الاثنين، أكتوبر 20، 2008

البوح والفضح

يحمل كلمه البوح في الذهن:(الفضفضه) معني ايجابيا ويعكس قوة وقدرة صاحبها علي الافضاء بمكنونات نفسه.. ومشاركه الاخرين فيها من منطلق قوة وثقه في النفس
بينما الفضح يحمل بفعل الانتهاك وايلام النفس او الاخرين... ينطوي علي كشف الستر وتعريه الذات
بين البوح والفضح تتوه الخيوط الدقيقه الفاصله كثيرا....فلا يعد من الحكمه كشف الذات وتعريتها امام الاخر...لا يعد من العقل{ كتر الكلام }... بل يصبح نزقا وحماقه...

اتنقل يوميا بين الرغبه في البوح والتي تغذيها وبقوة مشاعر الوحده او ثقل المعاناه...فتردني تلك الالام الناتجه عن كشف المستور وترك الذات عاريه للاخر يتلقف هذا البوح بخليط من مشاعر الشفقه او العجز او الشماته احيانا!!
فاؤثر السلامه والجم لساني عن مزيد من البوح الذي يصبح بعدها فضح
وحين التزم بالصمت والوذ بالاستكانه واتمسك بالحكمه القديمه السكوت من ذهب اشعر بنفسي كالمومياء القديمه الملفوفه بشرائط من الكتان ترقد في بئر من الاسرار!!
قد اجاهد نفسي ان استعظم واحاصر تلك الاخبار الصغيرة والحكايات الموجعه ان تنفلت للاخرين حين اجلس مع صديقه او حين يرن الهاتف لمكالمه ليليه طويله
فمن نبوح له يمتلكنا ويعبث بنا يتغلغل في ذاتنا فنتعري امامه تماما وقد ينقلب قاضيا او جلادا
فاتحول الي قطه تلعق جرحها وتواجه وحيده عصف الريح
اثقل الحالات حين يكون الاقرب هو الابعد ان تحتاج الي ان تبوح عن من تحب الي تحب!!
اوان يخرج الاخرنفسه من دائرة النصح اوالتربص او الشفقه او ان اخرج نفسي كمستمعه حين العب هذا الدور مع الاخرين عن الحياد المطلق والنزاهة التامه التي تستحيل احيانا... بين الموقفين لا اجد نفسي مثل الاخرين الذين حسموا اختياراتهم.... وان كان الزمن يحليني الي امرأه تتكلم كثيرا كي لا تقول اي شيئ !!

هناك 31 تعليقًا:

فاتيما يقول...

أمانى ...
أزيك يا ضى القمر
وحشتينى و وحشنى كلامك
أنا من النوع اللى بيفضفض لحد الفوضحية جداً و مش هتفزلك و أقولك مش بعانى أوقات من جلد الآخرين و احكامهم القاسية
لكن هقولك إنى اسعد حالاً بتربيت الآخرين أيضاً على جرحى و محاولة مداوته و لو بأضعف الإيمان ...
يمكن خوفى من التحول الى مومياء هوه ما يجعلنى أشبه بسمكة فى حوض زينة اللى رايح و اللى جاى يتفرج براحته
بس الحرية داخل حوض أرحم ألف مرة من الخنقة داخل شرائط الكتان
مش بقولك وحشنى كلامك ...
دمتى بكل خير

راجى يقول...

من نبوح له يمتلكنا

هذه حكمة بالغة وقول فعلا يحتاج تأمل وتحليل
ولكننا نحتاج بشكل او باخر الى البوح الى شخص ما ، ولقد لاحظت من الخبرة يعنى والاحتكاك بالبشر ان كثيرا من الناس يبوح للغرباء وليس للاحباء ليس بسبب الخوف ان يمتلكنا من نحب ولكن قد يكون البوح الى من نحب يحمله مالا يطيق فنزيده شقاء وتعاسة
فاحيانا اجد سائق التاكسى الذى يعرف اننا سنفترق بعد دقائق ولن نتقابل مرة اخرى يبوح لى بادق الاسرار فى حياته وهكذا فى القطار او المطار او الكافيه او النادى او فى المرور عند تجديد الرخص دائما الغرباء يبوحون بسهولة بمكنون صدوروهم فيشعرون بالراحة لمجرد الشعور بالمشاركة مع شخص اخر
وانا اكره التلفزيون والكمبيوتر والموبايل هذه الاجهزة الثلاثة التى افسدت التواصل المباشر بين الناس
واتذكر ايام الصبا والشباب عندما كنت اتكلم مع الاخرين وانا انظر فى عيونهم وينظرون فى عيناى

