الاثنين، مارس 24، 2008

التدوين وثقافه الشارع




اتصفح كل صباح الريدر وارد علي التعليقات واشوف مين كتب ايه

وبعد ما اخلص اروح استلف من ريدرات الجيران ولينكاتهم غالبا من بثينه وعباس العبد ونوارةوبيلا

ولينك يشيلني ولينك يحطني وتعليق يجر مدونه ومدونه تجر تعليق ومن ده لده واكتب تعليقات وانسي ارجع اشوف ردها واللي يمخمخني اوي احطه علي الريدر ما يغركوش اللينكات اللي عي الجنب دي قديمه الريدر خلاص اتخنق مني

المهم من مدونه الي اخري احيانا بيكون الانتقال زي الانتقال من الساقع للسخن وبيعمل حاله تششششش

حاله التشششششششششششش دي خطيره جدا ليه؟؟ لانها بتشقق قشرة الدماغ وبتحولها الي ما يشبه الزجاج المسرطن؟؟

او ما يشبه شظايا الكريستال


ليه؟؟

لاحظت ان التدوين لم يقدم لي ثقافه حقيقيه بجد والله محدش بيثقف من التدوين او علي الاقل انا لكن مجرد عرض لنماذج مجتمعيه متباينه ومختلفه الي حد مرعب. وده اعتقد هو ما نحصل عليه من الشارع يعني ثقافه شارع او فن الحياه...تلاقي اتنين او تلاته بنفس الاسم كل واحد دماغه ملهاش علاقه بالتاني ومختلفين من اقصي اليمين الي اقصي الشمال مثلا في تلاته هيومان كلهم ناس زوق بس مفيش واحد بشبه التاني

الصبح كنت بقرا الجمله دي في احد التدويناترقة شدة انتباهى من جمالها وتدرج لونها الواحد ما بين الفاتح والغامق ـ سبحان الله الخلاق العظيم } هكذا كتب احد المغتربين المصريين في امريكا

ثم قرئت بعدها مباشره تلك الجمله{، أن الله لا بد أن يستيقظ يوماً ما فيأخذ كل المرضي والأغبياء والمجانين والعواجيز، والجالسين على الكراسي،}

وهكذا تحدث حاله التششششششششش او التقشير الدماغي والشرخ الكريستالي اللي حكيت عنه

ليه بقول التدوين مقدمش ثقافه ليا؟؟ عشان بصراحه حاسه ان الواحد عشان يتثقف لازم يروح المكتبه او يشتري كتاب ويدفع فيه دم قلبه حتي الانتاج الادبي في التدوين مستواه مختلف جدا ومساحه الحريه المتاحه بتخلي الواحد يقرا الغث والسمين يعني زي اللي بيدور علي ابرة في كوم قش


او تلاقي مدونه مخصصه لحكايات جنسيه.. تغلب عليها احيانا الشطحات لاصحابها لكن موضوعه في قالب ادبي مميز او تلاقي تجارب شخصيه بحته برضك مكتوبه احسن من ادباء معروفين بيتنشر لهم

المهم تاني طب انا استفدت ايه.. عرفت ناس..بس!! خصوصا الكتابات والتدوينات الرجاليه يمكن طبيعه مجتمعنا مش بتخلي الواحدة عندها فرصه يكون لها اصدقاء حقيقين للمحاذير المعروفه او العكس الواحد مش بيكون عنده نفس الفرصه قوم اكتشفت ايه؟؟ ان الرجاله شبه الستات جدا.. والله فيهم الغبي والذكي المثقف والمدعي الاديب والمؤدب!! الطيب والخبيث!! يا سلام!!حد ها يقولي امال ايه؟؟ مش عارفه بس اكيد الانطباع مشترك واحده غبيه وواحده ذكيه وحيث اننا بنختفي تحت اسماء مستعارة في الفضاء الالكتروني اللانهائي

ناسلها كاريزما وناس متنطقش

بيكون الحكم علي ما تنقرة اصابعنا علي الكيبوردات فقط وفقط لاغير وبنحكم علي الشخص من خلال كتابته بس


طيب انا عاوزة اقول ايه في الاخر ولا حاجه ربنا يخلي عم جوجل كان راجل طيب عرفنا بعض وجمعنا في التدوين اهو بدل الرجاله ما تنزل علي القهوة تشرب شيشه وتلوث البيئه والستات تروح المول تصرف فلوس الرجاله..


