الأربعاء، أكتوبر 22، 2008

مش كلنا نهي رشدي

ليس رغبه في العكننه علي الجموع الهاتفه بحياه نهي ولامن سيتخذنها مثلااو من سوف يرون ان انها قدوة وبطله ورمز او ايقونه سيتحلي بها
لكن هاند شمال في وجه من يعتقد ان التحرش صفحه وانتهت في تاريخ مصر... او ان بنات مصر محدش ها يقدر يقرب لهم من هنا ورايح
!!
او من يعتقد ان كل النساء سيصبحن نهي رشدي...
نهي خدمتها الظروف لتكون بطله.... اه الظروف خدمتها مستوي تعليمها(الجامعه الامريكيه وثقافتها ومعرفتها بحقوقها القانونيه جعلها تستخدمها وقد قرات روايتها عن حادث التحرش اللي حصل لها... الحقيقه ان كل ما قريت الاندهاش يرتسم علي وجهي ازاي قدرت تجري ورا المتحرش وتطلع فوق عربيه وتمسكه وازاي قدرت تثبته انه ما يهربش مع اقرارها انه محدش ساعدها لما طلبت توديه القسم وان مكنش معاها الا صديقه دي سوبر وومن بقا!! وهو متحرش طيب جدا كان باين عليه وقف معاها وبعدين راح القسم في عربيتها!!!!!!!!
فضلت تتصل بابوها وابوها عمل اتصالاته وجده وودوه القسم... طب والنبي ده متحرش اهبل ويستاهل 10 سنين مش تلاته
طبعا ده مش تقليل ابدا من بطوله البنت بس مش كل بنت نهي ولا كل بنت تقدر تعمل كده ولا كل متحرش اهبل وطيب كده !!
في متحرشين مدمنين او غوغاءاو حاملي سلاح
وضحايا.. اطفال او صغيرات او كبيرات السن.. في تحرش جماعي في تحرش خفيف وفيه تحرش مؤذي ومؤلم
يعني في موضه رش المياه علي العابرات في الطريق ودي وسيله غير مؤلمه لكن مرعبه لان الضحيه بتقعد تفكر ايه السائل ده... هل يحمل مرض ...هل سائل حارق.. بس بياخد وقت يتفاعل... يكون دمها نشف
لحد ما تكتشف انه شويه ميه !!
لو نفتكر من سنوات كان في متحرش بينغز البنات بمطواة في اردافهن... يعني اهو السلاح في ايده طيب لو الضحيه شافته ومعاه مطواة تبقي متخاذله وجبانه عشان هي معملتش زي نهي رشدي!!
بما اني عندي طفله 12سنه لم تركب اي مواصلات للان فكل ما اقدر اعمله اني اربي فيها الثقه في النفس علي قدر سنها لكن مش ها اتوقع منها اللي مقدرش انا اعمله شخصيا
مش كلنا نهي ولا ثقافتها ولا وعيها ولا ظروف الواقعه قابله للتكرر

الحل ايه؟؟.... مش قادرة اتصور انه( رغم انه ممكن يكون حقيقي) انه الدوله خلاص بح... رجاء قراءه شهاده د- شرف الدين عن المطالبه بدوريات راجله في الشوارع
مش قادرة اتخيل انه خلاص لازم انزل الشارع بمطوة تحسبا للظروف لانه محدش ها يحميني... وان ممكن اضطر استعملها وان كان في عربيتي سكينه صغيره لنفس السبب:(
لازم الناس تقوم بدورها وتبطل سلبيه والدوله تتكسف علي دمها مش العبء يترمي علي النساء في مواجهة وحوش الطريق!!
الناس فرحانه لانه العدل والطبيعي اتحقق لكن للاسف الناس بتلتف حول المنتصر وتقلده وتنفض حول المهزوم... لو المتحرش ده ضرب نهي بمطواه اوداس عليها بعربيته رماها مكسره علي رصيف..مهما قاومته. كانت الناس مش ها تعتبرها بطله!!.. مجرد ضحيه... عاديه..
. زي ضحايا جامعه الدول او ضحايا العيد السابق يعني عشان النهايه سعيده بقت بطله لو النهايه عاديه والجمهور ما شافش شرير الفيلم بقي بيشر دم والبوليس مجرجرة....يبقا السينما اونطه

هناك 37 تعليقًا:

فاتيما يقول...

