الخميس، مارس 20، 2008

المدونه... واشباح الستينات

حين اخبرت ادم في حوار عائلي لطيف عن وصيه قريبتنا ان لا اتحدث في السياسه خلال رحلتي لدبي ساخرة من تلك النصيحه
رد بجديه :ومالو خايفه عليكي عندها حق
اجبت: حق ايه وسياسه ايه؟؟
هو احنا لسه عايشين في ايام صلاح نصر والناس اللي بتتصنت علي بعض واللي يتكلم في السياسه يبعتوله زوار الفجر!!
اجاب ادم: صلاح نصر في كل زمن وكل حين ومين قالك ان زوار الفجر خلصوا؟؟
واتجه بالحوار الي اتجاه اخر
مين قالك ان التدوين ده كله مش تحت الرقابه؟؟ مين قالك ان مفيش فيه ناس مدسوسه !!كأنهم مدونين لاثارة نقاشات ومعرفه ورصد اتجاهات الشارع وهما تبع الحكومه
هما مش كل شويه بيقبضوا علي حد مدون.!!. كل اللي بينكتب بيتعمل بيه تقارير وفسحه الحريه اللي في التدوين متراقبه ومرصوده
انا:: اخدتني الافكار ومش عارفه ليه افتكرت نوارة وجماعه بتوع مدونون ضد التعذيب والبوستات الصغيرة اللي بتعملها زي البرقيات
فلان اتقبض عليه فلان اعتقلوه
تماسكت قليلا.. ورديت لا طبعا بلاش نظريات المؤامرة واشباح زمان دي والنظريات البوليسيه دي
اصل انت يا بيبي مواليد الستينات ايام صلاح نصر لكن انا مواليد السبعينات زمن الانفتاح والحريه
انزلق في كرسيه ونظر الي من خلف نظارته الطبيه بعينيه الضيقتان.. براحتك انتي فاكرة استبيان زي بتاع العيال بتوع معا الي الله
اللي انتي كتبتي معاهم بتاع المصالحه ده
مش مرصود؟؟ امال جابوهم في العاشرة مساءا ازاي.؟؟. الداخليه تقدر تعرف اي شيئ مكتوب مين كتبه وامتي ومن اي مكان في مصر
انتي بس اللي طيبه... تصورت نفسي في دور الناشطه السياسيه او الحقوقيه والبوليس جاي يقبض علي في البيت الفجر وافتكرت البنات.. اكيد ها يدّمروا لو حد قبض علي امهم.. ثم طردت تلك الافكار من نفسي وده لاني اصلا مش ناشطه في اي مجال الا مجال البحث عن نفسي وذاتي!!... الحقيقه ان ادم لا يعير التدوين اهتماما جديا ولا يتابعه الاحين يملأ وقت فراغ قصير جدا لحين تحضيري للعشا او لحد ما اخلص واجبات البنات ..,
ان كان ينظر اليه كمنفذ يمتص طاقاتي المتجدده.. او كشيئ طيب اتلهي فيه بعيدا عن ان ازعجه باحباطاتي وعذاباتي او طلباتي المعقوله احيانا والسخيفه احيانا اخري
اخدتني الافكار..مرة تانيه .. وحاولت ان اقتل بذرة الخوف التي يريد زرعها في رأسي.. ان كل شيئ مراقب ومحاصر..اجبت بتحد حقيقي لاثبات اني مش قلقانه ولا شاكه في حد او شيئ
سألت كي اغيظه:تخيل كده لو طلبوني في العاشرة مساءا
مفروض البس كلاسيك ولا كاجوال البس جينز ولا بدله كلاسيك.. ؟؟اكيد ها اكون اجنن وانا جنب مني الشاذلي!! صحابي ها ينبهروا لما يشوفوني
اجاب ادم.. في الثواني الاخير قبل ان يسرقه النوم ربنا يهديكي.....

هناك 43 تعليقًا:

Bella يقول...

تعرفي

آدم لحد كبير جدا عنده حق

المدونات زيها زي المنتديات فيها ناس موجودة للاستعلام عن المشاركين ومعرفة هم مين وبيشتغلوا ايه

وبيثيرهم اكتر الناس اللى بتطتب تحت اسم مستعار ولاتوجد معلومات مباشرة عنهم ولا يشاركوا في لقاءات عامة يتم من خلالها معرفة مين يطلع ايه

يعني بشكل عام كلامه صح

وصلاح نصر واعوانه منتشرين في كل وقت

عباس العبد يقول...

