عزازيل=====
جبت عزازيل عشان مني قالت لي انها حلوة وقريت لحد صفحه100 الروايه بتحكي عن الراهب المصري هيبا ورحلته في الرهبنه هو ابن من اب وثني قتله ابناء الديانه القديمه الفراعنه الوثنيين.. من اسيوط الي الشام... مرورا بالاسكندريه وعشقه للوثنيه اوكتافيا ولقائه بالفيلسوفه هيباتيا وتخبطه المهم مليئه بحوارات ونقاشات فلسفيه ودينيه.. مش عارفه الروايه ممنوعه ليه او ايه سرخطورتها لحد دلوقت.. هل اللي قريته لحد دلوقت والحديث عن الالحاد وربطه او عدم ربطه باخلاق.... او بدعه الاريوسيه واحتماليه ان لا يكون اريوس مهرطقا ولكن اراد تخليص المسيحيه من اثار المصريه القديمه( نقطه التثليث الفرعوني) ولا عشان بيتكلم عن قسطنطين باعتبارة ليس قديسا وان ما حدث في مجمع نيقيه هو انتصار فقط لكنيسه الاسكندريه
مش عارفه ايه خطورة المعلومات دي وهي ماليه كتب التاريخ وتحت يد الجميع.. ها اخلصلها وبعدين الخصها واشوف
الدروز..حكمة ربنا
====
اثناء احداث تحرير اسري لبنان عرفت ان سمير القنطار درزي قلت ارجع ادور علي معلومات عن الطائفه الدرزيه... الحقيقه متاهه اخري.. يعني هما بيعتبروا نفسهم مسلمين والمسلمين بيعتبروهم مش مسلمين... وقسم اخر يعتقد انهم مسلمين لانهم يعترفوا بالشهادتين !!!!المهم في الاخر يعني هو سبحان الله ليه حكمه في التعدد ده وكل واحد فاكر نفسه صح وفاكر نفسه مؤمن وفاكر نفسه زي الفل الحقيقه ان كل حاجه ما نفهمهاش نقول حكمه ربنا... وانا طبعا مش معترضه علي حكمه ربنا وطبعا مش فاهما هو الايه بتقول جعلناكم قبائل وشعوب لتعارفوا... طبعا احنا ما تعارفناش... احنا هات يا قتل في بعض.. وتكفير في بعض... بس طبعا حكمه ربنا.. !!يمكن يجي وقت ونفهمها في حياتنا او يمكن بعد كده!! او ما نفهمهاش خالص:)
حوار... ثارات او تسامح؟
========
انا: مش انا حلمت بابويا امبارح في مكان واسع ومريح زي ما يكون في الجنه
!!امي: بعد( 32 سنه طلاق من الراحل.)....يا عالم يابنتي يمكن ربنا يبدل سيئاته حسنات
==============
الحكمه القديمه بتقول.... ليس المهم ان تخسر معركه ولكن ان تنتصر في الحرب في النهايه
تقريبا يعني هو لحد دلوقت مرحله معارك صغيرة بتهزم فيها.... واديني مستنيه اخرتها واشوف الحرب ها تخلص علي ايه اعتقد ها تكون النهايه والهادئه او الصاخبه وبلا كلمه نهايه... فقط اسلم الانفاس الاخيره
وسعت رحمته كل شيئ
=====
استيقظ فجرا بعد ارق مزمن اتوجه للكومبيوتر.. يذهب هو للصلاه,, امازحه قائله ده الفرق بيني وبينك عشان كده انت ها تخش الجنه وانا ها اخش النار... ويمكن بالرغم من كده ادخل انا الجنه وانت تدخل النار يا عالم كل شيئ جايز:) وسعت رحمته كل شيئ
ضيف غالي
========
يحضر خالي العزيز المقيم في كندا الي الاسكندريه يرغب في شراء كتاب ثلاث اجزاء لتروتسكي_سيره حياته_ وكتاب قصه الارجون_ مذكرات مناحم بيجن.. لا نعثر علي الكتب في السوق الحل تصويرها من مكتبه الاسكندريه التي تشترط تصوير 20% من الكتاب في اليوم الواحد اذن الكتاب ياخد خمس ايام تصوير!!! عجايب مش فاهمه ليه او الحل البديل اصطحاب 5 اشخاص كل منهم يتولي تصوير جزء لوحده المهم صورت له قصه الارجون طنشنا الراحل العزيز تروتسكي يمكن العام القادم.. لا اعرف هل الكتب تشبه اصحابها ام الانسان يشبه ما يقرأ
هناك 39 تعليقًا:
بنت القمر
اولا احب اشكرك على تعريف كلمة الاريوسية فهى معلومة جديدة بالنسبة لى كا عقيدة مسيحية
اما عن الدروز ومن نفس مصادرك فقد كان للتاريخ فيهم حكمان فمن حيث التسمية : إن التسمية الحقيقية والروحية للدروز(طبقا لتعرفيهم) هي : الموحدون أو الفاطميون .