أنا معاكى يا أمانى
القصة دى إستثنائية شوية
لكن فى الغالب ملايين النساء يتعرضن للتحرش بكافة أشكاله و بيضطروا يسكتوا لأنهم لو إتكلموا هيتبهدلوا أكتر من كدا
بس الفكرة فى حد ذاتها ممكن تكون رادع للجبناء و يا ريت يحصل كدا
بس انا شايفة إن الحل الحقيقى فى وجود أمن زى زمان لأن الأخلاق قياسية
تحياتى ليكى

mido يقول...

شوفت بقى الظلم

مجبتيش سيرة الشاب (20سنة) اللى وقف معاها بجانب صاحبتها
:)

ازاى تطلبى من الدولة تحس على دها؟

1- مافيش دولة( دولة رخوة-الوصف لدكتور جلال امين)

2-بلدنا بتتحرش بينا مجازا و حقيقة

3-لازم الموقف الشجاع ده يتكرر كذا مرة لبدء تغيير الواقع

mido يقول...

*دمها

محمد عبد الغفار يقول...

صدقتِ

Empress appy يقول...

طيب وايه المشكله انك تعلمي بنتك تبقى كده وايه المشكله اننا نكون كده
طيب احكي لكي موقف حصل من كذا سنه ليه انا شخصيا
بس الاول انتى نسيتى حاجه فيه واحد وقفت عربيته بالصدفه قدام الراجل يعنى ربنا هو اللى عمل كده وعلشان كده هي جريت عليه ابقى اقري اللينك التاني عندي للحوار بتاعها وعلى فكره الحادثه اتكتب عنها قبل كده
المهم كنت ماشيه فى الشارع مع اختى وفى المنصوره وجاي علينا تلات ولاد ووراهم بنت صاحبه اختى فاحنا بنضحك لها وبنكلمها وجينا فى جنب علشان الولاد تنحت وفضلت فو شنا فكنا هنخبط فى بعض ومنت لابسه سلسله فضه طويله اوي الولد مد ايده مسكها محستش بنفسي غير وانا بالقلم على وشه وهو مسكتش زقنى وقعت على الارض اختي ضربته بالقلم هى كمان او شالوت مش فاكره بقينا احنا التلت بنات بتضرب فيه والناس اتلمت وبقوا يشدوه مننا واصحابه والولد اكبر منى واقوي على فكره وفى الاخر مشيت ورحت حكيت لبابا وقعد يدور عليه علشان يعرف هو مين لانى وصفته وكنت عارفه واحد من اصحابه والود جالنا البيت يعتذر لوحده وقال لبابا انت متخافش على بناتك دول اجدع مننا وانا اسف والله مقصدتش ومعرفش عملت كده ازاي بابا كان عاوز يحره على القسم بس الولد فعلا بدون مبالغه كان فيه كدمات فى وشه واتبهدل ومن ساعتها لو شافنى وانا هناك بيحط وشه فى الارض ووالده جه واعتذر عارفه ناس هتقول طيب مش انت كده هزاتي نفسك اقول ياسلام وهو لما مد ايده ولمس جسمي مكنش بيهنى واللى فى الشارع هيضحكوا وابقى بنت بنتمشي كل واحد يحتك بيه
الغرض من الموضوع ايه ان الواحد لما بيتجرح يا قمر ولا بيتهان ربنا بيده قوه مش تتخيليها على فكره وبيكون فيه عزم انه يقطع اللى قدامه
انا مخفتش انى بنت بس خفت على سمعتى يعنى ايه واحد يلمسنى واسكت ليه يعنى
عموما فى النهايه حتى لو الظروف خدمتها وهي جامعه امريكيه مع ان ملوش علاقه ومش فاهمه ليه رابطين ده بده وان كمان بنات مصر الجديده ومدينه نصر يعنى ياى وكده ولهم واسطه واسطتنا ربنا يا حبيبتى صدقينى بجدغير كده فيه بنات فى جامعه امريكيه مش بيخرجوا من بيوتهم برضه ومش بيحتكوا بالعالم وانا عارفاهم ههههههه
وانا مش هتنازل انى اعلم بنتى لما تيجي ان محدش يحتك بيها بدل ما تحصل مصيبه وتيجي تعيط ومتقولش فهمتى قصدي ومش لازم اكون دارسه قانون علشان اعرف حقي انا اعرف ان جسمي له قدسيه جوزي اللى يلمسنى مش كل واحد هاوي قله ادي ياما ستات ماتت وهي بدافع عن شرفها ضد اغتصاب او غيره ومقولناش عليهم مش كويسين بس المجتمع بيقول مش كويسه على اللى اغتصبت وانتهك عرضها وقالوا دي مش محافظه
احنا اتفقنا انها ثقافه مجتمع لازم تتغير يا قمر ولازم كله يتعلم يحترم نفسه وخصوصيات غيره
طولت عليكي معلش

Empress appy يقول...

