الاثنين، مارس 31، 2008

البحث عن بهجة

انطلقت لواجب اجتماعي سخيف_عزاء حماة صديقتي.. ارتديت بدله سوداء وصندل اسود وحقيبه سوداء
اكره اللون الاسود بشده ولا امتلك الا تلك البدله باللون الاسود _ لمثل تلك المناسبات لم اشعر حقيقه بالحزن علي الفقيده
فقد جاوزت السادسه والثمانين وجلبت للعالم احد عشر كائن بشري.. وعانت اخيرا من امراض عدة!!
لا بد انها الان بين يدي الله ارتاحت من عالم خانق ملئ بالصراعات والاحقاد والشرور..
انهيت ارتداء ملابسي الكئيبه اضطرارا
وبعد ان توجهت الي الباب عدت ادراجي طليت اظافري بلون احمر قاني متحديه سيمفونيه السواد..
ثم استبدلت الصندل الاسود بآخر ملون
وصلت عند صديقتي حنان كانت تشعر بالضيق من فترة الحداد عرضت عليها ان نخرج قليلا وافقت
انطلقنا بالسيارة الي مكرم ..اشهر بائع جيلاتي .في منطقه ميامي.
خجلت من زوجها واخفت عنه اننا سنتناول جيلاتي واخبرته حين اتصل هاتفيا اننا نشرب عصير!!
تذكرنا صديقه اخري اتصلت بنا ايضا
عرضنا عليها ان نشتري جاتوه ونتناول معها الشاي فجأه قارب تنك البنزين علي النفاذ لم نستطع الي الوصول الي اقرب محل جاتوة علي بعد 300 متر اسمه برنيس
وهو اسوأ مكان تأكل في جاتوه في الاسكندريه ولكننا كنا في حاله اصرار علي الخروج من حاله الكآبه بأي ثمن انا وهي
قلت لها: تسمعي ايه؟ قالت وانتي عندك غير عبد الحليم فاجأتها بشريط اليسا..
ذهبنا الي اقرب بنزينه ونحن ندعو الله ان لا ينفذ البنزين قبل ان نصل استمتعنا بهواء البحر البارد وصوت اليسا وتلك الرحله القصيره ثم الي صديقتنا الثالثه التي تنتظرنا علي الشاي
فتحت الباب كنا نرتدي السواد ونحمل علبه الجاتوه.. فقالت : ايه قاليبنا ضلمه وداخلين بجاتوه علي روح المرحومه؟؟
انفجرنا ضاحكين...
اكلنا الجاتوة وشربنا الشاي واستغليت سفر ادم يومين في التأخير قليلا
والحصول علي ساعه اضافيه بعد مواعيد العوده الرسميه للبيت!!
تبادلنا الحديث والضحكات والحكاوي وعدت
وقررت ان احاول مرة اخري البحث عن بهجه بأي ثمن!!



هناك 29 تعليقًا:

عاشــــــ النقاب ـقــــة"نونو" يقول...

للفقيدة الرحمة وبالهنا والشفا ليكوا
ضحكتيني
كويس انك قدرتي تنشليها فعلا من الجو الكئيب وتفكي عنها
ربنا يبارك في صحبتكم

محمود المصرى يقول...

بسم الله الرحمن الرحيم

دا كله طبعا على افتراض ان كان فى مشاعر حزن حقيقية عند صديقتك تجاه وفاة حماتها , وان كنت اشك فى قدرة الانسان على التعافى السريع من تجربة مؤثرة بهذه الصورة , يعنى الواحد ممكن يتجاوز الظروف ويمارس حياته الطبيعية لكن انه يبالغ فى معايشة البهجة فدا لا اقدر ان افسره الا انه غياب للحزن الحقيقى ومحاولة للتخلص من مظاهره التى لا تعكس مشاعر حزينة .
عموما يعنى المهم انكم اكلتوا جاتوه وجيلاتى والاهم من دا كله انك نزلتى البوست دا بعد اللى حصل فى البوست اللى فات
تعليق بسيط للأخت عاشقة النقاب
فلا تهنوا وتدعوا الى السلم وانتم الاعلون والله معكم ولن يتركم اعمالكم


تحياتى

غير معرف يقول...

أغيب شويتين أرجع ألاقيكى عاملة شبطة وحريقة
وانا عارفاكى خلقك فى ماخيرك
سبحان من صبرك على اللى حصل فى البوست اللى فات
بسعجبنى جدا كلامك مع نفسك
كأنك ترجمتى كلام كتير مننا لكن مش قادرين على تصويره فى حروف

الله يرحمها
المهم الجيلااااااااتى
والجاتوة سكى عليه
خخخخخخخخخخخخخخ

Bella يقول...

بحث عن بهجة في مناسبة لاتتناسب مطلقا مع هذا البحث

ههههههههههههههه

انتم عفاريت بجد

هههههههههههههه

بنت القمر يقول...

