الأحد، مارس 02، 2008

اقر واعترف..امام الله

اقر واعترف اني معنديش مشاكل ولا حساسيات ضد الاخوة المسيحيين تحديدا
اقر واعترف ان علاقتي بالمسيحيين طيبه في المجمل اني اتعامل مع كل انسان كحاله منفصله
بعضهم بحبهم وبعضهم بكرههم عمي
اقر واعترف اني حزنت لما حصل للسيده وفاء قسطنطين وتقهمت مشاعر المتظاهرين لتسليمها
اقر واعترف اني حزنت لظهور حالات من المتحولين الي المسيحيه زي حجازي واعترف اني اعتقدت في صميم قلبي انه افاق او انتهازي قبل ما يكتشفوا كده
اقر واعترف ان تسهيل باب التحول من دين لاخر ها يفتح علي البلد بركان مشاكل طائفيه واجتماعيهلا حصر لها بدون لازمه
اقر واعترف اني بحب ناديه وماريان واحلام المسيحييات وباكل وبشرب في بيوتهم ومش بخاف انهم يحطولي حاجه في العصير
اقر اني ا تعزمت عند ماريان وعملت لي اكل فطاري وهي صايمه ولما دقت الاكل الصيامي لقيته خنيق اوي ربنا يعينهم
اقر واعترف ان المسلمه اللي مش بتشرب حاجه في بيت المسيحيه بتجرح شعورها احيانا المسيحية بتتقمص بدون لازمه خصوصا لو المسلمه معدتها بتوجعها او صايمه او مقاطعه البيبس مثلا
اقر واعترف ان بعض المسلمين بيقرفوا او بيستحرموا يشربوا حاجه من المسيحيين عشان معندهمش احكام طهارة من العلاقات الحميمه
اقر واعترف ان اجارتي المسيحيه تحبني حب صادق كبنتها تماما.. وانا احبها كأمي واستشيرها في ادق خصوصياتي رغم فرق السن واختلاف الدين
اقرواعترف اني اكره الراهبه مريم مديرة مدرسه بنتي من صميم قلبي لانها متعصبه جدا وقالت لبنتي في طابور الصباح ايام احداث كنيسه اسكندريه ان كل بنت مسلمه لازم تتأسف لكل بنت مسيحيه عن افعال الارهاب اللي عملوها المسلمين ان مصر اصلا بلد المسيحيين وعيب الضيف المسلم يعمل كده في صاحب البيت المسيحي!! واقر ان حكايه البلد بلدنا بتجنني وتنرفزني الي درجه االعته!!
اقر واعترف اني اكره الراهبه مريم الكاتوليكيه لانها تجبر بنات ناديه الارثوذكس ياخدوا حصه الدين في بدروم المدرسه..بحجه ان الارثوذكس بيرموا قشر لبان وكياس شيبسي في الكنيسهّ!!!
انها نموذج وحاله تستحق الدراسه لو ملقيتش حد تتعصب ضده تتعصب ضد نفسها
اقر واعترف ان التعليم الرهبني في مصرفي رأيي بقا مش زي زمان ايام الاجانب وانحدر بعد ما مسكوه المصريين
اقر واعترف بكره منظر المسيحيين ايام الكليه وهما واقفين شلل مع بعض ومش بيختلطوا بالمسلمين زي اعضاء الجماعه السريه
اكره رغبه البعض في اعلان هويه مختلفه بلازمه ومن غير لازمه
زي حكايه السمكه اللي حطوها علي العربيات زي المسلمين ما بيحطوا لا اله الا اله
واقر واعترف ان اكبر مشكله للمسيحيين انهم منعزلين داخل شلل ومجموعات وكنايس وبيتحركوا غالبا في دواير مغلقه بتحرمهم فرصه تواصل انساني حقيقي وعميق مع المسلمين
اقر واعترف اي بشوف او تي في
اقر واعترف اني بشتري بقاله من سوبر ماركت مسيحي وبزعل من ناديه المسيحيه عشان بتشتري من سوبر ماركت بعيد عن بيتها نص ساعه لانه مفيش جنبها سوبر ماركت الامسلمين
اقر واعترف ان اهم ميزة في المسيحيين انهم شاطرين في شغلهم ووامناء وناجحين في الاعمال التجاريه والطب وانهم سياسيين خصوصا الجيل الاقدم سياسيين لدرجه الدهاء
اقر واعترف انه تسرب الي اعماق نفسي في فترات سابقه ان البنت المسيحييه ممكن تنصر المسلمه وتوديها دير في الصعيد وتخفيها عشان البنت دي هي اللي ها تخلف عيال مسلمين
اقر واعترف انه تسرب الي اعماق ناديه ومونيكافي فترات سابقه ان البنت المسلمه بتصاحب المسيحييه عشان تجوزها اخوها المسلم وتهرب معاه والبوليس يحميهم
اقر واعترف اني سمعت بودني ام مسيحيه بتزعق لبنتها عشان وسخت هدومها بأنها بقت مقرفه زي عيال المسلمين!
اقر واعترف اني بكره من صميم قلبي مايكل منير.. وامنحه جايزة الشخص الاعلي استفزازا في العالم
اقر واعترف ان يمكن اكبر مشكله من ناحيه المسلميين ضد المسيحيين هي دعاوي الارتباط بالخارج وطلب الحمايه و واعتقد ان الخارج معملش حاجه للمسيحيين اكتر من انه كرّه المسلمين في المسيحيين وحسّسنا انهم شويه خونه ها يبيعوا البلد للاجانب تحت دعاوي الاضطهاد
اقر واعترف ان بعض المسلمين عندهم يقين ان السفارات والقتصليات الغربيه بتمنح تأشرات وفيز هجره للمسيحيين لتوفير فرص عمل ودراسه دون المسلمين
اقر واعترف المركز الثقافي الفرنسي بينمح المسيحيين شهادات ديلف ودالف للمسيحيين بسهوله لانها تؤهل الحصول علي فيز هجرة كندا في المقاطعات الفرنسيه بسهوله
اقر واعترف ان الوزرا المسيحيين معملوش حاجه للبلد زي المسلمين تماما
اقر اني زرت بعض المدونات العنصريه زي مدونه تحتمس اللي بتضخ مشاعر كره وبغض رهيبه وكافيه في حد ذاتها لاشعال حرب اهليه
اقر اني بزعل من بعض المدونات اللي اصحابها مسلمين وبتاخد موقف مضاد للمسيحيين لمجرد انهم مسيحيين
اقر واعترف اني اخاف علي هذا الوطن من كل قلبي والله علي ما اقول شهيد
تفاعلا مع باقي الاصدقاء بلوستون بيكيا وعباس العبد العداله للجميع