ومن ناحية أخرى معاكسة أصل الدروز فرقة سرية من فرق الباطنية يتظاهرون بالإسلام !!!!. وحيث اننى من محبى التاريخ ولان الموضوع محير وأختلفت فيه الاراء فسوف ابحث عن الحقيقة وجدية مصادرها .. ومرة ثانية شكرا لمعلوماتك القيمة.
اما عن معاركك الصغيرة فأنا مؤمن تماما ان الحال لايبقى على ماهو عليه وان كنت على حق فسوق ينصرك الله آجلا او عاجلا فصبرا يابنت القمر
واخيرا تحياتى و ربنا يحسن ختامنا جميعا
يبدو ان الحديث عن مصادرة الروايه كان نوع من الدعايه الترويجيه ليها .. يادى الكسوف @@
-------------
على فكره واضح إن مامتك دمّها خفيف بس شكلها من النوع اللىّ ممكن يقول نكته و هو ملامحه فى منتهى الجدّيه :)))
السلام عليكم
مقتطفات مليانة واضافة معلومات
قوليلي مش هتنزلي القاهرة قريب يمكن نتقابل
تحياتي وربنا يارب يدخلك الجنة
السلام عليكم ورحمة الله وبركاته
دوختيني يا بنت القمر وانا لسه في فترة النقاهه من موضوع دسم لموضوع اكثر دسامه
عموما يا ستي ما تقلقيش ربنا رحيم غفور ورحمته وسعت كل شئ وان شاءالله كلنا ندخل الجنه ويبدل سيئاتنا حسنات
سلام
وميض ابتسامة
================
اشكرك يا عزيزي اني اضفت شيئ من القيمه وليع معني في وسط اللامعني اللي عايشينه
موضوع الدروز قريت كتير فيه اليومين اللي فاتوا واعتقد انه... ما يصفوا بيه انفسهم يختلف كليا عن ما يعتقده البعض تجاههم
ليهم كمان كتاب اسمه المنفر بذاته الكتاب سري ولا يوجد ليه نسخ علي النت ويستحيل الحصول عليه
حاجه غريبه مش كده دين يبقا سري|!!!!!!!!!!
تحياتي ونورتني
زمزم العزيزة
=========
انا استمتعت بما قرئت الي الان لحد ص 160
ومش ندمانه علي شرائها بالعكس
بس كل ما فيها الي الان معروف تاريخيا
هي مجرد تساؤلات بين الراهب هيبا ونفسه او بين الراهب و القس في الاسكندريه
يعني مفيش حاجه تستاهل المصادرة خالص
حتي الولد بتاع دار المعارف وهو بيديني الروايه مارس عليا نوع من الاشتغال
:))
انه بيديني حاجه وصايه لي مش لاي حد تاني
!!
او يمكن مروري في الدراسه علي كل تلك القصص خلاها محروقه بالنسبه لي كنت بدرس تاريخ وسيط واتهرينا مجمع نيقيه وقسطنطين والهة اليونان الوثنين
بس كان واجب مش اختيار
:))
يمكن عشان كده ما حصليش صدمه من ما قرئت
امي بقا حكااايه كبيرررره
حكايتي مع الزمان
:))
نورتيني يا زمزم
نونو
===
احسن حاجه الدعوة اللي دعيتي هالي دي... الجنه..
يحسن الدنيا وحشه اوي يا نونو!!