اهلا و سهلا
هو ادم اسمه أيه و بيشتغل أيه , و عرف المعلومات دى منين , و بتتعامله مع مين ؟ و لما رحتى دبى قابلتى مين ؟ , و ايه علاقتك بالعيال بتوع معاً امام الله ؟ و عرفتى منين انهم عيال ؟ و لما انتى مشفتيش الحلقة , عرفتى منين أنهم طلعوا ؟ , و مين قالك ان البرنامج أسمه العاشرة مساءاً , و ليه مش أسمه التاسعة و الربع مساءاً ؟ و قاعدين ليه فى أسكندرية ؟ و جبتى منين فلوس الطيارة لدبى ؟ و مش انتم كنتم فى العين السخنة من قريب ؟ و كمان رحتى دبى ؟ بتتفسحوا كتير انتم , جبتوا فلوس الفسحة منين ؟
و طبعاً عندكم كمبيوتر , قسط و لا كاش ؟
اعترفى
مع تحيات
عباس العبد
مخابرات ( سكلكلى )

عين فى الجنة يقول...

وانا باقول الاستبيان بتاع العيال دول ملعوب فى اساسه وبايظ قام رامى سيدهم( اخناتون) زعل منى
على العموم انا داخل بشخصيتى الحقيقية وانا وعيالى على الفيس بوك قصدى كتاب الوشوش على رأى حفصة بتليفونتنا وصورنا ورافع ايديا لفوق بس خايف البنطلون يقع واستهوى
وعاوز اعرف امتى حتطلعى مع منى الشازلى علشان نشوف مين اجمل واقترح عليكى فستان ديكولتيه احمر علشان تخطفى الاضواء
على فكرة ما بعد دبى اجمل واكثر اثارة مع نكهة جاسوسية وعساكر وحرامية
تحياتى

mohand يقول...

ربنا يهديكي

الصراحه الكلمة فظيعه منه

هههههههههههههههههههه

mohandsmasry يقول...

اتفق مع ادم فعلا فى رأيه يمكن بالعكس صلاح نصر وحمزة البسيونى مقارنة بأمن الدولة واجهزة الداخلية دلوقتى يطلعوا تلاميذ روضة بالنسبة ليهم وعلى فكرة مش صعب يرصدوا ويعرفوا أى حد بيدخل على النت ويقدروا يجيبوه ويعرفوا عنوانه من خلال الأى بى بتاعه وشركات النت عندنا طبعا تحت الامر احنا دلوقتى الأمن عندنا بلغ حوالى مليون ونص بنسبة واحد لكل خمسين مواطن تقريبا وقريب فى ظل حكومتنا الرشيدة وده شعار المرحلة القادمة هايبقى عسكرى لكل مواطن تحياتى

بنت القمر يقول...

بيلا
اولا اهلا بيكي منورة
تانيا انا لا اشك في كلامه..
لكن اللي لفت نظري بما اني لا اعتبر نفسي ناشطه في اي مجال ان حتي موضوع المصارحه والمصالحه وهو ملوش اي دعوة بالسياسه ممكن يكون مرصود ايضا وحسيت ان كده الموضوع اوفر شويه
يمكن ما يكونش اوفر
عشان كده قلت اشباح الماضي
بالاضافه انك ممكن تزوري مدونه يكون صاحبها مزروع امنيا تقلب الحكايه علي نظريه مؤامرة
ويبقا شيئ مخيف جدا
منورة بيلا

بنت القمر يقول...

