الأحد، سبتمبر 02، 2007

هو الريس مات؟؟؟؟



الحاديه عشرة صباحا ماما :الو
انا : الو
ماما:سمعتى الريس تعبان في جدا في باريس
انا: ما سمعتش
ماما:دا خبر جامدكل الناس بتقول رافعين حاله الطوارئ فى البلد
انا:ربنا يستر
الواحدة ظهرانا بكلم صاحبتي ايمان: سمعت الريس تعبان في باريس
ايمان : يا بنتى بيقولوا مات اكلينيكيا ورجعوه مصر خلاص حالته ميئوس منها بس غريبه مش كدا
انا:لكل بشر نهايه...ما يعظمش على ربنا ولكل انسان نهايه!!ا
السابعه مساء ايمان:الو
انا :الو
ايمان:بعتوا للناس في النادى ماسجز على الموبايل ان الريس بخير وان مرضه اشاعه

انا:كله هيبان
الحاديه عشرة مساء:ايمان:عمرو اديب بيقول الريس بخير وها يقابل القذافي بكرة
انا: دا الاشاعه قويه بقا
ايمان:يابنتى لازم يريهولنا ما يسيبوش الناس كدا
انا يا ستى ما هو بشر ومش ها يخلد وكلنا هنموت ...باي بانقباض
حاله من التوهان والهيستيريا بسبب اخبار صحه الريس الذي جاوز السبعين معرض للموت والمرض وكل ما هو عارض بشري
حاله هيستريا بغض النظر عن المشاعر نحو شخصه وحبنا او كرهنا ليه....حاله هلع وذعرعلى الرئيس الحاكم الفرعون الاله المرتبط فى وجداننا وجودنا كشعب بمصيره

حاله الوطن المرتهن امنه ووجوده ببشر

حاله عقم سياسي وفكري تجعلنا لا نعرف سواه بعد حضاره 7000 سنه الناس لا تعرف اذا مات الرئيس بسكته قلبيه ليلا من سيحكم في الصباح فتتلقفها الاشاعات بين اكترها معقوليه سيخلفه رئيس المخابرات واكترها تخريفا ان القادم نجيب ساويرس الذي دفع للخارج ومساله رئاسته ماهى الا مساله وقت!!!ا

مصيرنا مرتهن بالشائعه ومستقبلنا يغفله الضباب كأن مصر عجزت تلاتين سنه عن انجاب بديل يشعر الناس بالامن حتى لو خابت ظنونها في هذا البديل لكى الله يا مصر!!!ا

هناك 19 تعليقًا:

اسكندراني في الغربة يقول...

صديق ليا اتصل بيا الساعة 4 صباحا علشان يقولوا الخبر دة
وكان ردي الناس دي مش بتموت(استغفر الله
وبعد مرور سريع على الجزيرة و العربية و السي ان ان
حسيت انها بالونة اختبار للشعب
وطبعا شعبنا اللطيف المهاود معملش حاجة
ومش حيعمل
------
طبعا انتوا معاكوا عنواني و ارقامي لو ملقتوش حد في مصر يحكم
ممكن اتنازل و اتعطف وافكر في الموضوع دة

فى القلب يقول...

بعد الضهر جميل ولذيذ ورايق على عيونك يا جميل
أول حاجه على موضوع الرابطه
أحلفلك يا قمر بسماها وبتربها
أنها مش للسوق السودا
دى للبيضه أنا
وملتليش يا ٌمر غير حلايب بعد الحب ده كله
بقى أقولك يا جميل عندى حاله شبه حاله ديق التنفس
تبعتنى حته حررررررررر
طب أنا راضى بأى زقاق جنبك فى أسكندريه


تانى حاجه أنا سمعت أمس تعليق من مدون خلانى أضحك نصف ساعه
ألى يحكم عمى وألى يجوز أمى أقوله يا عمى

يلللللللللللللا المركب ألى تودى

ونشوف عمنا ألى جى شكله أيه
عندك حبه عصير برتقال أحسن حاسه الدنيا حر

شـــــهــــروزة يقول...

