الجمعة، أكتوبر 31، 2008

خطة حياة

أقضي في الميكروباص ذاهبة الي عملي ساعه كامله يوميا .منذ تخرجي من كليه الصيدله وعملي عند الدكتور خالد
كل شيئ يسير علي وتيره واحده لكن اليوم اهتزازات الميكروباص اكثر قوة مما يزيد تقلص معدتي ويؤلمني بشده
اعيش اياما مرهقه وليالي بارده شغل الصيدليه في الصباح واعمال المنزل في المساء
الذهاب تاره لجلب الخضر والعيش واو تسديد اقساط ملابس الشغل
بعد ايام اتم عامي الرابع والتلاتين كل فرص الزواج السابقه في حياتي كانت عروضا هزيله
لم يكن منهم اي عرض مثل الدكتور خالد الشاب المثقف الوسيم الحنون
أبدو انا وخالد مثل نصفي التفاحه المكملان لبعضهما فكلانا طبيبان صيدليان ونقضي ساعات معا افهمه من نظرته ومن اشارته
حسابات الصيدليه والضرائب والشركات احفظها اكثر من ما احفظ ذكريات الطفوله اواكثر من ما احفظ قسمات وجه ابي
تزوج خالد من ثلاث اعوام من دينا صديقه اخته. شابه تافهة لا هم لها الا انفاق النقود والثرثرة في الهاتف
لا اعلم كيف لم يلاحظ خالد مدي ملائمتنا لبعضنا البعض؟! كيف لم يشعر بي ؟!
ولا افهم بماذا تتفوق علي دينا ؟كل ما تفوقني به ان ابيها طبيب جامعي بينما ابي موظف في شركه الكهرباء!!
باع أبي نصف بيت ليكمل تعليمي ملعونه دينا في كل ساعه!! لو لم تظهر لكان الوضع مختلف الان
فسد كل شيئ !! لكن تشير نجوي زميلتي ان الاوان لم يفت تماما وبامكاني استرداد خالد في لحظه ضعف واشعاره بوجودي ..
انفق مائة وعشرين جنيه في الميكروباصات للوصل للعمل والباقي احصل به علي ملابس وأحذيه بالقسط...اليوم اقتربت من خالد كثيرا وهو يراجع حسابات الضرائب..كان منشغلا كنت اشعربالم في معدتي وبرودة تمزق اطرافي
بينما هو كان وسيما فتيا انيقا تنبعث منه روائح مختلطه من كريمات الحلاقه والعطور الباهظه التي لا اجدها في رجل اخر
ادمنت رائحه خالد بعد العمل معه سنوات طويله.... تسري الرائحه في انفي كالمخدر فتجعلني اتحمل تلك الايام القاسيه
.. اقتربت منه كثيرا وسالته ان كان يريد شيئا ليشربه فلم يرد كان مشغولا!!
دخلت دينا الصيدليه والقت التحيه علي خالد وحشتني يا خالد اخبارك ايه؟... وبعدوصله من الثرثره الملعونه يمد يده لها ببضعه مئات من الجنيهات وتنصرف
ثم تعود فجأه وتقول: حياة لما تعوزي تكلمي الدكتور ابقي أقفي بعيد شويه!!
اشعر بغصة في حلقي ودموع محتقنه واهز راسي مطيعة في ذل
... الملعونه تريد ان تخبرني ان خالد لها وانني مهما قضيت ساعات في خدمته فهو لها! يعطيها في دقيقةالمال الذي اخذه بعد شهر عمل...
تحرص ان تعاملني كخادمه فلا تقول يا دكتورة حياه فقط يا حياة حتي تذلني
تمضي ايام اخري.... تظهر فيها دينا علي فترات بعطرها الغالي و ملابسها الانيقة.. وجوهراتها الثمينه
يمضي خالد معي معظم الوقت بلا كلمه بخلاف العمل... او يسالني احيانا مدام دينا متصلتش قبل ما اجي؟؟
الملعون لا ينساها لحظه واحده!
تتسرب الايام من بين يدي... يمر العمر ولا شيئ يحدث خالد يزداد تجاهلا لي
هل الجأ الي خدعه حواء القديمه وادعي وجود علاقه بينا وانني احمل منه طفل؟؟
تبدو فكرة مجنونه فسوف اجلب العار لابي.. وحتما ستنكشف الحيله....
إذن سادعي انه راودني وتحرش بي ستكون فضيحه مدويه له امام اهله واهل زوجته
... ساحطمه واحطم زوجته المغروره.... سيعرف ان ثمه امراه كامله كانت بجواره
ولفظها يوما بعد يوم سيعرف ويتاكد... انني كنت هنا وربما ياتي طالبا غفراني!!
وعلي اسوأ الفروض ساحطم غرور دينا واكسر انفها المتغطرس
وحين احطم صورة خالد في عينها لا بد ان الشك سيقتلها فيه!!
وربما تحدث معجزة وتطلب دينا الطلاق..و في تلك اللحظه سأكون انا فقط الي جواره معه وله
غدا اري ما يجب عمله.... لم عد بيدي غير انتظار الغد!!