ادينا نعرف المجتمع رايح علي فين وبلدنا ايه اللي فيها؟؟ اول باول ونفك علي نفسنا شويه قيود من اللي مخنوقين بيها وربنا كريم ودمتم


هناك 23 تعليقًا:

عباس العبد يقول...
أزال المؤلف هذا التعليق.
عباس العبد يقول...

أنا كتبت من فترة كبيرة تدوينة أسمها

href="www.charkawy.blogspot.com/2007/o4/blog-post_2327.html">ثقافة التدوين

و هى مؤيدة ليكى و لوجهة نظر التديوينة بتاعتك
و انا بشاركك فى رأيك
لكن متنكريش أن معرفة البنى أدمين مهمة ؟؟

فاتيما يقول...

نور القمر
يا لؤلؤة
متفقة معاكى الف فى المية....
التدوين بقى عامل زى دفتر احوال الوطن ...
جريدة الناس الناطقة و الناس على اختلافها و تنوعها شوفى بيطلع منها حاجات شكلها عامل ايه و دى فى رأيى أحسن من الصحافة بكتير ... لأن كل واحد حر و مفيش فوق دماغه رئيس تحرير يتحك فيه ولا رقيب يقرفه ولا نسبة توزيع تبطله كتابة فى يوم ....
حكاية الثقافة دى حتى من الصعوبة توافرها ... بصى على الجرايد و المجلات بتاعتنا هتلاقى ثقافة؟؟؟
كل الحكاية ناس بتدور على حد يسمعها و حد يفهما و حد يعجبها ...
انا شخصيا بقالى سنين متعلرفتش على حد عدل .... لقيت فى المدونات صداقات ...صحيح افتراضية لأنى معرفموش فى الحقيقة ... بس هما كمان ميعرفونيش ..الا بما اكتب ...
طب ما اغلب الادباء و الكتاب و الصحفيين كانو كدا محدش يعرفهم لكن بيقرلهم ....
المهم المحصلة النهائية .. و هى ماحدث من تعارف ينمو يوم بعد يوم
تحياتى يا عزيزتى

الطائر الحزين يقول...

نعم ليست اضافة ثقافية


دوما أقول انه كلما عملت مجهود فيما تقرأ استفدت منه أكثر

حتى الصدقات والتبرع لما تجهد نفسك وتحاول تعرف مين المستحق يكون المنفعه أعم


والاجر على قدر المشقة


وكذلك الثقافة



تحياتى

Empress appy يقول...

ثقافه ايه دى بقى هنهزر
دى بتنجانات بجد مش ثقافات
لان فى راى اننا بنعرض وجهه نظرنا
بس عاوزة اقول على الصدمه انى لاحظت فى بعض المدونين انهم بيكتبوا بشخصيه ولما تقابليهم فىالحقيقه تكتشفى شخصيه تالته خالص

عاشــــــ النقاب ـقــــة"نونو" يقول...

معاكي جدامعاكي بشكل وحش يعني
ههههههههههههههههههه
اول زيارة بس هتاابع
اسمحيلي اقرا وبراحتي وارجع اعلق على كل تدوينة على حدى
بورتي حبيبتي

خمسة فضفضة يقول...

السلام عليكم ورحمة الله وبركاته

صحيح الواحد مش بيتلقي ثقافه مباشرة من خلال متابعته للتدوين
بس ممكن تقري عن حاجه عابره عند شخص ما وبعدين تتبعيها بنفسك وتعرفي كل حاجه متعلقه بيها ، او ممكن تسمعي عن كتاب ما ويعجبك العرض الشيق بتاعه فاتشتريه وتقريه او حتي تتعرفي علي مواقع كويسه فيها ثقافات مختلفه


وزيك باعتبر التدوين دنيا وحياه تانيه حياة افتراضيه موازيه للحياه العاديه بكل اللي فيها الحلو والوحش
وياما تششششااااااات بتحصل في الدماغ واحنا بنلف في المدونات
بس بيني وبينك يعني بقي ادمان ما نقدرش نستغني عنه


سلام يا قمر

غير معرف يقول...