مات؟؟
لا يا شيخة؟؟
مستحيل
هو الريس بيموت زينا؟؟؟


دى مقولة ماما من يومين بالضبط



فنجلة فى العينين وبحلقة وفتح بوق باذبهلال
دة أنا

أمى اللى عاصرت تلات رؤساء بدءا" من ناصر لحد دلوقتى
بقا عندها يقين أن الرئيس حي لا يموت



((وش عليه حالة اشمئناط حاد))
بعد ما عرفت الناس بتفكر فيه ازاى

بنت القمر يقول...

اسكندرانى فى الغربه
يعنى تفكير عريب انها بالونه اختبار
ليه هما متوقعين الناس تعمل ايه تحتل مبني الرئاسه مثلا!!وبالنسبه لحكايه انك تتولى الحكم وليه انت بقا طب ما اتولاه بقا والله اخليها لكم جنه ههههههه

بنت القمر يقول...

في القلب
يا روحى يا حبي
بعد الشر على قلبك بس انتى من الكوادر القويه الهامه عشان كدا قلت انتى اللى تنفعي في حلا يب تانيا متخاا فيش برضه فيها حوافز وبدل انتقال
بالنسبه لعصير البرتقال الموجود يا روحى بتاع جهينه محفوظ يعنى مفيش فريش بس في عصير باميه تحبي؟؟؟؟ههههههه

بنت القمر يقول...

شهروزنى بجد ماما قالت كدة؟؟؟؟ ياةة يبقا انا ماما او متقمصه روحها وانتى بنتى وبما انك بنتى وانا بنت القمر تبقي انتى بنت بنت القمر
هههههههههههههههههه
شفتى لما تطلب معايا فلفسه ببقا سكرررر طحن!! وبعدين الريس بيموت تخيلى!!ا
وبعدين مامتك شهدت تلات رؤساء مالك فرحانه فيها ؟؟اهى على الاقل عرفت التغيير حبه.. وانتى الدور والباقي عليكى تلاقيكى من ايام الطلعه الجويه ودا اخرك.. اه يا شعب ما يطمرش فيه حاجه.. قومى يا بت واحد نسكافيه الادماغي فوتت!!!!ا

alo2ah يقول...

أهلا .. فيكي .
هل لي كفلسطينية أن أترك هنا تعليقا ما -متعاطفا مع أهل مصر - أختاه كلنا في نفس الضائقة ..
وبعدين لما يموت -ادام الله عزه - انتي عارفة يجي بداله واحد أسوأ ؟.
احمدوا ربكم يا جماعة ..

ادام الله عز الرئيس ..!!

Esmat يقول...

أنا عرفت من المصرى اليوم إن الريس بقى له فترة مش بيظهر و إشاعات كتير مالية مصر إن حالته مش تمام- قلبى اتنطط من الفرح وقولت لزوجى العزيز قالى ههههههها لا ده كلام فارغ الريس لا يتعب ولا يموت قبل ما يطمن عليناواحد واحد- الاوليدفن ال 75 مليون مصرى وبعد كده يبقى يفكر

عاليا حليم يقول...

مبروك على التجديد ده
ربنا يشفيه اذا كان عيان و يرحمه اذا كان انتقل للدار الاخرة

بنت القمر يقول...

alo2ah
هلا بيكى في المدونه نورتي ياجميله تصدقي ان وجهه نظرك جدير بالتفكير والاحترام وخصوصا اذا اخدنا في الاعتبار التجربه الفلسطينيه والتى تعتبر التجربه الديمقراطيه الوحيدة والتى انتهت بفوز حماس ثم انقلب الوضع الى اقتتال وحرب اهليه وماساة يعنى اللى كان مضايق من حكم ابو عمار القبلي الابوى ممكن يراجع تفكيره الان الف مرة ان الغد ممكن ان لايحمل سوى الاسواء

بنت القمر يقول...

قسمت
قريتي فين؟؟؟ المصري اليوم اخص عليكى مكنتش اعرف انك من بتوع الجرايد الصفراء ما لها يعنى الجمهوريه والمساء
وبعدين فرحانا على ايه؟؟؟ولو الريس جرا له حاجه ها تعضوا في بوز اللحاف!!!ا واسألي زوجك العزيز هوا الي عارف قيمه الريس والله راجل كويس وتمرت فيه العشرة
مكنتش عارفه انك كدا لا لا من جوا مش ابيض
هههههههههههههههههه تحياتى يا قمر

بنت القمر يقول...