ايضا تأمل اخر سطر فى البوست انكى تحولتى الى امرأة تتكلم كثيرا ولا تقول شيئا يجلعنى اندهش من هذا التعبير الجميل الذى يدل على النضج المبكر ( انتى قولتى ان عمرك خمسة وثلاثين سنة بس؟ ) جميل ان ندرك ان اللغة احيانا تكون وسيلة لعدم التواصل اى عكس وظيفتها
كلمة فى ودنك : بطلى سربعة فى الكتابة وراجعى الاخطاء اللغوية والاملائية انتى مستعجلة ليه؟

osama يقول...

صدقت بين كشف المكنون وبين المواراة شعرة. عبرت هنا عنها ببراعة وصدق في آن...

وأظن ان الأمر يتوقف على حسم الموقف مع النفس.. ان نقول باصرار علينا ألا نلتفت كثيراً الى رد الفعل.. طالما نتحدث عن انفسنا.. نتحدث كي نستريح.. كي ننفجر.. كي نتحرر لا ان نقيد انفسنا ....
دمت بكل ود...
خالص تحياتي

بثينــــــة يقول...

بوست رائع
عارفة ليه
لأننا أحيانا بتصادفنا لحظة تجلي وبنقدر نحلل نفسنا صح ونعبر كمان صح
وأحيانا -وهي كثيرة-تفلت منا فكرة لحذرنا الزائد من كشف المستور حتي لو مجرد فكرة
كتبت زمان قصة اسمها الناس صناديق مغلقة .. فانتازيا .. وصلت فيها ان لما واحد فتح صندوقه لصديقه عن غير إرادته انفضحت خيانته له
ساعات صدقيني بيكون الوضع الموميائي أرحم

عجبتني فكرة راجي في سهولة البوح للغرباء ..حقيقية

حلوة الصورة ولو انها منمنمة علي الموبايل

blackcairorose يقول...

الحدود بين البوح والفضح صعبة التمييز وغير مرئية فى رأيى الشخصى جدا، فهى تعتمد على عوامل كثيرة، منها الشخصى ومنها ما هو خاص بالمجتمع

وبالتالى الادانة او الاطراء لعملية الفضح او البوح ايضا تختلف من شخص لثانى

وفى مجتمعنا بشكل عام هناك ادانة مختلفة الدرجات للبوح/الفضح بدرجاته، وفى ظل تزايد التوجه الدينى فى المجتمع أصبحت عملية البوح بدرجاته ليست فقط مدانة اجتماعيا كما كان فى الماضى ولكن أيضا دينيا

فاذا تحدث شخص عن اخطائه فهو يكشف ما ستره الله أو يجاهر بالمعصية، واذا تحدثنا عن اخطاء شخص توفى فاننا نفعل مالا يجوز، وهكذا

وهذا يجعل هناك قضايا ـ من وجهة نظرى بديهية ـ لكن المجتمع يختلف على السماح او عدم السماح او الموافقة او الرفض لاثارتها مثل قضية هند والفيشاوى أو نهى التى تم التحرش بها وانتهاءا بأى مقابلة اعلامية مثلا مع فتاة ليل او أو أو ، فهى كلها تدخل من وجهة نظر البعض بالفضح او الجهر أو أى مسمى آخر

ومن ناحية أخرى وعلى المستوى الشخصى أشعر ان هناك فرقا بين الادانة او الاعجاب ازاء الفضح او البوح الذى يقوم به شخص ما، وبين ما يمكن أن افعله انا

يعنى

انا اعجب بالاشخاص الذين لديهم القدرة على البوح او الفضح دون الاهتمام بما يراه المجتمع أو الآخرون، رغم أنى فى نفس الوقت ليست لدى القدرة على البوح بنفس الدرجة بل أضع عينى الى حد ما على كيف سينظر لى المجتمع او الاخرون فى الحياة الواقعية

هذا الاعجاب ليس منصبا على مضمون افعال الاخرين، بل بدرجة اكبر على القدرة عن الخروج عن المعتاد والمعروف والمألوف بل والمحفوظ فى المجتمع

لا أدرى يا بنت القمر هل خرجت بره الموضوع ام انا داخله

على كل

انا قرأت تدوينتك السابقة أمس بخصوص النماذج المشرفة للمرأة ولكن لأنه كان لدى كلام كثير فيها كنت قد قررت التعليق عليها اليوم، ولكنك اليوم فاجأتينى بتدوينه جديدة!! على كل حقى محفوظ فى الرد بعدين

Sherif يقول...