معلش هرد على فاتيما

امن ايه يا حبيبتى اذا كان اغلبه بيتحرش بالبنات

غير كده يا قمرايه يا قلبى
الموضوع اخلاق انعدمت اساسا ومفيش لها رادع غير انك تصدمي المجتمع المتخلف اللى لسه عايش ان البنت عار
طيب بمناسبه الامن بنت واحد كبير اوي وفى قمل الدوله وصحبتى واهلها عارفاهم وجنبى فى التجمع مبتخرجش غير يا مع مامتها يا السواق يوديها المشوار ويفضل معاها اصحابها تلاته اربعه لنروح الفيلا عندها يا هي تقعد معانا فىالبيت وبوقت كمان عارفه ليه اخوانها وابوها بيخافوا عليها من التحرش والالفاظ القذره اللى فى الشارع والبنت بجد بسكوته ولهم حق انا ساعات بضايق من السواق اللى متذنب تحت البيت بس بقول والله لهم حق يبقى من المنطق ده كل واحد فى الامن يجيب بقى سواق وحارس للبنات ده مش منظق يا طمطم بوسه كبيره



بنت القمر احتليت مدونتك هههههههههه

فاتيما يقول...

بعد إذنك يا أمانى
أرد على آبى قمر التدوين كله
أنا معاكى فى إن الواحدة لازم تتعلم تحمى نفسها بس لحد فين ؟؟
يعنى فيه تحرش يصل لحد الفجور و لو مكنش حاسس بأنه خايف لأن فيه امن يوقفه عند حده إيه هيمنعه
و بعدين إحنا بقينا بسبب الفوضى الحاصلة دى عايشين فى غابة بالضبظ كدا المصطلح المناسب لها هوه الغابة
يعنى كل فرد يحمى روحه بروحه أو معارفه و عزوته او فلوسه او ...أو ...
و كل حد بيقف قصاد الأذى لوحده و بطوله دون الأستعانة بأى سلطة المفروض بيها تحميه
و هوه و مدى صموده
يا يصمد و ينتصر يا يداس بالرجلين و ينزوى و يمشى جوا الحيطة
هيا دى الدنيا الحالية عشان كدا بقول وجود سلطة أو امن يبقى الحل
المشكلة دلوقتى إن حاميها حراميها
و دى الكارثة الأبشع من التحرش
بس كدا يا حبيبتى
بوسة اكبر

انا حره يقول...

عندك حق والله ياامانى انا بجد بستغرب من الستات اللى محسسنى انهم سوبر ومنز واللى يكلمك كلمه اديله عشره ووقفيه عند حده وكلام كبير ومتختخ كدا وبوستات طول كدا نازله

معلش انا بقولهم انا مش راجل ولا عندى استعداد استرجل وليا حدود فتعاملى فى بنات زى البسكوت والله اللى بيكلمهم كلمه غلط او يعلى صوتو عليهم بيعيطو لانهم بنات ممكن تلاقولهم حل لو سمحتم غير انكو تقولو ادام بسكوت يبقو يستحملو بقى اللى يجرالهم

ماهو من حقى انى الاقى اللى يحمينى اتربينا على كدا وعاجبنا كونا بنات معرفش ابخ فاللى يكلمنى ولا اعرف اضرب راجل ولا اطول ايدى عليه لانى عارفه امكنياتى لما اجى اواجه

المشكله كبيره ومحتاجه حل غير الخشونه والمطاوى والصوت العالى والكاراتيه

بنت القمر يقول...

فاتيما
========
جميل اننا متفقين ان القصه استثنائيه
والحظ لعب فيها دور مهم
الفكرة ان الناس تفتكر نه بالحكم ده خلاص كل واحد تشيل مسئوليه روحها وتفضل الناس علي سلبيتها والحكومه علي تراخيها
وده مش منطق لانه في متحرشين مش في وعيهم او بسلاح لازم يكون في حراسات وامن عي الا عياد وامام المولات والمدارس
بدل ما الداخليه بتطلب زياده ميزانيه تاخدها بس تشوف شغلها
لو الناس لقت شاويش بسلاح اتحرك ها تتشجع تساعد اي بنت
ده المفروض
لان لو المتحرشين اتنين= ها تعمل ايه الواحده معاهم؟؟!!
نورتي

بنت القمر يقول...