ايميلي في البروفيل
ابعتي لي ايميلك ولو نزلت القاهرة اكيد ها احاول نتقابل
يا رب اللينكات تقدم ليكي اي اضافه وتفيدك... مبسوطه ان حد ممكن يطلع باستفاده من ما اكتب
نورتيني
خمسه فضفضه
==========
كسفتيني بزوقك:))
كنت لسه بقول انتي وبيلا مختفيين جامد بيلا عندي ايميلها بعت اطمنت عليها وقلت انهارده ها ابعت لك علي الفيس بوك اطمن عليكي... سبقتيني يالخير يا فضفضه... اسفه علي تدويخك في رواقه ابقي شوفي اللينكات والف الف سلامه
نورتيني
أحلى جملة عجبتني هنا ..و لأنها حقيقية جدا و وصلت من خلالها لنتائج رهيبة من زمان ..تتعلق بنظرتي للدين و الطوائف جميعا .. هي جملة ( كلهم فاكرين نفسهم هم الصحّ ) ..هذه حقيقة لا شك فيها .. الكل بدون استثناء فاكرين أنفسهم هم الصح .. حتى لو رحت لطائفة دينية في أدغال إفريقيا .ليس عندها كتاب و لا نبي .. سيقولون أنهم هم الصح و سيعطوك براهين ..طبعا لن تقنعك البراهين لأن لديك براهين أخرى .لكنهم تقنعهم بطريقة لا مجال للحوار حولها ..أو الناش فيها .
في أوائل التسعينيات اجتمعت بالصدفة بشخص من طائفة قديمة جدا لا زالت موجودة في شمال العراق ..يـُقال أن هذه الطائفة تعبد الشيطان ( غير عبدة الشيطان الجدد) .سألت الرجل عن صحة هذا الكلام ..قال لي ..بالطبع لا ..هذه أكاذيب . الأمر ليس كذلك تماما ..سأقول لك الان حجّته ..قال ( نحن نؤمن أن هناك قوة خير و قوة شر في هذا الكون.. الخير هو خير بكل الأحوال ..سيكون خيرا دائما علينا و على غيرنا ..أما الشر فنحن نأمن جانبه بأن نقدّم له النذور و القرابين كي يتركنا بحالنا .فقط ) .. شو رأيك ؟؟ الرجل مؤمن بجدوى هذا الأمر تماما ..كنت على وشك أن أبدأ معه نقاش طويل ..لكني وقفت عند جملتك تلك ( الكل فاكر نفسه صح ) فقلت له باختصار : برافو عليكم .
لذلك نصيحة لا تبحثي عن أي طائفة ..لا تاريخها و لا مستقبلها ..ابحثي عن الإنسان في كل عرق و لون و طائفة ..
منذ زمن بعيد لم أعد أعتبر الطوائف أمر يستحق النقاش .
لكن بالتأكيد ..مقارباتك للأمور هنا ..رائعة جدا .و تستحق الكتابة و القراءة ..بعيدا عن صخب الطوائف ..
ـ عجببتني كتير المقاطع الأخرى من النص ..
