الثلاثاء، يوليو 08، 2008

:))حلم النشر الورقي _ معلش يا زهر

حلم النشر الورقي اكيد داعب مخيلتي زي البعض.. واثناء تسكعي في الاماكن حدث انا قابلت مدونه ترغب في نشر مدونات في جريده اسمها الاسرة العربيه وعبر ترك تعليق بيه اسماء البوستات التي ارغب في المشاركه بها وموافقتي علي النشر تركت ما احب ان اراه منشورا من كتاباتي بعض الخواطر والقصص القصيره
نسيت كالعاده الموضوع بعد يومين واهو اللي يعوزني اكيد ها يعرف يوصلي الي ان فوجئت امبارح بالاستاذة اسوور تترك لي كومنت يفيد ان جريده الاسره العربيه نزلي فيها بوست!!
طبعا ليلتها يا سلام علي الاحلام هم عجبتهم كتابتي يا دي الهنا يا دي السرور
وامتلئت نفسي تيها وعجبا ونويت اني اقتني كل الاعداد المتاحه من الجريده لزوم التوزيع علي الصديقات.. :))والعوجان علي ادم والذي منه
الحقيقه لم اتشرف من قبل بالقراءه في جريده الاسرة العربيه من قبل واثناء جلوسي في الصبح اقرض الفصل الاخير من واحه الغروب في النادي اشتريت عددين من الجريده وبدأت التصفح
طبعا مش اساسي ابدا ان صورة دينا الراقصه وصدرها المتدلي ظاهرة علي موضوع كبير !!!منشور
وطبعا ميخصنيش ان الجريده مليانه اخبار عن شبكات الاداب و لا الراقصات اللاتي يغتصبن الرجال .... مليش دعوة هو انا كنت يعني رئيسه التحرير المهم البوست بتاعي.!!.
. واصلت الجز علي اسناني والبحث عني في الجريده ولا اعلم اي بوست تحديدا هو المنشور الي ان وصلت الي ركن اسمه احلم وعبر_مدونات_ وفيه بوست لي اللي كتبت فيه مقاطع من فيلم ليله البيبي دول!! طبعا ده مش بوست ده مش كتابتي ده مجرد بحكي لاصحابي الفيلم فيه ايه؟؟ حتي رايي لم اكتبه الا في التعليقات مش زي فيلم حسن ومرقص مثلا.. وفي الاخر مكتوب مدونه بنت القمر...... واللينك كمان غلط:( القمرمكتوبهAIKAMARبدلا من ALKAMAR

طبعا لم اعرف الا امبارح والعدد نزل انهاردة باعتبار رايي طبعا تحصيل حاصل!! وهو انا يعني اطول ده انا مجرد مدونه مغمورة!!
ينوبني الشرف اني اسمي يتكتب في الجرايد وبعدين يستأذنوني ليه ما هو طبعا الحقوق الماديه مش عاوزاها والحقوق المعنويه مفيش احسن من كده.. المدونه مفتوحه والي عاوز يعبي ويشيل زي اي مار علي مدونتي وبعدين يا بت يا مووون زي ما بتحب تدلعني صديقتي واختي نسرين بسيوني شفاها الله اللينك كمان حاجه تافهه وغلطه مطبعيه واحمدي ربنا وارقصي علي سعدك حاولت ان اقنع نفسي طول الوقت بذلك..
. ولكن.. الحقيقه انا زعلانه ومش عارفه افرح وتقريبا انا جاحده وناكرة جميل.. للجريدة والاخت اسر ياسرالتي اعدت الركن.. {الحقيقه اسمها جميل } .. لانه بحساب المكسب والخسارة انا ما استفدتش اي شيئ مادي ولا معنوي حتي اللينك بتاعي مكتوب غلط وما رغبت في نشره لم ينشر وما لم ارغب وربما اقل ما كتبت تم نشر معلش يا زهر الجريده عبت وباعت والاستاذة اسر عملت شغلها و سابتلي كومنت تعرفني كتر خيرها ليله النشر!! حتي تم نشر بوست للصديقه قطه الصحراء باسمها الحقيقي حنان الشريف اما موضوعي فقد تم نشره بدون اسم رغم اني عندي اسم والله زيها بالظبط!!
فقط بلينك غلط لم اخبر ادم ولا صديقاتي ولا احد فقد اخبركم الان..كيف اني جاحده وناكره جميل:... ومفرحتش
الصحافه في مصر بالف خير وصحه جيده :)والرياح تاتي كما تشتهي السفن تماماوكله زي الفل:))
الحياة بمبي!!
الامضاء:مدونه مغمورة جاحدة.. بنت القمر... اماني خليل

هناك 45 تعليقًا:

blue-wave يقول...