لقد جاء التدوين ليكون طوق نجاة لملايين البشر من أمراض التوحد و الأكتئاب و الأنطواءو الأنكفاء داخل الذات

كل مدون بيشعر بالرضاء و الأنتشاء و السعادة لكل من يطأ مدونته و يقرأ له حرفا و ييتعايش مع ما يكتبه للحظات ... تلك اللحظات التى نفتقدها و نبحث عنها فى الحياة .. ولكن نخشى عواقبها و و نبتعد اتقاء لشرورها ..

و كلما ذاد عدد من يقرأ لى ... و كبر عدد من يخط فى صحيفتى كلما شعرت بالرضا و اذددت يقينا بأهميتى
أما ثقافة ... فلا اعتقد أنها متواجده أو هنالك من يبحث عنها ...

karakib يقول...

كلامك حلو
خرجت من التدوين بمجموعة من الاصدقاء
ماكنتش اتخيل اني ممكن اعرف حد منهم
افكار و ثقافات مختلفة و كلهم حلوين جدا

محمود المصرى يقول...

بسم الله الرحمن الرحيم


اختلف وبشدة , لأن التدوين مش برنامج شات , لكن هو ساحة لعرض الاراء والافكار , والواحد فى التدوين يقدر يطلع على افكار واراء ناس جايز مايقابلهمش فى الحقيقة اما لأنه مش هايحتك بيهم اوى او لأنهم ممكن يكونوا انقرضوا او اوشكوا , وبالتالى بنعرف التيارات المختلفة , ودا يعتبر فى رأيى ثقافة , اما بقى لو الثقافة فى تصورك انها دراسة اكاديمية فدا موضوع تانى خالص وفعلا المدونات مش مجالها ابدا .

بنت القمر يقول...

عباس العبد
قريت التدوينه بتاعتك اللي نهيتها بسؤال؟؟
هل التدوين يقدم ثقافه
طبعا محدش يقدر يقول انه قرا بوست قام زاد وعيه اللهم اذا قلت انه نوع من توسيع المدارك بمعني انا عرفت عن القرأنين من التدوينات
لكن عشان افهمهم صح واقدر اكون رأي
لازم اروح اشتري كتبهم مقالاتهم
عموما متفقيم بتقول معرفه الناس مهمه
طبعاا وده اللي قولته لما قلت
لكن مجرد عرض لنماذج مجتمعيه متباينه ومختلفه الي حد مرعب. وده اعتقد هو ما نحصل عليه من الشارع يعني ثقافه شارع او فن الحياه...
كمان ممكن في خلال التدوين تعرفني او تعرف حفصه وبيلا ونوارة
وهوما يتجاوز المسافات والاماكن
وتقدر تعرف دماغ كل واحده وطريقه تفكيرها
بدون تعامل مباشر
لكن تقدر تنكر احيانا ان حاله الانتقال من النقيض الي النقيض دي مش مفزعه احيانا زي الجملتين من مدونتين اللي انا اوردتهم
علي فكرة الجمله التانيه اخدتها من مدونه لينكها من عندك وقد منحت صاحبها لقب وزير التعليم!!
احيانا الانتقال ده بيكون مرهق وبيخلي الواحد يخاف علي البلد دي اللي مفيش فيها حد زي حد ولا حد شبه حد ولا حد متفق مع حد
تحياتي

بنت القمر يقول...

فاتيما
اهلا بيكي متفقه معاكي اضافه الي اني اري التدوين او هو بالنسبه لي طاقه فضفضه وتعرف علي اتجاهات وافكار جديده مش مهمه النتيجه المهم المتعه هنا
طالما بستمتع وبفكر وبدور علي المعلومه بدون محظورات يبقا جميل
اهلا بيكي
ويا ستي اهو انا صديقه جديده
تحياتي

بنت القمر يقول...

الطائر الحزين
فعلا يمكن تاخد راس المعلومه من بوست
زي مثلا انا سمعت عن القرآنين من خلال التدوين بس عشان اعرفهم اقدر ادور برة
ما تخيلتش لنه في تيار ديني مش قليل الا من خللال التدوين
عشان اقدر افهم لازم ادور برة
اشكرك تحياتي

بنت القمر يقول...

ابي
ما قابلتش مدونين كتير لكن علي الميل عرفت كذا حد بس الحقيقه انطباعي الول ما خيبش وحكمي الاول ما تغيرش
لكن الانسان محتاج ينوع مصادر معارفه
تحياتي

بنت القمر يقول...