مرسي يا موون على اللينكات وعلى البوست
ربنا يطمن قلبك وما يجعل فى حياتك اى معارك دمويه :)) يعني شويه مناوشات بسيطه مش حتضر
ههههه معرفتش فى حياتي غير درزى واحد بس وهو جار احد اصدقائي هنا معرفهوش شخصيا ولمحته بس مره من بعيد لكن صديقتي وزوجها بيقولو انه مش بيصوم رمضان ومش بيصلي وانه قالهم ان عندهم الرجل لو تخطي عمر الاربعين اصبح غير مكلف بصوم او صلاه او اى عبادات
:))
ميهمنيش كل ده دلوقتى بس فى الوقت اللى قالولى فيه الكلام ده اتصدمت جدا لمجرد فكره ان فيه مسلمين مختلفين عن الاسلام اللى انا اعرفه كنت لسه مخوضتش فى الفضاء السايبري وشفت عجائب الدنيا اللى لو حد من اهلى عرف انى اعرف ممكن يموت بالجلطه
:)
اه فيه حاجه كمان غريبه فيما يخص الدروز انهم قفلو على كده يعني مش بينشرو معتقدهم خالص ولا بيعلنو تفاصيله ولا بيرحبو باي حد حابب يعرف عنهم حتى بنيه انه يعتنق مذهبهم
هما مرتاحين كده وبيتجوزو من بعض وبيتكاثرو وخلاص ومفيش حد غريب بيدخل عليهم
حاجه مريبه مش كده لان اى معتقد فى الدنيا تابعيه اكيد يحبو انه ينتشر او على الاقل بيحاولو انهم يقنعو الغير ولو على نطاق ضيق بيه
الأحمدية إفتتحوا مؤخراً أكبر مسجد بكندا. رئيس الوزراء وسياسيين كبار حضروا حفل الإفتتاح وألقوا كلمات. رئيس الوزراء قال إن هو ده الإسلام المتسامح الجميل المقطقط. الأحمدية رغم معرفتهم بكيفية نشأتهم وسببها أيام الإحتلال الإنجليزى للهند برضه بيقولوا على نفسهم مسلمين. مش عارف إيه القيمة اللي ممكن يضيفها إنتساب الجماعات المخالفة فى عقيدتها مخالفة صريحة للإسلام لهم سواء كانوا دروز أو أحمدية أو غيرهم غير تشويه عقيدة الإسلام.. علشان كده ضرورى توضيح الحقائق عن هذه الجماعات من خلال كتبهم وعقيدتهم نفسها
حمدالله على سلامة ضيفك الغالي وربنا يتوب عليكي وعلينا من إدمان الكمبيوتر
وقد لا تري النصر حتى في الدنيا...قد لا ترينه مطلقا... وقد لا ترينه كاملا وترين جزءا منه فقط
على "سكيل" أكبر من النظرة الدنيوية....سمية ام عمار بن ياسر لم ترى النصر على الاطلاق
مصعب بن عمير رآه جزئيا
النبي صلى الله عليه وسلم لم يرى النصر على الفرس والروم
اعملوا فقط...والله محاسبكم على ما تعملوه وليس على النتائج...وكل هم الدنيا لا يساوي غمسة في جنة الاخرة باذن الله
تكلم عن هذا المعنى الشهيد سيد قطب سابقا في احد كتبه وان كانت لا اتذكر أكان الظلال ام كتاب آخر
***********************
يمكن ..تعارفوا...تعارفوا...احتكوا..ولنبلوا بعضكم ببعض فننظر كيف تعملون
أخلصوا النوايا واياكم واتباع الهوى .... فان عملتم خيرا...فلذلك خلقناكم...وان عملتم سوءا فمردكم الى الله وستحاسبون
قيسيها على "اني جاعل في الارض خليفة"
هل النسان فعلا خليفة الله في ارضه ؟
لا تتسرعي في الاجابة....منهم من هو كذلك ..ومنهم من يحاول...ومنهم من هو بعيييد تماما
اذن نكمل الخلافة بمدأ آحر ...قرآنؤي ايضا.."وهديناه النجدين" اي طريق الخير وطريق الشر
يمكن فيه قصة حلوة جدا بتشرح المعنى ده على الرغم من اسلوبها الانحلالي في كثير من مواضعها للكاتب الاسلامي علي احمد باكثير اسمها "هاروت وماروت"
وفي الآخر..."ذلك الكتاب لاريب فيه هدى للمتقين*الذين يؤمنون بالغيب ويقيمون الصلاة ومما رزقناهم ينفقون"
اول صفة للمتقين...الايمان بالغيب
يؤمنون بالغيب = حكمة ربنا التي قد نرى بعضها في الدنيا وسنعلمها كاملة في الآخرة بامر الله
والله انا مش بيفرق معايا اي أنتماء ديني طالما يحترم اصحابه معتقداتي فلهم مني نفس الأحترام واسمحيلي أحي خالك وزوقه الراقي في القرأه وطبعا كان طبيعي أنه مايلاقيش الكتب دي في أسكندريه لأن عشاق تروتسكي بينقبوا عن كتابته واللي معظمها مترجم في لبنان في كل مكان
بوست متنوع وجميل تحياتي
الدروز :
تنسب إلى محمد بن عبد الله الدرزي وهو موالي للحاكم بأمر الله الخليفة الفاطمي
يقوم دين الدروز على ألوهية الحاكم بأمر الله وأنه نسخ كل الشرائع وأتى بشرع جديد لأنه هو الإله .