هناك 35 تعليقًا:

Alkomi يقول...

هل هي يوميات اعتيادية

ام اسرار متمردة

ام قصة

احس انها خليك بين كل ما سبق

بنت القمر يقول...

محمد الكومي
=============
هي مجرد قصه.. مش متقاطعه مع حياتي بأي شكل
مجرد تنبؤ ... بقضايا ومحاضر تحرش قادمه
اسلوب الراوي او الحاكي في السرد مش معناه اني انا:))
انا زوجه من زمن ومده:))
نورت

Desert cat يقول...

ما فى خيال حياة مجرد خيالات وأوهام
اولاً : انها لم تقم بالفعل نفسه
حتى وان قامت فليس بمجرد ان تتبلى اى انثى على جل بانه تحرش بها سيصدقها الجميع على الفور .. وإلا كانت كل واحدة اعجبت بشخص اتخذت معه نفس الحيلة .. ثم اتمنى تفعيل القانون الجديد والعمل به على اقصى سرعه لأنه سيطبق على الرجل والمرأة بسواء بسواء ولن نرى فى شوارعنا بعد اليوم المتسكعات من تنتظر صاحب العربة الفارهه ورائحة البريفوم النفاذ ولن ترى من ينظر لكل أنثى تسير أمامه على انها فتاة ليل ويجب اذلالها ولو بكلمه تدل على بيئته .
تحياتى
واحدة بتتمنى تفيعل القانون وباقصى سرعه ليتم انقاذ ما يمكن انقاذه

غير معرف يقول...

ايه الفكرة الجهنمية دى؟

وافرضى فى الآخر طردها؟ ولا دينا طردتها.. وده ممكن .. لايغرك ماحدث مع نهى

آخر الاخبار ان محاميتها تحولت للدفاع عن شريف جبريل لانها اكتشفت ان نهى تحمل الجنسية الاسرائيلية

لاادرى على وجه التحديد مالعلاقة .. ايه دخل الوطنية دلوقتى فى الحقوق والقانون؟

ماأريد قوله هو انه ليس بسهولة أخذ الحق .. وفى زمن الخلع الذى استقر تقريبا .. لازالت هناك قضايا طاعة فى أروقة محاكم الاسرة .. وستات كتير غير قادرة على الحصول على طلاقها ..

خللى بالك وانت تنسجى قصتك .. ولاتبتعدى كثيرا عن الواقع ..

أما من ناحية جمال الادب القصصى والسرد فانت عارفة رأيى .. عشرة على عشرة

تحياتى

Cleo يقول...

الحب اليائس الذى دفع شمشون لهدم المعبد وهو يصرخ "علي وعلى أعدائى يا رب" !!

mido يقول...

القصة حيبقى ليها جزء تانى ؟!


------------
الصورة اللى فى رأس البلوج مش حلوة زى الاولانية

أنا عايز صورة تانية
:)

عين فى الجنة يقول...

عندما تشعر الانثى بتجاهل الرجل لها، مهما كان هذا الرجل اعزب او متزوج شاب او شيخ فهى تشهر اسلحتها راغبة فى الظفر به لنفسها
بعضهن ، فى هذا المضمار قد يسلكن دروب وعرة محفوفة بالشر
صدقتى فى تصوير مشاعر هذه الانثى فى القصة

karakib يقول...