فى معظم الاحيان نخشى أن يمتلكنا أحد ..

ولهذا كانت الحيلة القديمة أن نحكى على لسان واحد تانى ..
لى واحد صاحبى .....
أو لى واحدة قريبتى .... وتلك حيلة أصبحت ساذجة الآن لأن التفاصيل الدقيقة والمشاعر لايستطيعها الا صاحبها الاصلى ..

لكن البوح احتياج حقيقى لكل واحد .. ويمكنك عمله دون التطرق الى درجة الفضح ..

أما العقلاء فهم يعرفون جيدا انهم بشر .. وغيرهم كذلك .. ومايعتبره الكثيرون غريبا وشاذا هو وارد فى هذه الحياة .. وعليك قبل ان يكون على غيرك .. كأن يتحدث واحد عن ابن غيره الذى انزلق الى الادمان .. لأ .. وابنك أيضا وارد ان ينزلق لانه بشر كغيره .. من هنا يجئ التحرج ..

الانسان الواثق العاقل يرى الجميع والمقربين بصفة خاصة من نظارة المحامى .. لاالقاضى أو الجلاد .. لانه يحاول التماس العذر قبل القاء اللوم .. فما أسهل القاء اللوم .. لكن هذا لن يجدى .. ولن يساعد .. كما انه لايستثنى نفسه عنهم ..

موضوعاتك جميلة ولاتخلو من غرابة ياقمر .. وكما قلت .. أنا أشفق عليك من تفكيرك المشحوذ دوما .. دون أن تمنحيه أجازة

زمان الوصل يقول...

what are good friends for
إذا لم يكن من أجل الاستماع المخلص دون إدانه أو أحكام مسبقه !!
يمكن عشان كده الأصدقاء الحقيقيين عمله نادره مش لازم الواحد يفرّط فيها بأى تمن :(

شغف يقول...

:)

None يقول...

حلوه اوي يا اماني بجد
:)

بنت القمر يقول...

فاتيما
=======
يمكن خوفى من التحول الى مومياء هوه ما يجعلنى أشبه بسمكة فى حوض زينة اللى رايح و اللى جاى يتفرج براحته
-----------------
المساله مساله اختيارت بحته ومع كل ما يظهر من السمكه الملونه فيبقي الكثير خافيا
:))
نورتي....تحياتي

بنت القمر يقول...

راجي
========
اولا اوعدك البوست ده ها يقعد حبه والاخطاء الاملائيه لاني بكتب بسرعه مريعه عشان انت عارف ورايا 1000000 حاجه
بس حقيقي اسفه ها احول اراجع اكتر من مرة
سني الحقيقي في البروفيل اللي كل معلوماته صحيحه تماما:))
36 :(( سنه
نورتني ومتفقه معاك تماما
وها اعتبر اطرائك... عربون صلح بعد المعركه الاخيره
:D:D

بنت القمر يقول...

اسامه
=========
اشكرك
علي تلك الشعرة نحيا جميعا
بين الرغبه في البوح وحساب الحسابات
:)

بنت القمر يقول...

بثينه
==========
ها ادور علي القصه ويا ريت اللينك ينوبك ثواب
:))
الوضع الموميائي بيكون قمه العقل وايثار للسلامه... بس اللي يقدر عليه!!!
اشكر اطرائك يا جميله

راجى يقول...

هو احنا اتعاركنا ؟ انا موش فاكر !!!
احنا اصدقاء طول الوقت
الستات دول حاجة غريبة جدا:)))

بنت القمر يقول...