عباس العبد
ها اجاوبك عشان ترتاح ادم مهندس معماري يمتلك توكيل تجاري.. ورحله دبي هديه من الشركه صاحبه العلامه ما دفعناش فيها ولا مليم غيرفلوس الشوبنج
مصرفتش كتير لان الرحله كانت قصيرة وقابلت صديقه عمري مقيمه هناك وعزمتني علي الغدا
ولما رجعت لقيت ماريان سايبالي ايميل اني اشوف الحلقه عشان كده كنت بدور علي لينكها لاني طبعا ما شوفتهاش في ساعتها
لقيت كراكيب منزل اللينك وشفتها امبارح
العيال بتوع المصارحه هو توصيف مستخف بالمصارحه والتدوين عموما ودي وجهات نظر واكيد مش عند ادم بس
اكيد عند ناس كتير
وده يرجع لطبيعه عمل او طبيعه تفكير ناس ممكن تشوف ان القعده علي النت زي القعده علي القهوة
او اوفر شويه
فهمت يا عمي.. وان مفيش حاجه ممكن تتغير بالقعده علي القهوة اقصد النت
بطل قر يا رامز بطل قر!!
ها تخليني اراجع كل كلمه بكتبها هو القر في النت كمان!!!
بس اخر حاجه تفتكر ان في مدونين مزروعين تفتكر الكتابات العاديه زي اللي احنا بنكتبه باعتبارها تختلف عن ما يكتبه وائل عباس او نوارة او الناس الناشطه ممكن يكون مرصود؟؟؟ برضه
تحياتي

بنت القمر يقول...

الاستاذ راجي
مفهمتش ليه شكيت في المبادرة
وما فهمتش ايه جاب سيره الفيس بوك وما فهمتش حاجه وان كنت احب اقولك اني ما بخرجش بفساتين حمرا ديكولتيه انا بلبس زي ام البنين!!
ولا هي بتلبس كده؟؟!!
ومرضيتش امسح التعليق احتراما ليك بس كنت اتمني تاخد الموضوع بجديه
تحياتي

بنت القمر يقول...

مهند
ربنا يهدينا جميعا
كويس انك ضحكت

بنت القمر يقول...

مهندس مصري
معنديش شك في ما بقوله واعلم صدقه لكن كل الفكرة هي في مدي توغل المتابعه الامنيه للتدوين وحيث اننا مش بتوع سياسه الا بالقدر الصحي المعقول والمقبول
فمفيش مشاكل
لكن ان يكون في مبادرة متابعه او شخص مزروع بتكلمه علي انه زميل او زميله مدونين
فكره مرعبه
بس
تحياتي

أبو عمر - الصارم الحاسم يقول...

فيه واحد صاحبنا كان قال لي كطلمة من قبل

عيش وكأنك هدف ماشي على الارض

الكلام كان بمعنى...ولا تاخد فيبالك واعمل اللي شايفه صح طالما ليس له سبيل الا هذا


بعقل ....وبحكمة....بلا خوف...ولكن بلا افراط ولااستهتار ولا رعونة بدون داع

أبو عمر - الصارم الحاسم يقول...

نسيت اقولك ......بالنسبة لدبي ...كـ"دبي"

فقريبتك عندها حق


لكن برضه على قاعدة مفيش داعي لفتح الصدر لمجرد فتح الصدر

غير معرف يقول...

بنت القمر

ماتقولينه وتكتبينه لاغبار عليه .. لأنه رأى شخصى ..

لكننى أقول لك بأن عقلك الراجح يستطيع أن يدلك فيم تشاركين .. وماهى الموضوعات المفيدة التى يمكنك أن تساهمى فيها

فى النهاية فالله هو الحافظ ..لك زلنا جميعا

تحياتى على اشباح الستينات ..

محمود المصرى يقول...

بسم الله الرحمن الرحيم

اذا كان الامن بياخد تقارير منتظمة من بائعى الجرائد علشان يعرفوا الناس اتجاهاتها ايه يبقى مش هايدخلوا النت ويتابعوا اللى بيحصل فيه ؟
اكيد بيتابعوا وبيقرأوا لكن هما بيسيبوا دايما مساحة حرية نتحرك فيها , لغاية ما يحسوا ان التحرك بدأ يتجاوز خطوط حمراء يبدأوا فى التعامل , لكن ماتقلقيش هما مش بنفس عنف صلاح نصر والروبى والبسيونى , التانيين كانوا اغبياء عاوزين ماحدش يتنفس نفس غير حكومى , دلوقتى بيناوروا بذكاء .

يا مراكبي يقول...