ومن شرائعهم أنهم يبغضون كل الأنبياء والرسل ويقولون أن الحاكم بأمر الله لم يموت وإنما هو مختبئ في سرداب حتى يعود فيهدم الكعبة ويسحق المسلمين ويحكم الدروز العالم للأبد.
كما إنهم لا يؤمنون بالقرآن بل لهم مصحف خاص بهم أطلقوا عليه اسم :
(( المنفرد بذاته ))
ولهم عبارة شهيرة تتصدر كتبهم وخطبهم ويتعبدون بها وهي :
(( ليس في السماء إله موجود ولا على الأرض رب معبود إلا الحاكم بأمره ))
ملحوظة : من هؤلاء الدروز ممثل ومطرب قديم وشهير جداً أتى إلى مصر هو وشقيقته وعملا في مجال الغناء والتمثيل وهم جميعاً كفار كفر أكبر .
والله أعلم
واضح ان اى كتاب او فكر بيناقش طبيعة السيد المسيح عليه السلام بيكون مرفوض من الكنيسة المصرية
وطبعا كلنا نذكر رواية دافنشى كود وازاى تم منعها فى مصر مجاملة للكنيسة المصرية( موجودة عندى فى لغتها الاصلية ثمنها خمسون جنيه وقرأتها خلال ثلاث ايام فى سيدى كرير العام الماضى )مع انها فكشن يعنى خيال
فما بالك بالذى ينسف عقيدة التثليث ويؤمن بالوحدانية ،،، لازم يتمنع طبعا
_______________
الانتصار النهائى فى معركة الحياة هو ان نختار الهزيمة حتى لو استطعنا الانتصار ، اى نتسامى ونشف بالروح ونقول كما كان على بن ابى طالب يقول
يادنيا غرى غيرى
________________
قال رسول الله صلى الله عليه وسلم
" كل أمتي يدخلون الجنة إلا من أبى قالوا يا رسول الله ومن يأبى قال من أطاعني دخل الجنة ومن عصاني فقد أبى "
____________________________
ملحوظة هذه ليست صورة ابوللو بل صورة marsyas مرساياس الذى قتله ابوللو
وعلى فكرة ابوللو الوحيد من سكان الاوليمب الذى يبدو فى الصور بدون لحية
_________________
تعليقا على الحلم ،،،،الستات دول حاجة غريبة جدا:))))))
تحياتى
إنتي دخلتينا متاهة فعلا ..
- عزازيل : طبيعي لما واحد متخصص في التاريخ و المخطوطات زي يوسف زيدان يكتب عن التاريخ ده حتى في صورة رواية إن الكنيسة ترفض ، زي ما رفضت شفرة دافنشي ، أنا ماقريتهاش لكن عرفت كمان إن فيها جرعة جنسية تدعو للشهرة كالعادة ، و للآن لا أجد مبرر للجنس في الفن بأنواعه غير التجارة أو الانحلال .
- فكرتيني بموضوع بدأت أكتبه عن الحق و الباطل ، أظن إن سنة التدافع مسئولة عن اللي بتقوليه ، و لها حكمة عليا ، لكن ده بوست لوحده .
- مش عارف ليه مش مقتنع إنك ممكن تسلمي الأنفاس الأخيرة في هدوء ! أعتقد إن لديك طاقة أكبر من كده !
- يا عالم مين اللي حايدخل الجنة ، أسأل الله أن نكون جميعا من اهلها .
أنا تهت فعلا خلاص و لازم أنام ، شوية تركيز بقى من فضلك :)
لا انا دخلت متاهه فعلا اكيد هاعلق تاني لما اخرج من امتاهه ديه بس عارفه متاهه تخلي العقل يشتغل بعشق افكارك يا قمر
وحشتنى يا قمر وحشتنى المواضيع الرشيقه المملؤه بالحياه وحشنى التنوع والثقافه
وفعلاً البوست ده أضاف لى معلومات كانت مجهولهتماماً بالنسبه لى
شكراً لكى
يا رب ندخل كلنا كلنا الفردوس الأعلى
حنا السكران
===============
طبعا كلنا فاكرين نفسنا الصح بس تفتكر انت انهي الصح ما هو مستحيل نكون كلنا صح لا ن الصح واحد مش ممكن يكون مختلف او متعارض بالشكل ده!!