حكايتك ايه بقي ؟؟ بقي لك كام بوست متألقة كده ليه ؟؟ ها ؟ في ايه ؟ كده يبقي في الم ما شخصي للغاية يفرز ابداعات .. بيتهيألي يعني

... يقول...

القصة جميلة أوي
بس مش عارفة ليه ماليش مزاج أعمل إسقاطات علي أحداث التحرش الحالية
حاسة إنه حوار داخلي فيها ورائع جدا .. حب من طرف واحد يائس ولن يتعدي الأمر كونه أحاسيس داخلية .. ورغبات ضاغطة بفعل الخوف من ضياع الأيام القادمة .. إنما إنت صورتيها بشكل جميل فعلا

Jana يقول...

الانثى حين لا يلحظ رجلها من تحب جنون انوثتها تتحول الى انثى مجنونة

مـحـمـد مـفـيـد يقول...

سرد رائع لواقع مرير ننحي الجانب عنه بأعذار كثيره

خمسة فضفضة يقول...

السلام عليكم ورحمة الله وبركاته

ايه التنبيط الجامد اوي علي الصيادله ده؟؟؟
:)))))))))


بس فكرة الحكاية حلوه اوي واكيد هاتيجي علي بال بنات كتير من اللي اتخر زواجهم

بس بلاش تدخلي الصيادله في الموضوع...ههههه

سلام

عدى النهار يقول...

كتبتيها لغرض معين زي ما أوضحتي فى تعقيبك على تعليق محمد الكومي لكن الكل قرأها بشكل مختلف
:)
الأفكار الشريرة ممكن تزور خيال الناس من باب التنفيث والعجز عن تغيير أوضاع قائمة ليست على هواهم لكن مش ضروري إنهم يتخذوا خطوات حقيقية لتنفيذ أفكارهم.. ممكن بعضهم يقدم خطوة ويرجع تاني.. متهيألي عدد قليل من الناس ممكن يمشي فى الطريق ده لنهايته

وميض ابتسامة يقول...

قد تكون مجرد قصة .. ولكنها جميلة وانتظر وبدون تعليق رد فعل الدكتورة حياة ورغبتها فى الانتقام ..!!

واذا كانت القصة انتهت هكذا فيالها من بائسة .. وليرحمها الله من هول فعلتها..؟

بجد قصة جميلة .. بس محتاجة نهاية قوية

زمان الوصل يقول...

يا حبيبتى :(
بجد ده كان إحساسى تجاه "حياة" و أنا أقرأ قصّتها ..

مش عشان الحب البائس اللىّ من طرف واحد .. لكن بسبب ما هو أقسى و هو إحساس الإنسان أن حياته و سعادته و وجوده كلّه مرتبط بشخص ما و بحدث ما غالبا لن يتحقّق ..

محمود محمد حسن يقول...

عارف كويس اوي الشعور ده ،

لما يكون قدامك شخص ، انت شايف انك بتحبه ، بس مع كده الشخص ده مش باصص ليك اساسا لأن فيه شخص تاني مسيطر عليه ، ما تقارن نفسك بالشخص التاني ده تحس قد ايه انك احسن منه ميت مرة ، وانك اولى بحب الشخص ده منه ،

شعور فظيع قد يقود للجنون في بعض الأحيان

بنت القمر يقول...

قطه الصحراء
============
قد لا يصل الامر الي قضيه ومحاكم لكن برضه العيار اللي ما يصبش
يدوش
في بلاد تعشق النميمه.... والشائعات
والتدخل في حياه الاخرين
نورتي

بنت القمر يقول...

شريف
=========
ممكن يطردوها واكيد ممكن العيار اللي ما يصبش يدوش
مع زوجه شكاكه
او رجل اعمال رأس ماله سمعته
وفي احوال كتير
جرجرة رجل برئ الي القسم لها اثرها اكيد علي سمعته وسمعه اولاده
اشكر اطرائك جدا
طبعا تطورات قضيه التحرش بتاعه نهي عارفاها ومتابعاها اكيد
بس الفكرة هنا ليس كل امرأه ضحيه ولا كل رجل جاني!!
احيانا الامر بيكون العكس
وفتش عن الغيره او الحقد او المنافسه في العمل!!
وربنا يخليك... تحياتي

بنت القمر يقول...

