الاثنين، مارس 10، 2008

الي بيلا.. وفضفضه,, وزمزم..وحفصه.. واخريات


اتشرف اليوم بدعوة سيادتكم الى حضور الاجتماع التاسيسي الاول لرابطه المود الكحلي

والتى تهدف الى في تاسيسها الي تقديم خدماتها للاخوات المكتئبات

ارهاصات.......

لاحظت العضو المؤسس اللى هو انا زياده الضغوط الرهيبه علي المراة فى مصر

من قهرازواج وتعنت اباء ونكد امهات وقرف عيال وارتفاع اسعار وغلاء معيشه وما يلىانحدار فنى وغنائى, وفيديو كليبات, وتردى فني وسينمائي ,وما تعانيه من تحرش جنسي ومعاكسات, وانتهاك كرامه

, ومضايقات مروريه

, وجميع اصناف الضغوط والتى تلقي بظلالها عليها من احداث يمر بها الوطن

من فساد حكومىومالى واداري وانهيار تعليمىوعلاجى ودروس خصوصيه وثانويه عامه ورداءه مواصلات,وزواج وطلاق وعنوسه وسن يأس وتسلط مجتمع ذكوري ووطن منكمش وحكم متهالك ....

خدمات الرابطه

تقدم الرابطه لعضواتها جميع اصناف حبوب الموتيفال ومشتقاته

واصناف جديده من القهوه عاليه التركيز والكابتشينو لزوم ضبط الدماغ

كما توفر مكابح نفسيه جديده لكبح الغضب وارد المانيا باسعار زهيدة

وتقدم الرابطه ايضا مصدات واكصدامات صلب
لزوم الحمايه والدفاع عن النفس من الانهيار والانفجار فى الاخرين
وتوفر ادويه الضغط والقولون العصبي وقرحه المعده..

كماتقوم الرابطه بتقديم كورسات تعليميه فى كيفيه التبلد وتتخين الجلد محاضرات قيمه فى فنون ضبط الانفعال وما بقي منه
محاضرات فى مواجهة الاستفزازوالاستهبال والاستعباط بوجه بشوش
وما يجد من خدمات تقدمها الرابطه لبنات مصر المحروسه وعلى من تجد نفسها تنطبق عليها الشروط وترغب في الاشتراك مجانا
التقدم باوراقها للعضو المؤسس اللي هو انا والرد ها يكون في اقرب وقت

> وشكراتصفيق حاد حاد
***********************
بمناسبه اليوم العالمي للمراه
احد بوستاتي القديمه
مناسبه للمناسبه....... اعتذر عن الرد علي التعليقات لمده خمس ايام اجازة قصيره.... كل سنه والكل بخير

هناك 22 تعليقًا:

AHMED SAMIR يقول...

الاقي عندكم فرع رجالي للرابطة دي
انا كمان مكتئب جدا
تحياتي

Bella يقول...

انا اسمي مكتوب

ههههههههه

طيب اعتبريني سكرتير اول الرابطة

^ H@fSS@^ يقول...

والله معاكي حق
عندك دوا ضد خبث الباكستانيين و سفالة الهنود و جليطة البريطانيين و سلبية العرب
اصل دي خلطة الشغل عندي و تقريبا حفصد دم من مناخيري من قد ما ضغطي مرتفع لكن عاملة نفسي بضحك و مطنشة
ها؟عندك؟ ها
و كمان عاوزة كميات هائلة من الكركدية المتوسط الحرارة لان بارده بيوطي الضغط لكن بيدوخني
و ساخنه بيرفع لاضغط و انا مش ناقصة
و يا ريت لو فيه حاجة ضد القهر و الظلم و تأويل الكلام و اتهام ناس بالباطل و اختياري ككبش فدا للقسم بتاعنا
و ايضا يا ريت لو فيه حبه تمنع تساقط الدموع من العيون و تحويلها لمسار تاني لجوا العين او حتى لو جت على شكل سوائل مخاطية ف يالمناخير او انسداد في الزور
معندي شمشكلة كله و لا انيش اعيط قدام اعدائي
و بس الى الان لكن لو افتركت حاجة تانية حبقى اقولك عليها
مشكووووووووووورة يا قمر
و ادعو كل بنت حوا للانضمام في البوست اللي عندي عشان نعرف الرجالة ان الارض دي كانت لينا احنا و احنا صاحبتها الاصليين

و كل يوم حيبقى يوم للمراءة
مش بس يوم واحد
الله
الارض
بنات حوا

زمان الوصل يقول...