بدور في تاريخ الطوائف لاني اصلا دارسه تاريخ ومهووسه بيه من باب طلب العلم وليس بحثا عن الحقيقه لانه يا عزيزي تبدو ان الحقيقه بعيده المنال او مستحيله في هذه الدنيا
نورتني يا جو
نسرين العزيزة
================
لمجرد فكره ان فيه مسلمين مختلفين عن الاسلام اللى انا اعرفه كنت لسه مخوضتش فى الفضاء السايبري وشفت عجائب الدنيا اللى لو حد من اهلى عرف انى اعرف ممكن يموت بالجلطه
:)
=============
ضحكتيني حتي استغاثت السماء
طبعا انا عارفه انتي بتروحي فين واكتشفتي اسلام مختلف فين و وازاي
هو الحقيقه الي وصلتله يا نوسي كل واحد بيشوف دينه او اسلامه من وجهه نظرو وبوينت اوف فيو الخاصه بيه
وكمان حسب مصلحته الخاصه
وحسب حاجات كتير وتقريبا هو الكتالوج بتاع الاسلام بقا شخصي جدا وكل واحد ماشي علي كتالوجه وفاكرة منتهي الصح
فعلا نقطه اخفاء كتاب المنفرد بذاته دي عجيبه يعني لسه في اديان سريه
احنا معندناش دروز في مصر عشان كده ممكن الكتاب يكون مش موجود بس تفتكري موجود يره في لبنان او سوريا؟؟
ولا برضو بيذاكروه في السكرته
:))
نورتي واللي يعيش يا ما يشوف
عدي النهار
=========
اشكرك يا عزيزي جدا علي اللينكات لسه بقول في التعليق اللي قبل ده اللي يعيش يا ما يشوف بس تفتكر هما بينتسبوا للاسلام ليه
عشان المعاش المبكر مثلا
ولا وجاهة اجتماعيه
غريبه فعلا
:)))))))))
خالي نورنا وليه حكايات بلا اول ولا اخحر بفكر احصرها في بوست بس بعد سفره
ادمان الكومبرورر
:))
قد يكون يحمل خير اكتر مما يحمل شر
اذا بحثت عن العلم والخير ستجدهم من خلاله واذا بحثت عن الشر والحقد ستجدهم بوفرة متناهية
:))
تحياتي واشكر مرورك
الصارم الحاسم
==================
انا قريت التعليق 115 مرة عشان اعصر ذهني انت بترد علي انهي مقطع تقريبا
بس اللي فهمته انك بترد علي جزئيه الطوائف مع المعارك الخاسره معا
هو انا بس عاوزة اشكرك علي جزئيه انه لم ير النصر دي
ممكن تكون رؤيه جديده لكن الانسان يحتاج فعلا ان يري ايمانه منتصرا او شكوكه مهزومه حتي لا يظل تائها في متاهة الشكوك هل انا علي الحق ام علي غيره وقد تغيب تلك الرسالات الالهيه كثيرا او قد لا تاتي قنبقا في حيرة بلا نهايه
اشكرك يا عزيزي
EGYPT EYES
==============
اهلا يا عزيزي مرورك الاول
بس يعني انت جاي تحيي خالي عشان بيقرا تروتسكي
:))
ماشي يا سيدي!!
هو الكتاب تلات اجزاء لم نفلح في الوصول اليه عبر الحاج مدبولي لم نحصل سوي علي وعود باستجلاب المجموعه لكنها موجوده في مكتبه الاسكندريه لو تحب تقراهم او تصورهم شرفنا بس هات اربعه معاك او تصورهم علي خمس ايام
احد صور البروقراطيه يا عزيزي
نورتني... في انتظار زيارات اخري
يا مراكبي
=============
اهلا يا باش مهندس
المعلومات الانترنتيه متضاربه بشـأنهم جدا واللينكين اللي وضعتهم مثيل
بس مين هو المطرب الفريد الذي حضر مع اخته ذات الاسم الهان!!
:)))))
هو مدونتي متراقبه ولا ايه؟؟
ولا المرحوم ليه معجبين معاهم شوم وها يدغدغوا المحكمه؟؟!!