بلاك كايرو
============
التعليقات بتوصلني علي الميل واحيانا بتجيني تعليقات علي بوستات قديمه براحتك علقي ولا يهمك كل حاجه بتوصلني وبهتم بكل كلمه بتتكتب لي وليها احترامه
واوعدك اني ها اسيب البوست ده شويه
:))
- بالنسبه للبوح المرتبط باستفزاز المجتمع او مواجهته انا ها اقولك وجهة نظري المتواضعه
الحريه.... اي حريه ... بيكون لها تمن!!
واالي عاوز يمتلك حريته تماما ويكون حر في اختياراته تماما وقناعاته
من ناحيه الميول والاعتقاد واللبس والاراء.. الخ
مهما قلنا ان المجتمع محافظ او متدين او متخلف
بس بنفضل عايشين فيه ومنقدرش نغيره تبعا لاهوائنا بشكل مباشر
عشان تمارسي كامل حريتك وتواجهي المجتمع ده لازم بتدفعي ضريبه منها الرفض او النبذ اوالاقصاء!!
من حقك جدااا تلبسي ميني جيب
لكن اكيد اختيارك ليه تمن انتي بتدفعيه والتمن ده بيكون دم
قيسي بقا علي المثل ده بقيه الاختيارت والاعتقادات
سواء بحتي او او فضحتي هذا الاختيار التمن والمسئوليه بتكون ليكي وعليكي
اما انك تعيشي بشخصيه مزدوجه تعيش في صورة وتعتقد شيء اخر فهو العذاب بعينه... ولكن ده لا يندرج تحت نسمي الحريه ابدا
كنت اتمني يكون في نافذه للتواصل خارج مربع التعليقات
لان الكلمات مقيده(بسبب علانيتها)... باحترامي لخصوصيتك ولحريتك في اختيارتك وكتاباتك وزوراك....
دمتي بكل خير وود
واهلا اي وقت... علي اي موضوع

بنت القمر يقول...

شريف
===========
والله يا شريف انا مش بقول صاحبتي ولا بنت خالتي انا في لحظه معينه حين يثقل الحمل جدا اقوم بفك شرائط الكتان وانا ونصيبي!!
:))
با رب تكون اختياراتي ومواضيعي عند حسن ظنك... وتنول اعجابكم جميعا
نورتني وتحياتي

بنت القمر يقول...

زمزم
========
طبعا الصديق الحقيقي موجود... اللي بيعبر فوق عوامل الغيرة والمنافسه وحب الذات والرغبه في المريسه والسيطرةويلتزم بالامانه والعقل والحكمه والثقه وايثار الغير ورجاحه العقل وحفظ السر والامانه
اكيد موجود!!!
سلمي لي عليه
:D:D

بنت القمر يقول...

شغف
========
كويس انك مبسوطه يا ست البنات يا كسلانه:))

بنت القمر يقول...

نون
========
كلك زوق يا سارة:))

بنت القمر يقول...

راجي
=========
طبعا يا بيه... انت انسان محترم وصديق غالي...
اهو بتخيل معركه... عشان اتخيل صلح
يا عم سيبني اتخيل
:D:D

سارة نجاتى يقول...

و الله يا بنت القمر
أنت اتكلمتى فى موضوع أنا أعانى منه شخصيا ساعات ببوح لدرجة العبط , و ساعات بعمل زيك و أتكلم كتير عشان لا أقول شىء معين , و فى النهاية برضه الناس بتكون فكرة عندى , لما بسكت بحس أن أنا ليئمة , و أن أنا مش أنا .

تحياتى
سارة

قوس قزح يقول...

دايما كنت اسمع ان السر اللى يخرج من بين اتنين بيكون خلاص مش سر

و اصبحت اقتنع بالمقولة دى جدا

و الاتنين هم انا و نفسى

و البوح ما هو الا بداية الطريق لفضح الاسرار

طيب و على ايه
ما الطيب احسن و نكتفى بالسمع بس
و لو طقينا هنموت و وقتها مش هتفرق معنا لا الاسرار و لا غيرها :)

blackcairorose يقول...

بنت القمر

رغم انى لسه الصبح بس لما قريت تعليقك مقدرتش استنى عليه!!