هناك 19 تعليقًا:

غير معرف يقول...

متى نرفع شعارا قديما ..

الدين لله والوطن للجميع ؟

فى اعتقادى ان القائمين على الاديان كلهم لم يقوموا بواجبهم على الوجه الأكمل .. وهذه هى النتيجة ..

أحييك أول على شجاعة الاعتراف .. والصراحة المتناهية التى تعوز الكثيرين ..

اختصار ذلك كله أننا لم نتعلم بعد كيف يحب بعضنا البعض .. حتى وان تظاهرنا بذلك .. وتشدقنا باحلى العبارات واروع الكلمات ..

تهنئتى على هذا البلوج العظيم

اسكندراني اوي يقول...

جريئه كالعاده

عندك حق في كره التعصب من الديانتين

للاسف في ناس بتحب تصطاد في الميه العكره
لكن للامر نهايه

زمان رفع شعار يحيى الهلال مع الصليب

وانا اطالب ان يعود الشعار ثانيه لقطع الطريق على اي حد يحاول يلعب بالنار

لكي كل التحيه على البوست ده

غير معرف يقول...

Attention!

بنت القمر يقول...

شريف
اشكرك
لم نتعلم ان نحب انفسنا قبل ان نحب الاخرين
اشكرك واشكر مرورك

بنت القمر يقول...

اسكندراني
يعني مش اوي
نص جراه وعدين الدعوة اسمها مصالحه ومصارحه
طب اهه اخر صراحه
اشكرك اسكندراني وعلي فكرة شفت بوست المقاطعه عندك وكان له تأثير في كتابتي البوست السابق

بنت القمر يقول...

اAkicage
معلش اللينك مفتحش معايا ها احاول افتحه تاني بس يا تري هو فيه ايه؟؟؟؟

karakib يقول...

تدوينة مدهشة و اكثر من رائعة !

عين فى الجنة يقول...

اقر واعترف ان هذه التدوينه صادرة من قلب شفاف مبصر وعقل مستنير

بنت القمر يقول...

كراكيب
اشكرك
ربنا يخليك

بنت القمر يقول...

راجي
اشكرك واقر واعثرف ان بوست حضرتك اقوي وفي الجون ومن افضل ما كتب بلا تحيز او عصبيه
تحياتي

اسامة يس يقول...

أقر وابصم على جوهر اقراراتك العفوية العميقه جداً الصادقة في آن واحد...

اقر واعترف انك نقلتي الصورة كأبدع ما تكون..