ضحكتني يا عزيزي
راجي
=========
مش مشكلتي خالص عقيده التثليث ولا مناقشه صلب الايمان المسيحي لانه في الاخر كل انسان بينظر للمسيح من خلاله ايمانه الخاص الناتج عن دينه
يعني انا ها اشوفه نبي بشر طالما لم انتقل الي ايمان اخر
بس انا اتصدمت من شيئ تاتي في الروايه
مش ها اقولك عليه دلوقت
ها اتأكد بعد ما انتهي واروح ادعبس في المكتبه واقولك سمعت ان الروايه متوفره في مصر حاول الحصول عليها يا عزيزي ربما احتاج نظرتك فيما سوف اشارككم بيه بعد انتهاء قرائتها يا مسهل
وصلت ل ص180
تمنها 25 جنيه دار الشروق
بخصوص الصورة فهو خطأ لا يغتفر بس انا كنت بدور علي شيئ تاني في الصور
فعثرت عليها وحسيت انها ربما تكون موحيه بصورة ما احترت في تحديد تلك الصورة لما اود قوله في البوست اشكر لك التصحيح
بخصوص السيده الوالده الفاضله
فلك ان تتخيل حجم الثأر اشخصي الذي لم ينمحي ب32 سنه طلاق وعشر سنوات موت
:))).. عجيب الانسان فعلا!!
نورتني
ياااه 115 مرة
:))
طويب
:)
الكلام كان عن حاجتين اساسيتين
موضوع انتظار النصر
وموضع حكمة ربنا في قوله وجعلناكم شعوبا وقبائل لتعارفوا....وسؤالك اين حكمة ربنا هاهنا ومامعناها...وفصلت كما بينهم بصف نجوم "*******"
بث
:)
بالنسبة لانتظار النصر..على فكرة الرسائل الالهية سواء جحاء النصر ام لا...سواء كان الانسان على الحق ام على الباطل...فهي مستمرة دائما ولا تتوقف ...صدقيني ....وكتير ممكن يقولك كده
لكن تحتاج لصفاء نفسي وشئ من الاخلاص وعدم تحكيم الهوى ...كي يراها العبد على صورتها الصحيحة
واحيانا حتى يفهمها العبد لفترة قصيرة...ثم ينساها..وده بيحصل برضه
وتكملة لنقطة ينساها...قد ينساها الانسان...او قجد ينسيه الشيططان كي يزعزع ثقته بالله
تحياتي الشديدة
:)
احمد كمال
===============
- مش عارف ليه مش مقتنع إنك ممكن تسلمي الأنفاس الأخيرة في هدوء ! أعتقد إن لديك طاقة أكبر من كده !
------------------
كده برضه يعني ها اعافر مع عزرائيل مثلا!!
علي العكس تماما يا عزيزي قد ارغب في ان اذهب فقط بعد ان اتم واجبي نحو الصغيرتين
تعبت من الاسئله التي بلا اجابه ومللت البحث عو اجابه
فقط زي ما قلت عندي طاقه .. لكن اعتقد انها في الاتجاه الايجابي للاخرين والسلبي تماما علي نفسي
المتثل سلبيته في صداع عصبي وعسر هضم وفوران معده وارق
:))
توليفه اذا لم توجه تلك الطاقه في البحث عن الاشياء وتعلم الجديد فان تلك الطاقه تصبح سهم يتجه الي الداخل
علي فكرة كل الستات كده
:)))))))))
المهم تكون تعرف تستفيد من طاقتها.. بشكل ايجابي واو انا مش عارفه هي الطاقه بتدور علي اسئله حائرة ولا الاسئله الي بتخلق الطاقه
طبعا كده انت تهت خالص
:))
ربنا يجعلنا من اهل الجنه يا رب واشوفك علي خير هناك ان شاء الله
اصل الدنيا دي صعبه اوي:(
عاوزة اجرب حاجه احسن ربنا يديك العمر والصحه وراحة البال
-------------------
علي فكرة عزازيل ما فيهاش حاجه غير اخلاقيه
لحد 180
طبعا في جزء بيوصف فيه خطيئته مع اوكتافيا لكن لم اري شيئ غير مقبول او اوفر