نونويم
ربنا يرحمنا جميعا
والله الواحد لازم يحاول ما يتماداش في احزانه وخصوصا ان الست كانت كبيره اوي ومتبهدله والكل كان بيدعي لها الرحمه وبعدين انا كمان استفدت من الفسحه
(:
اشكر مرورك
تحياتي

بنت القمر يقول...

محمود المصري
وعليكم السلام يا سيدي
هو الحقيقه شكلك كده عاوز تقول ان معندناش دم
(((:
بص هي اصل المتوفاه كانت كبييييرة وقعيده وولادها اتبهدلوا بيها
بالاضافه الي انها حماتها مش امها
ازعل انا ليه يا محمود
(:
ده انا الدنيا كلها مزعلاني وانا ناقصه؟؟!!!
بخصوص البوست ده والله البوست اللي فات كنت عاوزة اعمل بوست روحاني تأملي وكنت بدور علي الحاله دي!! لكن هيهات قلبت كوبيا!!
طب اعمل ايه بوست راس ورجل كل واحد وواحده يسكتوا محدش سكت؟؟
اعتذرت لهم كل واحد باسمه
ولو!!
قلت احتراما ليّا محدش عبرني!!
قلت انزل بوست تاني اغلوش علي الاولاني
((((:
طب اعمل ايه بقا؟؟ اكتر من كدا؟؟
وبعدين لاتهنوا وتدعوا للسلم؟
اوع تكون مش عاوزها تكلمني؟؟
((: تحياتي
اشكرك واشكر مرورك

بنت القمر يقول...

شهروزة
مليتي مكانك يا ست البنات
برضه عاوزة حق التمن لانشون!!
((:
يعني انتي تغيبي تغيبي وتيجي علي خناقه!!
بس شفتيني وانا رجعيه متزمته بدرجه تغيظ متحررة ليبراليه مسيحيه المصطلحات!!
((:
ده انا بقا نصيبه رأفت الهجان
عموما مبسوطه ان كلامي عن علاقتي بالله وشويه الفضفضه عجبوكي ومسوا قلبك
تحياتي يا إش
نورتي بعد غيبه
((:

بنت القمر يقول...

بيلا
لا يا بيلا ما احنا بحثنا في الخباثه
والجاتوة كان وحش بس ما عتقناهوش
(:
الفرح مش بيدق بابنا لازم ندور عليه يا بيلا
تحياتي

عدى النهار يقول...

الأول خدى بالك تكون صاحبتك بتقرأ المدونة وبدون قصد تحكى لزوجها عنها فيعرف موضوع الجيلاتى :) كفاية البوست اللي فات والولعة اللي لسة آيدة هناك. بس بصراحة حاجة تضحك وتحزن فى نفس الوقت.. تعليقات وردود مليانة غل زى مايكون فى تار بايت بين أصحابها

المهم.. إنشاء الله تعثرى على بهجة وأخوتها كمان ومن غير واجبات إجتماعية سخيفة
:)

خمسة فضفضة يقول...

السلام عليكم ورحمة الله وبركاته

جميل جدا ان الواحد يقدر يلاقي البهجه في اي مناسبه واي مكان حتي ولو كانت مناسبة حزينه

ربنا يجعل ايامك كلها بهجه وسعاده

Yuki يقول...

البقاء لله لزوج صاحبتك

بس المهم انك فرفشتى شوية و قضيتى شوية وقت حلوين

أول زيارة لمدونتك

بالتوفيق

عاشــــــ النقاب ـقــــة"نونو" يقول...

اختي بنت القمر
اسمحي لي ان ارد على اخي محمود
بارك الله فيك واحنا ايه في اللي حصل للرسول واللي شافه ربنا يهدي الكل يارب
وعلى فكرة يا اختي بنت القمر ما اقدرش ازعلك ابدا وباعتر بشدة واا سمحتي احفي من تعليقاتي اللي مضايقة منه بدون اي زعل
وطبعا هكلمك اخي محمود يقصد يطيب خاطري الله يكرمه ويكرمك
تحياتي للجميع

Empress appy يقول...

بصى يا سيتى
اولا حمد لله علىالسلامه من البوست اللى فات واللى اكتفيت فيه بأنى بتفرج من الشباك بس خوفت ارميلك حالى ههههههههههه على راى الاغنيه
نيجى لده سيبك اللى ماتت ربنا يرحمه برحمته اولا

انما لحظات السعاده او البهجه والله ساعات كتير بتبقى فى حاجات صغيرة جدا بس بتنفع زى الايس كريم والججاتوة او ورده اشوفها وانا مضايقه قوى طالعه فى بلكونتى ابص لها واضحك
ربنا يديكى السعاده والبهججه اللى بتتمنياها العمر كله

بنت القمر يقول...

