرفقط يرسل يوميا كل تلك الكلمات الحمقاء!!

هناك 30 تعليقًا:

mido يقول...

اذا كلمة أخرى حمقاء !
عايز أعرف بس حضرتك بتكتبى قصص ؟
أصل أسلوبك جميل جدا
كلمتى (دار الشروق) قبل كده مثلا؟
ليك مؤلفات؟ نشتريها منين؟
:)

أحمد كمال يقول...

مش عارف ليه لما بتكوني في الحالة دي من الدهشة و التساؤل و الترقب و الألم و القلق بتكتبي أحلى موضوعاتك .. مش أحسن حرفية ، لكن أعلى إحساس .

سؤالك حول الهوية شاغلني ، لأني أيضا أتساءل و أفكر عن الهوية و الطريق و المصير ، و ما كتبته في موضوع وجوه لم يكن إلا قشور ما يموج في عقلي من كلمات ، و لكن زي ما قلتي ساعات بتبقى الكلمات حمقاء .

تحياتي لك

انا حره يقول...

هوا الشتا السبب فكل الافكار دى اصلا

هفضل دايما عند رايى ان انا كمان بكرهه وبعشق الصيف والربيع وشمسهم المنوره

Sherif يقول...

من اجمل ماكتبتى ياقمر ..

منتهى العذوبة والتدفق والتلقائية .. لابد ان يجد هذا طريقه الى الكلمة المطبوعة مرة ثانية .. لاادرى كيف ..

التفاصيل مذهلة حتى المكوجى البائس الذى يمر على كل البيوت ليجيب عن سؤال ممل ومكرر .. انت تبع اى مغسلة ..

الا ترين انها شبه الباسوورد بتاعة الكمبيوتر؟ وانه اذا جه ميت مرة يجب ان يجيب على نفس السؤال ..

الدراسة فعلا تقضى على الرتابة .. وتجدد الذهن

اسلوبك جميل فى صراحته وبساطته الممتنعة

يا مراكبي يقول...

المقال جد رائع فهو ملئ بالفلسفة المستترة وراء المواقف الحياتية اليومية .. لا أخفيك سرا بأن لحظات المرض دائما ما تدفعنا للتأمل .. وهو ما حدث لك هنا .. فخرج إلينا هذا الموضوع الجميل

زمان الوصل يقول...

أوّل مرّه أشوف حد اسكندرانى مش بيحب شتا اسكندريه !! ده انتم بتذلّونا بجمال اسكندريه و روعتها فى الشتا "وهى كده الحقيقه يعنى مفيش كلام" :-)

أحيان المرض بيخلّينا نبص لأشياء بسيطه بشكل حزين شويّه .. بس زى ما قالت التعليقات السابقه لو هتبقى النتيجه رومانتيكيه كده يبقى استحملى عشان خاطرنا .. سلامتك ألف سلامه :-)

mohamed ghalia يقول...

حقا كل الكلمات حمقاء
ويبدو أن للشتاء أثار
موضوع رائع
تحياتى وإعجابى

عاشــــــ النقاب ـقــــة"نونو" يقول...

اسلوبك رائع يا قمر
الف سلامة عليكي
بس تصدقي اني ابدا ما اهتميت لو مدونتي اتسرقت ولا اتشهر بيها ولا ولا هعمل جهد عشان استرجعها او اثبت هويتي او اولكن قلت هسيب اللي عمل اعمال حمقاء وكتب كلمات حمقاء
واقفله الصفحة وبسهولة اعمل غيرها وخليه في حماقته بقى
دمتي بخير
ليمون بقى وزنجبيل وحلبة وعسل ابيض وربنا الشافي
تحياتي

عدى النهار يقول...

دي آخرة القعاد كتير قدام الكومبيوتر وهو مفتوح ، لأ وشبكة عنكوبيتية كمان.. يعني تيارات هوا سخن على بارد جاية من كل ناحية
:)
سلامتك وألف لابأس عليكي

مـحـمـد مـفـيـد يقول...

العيب فينا نحن
نفهم مفهوم الحريه في المطلق ولا نجيد استغلالها

karakib يقول...

حلوة اوي !! ايه الكتابة الرايقة العميقة اوي دي !؟ حلوة بجد يا اماني

ذو النون المصري يقول...

و الله انا فعلا حاسس اني انقسمت نصفين
نصف في الارض و نصف في الاسلاك و الاثير
و لا يمكن ان اتنازل عن نصف الاثير اطلاقا
لا يمكن اغلاق مدونتي او تجاهلها لمده طويله وجودي فيها هو جزء من وجودي الكامل في العالم
تخيلت انها طلبت مني اغلاقها مثلا مقابل البقاء سويا و قلت في نفسي هاعمل ايه؟؟؟؟؟؟
وجدت اني استحاله فعلا اتنازل عن المدونه

خمسة فضفضة يقول...