حاول الحصول عليها
ربما استفيد من رأيك بعد ما انزل تلخيصها بس قدام شويه .. محتاجه ادور علي حاجات كتير
ايناس لطفي
===========
انتظر تعليقك الجديد يا عزيزيتي
واشكر مجاملتك وزوقك
انا انسانه بسيطه جدا
في القلب
============
حمد الله علي سلامتك يا عزيزتي
نورتي عالم البلوجر مره تانيه يا رب في احسن حال
تحياتي وانتظر طقطقات كيبورك مرة تانيه
الصارم الحاسم(2)
=================
يمكن بس علي رأيك مفيش صفاء نفسي اليومين دول مخلي جهاز الاستقبال مشوش كل ما اتلقاه مزيد من القلق
والهواجس والشكوك
تحياتي ... اشكرك... دعواتك
ايه علاقة الصوره بالبوست؟
سكر .. خصوصا حكاية حلمت ببابا
هاقول لك حاجة ..مرة أتى رجل الرسول صلعم .. فسأله متى الساعة يارسول الله ؟ فقال وماذا أعددت لها ؟ قال حب الله ورسوله فقال له الرسول: انت مع من أحببت
مش انت بتحبى ربنا والرسول ؟ خلاص
لدى اعتقاد متطرف بأنه مافيش حدّ هايخش النار .. فقط مش هايحصل على جايزة كويسة .. كأن واحد خد قصر فخم .. والتانى خد اودة فى البدروم .. مش ده برضه عذاب ؟ وعذاب شديد كمان؟
سنوهي
========== ا
اممممممممممممممم
العلاقه تأثير واحساس نفسي ليس الا
نورتني
شريف
========
احيان كتير اوي بيكون عندي نفس الاعتقادبعا مفروض ما نشكش في صحيح القران انه في جحيم
بس اعتقاد انه برحمته ممكن في لحظه يعفو عن البشر ويطفي النار دي في لحظه
ممكن مش كده؟!!
انا عايشه علي امل الرحمه ييا عزيزي
مبسوطه اني بمتاهتي اسعدتك اهلا بيك
:))
بنت القمر
أثر في كثيرا ردك الأخير على تعليقي ، و وافق هذا مقالا كنت أعده ، و لهذا أهديك مقالي التالي الذي أنشره اليوم لاحقا بإذن الله .
تحياتي
يابنتي انا بقالي 3 ايام متواصل بلا نوم .. توهتي اهلي معاكي .. بنص تركيز ونصف عين ..
مسألة الاختلاف دي قصة طويييييلة قوي
عمرنا ما هنفهما غالبا ولا هنقدر نحسمها
غير بالايمان
لانه ببساطة كلها اخرويات
حاجات متعلقة بما بعد الموت
ولان اللي بيروح مش بيرجع
مش هنقدر نعرف
حاجات اصلا محدش يقدر يحسمها زي الجنة والنار وشكلهم
الجنة جنينة واسعة وحلوة وكلها ثمار واكل وشرب وستات حلوة وعسل نحل وهيصة ليل ونهار
ولا الجنة صلاة وتسبيح وبمشاركة الملائكة والبني ادمين ارواح خفيفة
ولا الجنة حالة السعادة اللانهائية
ولا مفيش جنة وهيحصلنا اعادة تجسد والابرار يرجعوا بني آدمين والاشرار يرجعوا حيوانات .. غالبا انا هرجع قطة لاني بكره القطط جدا
ولا اصلا مفيش جنة ولا حركات .. والموت هو اخر الخط ؟؟
طب انا صح ولا انتي صح ولا هو صح ولا دول صح ولا دوكهم ؟؟؟؟
اخرويات ..
لا يمكن حسمها إلا بالايمان وبس
ولاننا مش هنقدر نعرف هنفضل في الحيرة دي على طول
الحل .. الواحد يعمل اللي مقتنع بيه وحاسه ويجتهد في البحث والمعرفة قدر الامكان ويخلص النية وينتظر
لما نشوف هيحصل ايه
فيه آية في الكتاب المقدس بتقول
الله ليس بظالم حتى ينسى تعب المحبة
يعني اي تعب او اي عمل مخلص (بغض النظر عن ديانة فاعله) له قيمة عند الله
إرسال تعليق