ميدو
======
قريت القصه كذا مرة مكنش فيها ولد
علي الاقل في المصري اليوم!!
ماشي يا سيدي الف شكر للولد اللي ساعد نهي:))
حكايه الدوله الرخو دي مصيبه لانها كده بتتخلي عن دورها في حمايه الامن الداخلي وكل واحد بقي ينزل بمطوة وهو وصحته وعاه ربنا ودي تبقا غابه
مش دوله
نورت

بنت القمر يقول...

محمد عبد الغفار
=================
اول مرة نتفق
هيهيهي.... واخر مرة
تحياتي

بنت القمر يقول...

ابي
========
انا مقصدش اطلاقا ان البنت كتدافعش عن نفسها
ومش المنطق ان الامن يتحرش هوراخر
دي سلسله فساد انا عارفه
بس الداخليه السنه دي طلبت زياده الميزانيه عشان تسد العجز في عدد الضباط
طب ياخدوا اللي عاوزينه ويزودوا العساكر كمان
علي الاقل لو العساكر زادوا البنات ممكن تستنجد بيهم بدل ما يتحرش بيهم ويسكتوا
والناس تتحرك وتساعد الضحايا
المفروض كده
انا كمان قريبتي اتسرق منها سلسله اتشدت من رقبتها قدام مول كبير
والسلسه كانت جامده عملت لها جرح قطعي في رقبتها... لو في ضل عسكري ماشي
قام بواجبه مكنش ده حصل
ده دور الدوله اللي مفروض يكون
مش الهبل اللي احنا فيه
تحياتي واحتلي المدونه براحتك

يا مراكبي يقول...

كلام سليم تماما

دي حالة واحدة وحيدة قدرت توصل للنتيجة دي .. لكن نقول إيه عن مئات الحالات الأخرى اللي بتتعرض لحوادث زي كده ولسه ياما هتحصل حوادث أخرى وهيكون من الصعب جدا إلقاء القبض على الجاني؟

الظاهر هنمسك كل بناتنا وإخواتنا البنات مطاوي بجد .. لعلهم يقدروا يكونوا نهى رشدي

بنت القمر يقول...

انا حرة
===========
ما هو برضه انا مش عاوزة حد يفهم اني بشجع نظريه البنت البسكوته:))
انا اللي بقوله ان الحاله بتاعه نهي مش قابله للتكرار وانه ممكن يكون في تحرش اكثر قسوة و وخطورة
والحل ان البنت تاخد ثقه اكبر في نفسها وفي نفس الوقت بالتوازي لازم الناس تبطل سلبيه و الدوله تقوم من الغيبوبه اللي هي فيها وتقوم بالف باء واجباتها اللي هي حمايه الشعب
تحياتي

زمان الوصل يقول...

يعني عشان النهايه سعيده بقت بطله لو النهايه عاديه والجمهور ما شافش شرير الفيلم بقي بيشر دم والبوليس مجرجرة....يبقا السينما اونطه

لأ طبعا :)
مش عشان النهايه سعيده بقت بطله ..
هى بقت بطله من قبل النهايه و مع توقّعها هى شخصيا فى حديثها ل "اليوم السابع" أنّها لن تحصل على أى شئ ..
بالنسبة لى هى بطله بسبب إيجابيتها التى سبقت أى حكم .. و كنت سأظل أعتبرها كذلك حتى لو حصل المتّهم على براءه ..

خلّينى أسأل بكل صراحه .. لو واحده تحرّش بها عيّل صغيّر حتى ولا بمطواه ولا هو توتو عضلات و ممكن تاخده للقسم عشان يروح الأحداث يا ترى كام واحده هتاخد الفعل الإيجابى اللىّ قامت بيه "نهى"؟

كام واحد لو أهين فى قسم الشرطه أو تطاول عليه ظابط فى الشارع سيسعى لينال حقّه و لن يبحث لنفسه عن الأعذار من قبل حتى ما يخطّى خطوه واحده !!

الفكره إنّنا أحيانا ما بندوّر لنفسنا على الأعذار من قبل حتى ما نحاول و أعتقد أن قليلات جدّا حتى لو كان ميزان القوّه و الموقف فى صفّهن سيترددن كثيرا فى اتّخاذ نفس الموقف الشجاع الذى أخذته "نهى"

و أنا من هذا المنبر :) باحيي "نهى" و باقول لها جدعه يا بنت ربنا يحميكى و يحمى كل النساء

بنت القمر يقول...