وبعد كل ده يقرّوا و يقولوا الستّات عمرهم أطول !! بصرف النظر بقى العمر الأطول ده قضته فى سعاده و هناء ولاّ فى حاجات تانيه :)

عموما طول عمرى نفسى أبقى عضوه فى جماعه بس ماتقفشش على رأى "عاطف السكّرى" و أخيرا لقيتها :)

Desert cat يقول...

انا معااااااااكو
اتقدم باوراقى لحضرتك

غير معرف يقول...

وليه البنات بس ..؟

يعنى الصبيان هم اللى فى منتهى السعادة ؟ مكركرين على طول ؟

كل سنة وانت طيبة

الطائر الحزين يقول...

اجازة سعيدة

Empress appy يقول...

انا معاكوا ولا ايه انا عندى شريط اتبرع لكوا بيه
انا اكتر حاجه مموتانى موضع المرور الظابط ابن ال,............... سحب رخصتى بس ولا يهمنى هجيبها من عينه

مي بهاء الدين يقول...

أبعتلك صورة البطاقة على انهي عنوان؟

تواشيح سياسية يقول...

طالما الرابطه للمكتئبين
يبقى حرام انها يكون فيها عنصريه!!!!!

لازم نشترك معاك

خمسة فضفضة يقول...

السلام عليكم ورحمة الله وبركاته

لا حلوه الفكره داوي
و بالنسبه لادوية الاكتئاب هديه مني لعضوات الجمعيه مجانا وان شا الله ماحد حوش

:-)

--------------

بالنسبه للميجافيت والميدفيت

لما بتكون الحاله مجرد نقص في الفيتامينات عموما او عاوزين ندي الطفل فيتامين مكمل يبقي ندي الميجافيت اللي تركيبته عباره عن معادن و مالتي فايتمين ، اما لو كان فيه نقص في فيتامين ب زي في بعض حالات الانيميا او في الشتا لما تكون فيه بروده في الاطراف فابندي ميدفيت علشان نعوض نقص فيتامين ب لان تركيبته اساسا من فيتامين ب ومشتقاته مع نسبة قليله من المعادن والفيتامينات التانيه
وهو طعمه بيحرق بسبب الفوليك اسيد وفيتامين ب الموجودين فيه وكمان ماتنسيش انه بتاع شركه قطاع عام فامش بيهتموا بالطعم اوي زي الشركات التانيه اللي بتنوع في الطعم اشي فراوله واشي موز واشي تفاح
:-)

سلام يا قمر

زويل يقول...

على أساس ان انتو ملايكة بترفرف
ما كفاية اللي حاصل منكو فالشوارع يا ظلمة ارحمونا شويه رقبتي اتلوحت
هتقولي كبت و تخلف يعني بذمتكن لو سكتنا مش هتحنوا للمعاكسه وأيامها
وبعدين اللي يلاقي عسل ومايدوقش يبقى أهبل
اسف اذا كان التهريج زاد
واضح ان عندك خلفيه طبية أ مصابة باكتئاب مزمن
زيارة أولى و غير أخيرة اذا ماكانش يضايقك

عين فى الجنة يقول...

ترجعى من ضوباى بالف سلامة وارجو لكى اجازة سعيدة

Unknown يقول...

كنت بقول كلامك ده فى بوستى الى فات ( طريقه منين ) قالولى كتير انتى بتبالغى المرىة دلوقتى واخدة حقوقها و عصر سى السيد انتهى

سمراء يقول...