السلام عليكم ورحمة الله وبركاته

الف سلامة عليك يا بنوتة القمر الجميله

طب كنتي قليلي ابعتلك طلبية زنجبيل بالعسل والليمون وشوية مضادات حيويه علي ما قسم

:)))

الطائر الحزين يقول...

هل نستطيع فصل انفسنا اختياريا من هذه الشبكة العنكبوتية

واقول اختياريا لانه من الجائز ان نبعد مجبرين كانقطاع النت او السفر بداعى العمل

وان اوهن البيوت ولكنه دوما يجربنا اليه و ينفعنا و يضايقنا ولكن لا نستغنى عنه

بنت القمر يقول...

ميدو
========
بكتب قصص... وبحطهم في الكومودينو:))
ربنا يخليك يا رافع معنوياتي

بنت القمر يقول...

احمد كمال
==========
احياناالكلمات حمقاء واحيانا عصيه
واحيانا الاتنين مع بعض!!
عموما اشكرك علي الاطراء انا بس اقعد علي الكيبورد... وارش ميه واقول يا باسط... وزي ما تيجي:))
البوست ده تحديدا حسيت انه مفكك او عدم ثقه في نفسي بسبب البرد!!
الهويه دي بقا قصه!
انا مش انا انا واحد تاني:))
انت تحت الرصد والمتابعه سواء علقت اولا.. احيانا زي ما قلت الكلمات بتبقي عصيه او حمقاء
تحياتي...

بنت القمر يقول...

انا حرة
==========
الصيف= البحر والهوا والشمس والسهر والسفر والنشاط والاجازة بصره يا عزيزتي
تحياتي

بنت القمر يقول...

شريف بيه
=========
ميرسي ميرسي
اخجلتم تواضعنا
االافكار دي كانت زي الخيوط المفككه وعاوزة تتضفر او تتغزل عشان توصل اللي جوايا الحمد لله ان الغزل اعجبك
والفكرة وصلتك!!

واشكر كرمك وزقك

بنت القمر يقول...

المراكبي
=========
اشكرك يا احمد... يا رب عند حسن ظنك دايما

بنت القمر يقول...

ومان الوصل
============
استحمل ومالو... انا الشمعه التي تحترق من اجل الاخرين:)))
علي فكرة انا مش اسكندرانيه... انا قاهريه... شارع الزهراء متفرع من ش جده امام نادي الصيد الدقي
اسكندريه فيها من ايام الجامعه والزواج بعدها بس
لكن روحي قاهريه.. وانت بعشق الاسكندريه... كبلد وليس كسكان
تحياتي

بنت القمر يقول...

mohamed ghalia
=================
اشكرك يا عزيزي... ان شاء الله عند حسن ظن الجميع

بنت القمر يقول...

نونو
=========
يتهيألك كل صفحه من مدونتك وكل تعليق ليه ذكري وشجن مش سهل تبتريه علي ما اظن
اشكر نصيحتك واهتمامك
تحياتي

بنت القمر يقول...

عدي النهار
============
:))))
اشكرك

بنت القمر يقول...

محمد مفيد
=========
كل واحد يخلي باله من جيميله وباسوورده
كل شيئ قابل للاختراق والسرقه والتزوير
تحياتي

بنت القمر يقول...

كراكيب(هاني)
==============
ميرسي ميرسي
اديني ابقعد علي الكيبورد وارش ميه واستفتح وزي ما ربنا يرزق:))
البوست ده تحديدا كنت خايفه منه وحاساه مفكك ومش عارفه رايكم فيه كان ها يكون ايه؟؟
يا رب دايما عند حسن ظن الجميع
نورت

بنت القمر يقول...

نون
========
مالك يا عم شادد علي البنيه من اولها
لا قالت لك لقفل المدونه ولا حاجه
حرام عليك
شويه ها تبيعها عشان المدونه
وشويه تسم بدنها وتقول لها ها اجوز عليكي
يا اخي حرام عليك البنت لسه عروسه
:))
فرفشها كده وشاركها في اهتماما ماتك عشان تحب وتحترم انشغالك بيه عنها
نورت

بنت القمر يقول...

فضفضه
========اخدت كيتوفان وبرادورال وكونجيستال
منفعوش فاخدت فلورست وكيتوفان
منفعوش
اخدت ابيد روكسيل و كيتوفان وكونجيست ال
والحمد لله لو عصرتيني ها انزل كبسولات
ربنا يخليكي

بنت القمر يقول...

الطائر الحزين
============
مش مفروض نبعد طالما مبسوطين هنا
نورت

راجى يقول...

الكلمات حمقاء ؟ اشك
كلمة بجوار كلمة اخرى بجوار كلمات تصنع حياة كاملة
ونحن نصنع هويتنا من الكلمات كما صنعنا الله بكلمة منه تبارك وتعالى
فى البدء كانت الكلمة( كن )

بنت القمر يقول...

يمكن يا راجي ويا ريت ما تكونش الكلمات حمقاء... علي الاقل اللي بهديهالكم هنا