!نميمه... مسنجرية
هي: انتي عارفه ان مروة مجوزة مجدي؟انا :لا معرفش مين قال؟
هي : هيّ اللي قالت لي انه اتقدم لاهلها كذا مرة ورفضوه فاتجوزوا عرفي وهي بتساعده وتديله فلوس بس مش عارفه تاخده بره في{ البلد العربي اللي عايشه فيه} عشان اهلها
!!انا: يا سلام يعني بتصرف عليه؟
...هي :اه يابنتي دي عبيطه اوي وهو بيستغلها
!انا :غريبه
هي: بس طبعا ملناش دعوة دي حريتها الشخصيه
انا:............. اه .......... اكيد
********************
!!كمان نميمه بريئه
هي :{2} انتي عارفه ان مروة بتحب نادر؟؟ نفس{ المروة }السابقه
انا: يا سلام مين قال كده؟
هي واضح جدا يا بنتي... انتي مش ملاحظه.. كذ ا...وكذا
انا:بس هو متجوز
!هي{2}: اه عشان كده هي مكتئبة
!!انا: جايز
هي: بس ملناش دعوة دي حريتها الشخصيه
...انا:........!! اكيد
***********************
:((تدخلات خانقه.
هي {3}: انت مش ها تتحجبي؟
انا: ربنا يسهل
هي: امتي يعني؟! مستنيه ايه؟
ربنا يسهل ...ان شاء الله
!هي: يا بنتي الدنيا متفاتّه والنفس داخل مش طالع
الدنيا دي بتغّر الناس خلي بالك.. هو انتي ضامنه نفسك!!؟
!.........انا:
!!هي : انتي زعلتي مني... انا بنصحك مش قصدي ادخل في حريتك الشخصيه
:((:انا: واضح
******************************
:((كمان تدخلات
بعد شهور.. هي رقم {4} انتي اتحجبتتي يا خسااارة
انا:........ ليه بس هو انا وحشه كده؟
هي لا حلوة بس ليه يعني!....عموما انتي حرة....زعلتي؟!!
انا: ... اه....
هي ضاحكه: مش مهم!! بس شيليه... مش مهم تزعلي .. باي اشوفك قريب بقا... بس شيليه ها
انا:.........!! اه طبعا انا حرة
*******************
:(نصيحه مش تدخل!!
هي {5} انتي مش ها تجيبي بيبي تاني ليه؟
انا : مش عاوزة... مش حاسه اني عاوزة.... وطاقتي متسمحش
هي: لا غلطانه!! بكرة تندمي بس بعد فوات الاوان...
انا: يمكن بكرة اندم بس دلوقتي برضه مش عاوزة
!!!هي: يا بنتي هاتي احسن جوزك يبص بره ويفكر يتجوز
انا:...... ومالو....... لو بيفكر كده اوكيه......
!!هي: خلاص حريتك الشخصيه!! انا بس بنصحك
******************
):طبعا مش تدخل نصيحة بس..
هي{6} مش ها تشتغلي بقا
انا مش لاقيه شغل....لا مكان مناسب... ولا مواعيد
!!هي: اتصرفي! اي حاجه وخلاص
انا: ازاي اي حاجه ؟؟
هي: يا بنتي الشغل هو اللي بيخلي الست بني ادمه... ولو مشتغلتيش دلوقت ها تشتغلي امتي؟
انا: لما الاقي اكيد.... بس هو انا كده مش بني ادمه؟!
!!هي: بتأفف .... انتي حرة...انا نصحتك ودي حريتك الشخصيه
==================
!!احترام الحريه الشخصيه علي الطريقه المصريه
!!احترام الحريه الشخصيه علي الطريقه المصريه
هناك 23 تعليقًا:
من جهة حرية شخصية فهي واضح انها سايبة كل حد علي حريتة
بس لازم تديلوا كلمتين في جمبة
ذكرتني بقول الرسول عليه الصلاه و السلام
:" طوبى لمن شغله عيبه عن عيوب الناس "
دمتي سالمة
سلامٌ عليكي
كم من الجرائم ترتكب باسمك أيتها الحرية الشخصية
مش عارف ليه بجد الناس دافسه مناخيرها في أمور الناس التانيه. تلاقي الجيران عينهم ومناخيرهم علي جيرانهم، وتلاقي زمايل الشغل عايزين يعرفوا جبت إيه وكلت إيه ورحت فين. ولو الواحد عنده أفكار معينه لازم تكون غلط ومحتاجه تصليح.