عدي النهار
متخافش يا باشا
المدونه متراقبه ومتأمنه تمام !!وصحابي ملهومش اي علاقه بالنت الا البحث عن طريقه عمل التبوله علي الطريقه اللبنانيه!!
او البيتزا الايطاليه بزيت الزيتون(:
او تنزيل اغاني وافلام وموديلات سواريه..
محدش اضرب بالداء العضال بتاع التدوين غيري
وبعدين يا اخي دي خطايا أنسانيه بريئه استبدال ايس كريم بالعصير
اعتقد المرحومه نفسها مكانتش هتزعل
(((:
اما البحث عن بهجه مازال البحث جاريا
بكل قوة
وخصوصا بعد المأسوف علي شبابه البوست اللي فات
تحياتي

بنت القمر يقول...

فضفضه
يا رب احنا وياكي امين
تحياتي

بنت القمر يقول...

يوكي



يا يوكي اللي مات حماتها مش جوزها يارب المدونه تعجبك اهلا

بنت القمر يقول...

نونو يم
يا ستي ولا حذف ولا يحزنزن وانا رديت عليكي البوست الاخير وياريت نكفي علي الخبر ماجوووور
نكرم الميت وندفنه{البوست السابق}
انا نزلت البوست ده عشان انسي واغلوش علي القديم
انسي بقا
تاكلي جاتوة؟؟
(:
منورة نونويم

بنت القمر يقول...

ابي
يا لئيمه انتي متابعه في الخباثه؟؟
انتي سهنه بقا بضم السين
كويس انتي مجيتيش كنتي اخدتي طوبه ولا مطوه
(:ومن خاف سلم.. تعالي انتي في الرواقه
ربنا يرزقك الفرح والبهجة دايما يا رب
تحياتي

زمان الوصل يقول...

:)
فكّرتينى بموقف حصل من يومين .. رحنا النادى و مصيّفين و واقفين نشترى جيلاتى و فجأه الدنيا مطّرت و غيّمت و بقى فيه احتمال إصابه بدور برد محترم !! بس الموقف كان فيه قدر غريب من البهجه الغير متوقّعه !! من زمان يعنى محصلش ما يشبهه : آيس كريم تحت المطر .. على رأى "عمرو دياب" : آيس كريم فى ديسمبر !!

اسكندراني اوي يقول...

ههههههههههههههه
في قمه الحزن يجب ان نجد طاقه نور تبهجنا والا انفجرنا
اما كمدا
او
ضحكا



خالص عزائي

ذو النون المصري يقول...

انا بحاول ابحث عن البهجه باي ثمن منذ زمن و لا اجدها في اي شيء سوي في تغيير الكتاب الذي اقراه او الورقه التي ارسمها او اغنيات و موسيقي احب سماعها

غير معرف يقول...

انه الموت هادم اللذات و مفرق الجماعات ... سيظل سر الأسرار و أم الحقائق و المنتصر النهائى فى كل المعارك مهما تبسم الزمان و طال

و طبقا لقرابة المتوفى و علاقتنا به يكن الحزن و الألم للفراق ... و دى هايلاه حماة صحبتك و عندها 86 سنة ربنا يدينا عمرها , يعنى أيس كريم و شاى و جاتوه و تمشية على الكورنيش رد فعل متوازن جدا و يتناسب مع جلل الحدث ... لو المرحومة فوق التسعين كان بقى فيها كمان سينما حفلة ستة لتسعة .

الطائر الحزين يقول...

لكن الاتعاظ بالموت لا يحتاج الى سن


وفعلا الخروج من جو الكآبة مطلوب


اما فى العموم


البهجة فعلا اصبحت تحتاج الى بحث



تحياتى

بنت القمر يقول...

زمزم
اذا لم تحضر البهجهه فلنبحث عنها
تحياتي
ربنا يمنحك كل سعاده

بنت القمر يقول...

اسكندراني
صدقت
منحك الله كل الفرح
برنيس بتاع الجاتوة وحش ما تشتريش منه
):
تحياتي

بنت القمر يقول...

ذو النون
الكتاب والورقه والرسمه متع عظيمه قد لا تدرك قيمتها الا لاحقا فتشبث بها
تحياتي

بنت القمر يقول...

hassan
يعني هو الصدق في المشاعر زي ما قلت افضل بكتير من افتعالها
مش كده برضه
(:
تحياتي

بنت القمر يقول...

الطائر الحزين
اذا لم تدق البهجه بابك فابحث عنها بكل قوة
تحياتي
منك الله كل بهجه وسعاده

Yuki يقول...

ما انا فهمت و الله ان اللى مات حماتها مش زوجها

انا بقول البقاء لله ليه مش علية عشان اللى اتوفت دي تبقى والدته

صح ؟؟

مدونتك مميزة جداا و ان شاء الله مش هتكون آخر زيارة ليا :)