عاليا حليم
الهم لاشماته فى المرض ولا الموت بس ايه رايك فى الجو الجديد دا بحر ومركب وسما زرقا وداليدا جو جامد يعنى عشان المطرح يعجبكم اعمل ايه بقا؟؟بحبكم وطالباتكوا اوامر يا افندم تحياتى صديقتى

سلامٌ عليكِ يقول...

على رأى عادل إمام فى مسرحية الزعيم
: هو فيه ريس بيموت يا باشا؟؟؟
وبعدين احنا راضيين ان ربنا يتولانا مش عايزينه لا هو ولا غيره
يااااااااااااااربببب
قرب البعيد

mohand يقول...

السلام عليكم

احب اقولك اني سمعت الاشاعه دي
وبعدها بشويه شوفت خبر في التلفزيون المصري مصور والريس في احدي المصانع مش عارف بيزورها لسبب كده

قولت الخبر اشاعه قالولي لا من الارشيف
ومتوقعتش ابدا ان الخبر صحيح
لانها مش سايبه قوي كده

لو الريس مات بالليل رئيس مجلس الشعب هو اللي بيحكم
اعتقد ان الدستور بينص علي كده

مش عارف بعد التعديل نائب الريس هيحكم ولا لا ومعتقدش ان فيه نائب اصلا


انا شخصيا ارشح الاستاذ عمرو موسي بعده

ولو هو مرشحش نفسه هروحله مخصوص اقوله رشح نفسك وانا وراك
ويكفيك تبداء بواحد من الشعب

ربنا يديله الصحه عمرو موسي ويصطبر علي ما بلاه الله

تحياتي

بنت القمر يقول...

سلام عليك
اهلا وسهلا فعلا ربنا يتولانا برحمته وقادم الايام يكون افضل يا رب تحياتى

بنت القمر يقول...

مهند عمرو موسي اشك بعد تجربته فى الجامعه العربيهانه يوافق وعموما مصر فيها كفاءات كتير المهم تاخد فرصه حقيقيه وبعدين اعتقد حكايه رئيس مجلس الشعب بتكون مؤقته لحد اختيار رئيس جديد وبرضه لبيضه ولا الفرخه ما وقتها لسه هاندور على واحد يمسك البلد؟؟دا يبقا حرام سياسه اخر لحظه يعنى؟؟؟

other_things يقول...

على فكرة ..هوا فيه احتمالين ..يا إما هوا تعبان بجد..وهيموت

يا إما..بيشوف رد الشعب..ويدرسه ..

بنت القمر يقول...

اذر ثينجس
فعلا والاحتمال التانى بيشوف رد فعل الشعب وبرضه ها يموت
بس اعتقد الاحتمال الاول اقوى تحياتى

الفتى رحال يقول...

يا جماعه مفيش حد مش بيموت
كلنا هنفلسع

بس المشكله مش فى كده
المشكله ان الريس اللى احنا عاصرناه ده سواء بنحبه او بنكرهه

انا من وجهه نظرى انه احسن من غيره بكتير
على الأقل عرفنا وعرفناه
وزى ما كتير بيقول
كفايه انه لحد دلوقتى مخلى البلد بدون حرب بعدين عايز اقول حاجه انا مكنتش مقتنع بيها بس اقتنعت
الريس ده شبعان
او بمعنى اصح شبع
اللى حوليه هما اللى بيسرقوا بدون علمه والله اعلم
دلوقتى يجى دور كلمه مين عارف اللى جى هيكون مفجوع اد ايه وينشفها اكتر ما هى ناشفه
انا الحمد لله خريج المعهد العالى للحاسب الألى ونظم البرمجه والمعلومات (( مبرمج)) عارفين بشتغل ايه نقاش ودى مش المهنه الوحيده اللى بمارسها

اكتر من مهنه
<<< سبع صنايع زى ما بيقولوا

بجد مش هزار
وده بسبب حكومه مش عارفه تظبط شى
الله اعلم اللى هيجى هينشفها ويخربها اكتر ما هى خربانه ولا لا
ويا عالم بسببه هنلاقى حتى شغل فى النقاشه ولا لا وعجبى