معاكى مائة بالمائة ان لكل شىء ثمن، ولكن اشعر ـ وقد أكون مخطئة ـ أنك تنظرى لموضوع الثمن فقط من جهة الذى يدفع وليس من جهة من يقوم بقبض الثمن

بمعنى

من يحدد الثمن؟ وهل هذا الثمن صحيح؟ وهل هذا الثمن لا يجعلنا نشعر أن هناك ظلم فى قيمته؟ أليس من حقنا المطالبة بتغيير الثمن أو على الاقل العمل على تغيير الثمن؟ أو أضعف الايمان التعبير عن ان هذا الثمن غير عادل تجاه المدفوع فيه؟

اذا سارت نهى رشدى فى الشارع الان وتطاول عليها شاب باللسان مذكرا اياها بمن لا مس صدرها، هل نقول فقط انها تدفع ثمن جرائتها وخروجها عن اعراف المجتمع الصامت ازاء التحرش؟

أم على الاقل نوجه ادانتنا لهذا الذى تطاول بلسانه ونؤيدها وندعمها ونؤيد ما فعلته، ونرفض الثمن الذى يضعه عليه المجتمع ـ او بالادق فئات كبيرة من المجتمع ـ ؟؟

الثمن سندفعه سندفعه اعلم ذلك ولكن قبول فكرة وقيمة الثمن ـ سواء من قبل الذى يدفعه او الشخص المحايد الذى يرى الآخرين يدفعون الثمن وهو صامت ـ اعتقد أنه موقف ظالم وغير صحيح

اما بالنسبة لازدواج المواقف

اتذكر أننى علقت عندى مرة على هذه الملحوظة ولكن لا اتذكر اذا كانت ردا على تعليق لكى يا بنت القمر ام شخص آخر وضربت امثلة عديدة باشياء أعجب بها لكنها تختلف عما أراه أو ما اعتقد به ولا أرى تناقضا فى ذلك

بدءا من الترانيم الكاثوليكية وشعورى بجمالها ورهبتها رغم ديانتى المسلمة والتى سترى ـ من وجهة نظر المحافظين ـ تناقضا بل وخروجا عن الدين فى هذا الاعجاب، ومع ذلك فانا استمع واحب الترانيم الكاثوليكية بل واحفظ بعضا منها دون أن أشعر ان هذا يقلل من ايمانى ودرجة التزامى ـ أيا كانت ـ بدينى

وصديقتى التى يثير لسانها الفالت وصراحتها فى الحديث عن الجنس اندهاشى وجزء من اعجابى بهذه الجراءة دون أن يعنى ذلك أننى على تقليدها أو بالاحرى ان شخصيتى تتسق مع هذا الاسلوب، وربما حتى لو حاولت تقليدها فى الحديث لن يتقبل الاخرون منى هذا الاسلوب وسيرونه فجا فى حين انهم اكثر تقبلا لاسلوبها

أو المحجبة بإيمان والتى تعيش فى الغرب والتى ارى فى تمسكها بما تؤمن به رغم صعوبة التأقلم مع مجتمه غالبيته العظمى تندهش لهذا الزى، ورغم أننى أنا نفسى لا اتخيل للحظة أننى يمكن أن أرتديه ومع ذلك يظل اعجابى بقوة ايمانها بما تفعله وعدم اهتمامها بكيف يراها الآخرون

صدقينى مئات الامثلة الاخرى

تماما كما اعجب بفتاه ترتدى اللون الاصفر لأنه يليق بها فى حين أننى كسمراء اشعر ان هذا اللون خاصة اذا كان فاقعا لا يليق على

أو الشعر الاشقر

أو

أو

أو

آمل لو كان رأيى الآن أكثر وضوحا

واطيب تحية صباحية

Yasser_best يقول...

نحن لا نكون أنفسنا إلا حين نبوح بصدق عن الذات المغلقة بامتياز كأنها داخل محارة في أعماق البحر

البعض يعتبر البوح فضحاً وكشفاً للأسرار المحظورة
هنا يكون الخوف حكماً في مباراة الحياة

والبعض الآخر يرى البوح تطهراً..وربما وقفة مع النفس، كي ندفن الأيام والجروح في قبور تليق بها

والجراح لا تندمل إلا حين نعترف بوجودها

someone in life يقول...