موضوع رائع كالعادة
تحياتى

فاتيما يقول...

الحسنة الوحيدة فى الحكاية دى إنى اخيراً عرفت إسمك يا جميلة
و كل شىء إنكشفن و بان
و لا يهمك
مش ىخر حاجة هتتنشر يعنى
طبعاً عندك حق فى إحباطك و إحساسك بالشجن
بس الحقيقة الصحافة زيها زى كل مجال دلوقتى فيه الغث و فيه الثمين
و مع إحترامى للجريدة دى اللى اول مرة أسمع إسمها بس يعنى إذا كانت الجرايد العريقة زى الاهرام و الاخبار بقت مسخرة كدا فما بالك الجرايد التانية اللى بتبيع بصور دينا و أخبار الفضايح
و الصحافة علاقات كمان خلى بالك
أصل اختك ابوها الله يرحمه كان صحفى و كنت هتجوز صحفى و يعنى بسمع عن الصحافة من و أنا فى اللفة فعارفة الوعود حاجة و التنفيذ حاجة تانية
إنتى مش مدونة مغمورة بالنسبة لنا
الجريدة دى هيا اللى طلعت مغمورة
و بجد

... يقول...

حاسة بيكي أوي أوي يا مووون
ولا يهمك
وبجد طظ فيهم
وكويس ان اللينك غلط واسمك مش مكتوب
لو كانوا كتبوهم وصح كنتي هتزعلي اكتر علشان هتبقي عايزة تستخبي وتتبري من الجريدة دي
الفرصة الأروع لسه ما جتش

عصفور المدينة يقول...

السلام عليكم هذه التدوينة أعجبتني جدا هل أنا نكدي ولا أنا باحب الحاجات الواقعية معلش

بس تعبيرك عن تسلسل الحالة النفسية والواقع المؤلم رائع
معلش يا بنت القمر

وضعت هذه التدوينة تدوينتي المختارة وبعدين مغمورة إيه الخفيف هو الذي يطفو


أعتقد هناك لبس بسيط الأستاذة أسور(ياسمين) هي نفسها آسر ياسر الذي أشرت إليها أنت بالأستاذ

عدى النهار يقول...

ده بس من حظ آدم
:)

ولا تزعلي ولا حاجة.. البوست اللي تم نشره ماكنش من إختيارك يبقي كويس إنهم وضعوا لينك غلط

وبعدين هو الجمهور التخيلي ده أي كلام ولا أي كلام يعني
:)

هشام علاء يقول...

يا ست الكل و لا يهمك

هو احنا بتوع جرايد برضه

احنا مقامنا اكبر من كده بكتير
:)

تتعوض قريبا ان شاء الله

تحياتى

هش

abderrahman يقول...

انا بس يهمني حاجة انك بعد ما بقيتي مشهورة كده وحققتي حلمك الكبير بعد سنين من الكفاح والصبر في النشر الالكتروني ما تنسيش رفاقك القدامى المغمورين اللي زينا
:))

mostafa rayan يقول...

ولا يهمك ان شاء الله بكرة يكون ليكي كتابك الخاص بيكي

Hypatia يقول...

انا عاوزه حد من الجريده ديه امسك فى زماره رقبيته
ولاد ال******
طيب كان ليه من الاول ما كانو يحشو الجرنان بتاعهم باي بتنجان من غير ما يعكننو على حد محترم وكتاباته محترمه
ولا يهمك يا بت يا موون الى ان يأتى النشر الورقي المحترم انتى ليكي وضعك وكيانك على المدونات
بوسه

اسكندراني في الغربة يقول...

سوري لو كنت حخالفك شوية
بس غلط في حرف ميخلكيش تكرهي التجربة كلها
يعني هما طلبوا ينشروا بوست و انت وافقتي
انت اختارتي مواضيع شايفاها مناسبة و هما اختاروا موضوع شايفينوا مناسب اكتر
قليل الي يعرف اسمك من مستخدم الفيس بوك فقط
وإن كان بنت القمر اشهر
اما الحقوق المادية و المعنوية فأنتي مش بتتعاملي مع الاهرام يعني

---
هو بس سؤال : مين زاهر دة؟

تحياتي

زمان الوصل يقول...