ملل بجد.
تحياتي ليكي.
وهل يكب الناس علي وجوههم في النار الا حصائد ألسنتهم ، ولا أقول لك مالناش دعوة ، كل واحد له حريته الشخصية ! و على رأي الأغنية حشريين إحنا يا مصريين :)
من أكثر الأحاديث الشريفه التى أرتاح لها جدّا الحديث الذى يقول "من حسن إسلام المرء تركه ما لا يعنيه" أو كما قال ..
لكن الغريب إن بعض الناس تعتبر إن عدم التطفّل عليها و عدم رد السؤال بسؤال مماثل معناه تجاهل لها و عدم اهتمام بها !! حقيقى إرضاء الناس غايه لا تدرك .. وانتى مش هتشتغلى بقى :))) باهزّر و الله ..
والله انتى زى العسل
ودى الطبيعه المصريه
بوست هايل
يا امانى
الهى دى من 1 ل6 بتحبك بطريقتها الخاصة و هكذا تبدى إهتمامها بيكى
بتعتبر إنها بتنصحك و تلفت نظرك لمصلحتك على أساس إنك مش واخدة بالك يعنى و سيباها كدا
و بعدين باين عليكى سميعة كويسة
و هى من 1 ل 6 بتحب الكلام و الرغى زى باقى الستات
و بتحس بنفسها قوى لما تبدى ارائهم الشخصية فى الدنيا و الناس
و إنتى من ضمن الناس يا ستى
المهم إنتى
درجة تأثير الكلام دا عليكى واصل لحد إيه
بيأثر على قراراتك و لا لأ ؟؟
دا المهم
لو قصدك على قريفة المزاج و العكننة الحاصلة بعد الحوارات دى
فإسمحيلى
العكننة دى جزء من علاقتك بالناس
مهما حاولتى تتجنبيها
مش هتقدرى
يا إما تعيشى بدون ناس خالص
و دا طبعاً
مستحيل
يبقى الجنان معاهم اكثر ونساً من الجنان لوحدك
تحياتى يا أمانى
بجد بجد
التدوينة دي مشكلة
تحفة فعلا
وللاسف هو دا حال الكثيرين
والتدخل بالطريقة دي
(طريقة دي حريتك الشخصية)
بيثير مشاكل كتير جددددددددا
ربنا يعافينا
تحياتي على التدوينة المميزة
وعقلك فى راسك تعرفى خلاصك
وعاوزة تروحى روحى ولو مش عاوزة متروحيش انا بس بقول علشان اعرفك وانتى لو مش عارفة تبقى عرفتى وفى الاول وفى الاخر دى حياتك وانا مالى يأختى؟؟؟؟؟؟؟؟
ايتها الحرية كم من الجرائم ترتكب بإسمك
هى الحريه دى زهقت من شويه دى خلاص طلبت اعاره على السويس تروحى معاها
والله تدوينه فى الجون واللى عجبنى اكتر يا حبيبتى
كلمه الحرة الشخصيه على الطريقه المصريه هههههههههههههههه
أصل المصريين ناس عـ/ـحـشريين
:)
اولا اعتذر انى ملحقتش التعليق على بوست تحليل رواية واحة الغروب واحب ابدى اعجابى بالتلخيص المضغوط المركز المفيد للاحداث وانا اعتقد ان بهاء طاهر نفسه ميعرفش يلخصها بالبساطة والجمال ده ، بس خدى بالك ان من اهم العوانل اللى اثرت على محمود هى احداث قمع الثورة فى الاسكندرية
ثانيا موضوع الحرية الشخصية اللى الناس كوش شايفاها شخصية ولا حاجة بيأكد عدم اللباقة واللياقة التى يتمتع بها الاشخاص الذين يقولون رأيهم للاخرين بدون الاخذ فى الاعتبار ان رأيهم قد يسبب الآم فى نفس الطرف الاخر
وكمان بيأكد ان الستات دول حاجة غريبة:))
تحياتى
على فكرة راجية بنتى مجموعها 91 فى المائة وارجو ان تستطيع الالتحاق بكلية الفنون الجميلة
ويمكنك ان ترى صورها على الفيس بووك هى عسولة جدا
تحياتى
ههههههههههههههه
حرية شخصية ؟؟؟؟
مين حرية شخصية دي
طب خليها في سرك بقى
يا حبيبتي انا حصل معايا اللي يخليكي تتخبطي وتقعدي تكلمي نفسك
الناس الظاهر لسعت