مش عارفة ليه الكل بينصب محاكم دلوقت ليه مش فيه حرية
فيه ناس اساتذة انها تشد المعلومات و بالحاح شديد بينما لما تسأليها عن حاجة بتكون اجاباتها مايعه .. ده بقي اسمه ايه؟ اللي مش عاوز يقول و يفضفض ياريت مش يسأل كثير و يحترم خصوصيات الاخرين .. كل واحد ليه وجهة نظر في حياته
ممكن نقول حاجات خاصة و فيه حاجات نصر نخفيها ياريت الاخرين مش يلحوا عليها من وقت لوقت و الا مدافع تضرب صواريخ و محاكم تقام ... حرية الاخرين صارت معدومه لكن لو اي حد قرب من حريتك الشخصيه الاظافر تطلع ... صح و لا ايه

بنت القمر يقول...

ساره نجاتي
==============
عادي كلنا كده:))
نورتي

بنت القمر يقول...

قوس قزح
=========== اكيد بس الموضوع قدرات ولحظات ضعف بتحتاج الانسان فيها الي الثرثره مهما كانت العواقب
نورتي

بنت القمر يقول...

بلاك كايرو
==============
معلش يا جميله عطلتك عن شغلك
اولا كويس جدا اننا متفقين علي فكرة الثمن بعد كده تناقش في قصه من يدفع ومن يقبض
انتي بتجيبي مثل واضح وايجابي علي نهي رشدي وموقف لا يحتاج الا ان اقول الله ينور
خلي بالك لو النهايه مختلفة كان ممكن يكون الوضع مختلف
انتظري تدوينتي القادمه
انا ها اقولك مثل ابسط جدا وبدون تعقيدات
لو انا بحب امشي حافيه... وبدون مشد صدر في البيت
ونفسي امشي كده في الشارع
او مرتاحه في البيجامه وشايفه انه من حقي التام اخرج ببيجامة
0 هنا مش بكلم عن عري وبطيخ مجرد بيجامه او حافيه حق اهبل وعبيط
:))
الناس والمجتمع ها يقول الست دي اتجننت ورغم ان المشي حافيه ده غير مؤذي اطلاقا لاي فرد لي وجه البسيطه لسبب انا بس رجلي اللي ها تتوسخ:))
الفعل ده علي بساطته ها تلاقيه بيضرب في اعراف المجتمع بقوة ولازم لما اعمله اتوقع النتيجه من السخريه الي الاحتقار الي النبذ وغيره
انا مش ها ادور هنا علي كائن هلامي واقول له انت ظالم لانك بتعاقبني علي حريتي اللي مش بتضرك
لكن العرف الاجتماعي والعقل الجمعي للمجتمع... ها اواجه بقوة وها ادفع التمن مهما قلت انه ظالم ومبالغ فيه لازماحسب حسابه واعرف قدرتي علي التحمل اولا وبعدها اقررها اعمل ايه؟؟
صدقيني يا روز
كلنا بنخضع بصورة او بدرجه ما الي الضغوط دي مهما ادعينا من تحرر!!!
بالنسبه للازدوج اللي كنت اقصده هنا
انك تؤمني بمبدأ اودين او ثقافه او.. او..
تخفي ده عشان فكرة ان البوح سوف يفضي الي الفضح يعني ب تعتنقي فكرة وما تقدريش تعلينيها
ده اللي كنت اقصده...
وهو برضه نوع من الحريه المنقوصه
نورتيني وتحياتي

بنت القمر يقول...

ياسر
==========
اوافقك.. تماما ان البوح هو تحجيم للجروح ومواجهه لها
كل الفكرة انه يحتاج لشجاعه فائقه جداا
بالاضافه الي انه يحتاج الي قوة ان ندرك ان ما نبوح به وحش قد قتلناه تماما ولم نعهد به الي اخرين
ليبتزونا او يهاجمونا به وقتما شاؤوا
نورت المدونه واتمني تشريفك لاحقا

بنت القمر يقول...

سام ون ان لايف
===================
صح طبعا؟؟ بس مين الناس الوحشه دي اللي مزعلينك اوي كده؟؟
قوليلي بس وانا اموت هملك
تحياتي:))

كراكيب عادل يقول...

ساعات بنحتاج نفضفض ... وساعات بنندم اننا فضفضنا

علي حسب نوع الفضفضة ووقتها ومع مين

بس فعلا تعرية النفس اصعب بكتير