ولا يهمّك يا "منمونه" ما "جوجل" سهّل كثيرا الوصول للمدوّنات و غيرها و اللىّ هيلاقى اللينك غلط هيدخل يدوّر على مدوّنة "بنت القمر" و هيلاقيها بسهوله .. معلش هى أوّل طلعه بتبقى صعبه شويّه عشان بعد كده أمّا تشتهرى و البليه تلعب تلاقى ذكريات لطيفه تحكيها عن البدايات الجميله :)

اسكندراني اوي يقول...

معلش يا زهر
لا طبعا مش معلش
الزهر يعني حظ
واعتقد ان ما حدث ليس فيه اي حظ دا عامد متعمد يا فندمممممممممممممممممم
هههههههههههههههه
معلش المره الجايه تيجي في الجون
تحياتي لادم

alexandrany يقول...

مالك بس فيه ايه يا قمرايه صغيرة
اللينك غلط معلشي يا ستي
اللي هيدخل المدونه ومايلاقيهاش هيدور باللاسم العربي على جوجل
ايون يا جدعان
هي بقت كده
يا ستي عقبال ما يبقالك كتاباتك الشخصية المنفردة المتحررة من اي قيود فكرية ولا شهر عقارية
عشان لما حد ياخد منك حاجه من غير ما يستأذنك تبقي ساعتها تطلعي كل اللي مش عارف ايه على اللي مش عارف مين
:)
تحياتي

محمود المصرى يقول...

بسم الله الرحمن الرحيم

مسألة النشر الورقى دى مش بالضرورة تكون غاية او حلم اى واحد , التدوين وسيلة للتعبير عن الرأى فى وسط معين , وقد يصلح فيه مالا يصلح فى غيره , وبما ان الهدف هو التعبير عن الرأى بالاساس فالكلام المكتوب بيكون له قيمة فى ذاته تتصاغر الى جانبه اى مكاسب معنوية او مادية متحصلة من النشر الورقى حتى لو كان فى الاهرام مش فى جريدة الاسرة العربية اللى اول مرة اسمع عنها . :)
عموما حضرتك افكارك وكتاباتك ارقى من ان تنشر بهذا الاسلوب ولازم لما حد يطلب منك طلب زى دا تضعى اسس للنشر .
انما صاحبتك اللى نشرت الكلام اسمها بيتنطق ازاى؟

يا مراكبي يقول...

الأيام جاية كتير .. ولا يهمك .. المهم إنك نزلتي البوست ده لتوثيق الحدث .. وده لوحده شيء مهم جدا ممكن تحتاجي ترجعي ليه في المستقبل لو حبيتي تؤرخي لبدايات النشر الورقي ليكي .. لأن النشر الورقي هيكون كتير إن شاء الله بعد كده

بنت القمر يقول...

بلو ويف
========
اشكرك



فاتيما
======
الله يكرمك يا فاتيما ولو كنتي سالتيني عن اسمي كنت ها اقولك وهو باين في الريدر يا عزيزيتي
نورتيني

بنت القمر يقول...

بثينه
=========
احسن حاجه في كلامك انك حاسه انه لسه في فرص رائعه مجتش
:)
وضاع العمر يا ولدي!! من بقك لباب السما




عصفور المدينه
=========
نورت يا استاذنا
والمدونه تحت امرك والحساب يوم الحساب
D:

انا صححت اللبس اسور اسر مش مشكله
نورتني ما نجيلكش في عكننه!!
:))
تحياتي

بنت القمر يقول...

عدي النهار
========
يعني انا حكيت لكم قبل ما احكي في البيت تقولي انت حظ ادم؟؟!!
عقل ذكوري متحزبن ومتحيز صحيح!!
اكلين سواعيش وملح كل ده وبرضه بتدافع عن ادم:))
عموما يا استاذي حظ ادم حلو وانا عارفه كدهولا فخر
D:
اما عن الجمهور التخيلي فهو الخير والبركه
لحد ما ربنا بفرجها
:))
بجد دعمكم وتشجيعكم وصداقتكم لا تقدر لها كل تقدير في نفسي
تحياتي

بنت القمر يقول...