تتدخل في اللي ملهاش فيه بشكل سافر بغيض وترجع في نفس ذات الوقت تقولك انتي حرة
هههههههههههههههههه
قال حرة قال
تحياتي
نعكشه
========
اهلا بيكي زيارتك الاولي
تقريبا هي اتخنقت من الناس وعزلت ملقتش لوجودها لزمه ولا حد بيحترمها
نورتي
:
:
:
عصفور المدينه
=============
الناس فاهمه الحريه غلط ده من ناحيه
ومن ناحيه تانيه الناس بتخنق في بعض وتقولك طب مكنش قصدي ادخّل انتي وحريتك
وكل ده باسم النصح
وجهه نظري
===========
منتهي الملل... فعلا حلوة حكايه ت صليح الافكار دي
:)
نورتني
:
:
:
احمد كمال
=========
:D:D:D
ماشي يا ابو مصطفي
نورتني
زمان الوصل
===========
انتي تهزري براحتك بس لو عندك شغل يبقا اجدع .. بس تركه ما لا يعنيه ازاي
امال نخنق في بعض ازاي ونقرف بعض باسم النصيحه ازاي
عموما انا اعيش.. في قوقعتي الخاصه هذة الايام
حفاظا علي المخيخ
وعضله المعده:)))
:
:
:
بلو ويف
ربنا يخليكي ... اشكر مرورك
فاتيما
========
ما بين النصيحه والتدخل شعرة
هي اني اكون طلبت النصيحه اولا
واكون متقبلاها تانيا
ومن غير الحاح تالتا وباسلوب لطيف رابعا
وطبعا في كل اللي ذكرتهم ده مكنش متوفر يا حبيبتي
الشعرة دي بيتحكم فيها الحساسيه
والزوق
ودول ما بيتشروش
طبعا مقدرش اعيش من غير الناس نهائيا
لكن لقدر ابعد عن مصادر الازعاج
:)))
اقدر اعيش في قوقعتي الخاصه الي حين عشان متكونش الخسارة ابديه
نورتني
:
:
:
النجمه الصامده
==========
اشكرك يا عزيززتي علي المرور
الطائر الحزين
===========
:D
انا مش عاووووووزة اروح ولا عايرزة اعرف الطريق
نورتني
:
:
:
ابي
والله هما اللي طفشوها وبعتوها اعارة بس يتهيالي راحت كوكب بعيد مش علي قد السويس... بما انك خبيره كوكب اوصفي لي طريقها
نورتي يا حبيبتي
عبدو باشا
============
تقريبا مكون جيني يصعب القضاء عليه او فيروس متحول زي الانفلونزا غير قابل للعلاج
نورتني
:
:
:
:
راجي
=========
الف مبروك لراجيه الف الف مبروك
هنا ها اتفق معاك واقول فعلا الستات حاجه غريبه وعجيبه وخنيقه كمان
:)))
بالنسبه لروايه واحه الغروب اشكرك واعتقد انه في احداث كثير انا عديت عليها سريعا عشان التلخيص يكون شافي اعتقد انه الروايه تحتمل كلام كتير لكن موضوع التلخيص بيقدم لي متعه غير افاده الاخرين وهي انه بثبت القصه باحداثها في راسي وكمان كان في مقاطع كتير عجبتني مقدرتش اكتبها كلها
اخترت منها فقط
عموما اشكر ترشيحك كان في محله
انا دلوقت بقرا عزازيل ترشيح صديقتي زمان الوصل بس تقيله اوي وعاوزة تركيز طحن
نورتني
نونو العزيزة
===========
اوكيه... لو عندك قصه يبقا عندك موضوع بوست جاهز
:)))
احكي لي بقا
:))
منورة
هى صحيح حاجة تخنق بس بدرجات
يعني حسب نوع اللي بيحشر نفسة لو كان إهتمام وحب وللا حشرية وخلاص وللا فرض وصاية
لو كان إهتمام وحب يبقي اعذره حتى لو كلامه مش عاجبني
ولو كان حشرية وخلاص يبقي انفض ولا كأني باسمع حاجة
أما بقي لو كان محاولة فرض وصاية وتسفيه افعال دا بقي ما يتسكتش عليه لازم يتوقف عند حده
ولا انتي ايه رأيك
هو:
انتي مش هتقفلي المدونه ولا ايه
كفايه كده؟
عموما دي حريتك الشخصية
هههههههه
تحياتي
بهزر طبعا
:)
إرسال تعليق