دة حال كل الناس ستات ورجالة شباب ومسنين وحتي الاطفال ليه الرابطة بس ستات
بس احييكي انت وصفت الحالة واعطتيتي الحلول الابتكارية لو كل الناس كدة بتبص للحل يمكن الحال يبقي افضل

انا معاكي في الرابطة لو سمحت اقبلي طلب العضوية

سمراء

بنت القمر يقول...

سمير
اهلا بيك ان شاء الله الفرع الرجالي ها نفتحه الفين وميتين
ابقي قدم طلب
اشكرك




بيلا
طبعا اسمك مكتوب ولا انتي فرحانه لاسمح الله
سكرتير اول ومدير فرع اقليمي كمان منورة بيلا




حفصه
علي فكرة تعليقك مؤلم جدا
بجد مش بهزر خصوصا الحته بتاعه تغيير مجري الدموع لمست قلبي اوي
سلامتك من الدموع
ها ارد علي حكايه الجنسيات دي في ميل لو بوست ده انا شفت عجب من رزاله وخبث الهنود بجاحه الروسيات وغتاته الامريكان المهم سلامه قلبك

بنت القمر يقول...

زمزم
شفتي لا وكمان ها يقروا علينا علي الجمعيه بتاعتنا وعاوزين قال يخنوقونا فيها
قال قال
يلا استلمي ورق تعيينك فرع الرابطه في حلايب
منورة زمزم
تحياتي

بنت القمر يقول...

ديزرت كات
طبعا معانا يا باشا فرع الشرقيه وميت غمر القطاع الشرقي الجنوبي معاكي يا افندم
منورة




شريف
طبعا بنات بس الفرع بتاعك الفين وميتين
احنا اللي بيقع علينا اعباء الحياه وكمان بنستحمل غتاته الرجال اباء وازواج واطفال وحكام ووزرا شفت اهي كل المشاكل رجالي طحن
منور شريف

بنت القمر يقول...

الطائر الحزين
اشكرك





ابي
بجد اتسحبت رخصتك طب ها توزعي منشورات الرابطه ازاي؟؟
هاتي الرخصه وقدمي ورقك بسرعه ورانا شغل كتييير



مي بهاء تم اعتماد قرار ان اصحاب التعليقات يتم تعيينهم فورا مديرين لفروع الرابطه في محافظتم
يلا وريني الهمه
منورة مي




فضفضه
وانتي دايما عند حسن ظني تم نلاقيتك فورا من مدير فرع الي سكرتير تنفيذي
بالنسبه لدوا الاكتئاب عديت عليه فترة ... بس الحمدلله .. عدتوكان بينسيني اسمي
اه والله حاجه اسمها زولام بعيد عن السامعين ولا انا اللي دماغي خفيفه؟؟
منورة فضفضه

بنت القمر يقول...

زويل
لا احنا ملايكه ولا انتوا حملان وديعه
هزر براحتك في حدود ما لايعاقب عليه القانون وما يخج عن المألوف والمقبول اهلا بيك اول ومش اخر زيارة



الشافعي
اهلا اول زيارة وعذرا علي لخبطه الردود
معلش بقا الرابطه عنصريه من اولها ممكن تعمل رابطه مستقله او تنتظر لالفيم وميتين فرع الرابطه بتاعنا الرجالي منور

بنت القمر يقول...

راجي
اشكرك رحت وجيت من ضوباي وفي قول اخر من دوشباي
بخير ومفيش زي بلدنا
منور راجي



عاليا حليم
قريت اللي كتبتيه مفيش حاجه بتكتبيها الا ما بكون قريتها لانك علي الريدر عندي وانتي معنيه جدا بالبوست بس انتي طيبه اوي نشغلك ايه ؟؟ نشغلك ايه؟؟
نشغلك
المتحدث الصحفي لوسائل الاعلام باسم الرابطه منورة عاليا

بنت القمر يقول...

سمراء
منورة اول زيارة شفتي الحلولا معجزة ازاي
عموما لما الستات تكون سعيده اكيد ده ها ينعكس علي باقي المجتمع بس الشعور بالراحه يبدأ من القدمين.. اقصد
حوال المرأه معيار هام لقياس احوال اي مجتمع منورة