هشام
========
نورتني في زيارتك الاولي
بس اكبر ازاي؟؟!
ده حتي الجرنان اللي محدش سمع عليه مكتبش اسمي وكتبوا اللينك غلط
امال لو جرنان معرف
كنت دفعت فلوس بقا:)
اهلا بيك

بنت القمر يقول...

عبدو باشا
==========
في ريحه سخريه في كلامك مش مريحاني وبعدين يا ابني انا اتنشر لي ورقي مش اليكتروني
فاهم؟؟!!
يعني الناس تدفع فلوس عشان تقرا كلامي
طبعا مش ها انساك ايها الرفيق :))وبكرة اسمك يتكتب بحروف من نور في صفحات التاريخ اننا كنا نتبادل الزيارات التدوينيه وقد نالك الشرف والسرور بمروري علي مدونتك المتواضعه ذات يوم
تحياتي... قمر فيتش

Empress appy يقول...

انتى بتهزرى ول جد يعنى انا برضه ممكن يتنشر ليه حاجه ومش اعرف على اعتبار ايه لاااااااا انا لسانى طويل بلاش اقول انا لسانى طويل
طيب انتى واحده بتجيبى الجرايد وجبتيها بالصدفه قوم انا مش بجيب الحركات دى اعرف ازاى بقى لاااااااا انا هروح موقعهم واقول لهم الكلام ده

بنت القمر يقول...

mostafa rayan
اشكرك يا عزيزي واشكر تمنياتك
ولك مثلها........

بنت القمر يقول...

نسرين بسيوني
=========
والله انا مش في بالي الموضوع بس الدعوة لقيتها وقلت ليه لا
المصيبه ان ده معناه ان اي حد ممكن يعبي ويشيل وينشر من غير الواحد ما يعرف لاني طبعا مش ها اشتري كل الجرايد اليوميه والاسبوعيه
صحيح المدونه مفتوحه لاي حد يقرا لكن نشر وتجارة وفلوس كنت بس احب اعرف ولازم يكون في استئذان
وعموما انا اخذت جرعه ثقه كبيرة منكم
كمان بوسه ليكي

بنت القمر يقول...

اسكندراني في الغربه
================
يا عزيزي مش معني اني وافقت علي نشر قصه قصيره ليه اني موافقه ان اي حد
يا خد اي حاجه ويعبي ويشيل وينشر
لان كتاباتي علي الاقل يتفاوت مستواها في رأيي بين الجيد والعادي
مش معنا اني فاتحه باب بيتي للزوار والضيوف انك تاخد كرسي في ايدك وانت ماشي
:))))
والمصيبه ان معده الصفحه عرفتني ليله النشر رغم ان موافقتي كانت علي بوستات اخري
قصص قصيرة وخواطر
انا مش كارهه التجربه عشان الحرف غلط لكن لم تمثل اي اضافه لي
حتي التدوينات المجاورة كانت باسماء اصحابها الا انا ومدون اخر
يعني لا حق مادي ولا معنوي
وطبعا مش زنبي ان الجريده جديده او معندهاش ميزانيه لكن فين حقي علي الاقل في الموفقه... اسمي الاول معروف في الصفحه الداخليه في الريدر وكذلك الميل بتاعي باسمي
ودي مش القضيه
القضيه زي ما قلت لحضرتك
مش معنا اني فاتحه باب بيتي للزوار والضيوف انك تاخد كرسي في ايدك وانت ماشي
:))))
نورتني

بنت القمر يقول...

زمان الوصل
============
اديني امل وارميني في البحر..
بثينه قالت الفرصه الاروع لم تات بعد!! وانت بتقوليلي.. البليه ها تلعب
ها ارجع اتعوج انا تاني كده
:)))))))))
صدقيني مش القضيه ان مدونتي تتعرف
انا مش طالبه شهرةوان كان مش عيب
بس فكرة انك تلاقي بوست ليكي منشور من غير موافقتك تجنن صدقيني وفكري فيها واقري من فضلك ردي علي اسكندراني في الغربه... اشكر مرورك وصادق امنياتك لي يا حبيبتي ولك مثلها
تحياتي

بنت القمر يقول...