الكلام ده سليم مائة في المائة على فكرة


وأنا متأكد من الكلام ده ومش هأقول أكتر من كده .. المدونة ليها ودان

أنا عندي عيال عايز أربيهم

اسكندراني اوي يقول...

اعتقد ان ادم عنده حق
وصدقيني لو قلتلك ان كلامه صحيح بنسبه100%
لذلك برضه الحرص واجب وانتي عندك عيال بتربيهم
ههههههههههههه

التدوين في حد ذاته جميل ومساحه واااااسعه اوي للكل ان يقول كل ما يريد

تحياتي على الجرأه في تقديم الموضوع
وربنا يحفظنا جميعا من اللي بالي بالك

تحياتي لادم على نظرته
وسعه صدره

Cleo يقول...

هى التدوينة دى ليها أى علاقة باللى بالى بالك؟؟

(وش واحد مستخبى تحت السرير)

مروة الزارع يقول...

تحياتى ليكى يا قمر

ياريت تكبرى الخط حية

مراعة للمكفوفين اللى زيى

:)))

وكل سنة وانتى طيبة

عين فى الجنة يقول...

مكنتش فاكر ان الهزار بين الاصدقاء بيزعل

رئـــــيسـة حزب الأحلام يقول...

السلام عليكم
اتمنى لك التوفيق

غير معرف يقول...

المدونات نعمة من عند ربنا ... و جت نجدة للناس اللى زى حالاتنا و اللى هى رجل جوه و رجل بره
يعنى كما وصفنا رئيس حكومتنا نحتاج الكثير من الوقت لأستيعاب الفكر الديموقراطى و لكن المشكلة فى شريحة قد نضجت فعلا و تطالب باستحقاقاتها الأن و ليس غدا , و التى وجدت فى التدوين فضاء رحب يتسع للجميع و يستوعب كافة الأتجاهات ... و أرى أن من استطاع استيعاب تقنية الكتابة الألكترونية و التعامل مع مفرداتها لقادر على الحكم على ما يكتبه و قادر على تصنيفه و الحكم عليه بنفسه

زمان الوصل يقول...

أنا مش باحس إنّنا بنقول فى مدوّناتنا ما يستحق الملاحقه الجنائيه
ممكن طبعا يكون فيه متابعه لكافة الاتجاهات كنوع من انواع قياس الراى ومعرفة الراى العام فى كل القضايا .. لكنه شئ طبيعى مرتبط بطبيعة عصر المعلومات .. يعنى كل شئ و كل كلمه قابله للتحليل و الفحص من اجل الخروج بمعلومه لم تكن معلومه من قبل .. مش لازم الامر يكون مرتبط بحاجه تخوّف يعنى

Hypatia يقول...

شششششششششششششششششششششششششش
وطى صوتك يا قمر احنا متراقبين







:)

Hypatia يقول...

اعتقد يا قمر ان كل التدوين متراقب لكن اللى العين عليه هى الحاجات المؤثره اللى فيها جديه وتخطيط وموجهه فى اتجاه صح لكن اللى بيشتمو فى الحكومه وفى مبارك هما سايبينهم بمزاجهم ينفسو عن اللى جواهم بطريقه سلميه وخلاص بس مثلا كريم عامر عشان كان طالب ازهرى وكان بيهاجم الازهر بطريقه منظمه وواضحه اتجاب من قفاه والاخوان اللى بينظمو مظاهرات ووقفات احتجاجيه عن طريق التدوين بيتجابو من قفاهم برضه عشان كده موضوع مصالحه ومصارحه فيه قلق لانه موضوع جد من ناس جد فا بالتأكيد حيكون متراقب من وجهه نظرى وحتكون العين عليه

وادم خايف عليكي ربنا يخليكم لبعض يارب
واهلى كمان خايفين عليا ربنا يخليهومللى وماما محلفانى انى مأكتبش فى السياسه اصلها مواليد الستينيات برضه
:)

خمسة فضفضة يقول...

السلام عليكم ورحمة الله وبركاته

تصدقي انا مع آدم في كل الكلام اللي قاله ومقتنعه بيه جدا

ربنا يستر علينا

بنت القمر يقول...