المراكبي
=========
طقم مطاوي من السعودية لقريباتك بدل البرفانات هدايه وانت جاي:))

بنت القمر يقول...

زمان الوصل
==============
الناس فرحانه لانه العدل والطبيعي اتحقق لكن للاسف الناس بتلتف حول المنتصر وتقلده وتنفض حول المهزوم... لو المتحرش ده ضرب نهي بمطواه اوداس عليها بعربيته رماها مكسره علي رصيف..مهما قاومته. كانت الناس مش ها تعتبرها بطله!!.. مجرد ضحيه... عاديه...
------------------------
ده كلامي
ومش معناه انها مش بطله
انا بقول انها حاله استثنائيه مش الحاله الطبيعيه ومش معناه ان اي حاله تحرش تانيه البنت موصلتش فيها لنفس الدرجه وجرجرت المتحرش للقسم انها مش بطله
لكن الناس عملتها بطله لانهم كمان محتاجين بطله تنجح وتحقق العدل الغايب وترد اعتبارالبنات
لكن لو المتحرش هبدها برفرف العربيه ( وحاول) وكسر لها رجلها وهرب مكنوش ها يعتبروها بطله
لكن مجرد ضحيه عاديه
ده اللي اقصده بكرة ان الظروف خدمتها
مش نفي لبطولتها
اقري الفقره اللي فوق تاني
تحياتي

غير معرف يقول...

فرحنا بنهى

و صدميتنا انت بالواقع الذى تعمدنا تجاهله

عاشــــــ النقاب ـقــــة"نونو" يقول...

انا معاكي جدا ان الحالة استثنائية
وبجد بستغرب ازاي الراجل دة قدرت كمان تاخده في عربيتها
مش عارفة اقول غير ان ربنا كان واقف معاها في الوقت دة
الغالب بقى هو اللي سردتيه في تدوينتك
الحل في الدولة والامن والامان وعقوبات رادعة وكدة
حتة البنت تشيل مطاوي وووو
للاف اصبح هو حل لمكسورة الجناح انما هيخلي الوضع فوضاوي جدا ومش بيد يبقى السلاح دة هو سلاح لاذية الواحدة
ربنا يسترها يارب
ولحين اطمئناني بنتي ام 5 سنين واولادي الصبيان كمان بنخرج كلنا وبابا يودي المدرسة وماما تجيب من المدرسة
وربنا موجود
عجبي على دة زمن
تحياتي

عين فى الجنة يقول...

يا سيدتى طول ما احنا بنخاف حنفضل ضحايا
وقد قال الرسول من مات دون عرضه فهو شهيد
انا بنتى عندها صاعق ورشاش سبراى وبتركب المترو من جامعة القاهرة الى مصر الجديدة الساعة 11 مساء
لازم اخليها شجاعة ، زوجتى وهى فى الجامعة مسكت واحد فى ميدان التحرير ومسحت بيه الميدان وفرجت عليه الخلق اللى اصلا كان عندهم نخوة
المتحرش جبان حتى لو كان معاه مطوه
ولازم كل الناس تشعر ان فى امل وان فى بنات موش بتسكت على التحرش القذر والمتحرشين الاقذار لازم تدى له على دماغه مهما كانت النتائج متفرقش كتير
فاكرة الراجل اللى سب لك الدين وحكيتى عنه مرة وانا قلت لك ما تسبيهوش وامسكى فيه وصوتى باعلى صوتك، هو ده التصرف المظبوط
انا بصراحة شايف ان نهى عملت الخطوة الاولى على الطريق
كملوا انتو بقى
الستات دول حاجة غريبة جدا

زمان الوصل يقول...

يا عزيزتى لقد علّقت على هذه الفقره و باقى الموضوع أتّفق معك فيه


يعني عشان النهايه سعيده بقت بطله لو النهايه عاديه والجمهور ما شافش شرير الفيلم بقي بيشر دم والبوليس مجرجرة....يبقا السينما اونطه


الناس اعتبرت "نهى" بطله من قبل ما يعرفوا الفيلم هيخلص على إيه و أيّا كانت النهايه كانت ستظل بطله لأنّها عملت اللىّ عليها .. علينا السعى و ليس علينا إدراك المقاصد

مـحـمـد مـفـيـد يقول...

اتفق معكي جداً جداً
واتمني انها تكون البدايه

شمس النهار يقول...