اسكندراني
===========
سيبك انت من الكلام ده
سمعت علي اجتماع مدوني الاسكندريه اول
سمعت علي الجروب بتاعهم علي الفيس بوك
الصور والاخبار في مدونه الصباغ
ادم بيسلم عليك.. انت مش نازل اجازة تفسح المدام ولا ايه؟؟
كفايه تحويش بقا
:))
هات البنيه تتهوي
تحياتي

بنت القمر يقول...

alexandrany
=================
اعتقد يا عزيزي انه لسه بدري اوي علي اليوم اللي يكون للتدوين حقوق
الناس ضايع حقوقها في كل حاجه الميه والهوا ولقمه العيش!!!
مين ها يدور علي حق المدون انه يوافق علي نشر ما يرغب.. وخواطر متكنش طماطم بيتاجر فيها... لانها بعض من روحه..... تحياتي يا عزيزي

Ahmed Kamal يقول...

بنت القمر إنتي أشهر من نار على علم ، و على رأي فاتيما الجريدة هي اللي مغمورة ، و على فكرة أنا تجربتي مع نفس الجريدة قريبة جدا من تجربتك ، مع فارق إنهم محطوش اللينك خالص و لا اسم المدونة :) لكن أنا أخدت الموضوع ببساطة خصوصا إنهم نشروا الموضوع اللي أنا اخترته حنين للوطن و برضه عرفت يوم النشر .

أنا شايف إنك ممكن جدا تنشري موضوعاتك و تنجحي جدا لأن الناس بتحب اللي انتي بتكتبيه ، لكن و لا يهمك من أول تجربة :)

بنت القمر يقول...

محمود المصري
===============
اقرا اول سطر هتلاقيني مقلتش انه حلم اي حد
لكن لو النشر ده ها ينشر افكارك او ابداعك علي مستوي اوسع يكون اكيد شيئ لطيف وطيب....
انا لقيت العرض مكتوب ومدونتي مفتوحه للجميع وحددت بعض الخواطر والقصص القصيرة المعينه للنشر لانها مقربه الي نفسي وبتعبر عني
وزي ما قلت مش معني اني فاتحه بيتي للزوار انك تاخد في ايدك كرسي او نجفه وانت ماشي وتسيب لي كومنت انك اخدت الكرسي
:))
حاجه تشل بجد يعني... وحط نفسك مكاني ..
المعده اسمهاآسر ياسر.. علي وزن آدم
بخصوص كتابتي اعتقد ان رايك فيها من زوقك الجم يا عزيزي في ناس كتير بتكتب احسن مني اكيد... وان شاء الله اكون عند حسن ظنكم جميعا.. اخوة واصدقاء.. تحياتي لشخصك المهذب

بنت القمر يقول...

يا مراكبي
==========
تفتكر؟؟!!
اشكر صادق تمنياتك يا عزيزي واديني وثقت اهو وثبت كل شيئ.. ولكن وبعدين
:))
مقلب تمام يعني:))
مش كده نورتني واشكر كلماتك الطيبه وتمنياتك

بنت القمر يقول...

appy
========
يا حبيتي اللي بتحكيه وارد جدا تلاقي جرنان عامل مسلسل اسمه يوميات ابي:))
ومن غير ما تعرفي !!
انا مشترتش الجرنان صدفه
الانسه اسر ياسر هي اللي قالت لي انهم نشروا لي بس اللي علي مزاجهم مش اللي علي مزاجي فهمتي يا قمر البلوة وبرضه كان ممكن معرفش:*)
تحياتي

بنت القمر يقول...

احمد كمال
=========
نشروا الموضوع بدون اسم ولا لينك
ازاي يعني
ما هي دي حرق دم برضه
يعني هما بيعبوا ويشيلوا براحتهم
اما عن الشهرة واله مش القصد بس هو اكيد شعور محببان الناس تعرف كتابتك مش شخصك واعتقد الفرق بينه مش كبير
:))
شفت تعليقك هناك وده بيطرح فكرة قاسيه جدا ان كتاباتنا بياتاجر فيها زي الطمطاط بالظبط بدون حتي حق معنوي يكلفهم تلات اربع كلمات
ويا عالم ممكن مين كمان بينشر من غر الواحد ما يعرف
بس هو الواحد واخد حقه في ايه في البلد عشان ياخد حقه في التكريم المعنوي والادبي للمدونين
:) رفاهيه مش كده
تحياتي

الطائر الحزين يقول...

ايه الجحود ده اجمدى ربنا انهم ملبسوكيش تهمة وقالوا ان من حزب معارض

حاجة تقرف

اسكندراني اوي يقول...

سمعت ومتااااابع وكنت حموت وحضر بس للاسف مافيش نصيب الحقهم
واشتركت في الجروبات
لا انا اعجبك او ي اوي فورييييييييييره
ههههههههههههههه

حاضر حنبطل تحويش شويه وحجيب حوا ونازل خلاص
تحياتي لادم

Layla يقول...