نونويمم
طيب الحمد لله انك متفق المدونه متاحه للجميع بس حضرتك بتقول ايه اخر جمله؟؟
مش واخده بالي؟؟

بنت القمر يقول...

خمسه فضفضفه
دكتورة صحيح
مبسوطه انك قريتي بتركيز وعرفتي انا عاوزة اقول ايه
انتي برضه بتششششششي زيي
الحمدلله يعني مش انا لوحدي
فعلا ممكن تاخدي هنا متعه وتوسيع مدارك فقط لكن المعلومه الحقيقه لازم تدوري عليها بره
وبالنسبه للادمااان فده وصل الي اعلي معدلاته
احط براد الشاي علي النار الصبح وافتح الكومبيوتر اول ما افتح عيني دوغري
وممكن ابص مرة الي مرتين وسط النهار
يعني انتي زيي؟ مش انا لوحدي طب الحمد لله
منورة فضفضفه

بنت القمر يقول...

حسن
رحت ابص عند حضرتك كذا مرة بيديني الرساله التاليه مش عارفه ليه
يمكن عرض وضع Blogger الذي طلبته. لم يختر الكثير من مستخدمي Blogger المشاركة العامة لهذا الوضع حتى الآن.
مش عارفه ليه لو تكرمت سيب لي اللينك بتاع حضرتك
في تعليق
وعموما متفقين اهلا بيك صديق المدونه تحياتي

بنت القمر يقول...

كراكيب
اشكرك
والاصدقاء والتواصل الانسانس في حد ذاته نعمه كبيرة
ربنا يديمها منور هاني

بنت القمر يقول...

محمود المصري
الله يا محمود انا قلت برنامج شات
برامج الشات لها ناسها
حضرتك بتقول اراء وافكار واتجاهات ناس مقابلهومش ويمكن مش ها يقابلهم
طب ماهو نفس اللي قولته بالنسبه للافكار قلت:
التدوين او علي الاقل انا لكن مجرد عرض لنماذج مجتمعيه متباينه ومختلفه الي حد مرعب
وبالنسبه لمقابله ناس كمان قلت:
والتدوينات الرجاليه يمكن طبيعه مجتمعنا مش بتخلي الواحدة عندها فرصه يكون لها اصدقاء حقيقين للمحاذير المعروفه او العكس الواحد مش بيكون عنده نفس الفرصه
وكمان قلت::
بيكون الحكم علي ما تنقرة اصابعنا علي الكيبوردات فقط وفقط لاغير وبنحكم علي الشخص من خلال كتابته بس
طيب يبقا مختلفين في ايه؟؟
مفيش يا استاذي العزيز
معلش لو تتكرم اقرا البوست تاني
ولا هو لازم نختلف
(:
متفقين والله
تحياتي
اشكر مرورك

mohand يقول...

اتفق معاكي تماما

انا شخصيا شايف كده

عاشــــــ النقاب ـقــــة"نونو" يقول...

اختي اسفة جدا البرد عندي بتعلق
اخر جملة بوركتي حبيبتي
اتمنى ما تزعليش

None يقول...

معلش تعليق بعد كتير

اصلى برضه جيت هنا عن طريق الريديرا لى جابى لمدونها للى شفت فيها تعليق اللى جابنى هنا

المهم

حبت بس اقول ان ده مش حالك لوحدك وان كذلك كل يوم على نفس النظام


وسلاااااااام

Another يقول...

وأنا سعيد بأن التدوين عرفنا على شخصية مثقفة جميلة زي حالاتك يا فندم

:)

بس ياريت ما تقعيش في نفس الغلطة اللي ناس كثيرة بتعملها دون قصد؛ اعتبار المجتمع الإنترنتي (تدويني\ منتدياتي\ ماسنجري\ إلخ ...) هو الأغلبية والمعبر عن حال الشعب ككل .. لأن المنطقة العربية ومصر ليست استثناء منها أغلب مواطنيها تحت خط الفقر، والإنترنت بالنسبة لهم رفاهية لا يحلمون بها للأسف

عارف إن قصدك مش كده بالضبط، لكن الاحتياط واجب برضو، لأن الانفصال عن مجتمعنا للأسف حاليًا سهل

وتحياتي لكتابتك
:)