انت عندك بنت واكيد خايفه عليها انا كمان عندي بنات دلوقتي كبره الحمد لله بس وهمه صغيرين كان ابتدي هوجه كده من الاغتصاب والتحرش
فعلمتهمكراتيه واهتميت بالكوميتيه
عشان لو تعرضت لحاجه تعرف علي الاقل تتصرف
وعلمتهم السواقه والسباحه حاولت احصنهم علي قد ادراكي للحياه
وتعرضت احدهم لمثل ماتعرضت له نه
ولما الولد وجدها بتوقعه اتخض وعلي ماقام كان الشباب اللي في الشارع مسكوه وضربوه
ولما كلمتني اوديه القسم ياماما قلتلها لا كفايه عليه اللي حصل له اركبي العربيه بسرع وارجعي
لما جه موضوع نهي حسيت بالندم قلت يارتنا عملنا كده
ولوكل واحده عملت كده والناس ساعدتها
هنقضي علي الموضوع
وكل واحد هيعرف انه لوعمل حاجه عبيطه زي دي هيضيع مستقبله هيفكر قبل مايعملها
اما الشربين والمدمنين اللي بيعملوا كده اهي فرصه يتسجنوا ويتعلجوا ويتربوا
بس لازم الشارع يتعاون مع البنت او الست اللي بيتعمل فيها كده
يعتبرها امه اخته بنته زوجته اهي في النهايه شرف الزود عنه في سبيل الله
وشكرا

bluestone يقول...

شوفي انا معاكي في ان المقاومة العنيفة أو الرد الجسدي في حد ذاتها مش حل للظاهرة لأن مش في كل ظرف او واقعة هيكون الرد سهل
ومقدرة موقفك لان أم وعندك بنات بيكبروا وفاهمة انك أكيد مش هتقدري تنصحيهم يستخدموا الرد الجسدي او يجروا ورا المتحرش او يضربوه أو أو أو .. لأنك مش ضامنة الشخص ده ممكن يعمل ايه .. وده ممكن يشكل خطر عليهم

انتي عندك حق إلى حد ما في الموضوع ده
لكن اعتقد انك لازم تشجعيهم انهم مايبقوش سلبيين .. لو الظروف توفرت انها تاخد اجراء ماتخافش من كلام الناس

يعني موقف نهى الظروف خدمتها ولازم نشجع كل البنات انهم في موقف مشابه لو توفرت الظروف انها ترد سواء بملاحقة او بأي رد ايجابي مايتأخروش ومايخافوش من كلام الناس .. لان المجتمع نفسه محتاج يتربى من أول وجديد على حاجات كتير

لازم يبقى فيه رد فعل من اي نوع
القانون مش هيحل
ومش ممكن نحلم بعسكري لكل واحدة ست مثلا .. الحل الحقيقي في ان الستات يبقى لها رد فعل حقيقي وفعال أيا كان
لازم ماتسكتش .. وتقدر في نفس الوقت تقدر حجم الخطر اللي ممكن تتعرض له

بس في النهاية لازم يبقى عادي جدا والناس تتعود على ان البنت هترد
والجبان اللي بيتحرش بيها كمان لازم يبقى عامل حساب كده

المشكلة التانية في التحرشات اللفظية اللي بتبقى مزعجة جدا .. هتردي عليها بإيه ؟؟؟؟ هتردي بشتيمة ؟؟ هتجيبي منين كلام جارح وقبيح لدرجة انك تردي بيه على واحد حيوان في الشارع ؟؟؟؟؟

بنت القمر يقول...

ماجنوليا
==========
اسفه يا عزيزتي بس هو ده الحال للي عاوز يحط ايده في ميه بارده ويفتكر ان المشكله اتحلت
تحياتي

vision يقول...

احيكى على البوست لكن انا كمان شايفه انو اكيد مش بعد الحادث ده هيحصل ردع عام لكن يكفى اننا نبتدى نحس ان لسه فى فى بلدنا شعرة امل وان فى فئه ولو محدوده لسه بخيرها وبتتحرك طبيعى يعنى .....يعنى اكيد المرضى النفسيين مش هيخلصو ثم كمان مش عشان نهى ثقافتها خدمتها لا بالعكس ياما بنات فى احياء شعبيه او غير شعبيه الى بيدايقهم بينزلوا فيه عجن وتلطيش وفى منتهى الجرءه وبيلمو عليه الناس وبيتقطع وبتثأر لكرامتاه عادى وقبل نهى متظهر فى 100 نهى وفى مليون بنت بتتقهر ومحدش بيعرف غير ربنا سبحانه وتعالى واصحابها المقربين عادى....الفكره طبيعة شخصيات زى بالظبط اتنين معاهم سيلف ديفينس والأتنين طلع عليهم حرامى واحده طلعته واستخدمته والتانيه صوتها راح واغم عليها!!!
لكن يكفى اننا حسينا ولأول مره من فتره بعيده ان بلدنا لسه فيها ناس ممكن ياخدولنا حقوقنا>>>>سورى معرفتش اختصر!!