وأختم بقوله تعالى وهو خير القائلين :
لا ينهاكم الله عن الذين لم يقاتلوكم في الدين ولم يخرجوكم من دياركم ان تبروهم وتقسطوا اليهم ان الله يحب المقسطين
سورة الممتحنة آية 8

ذو النون المصري يقول...

تدوينه جريئه فعلا و كان نفسي اكتب حاجه زيها و علي فكره الظاهر ان فيه علامات كتيره موجوده في البوست هنا انا رايتها ايضا
فايام ان كنت في الجامعه كان زملائيالمسيحيين بيتركونا فجاه اذا وجدوا مسيحيين اخرين و كان تصرفهم هذا يضايقني بشده خصوصا اذا كنت اقف معه وحدي
و كان هذا التصرف موضع تعليق مني و من الزملاء
لكن بالرغم من كل شيء
فلي زملاء مسيحيين كثيرين لا زلت احتفظ بصداقاتهم و اعتز بها و بالنسبه للامانه في العمل فاعتقد انها في المعامله التجاريه ايضا لان والدي يبيع الاجهزه الكهربائيه حاليا و يمتدح معاملاتهم جدا

الإتربي اللولبي يقول...

أقر و اعترف إني اتربيت إن محمد و جرجس اخوات ف الوطن و الإنسانيه
أقر و اعترف ان عملية ان البلد بلدهم و إن مصر قبطيه فمسمى قبط و أقباط ده أقدم من ظهور المسيحية... مصر كانت مسماه ( إيقو - بتاح ) أو أرض بتاح و تم بعدها الاختصار إلى ( إيقوبت ) و منها إلى ( قوبت ) اللي بقت بدورها ( قبط ) ....
أرجو تشريفي بالزيارة و التعليق

شمعى أسعد يقول...

اقر واعترف

انى شعرت بغيرة جميله وصحيه

من البوست ده

وكنت اتمنى ان اكون كاتبه

اقر واعترف

ان كل كلمه فيه صحيحه ميه فى الميه

واصدق عليها بصفتى قبطيا

اقر واعترف بان المتحولين من دين الى دين

لا يستحقون الضجة المثاره حولهم

وان سلامه الوطن اهم منهم

اقر واعترف بان العلاقة

بين المسلمين والمسيحيين باتت فى خطر

وانهيارها سيضع البلد كلها فى مأزق

اقر واعترف بانى اشجع اخى اللى مازال

فى الجامعه بانه لا يكتفى بصحبة المسيحيين

وساقوم بنفس الدور مع ابنى

واخيرا

اقر واعترف بانى فخور بكونك سكندريه

واتمنى ان افوز بمعرفتك يوما ما

بنت القمر يقول...

الاديب الكبير اسامه
اشكرك لقد احترت في كيفيه المشاركه ولي يقين انه الموضوع كلما كان ابسط عرضا كان ايسر وصولا للقب وما يضير في بعض المكاشفه
لو كنا نهدف لرأب الصدع
وخصوصا ان المبادرة تحت عنوان مصارحه ومصالحه
تحياتي واشكر مرورك

بنت القمر يقول...

ذو النون المصري
اهلا بيك معانا صديق عزيز في المبادرةننتظر مشاركتك
ساتابع ماتكتب
اعتقد ان ما كتبتبه هو بعض من نراه من صورة الاخر في عيوننا وقد فضلت ان اكتب ببساطه وعفويه ليصل مباشرة للقلب
واعتقد ان ما اراه في الاسكندريه والتي تعتبر مدينه فتن للاسف
تراه انت في كفر الشيخ يراه اخرين في القاهرة
تفرج علي اللينكات واهلا بيك
تحياتي

بنت القمر يقول...

الاتربي اللولبي
اهلا بحضرتك البلد بلدنا جميعا وكلنا اقباط مسلميين ومسيحيين
اشكر مرورك
وتفضل شارك معانا
تحياتي

بنت القمر يقول...

شمعي اسعد
اهلابمرورك
سعيده جدا ان اعترافاتي مست قلوب الكثيرين ورأوها صادقه وعفويه بامكانك قرءه باقي اللينكات للتعرف اكتر علي المبادرة
وبأمكانك ايضا المشاركه فيه بعد ان تري مجهود الاصدقاء
وحضرتك تعرفت فعلا علي من خلال مااكتبه كلنا نتحقق ونظهر في الفضاء الاليكتروني بصدق حقيقي ربما اكتر من الواقع تحياتي

أُكتب بالرصاص يقول...

وأنا أقر وأعترف أن الموضوع اتكتب بحرفية شديدة
ورغم حساسية الموضوع
انما دي الحقيقة
وانا اقر واعترف معاكي بكدا