معلش فعلا... بس هو ليه جريدة اسمها الاسرة العربية مهتمة باغتصاب الرجال من الرقاصات و بصور دينا!!؟؟

واضح ان اهتمامات الاسرة العربية اتغيرت كتيييير

بس ولا يهمك..ازعلي شوية واغضبي شوية لكن ماتشيليش كتير لان الجرنان شكله لسه بيبدأ وكمان لان واضح من وصفك للصفحات ان اللي هيشتريه هيكون اخر اهتماماته هو معرفة عالم المدونات.. هيكون عاوز يتعرف اكتر على الاسرة العربية :))))

وانشاءالله تتعوض بالنشر في جرنان محترم او كتاب عليه القيمة

JaN DarK يقول...

تسجيل اعجاب ،، وتحية !!

بنت القمر يقول...

الطائر الحزين
=============
الحمد الله علي كل شيئ
تجربه وعدت... اشكر مرورك

بنت القمر يقول...

اسكندراني اوي
==============
بالسلامه يا رب

بنت القمر يقول...

M@RV3L
=======
يا عزيزي الاسرة العربيه باين بتتطور....تجربه وعدت.. وان كان مش بمزاجي
اشكر دعواتك .. وتمنياتك

بنت القمر يقول...

JaN DarK
========
اشكر مرورك...... والتحيه لكي

عين فى الجنة يقول...

قمر
انا حاسيب الموضوع كله وحامسك فى حته العوج على ادم علشان بس تعرفى ان الستات دول حاجة غريبة :))
وعلى العموم انتى لكى جمهور بيحبك ( احنا المدونين )وده جمهور كبير تاكدى من كده واحنا ولاد ناس وبنفهم نقرا ايه ومانقراش ايه ، يعنى احسن ميت مره من جرنان فاشل اكيد بيوزع نسخه ببلاش وبالعافية فى اشارات المرور
ومعلش انا تأخرت فى التعليق على ما سبق من كتاباتك الجميلة وخصوصا بوست كيف تغيرت حياتك من تحت راس صدام، وانا باعتبر البوست جميل بشكل خاص
تحياتى

بنت القمر يقول...

راجي
========
الكلمه بتاعه العوجان هي من قبيل القافيه بس او زي ما تقول الزهوالانساني الطيب في الحدود المعقوله.. مش اكتر
:))
بس هو ده اللي خدت بالك منه!!
عموما انا عارفه ومتاكده ان زواري احسن ناس وصفوة من الافاضل اتشرف بيهم جميعا وانت علي راسهم.. لكن الفكرة أن لو الواحد عاوز يوسع فاعده قرائه وتاخده الجلاله انه ممكن يكون كاتب توصل الامور لكده
اخيرا.. اقولك نكته.. ادم وهو بيفر في الجريده اكتشف انها جريده حزب الاحرار تعرفهم الاحرار دول؟؟!
احرار بجد يعني:))

ذو النون المصري يقول...

مش مشكله المره دي
خيرها في غيرها
ممكن ينشروا لك شيء جديد بشرط ذكر الاسم و اللينك الصحيح
و بعدين الاسره العربيه انا اول مره اسمع عنها من حوالي اسبوع او اتنين في الفيس بوك
لما نشروا لمدونه مش فاكرها صراحه كانت نشرت صورة البوست بتاعها في الجريده في الفيس بوك
المهم محتمل يكون توزيع الجريده اقل من زوار المدونه نفسها

Empress appy يقول...

يا سلام اممممممممم انتى مش حددتى اللى ينشروه
دى فكرة هايله دى وصفه فظيعه هما بيختاروا اللى على مزاجهم طيب
لما نشوف الا قوليلى ايه مسلسل آبى ده حلو يعنى ولا هيبقى زى نور اللى مش بتحمل اصلا اشوف التتر بتاعه ههههههههههههه
روقى يا قمر عدت

•√أريـ السمر ـج√• يقول...

حقيقى امر محبط
مش فكرة الشهرة و لا انك مهتمة بذكر اسمك
لكنه حقك ان كلماتك تعامل باهتمام كافي و من حقك الاختيار من كتاباتك

لكن ان شاء الله تتعوض و المرة الجاية يظبط الزهر
دمتى بكل الخير