بنت القمر يقول...

نونو
--------
خلي بالك واتاكدي ان التحرش مش للبنات بس للصبيان كمان
عشان كده لازم تنزلي بالتوعيه للسن الصغير اوي وللولد زي البنت بالظبط
ربنا يحميهم مع ان التوعيه مش عن طريق الرعب لكن عن طريق الارشاد وبث الثقه نورتي

بنت القمر يقول...

يا راجي بيه
===============
هل يشم في كلامي اي ريحه ان البنت تبقي بسكوته وتعيط وتحط في قلبها وتسكت
والله ما قلت كده
انا بقول انه في بنات في ابتدائي واعدادي
في ستات كبار اوي في السن مش كل واحده تقدر تبقي نهي
وتعمل اللي عملته وبعدين الافندي المتحرش ده باين عليه حظ امه اسود كان غلبان وشكله اول مرة يتحرش
ده يا عم ودته القسم في عربيتها
ههيهيهيهي
في متحرشين سفله
ومجرمين
مش كل واحد زي التاني ربنا يحمي راجيه بس اكيد او اتعرضت بعد الشر لموقف زي ده كنت اكيد تتمني انه يكون في عسكري جنبها او ولاد حلال بدل ما تضطر تهبد المتحرش بالصاعق وتجيب اجله وتبقي مصيبه
صحيح البنات لازم تدافع عن نفسها وتنزل بعد كده بالسيلف ديفنس
بس برضه مخي مش قادر يستوعب انه خلاص بقينا في بلد مفيهاش حكومه خالص
والدوله اتخلت عن ابسط واجباتها حمايه الشسعب
نورت

بنت القمر يقول...

محمد مفيد
======= اشكرك

بنت القمر يقول...

شمس النهار
============
متفقين تماما
تحيتاتي وربنا يحمي هالك

بنت القمر يقول...

بلو ستون
=================
هو ده اللي انا عاوزة اقوله تماما لوحد قلك كلمه وسخه
ها تعملي ايه؟؟ مش ها تقفي اكيد تردحي له في الشارع!!
اكيد انا مش بطالب بعسكري لكل ست
لكن في غياب امني جامد في الشارع يا بلو
شفتي عمرك عسكري قدام المولات او السينيمات او المدارس والجامعه
قدام سوق الخضار؟؟!!
او الاسواق الشعبيه مفيش يا بلو
الدوله غايبه خالص الدوله في اجازة وده وضع مش قادرة اقبله ولا استوعبه ان الدوله سايبه الناس تاكل في بعض
حتي الامن قدام المولات هدفه حمايه المحلات مش الناس:((
امن صوري!!
طبعا بعلم بنتي علي قد سنها بس لو كلب اتحرش بيها مقدرش اقول لها ممسكتيهوش ليه كل اللي اقدر اطالبها بيه هو الصويط:((
يمكن حد يساعدها ويكون عنده دم وها ابوسايدي انها رجعت سليمه
وكلام الناس طبعا ها يكون خارج حساباتي
نورتي

بنت القمر يقول...

camera_girl
================
البنت الشعبيه بتدافع وتصوط عن نفسها من منطلق العيب والما يصحش لكن البنت المثقفه... منباب انها عارفه حقوقها كمواطنه
ده مش مأخذ ليا عليها ابدا انا اللي بقوله ان ظروف الواقعه خدمتها وعشان نجحت اعتبرناها بطله وهي بطله لكن لو الظروف ما ساعدتهاش
واصبحت ضحيه
محدش كان ها يتم بيها بنفس الدرجه
زي بنات العيد الماضي او ضحايا جامعه الدول العربيه او غيرهم
الناس حبت نهي عشان نجحت لكن لو فشلت
كانت ها تبقي مجرد ضحيه
لو اهلها ما امنوش بحقها وكبتوهاوقهوروها وقالولها ما تفضحيناش كان الوضع اختلف لكن نهي بنت ناس امنوا بيها كانسانه وامنوا بحقوقها وده مش متوفر عند اي ضحيه تانيه
ولا يخلي اي بنت تانيه اقل
تحياتي

hartaka يقول...