الصارم الحاسم
عندك الف حق
كل شيئ باعتدال مطلوب
وان كنت لا اعتبير نفسي ناشطه في اي مجال
بس فكرة ان الواحد ممكن يكون متراقب او بيكلم حد مدسوس مزعجه جدا
اشكرك وتحياتي

بنت القمر يقول...

شريف
الله يكرمك يا رب
فعلا الحكايه كلها بيسوقها العقل ولا ادعي شرف اني ناشطه سياسيه او بطيخ
كل الحكايه هي ان المدونه طاقه للبوح والفضفضفه والتشارك فيما يفيد مش اكتر
ويكون شيئ مزعج ان تكون طاقتك او فضفتك مرصوده لاي سبب
اشكر مروروك

بنت القمر يقول...

محمود المصري
وانا طبعا مليش اي علاقه بالخطوط الحمرا ولا ادعي شرف اني ناشطه في اي مجال سياسي او حقوقي
الور والباقي عليك انت
((:
بس هو اللي خلاني اتاخدت من كلامه حكايه المصارحه بصراحه اعتبرتها نشاط سلمي عاااادي مش ممكن يكون له نفس الاهميه!!! وان كان ومازال ي رأسي بعض الاسئله!!
لكن مشاركتي فيها لاتعدو البوست الطفولي اللي كتبته والحقيقه انه لاقي قبول جااامد من منظمي المبادرة علي عكس ما اعتقدت!!
ههههه
يلا اللي عاوز يجمع معلومات ربنا معاه
ومعانا ربنا
تحياتي

بنت القمر يقول...

يا مراكبي
طيب
انا ها احرص وانت تحرص!!
عشان العيال!!
سلم لي علي ام دينا...
منور
تحياتي

بنت القمر يقول...

اسكندراني
يا عم اسكندر هو انا اصلا ليا اي علاقه بالسياسه كده ها تخليني اخد قلم في نفسي وافتكر نفسي ناشطه ولا حاجه
انا عارفه ان كلامه يحمل قدر من الصحه
بس مجرد فكرة
الرصد والمراقبه مزعجه جدا
منور

بنت القمر يقول...

كليو
لا ملهاش!!
((((:
تحياتي

بنت القمر يقول...

مروة الزارع
اهلا بيكي
حاضر تؤمري
وكل سنه وانتي بالصحه والسعاده
تحياتي

بنت القمر يقول...

راجي
انا مش زعلانه وعارفه انك انسان محترم جدا بس غيرك مش كده...
ممكن حد يفتكر ان ده جد!! وبعدين يا عم عاوز تجيب لي ضرف المدونه!!
((((((:
اهلا بيك دايما وهزر براحتك بس خلي بالك شويه
تحياتي
اخي العزيز

بنت القمر يقول...

حسن
مين اللي رجل جوة ورجل بره
ده طبعا مش انا خالص؟؟
انا فاهمه والله وزي ماقلت انا اصلا مش ناشطه سياسيه ولا بطيخ
مجرد ان الواحد يحس ان ما يكتبه رغم بساطته مرصود ومتراقب شيئ مزعج
ليس الا اهلا مروورك الاول وليس الاخير ان شاء الله تحياتي

بنت القمر يقول...

زمزم
والنعمه انا مش خايفه من حاجه لاني اصلا مش ناشطه سياسيه ولا حقوقيه ولا ادعي هذا الشرف هو مجرد طاقه بوح وفضفضفه
يعني زي ما تكوني بترغي في التليفون كده انتي وصاحبتك وبتقولوا اي كلام اكيد مش ها تحسي بارتياح لو حد راصد هذا الرغي وهذا الاي كلام
فاهماني يا زوزو
بس
ودي فكرة مزعجه جداااا بالنسبه لي
تحياتي

بنت القمر يقول...

زمزم
وكمان فكرة ان حد يكون مدسوس فكرة مريعه يعني انتي حاطه صورة راجل وانتي ست
ده صدمه
تكونيش مزنوقه في صورة حريمي من ام روج واي لاينر يا زمزم
بعا انا فاهمه جدا فكرة ودلاله ورمزيه الصورة بس زي ما تقولي بقا الخدعه مزعجه
بس منورة

بنت القمر يقول...

رئيسه حزب الاحلام
اشكرك تحياتي

بنت القمر يقول...