بنت القمر

انا متفق معاك جزئياً ولكن ليس في كل النقط
انا مش شايف ان الموضوع حظ اوي

نهي رشدي محدش ينكر انها عملت موقف مش كتير يقدر يعملة وانها نطت علي كبوت العربية فدة تعريض حياتها للخطر فمشهتفرق اذا كان ماسك مطواة او سايق عربية , انا شايف ان كدا كدا البنت كانت هتعمل نفس الموقف ومعتقدش انها بالغت وانها كانت هتتصرف بردوا حتي لو رفع عليها شومة

الفرق الوحيد والاستثناء الي خلي الموضوع يكبر ودة انت محقة فية

انها مثقفة وعارفة حقوقها كويس بالاضافة لوجود سيارة معهم بعد كدا ودة سهل ليهم انهم يكملوا الاجرائات
طبعا زي ما بتقولي في غياب الامن ودور
الدولة الموضوع مش هيتحل
لكن في الاخر انا شايف انها بنت مجدع وجريئة
ياريت كل البنات يبقوا زيها

بنت القمر يقول...

هرطقه
========
ولو انك منشرتش تعليقي علي بوستك قبل الاخير وطبعا انت حر لكن ده لا يمنع اني اقولك اهلا
- تانيا: انا مقولتش انها مش جدعه
كل اللي قلته انه ده لا يعفي المجتمع من سلبيته ولا الدوله من دورها
-وبقول تاني شيئ ان لو البنت دي المواجهة انتهت لغير صالحها وده كان وراد جدا وربنا هو اللي سلم
كانت ها تبقا ضحيه مجرد ضحيه!!
وده القاء عب علي المرأه اكتر انها تتحمل وحدها حمايه نفسها لو ماتت او اتصابت تبقي ضحيه:(
ولو نجحت تبقي بطله!!!
مش الحل هو المواجهة الجسديه وان كان طبعا الجراءه مطلوبه جدا
لكن مش كل واحده الظروف هاتخدمها كده
الناس عاوزة بطل يقوم بالفيلم من اوله لاخرة ويهزم الشرير في اخره
وهما بس يكونوا مجرد متفرجين!!
تحياتي

hartaka يقول...

بنت القمر
لا انا مش مختلف معاك خالص في كل الي قولتية
بالعكس تحليلك للموضوع كلة كان جديد ومنطقي
غير نقطة واحدة الي خلتني استغرب لان من كلامك في احدي النقط
كنت مشمصدقة ازاي نطت علي كبوت العربية وازاي عرفت تثبتةمع اني شايف ان دا عادي لان واضح ان المتحرش كان ساذج ومن احاطة الجموع بية اكيد كان مرتبك وخايف

طبعا لو اتبهدلت والقصة انتهت نهاية تانية مكنش حصل كل الهيصة دي
والاعلام فعلا ساعات بيستغل المواقف دي علشان يهيص وخصوصا تناول 90 دقيقة بتاع معتز الدمرداش كان سخيف وبايخ

انت بتقولي
ولو انك منشرتش تعليقي علي بوستك قبل الاخير وطبعا انت حر لكن ده لا يمنع اني اقولك اهلا ؟؟

قصدت بوست المراة بين فولتير والقرضاوي ؟؟؟

انا موصلنيش منك اي تعليق علي اي بوست
انا مبنشرش التعليقات الي فيها شتايم واهانة فقط ومعتقدش انك هاتكوني كتبت حاجة زي كدا

ممكن تبعتية تاني لان ممكن يكون حصل ERROR
او حاجة
سعيد بمعرفة مدونتك
:)

بنت القمر يقول...

هرطقه
=========
لا كان علي الاسكندريه مدينه الفتن!!
وطبعا الشتم مش اسلوبي التعليق معناه وجهة نظر موازيه او معارضه
انا طبعا مش بشتم نهائي
تحياتي

محمد النقيب يقول...

بصراحة الغلط في الموضوع كله على الرجالة المحترمة اللي هما احنا ..لما راجل يشوف واحد بيتحرش ببنت لو هو مش موافق على الفعل ده ليه بيسكت؟ بصراحة الغلط في النخوة اللي ماتت , الغلط مش على البنت ابداً مهما كانت لابسة (او مش لابسة مش هتفرق كتير الأيام دي) .. محدش بيضرب المتحرشين على ايديهم عشان يتحرشوا ببنات الناس ..