نسرين بسيوني
علي فكرة تحليلك عجبني جدا
بجد
دماغ انتي ولو ان صغننه
واللي يراقب الدعوة يراقبها براحته
لحد دلوقتي مشاركتي فيها وكل ما كتب فيها لايعدو النشاط السلمي ولم يتجاوز اي خط احمر
ربنا يحفظك لاهلك
تحياتي

بنت القمر يقول...

فضفضه العزيزة
هو طبعا ربنا يستر علي الناس كلها بس انا عن نفسي لادعي شرف اني ناشطه سياسيه ولا بطيخ
مجرد طاقه فضفضفه في التدوين وفرصه حلوة للتشارك في الافكار
بس فكرة المراقبه والمتابعه في حد ذاتها وزي ما قلت لصديقتي زمان الوصل
لو بترغي في اي رغي فلضي في التليفون
اكيد متحبيش يكون حد سامعك ليس الا
منورة فضفضفه

Empress appy يقول...

بصى الكلام صح
بس عاوزة اقولك حاجه لو شوفتى الناس اللى بيتقبض عليهم مش علشان مدونين احنا فينا الكتير هاتى ليه اى اسم وانا اقولك معروف نشاطه يعنى اخوان او غد او حركات واحزاب هبله فهمتى غيرنا احنا الناس العاديه بدليل نوارة بتكتب فى كل حاجه انما متقبضش عليها
عموما متخافيش اى حد يجيلك بالليل قوليله تعالى الصبح علشان نايمه
او اقولك قوليلو ه مش انا يا عمو هههههههههههههههه

زمان الوصل يقول...

يا فندم انا عارفه انك مش خايفه و اريد ان تظلى على هذه الحال
لان مفيش ما يستدعى الخوف ..
كما قلتى ما تكتبيه فضفضه لا تستدعى القلق !!
لكنّى اختلف معك فى تشبيه الامر بمحادثه تليفونيه
اللى بيكتب فى مدوّنه بيبقى عارف و متوقع ان كلامه سيقرأه غرباء قد يكون منهم من له صفه امنيه و منهم سيكون غير ذى صفه .. ومن ثمّ حساباته خلال الكتابه غير حسابات اللى بيكلّم اصحابه فى التليفون :)

اما بخصوص الصوره .. بردو ولا الصور ولا الاسماء مفروض يكون لها دلاله على النت ..
طيب افرضى حطيت صورة ست بس مش صورتى هتفرق ايه !! خاصة حين لا اتعمد اخفاء فكرة انى انثى ولست ذكر؟

بنت القمر يقول...

ابي عموما ماشي انا ها اسمع النصيحه
بس ينفع اقول انا مش هنا لبتاع النور والميه
((((((:
ضحكتيني طحن
منورة ابي

بنت القمر يقول...

زمزم
بصي يا زمزم
لما بكتب علي المدونه بفترض ان ناس عاديع لها عذاباتها واحباطاتها بتقرا كلامي
لكن مش بتصور ان حد بيعد ويحسب ويراقب ويحلل
لاني احيانا بكون بقول كلمه تتفهم غلط
في ناس بتدخل تسيب لي تعليق علي اني ضد الاسلاميين او المتدينينن وده مش صحيح وناس بتتهمني اني عنصريه ضد المسيحيين وده اكثر خطأ
يعني عشان تعرفيني لازم تتابعيني علي فترة طويله عشان تقدري تفهمي وتحللي شخصيتي وتوصلي لنتيجه حقيقه
بالنسبه للصورة
معلش انا عن نفسي اعتقدت فترة كبيرة انها لشخص ذكر
لما حد بيحط في البروفيل صورة بنت غالبا والبعض بيكدب كان في شخصيه علي النت
مدونه حنين
مش عارفه انتي حضرتيها ولالأ ودي اول دخولي عالم النت وكان حولها مريدين كتار
ومعجبين اكتر
البعض انبهر بأفكارها الصادمه
والجريئه ثم اتضح انها لراجل
واخفي ذلك عمدا لمزيد من الابهار
الموضوع ده كان في بوستاتي الاولي
انا عارفه انه لاينطبق عليكي بس فكرة انك ترسمي صورة مغايرة لاي سبب
برئ او غير برئ فكرة مرعبه
منورة زمزم