كليو
==========
اكيد متفقين تماما
تحياتي

بنت القمر يقول...

ميدو
========
لا مش لها جزء تاني
:))
ممكن حياةمتعملش حاجه وممكن تنفذ بس الفكرة ان الافكار الشريرة بتخطر علي راس الجميع
الحب اليائس والحقد الطبقي والغيرة
اسباب كتير تدفع حياة للايقاع بخالد
انا سايبه النهايه عشان القارئ يفكر ان ممكن يكون جانبه نموذج زي ده
او العكس رجل يفشل الحصول علي زوجه فيدمر سمعتها مثلا
نورتني وتحياتي

بنت القمر يقول...

راجي
========
متفقه معاك تماما
مش كل رجل جاني ولا كل امرأه ضحيه
اشكر اطرائك وتحياتي
ويا رب عند حسن ظن الجميع

بنت القمر يقول...

كراكيب
========
زورونا تجدوا ما يسركم:)
ربنا يخليك يا رب من بعض ما عندكم!!
الم ايه متقولش كده?!
حتي بص
هيهيهيهي
:p
تحياتي

بنت القمر يقول...

بثينه
========
من بعض ما عندكم يا جميله
ربنا يخليك
هو البوست مش اسقاط اوي
بس الفكرة ان المرأه مش دايما ضحيه
احيانا بتبقي اعوووووذ بالله
تحياتي وتسلمي لي

بنت القمر يقول...

جانا
========
تعليقك.....................عجبني اوي
تحياتي واشكرك

بنت القمر يقول...

محمد مفيد
==========
اشكر اطرائك يا محمد
وتحياتي

بنت القمر يقول...

فضفضه
========
هههههههههههه
طب والله قلت ها تقولي كده
هو المان صيدلي برضه؟؟؟
حرصي بقي يا اختشي الا ولاد الحرام مخلوش لولاد الحلال حاجه

بنت القمر يقول...

عدي النهار
===========
طب انت فكرت في ايه استقبلتها ازاي؟؟
الفكرة ان فكرة الادعاء ممكن تكون من طرف المرأه للانتقام من حب يائس
او ممكن يكون غيره طبقيه او غيره نسائيه
او رغبه للايقاع بزوج غني او ذو حيثيه
اسباب كتير ممكن تخلي واحده تدعي وترمي(بلاها علي شخص محترم
تحياتي

بنت القمر يقول...

وميض ابتسامه
===============
انا قاصده اسيب النهايه مفتوحه
عشان الفكرة تكون واصله افضل!
انه في ناس كتير زي حياه حوالينا... ممكن واكيد الخاطر الشيطاني بيراودهم وان الادعاء قائم مش دايما علي بينه وحق!!
خلي بالك لا يكون في حياه بجوارك وانت مش حاسس
:))
تحياتي

بنت القمر يقول...

زمان الوصل
============
انا اعرف من العينه دي كتير
من تصر علي افناء حياتها في البحث عن وهم!!
او من تعبر كل الحواجز الاخلاقيه للوصول الي رجل مهما كانت العواقب
تحياتي يا جميله

بنت القمر يقول...

محمود محمد حسن
===================
الحب اليائس والحقد الطبقي والغيره النسائيه وغيرها
اسباب تقود الي الجنون والاكتئاب
تحتاج طاقه نفسيه هائله للتغلب عليها!!
وقد تكون انت في موقع حياه ذات يوم او تكون بجوارك حياة وانت لا تدري
نورتني جدا وتحياتي

محمد إبراهيم محروس يقول...

القصة جيدة
واللغة سهلة وبسيطة ومعبرة
شكرا لك
خالص تحياتي
استمتعت بالمرور من هنا

تــسنيـم يقول...

على فكرة صدقتك

:)


بجد حلوة أووووووووي بس بلاش حكاية التحرش دي ليتعمله قضية ويتسجن فيها خلاص الدنيا معادتش سبهللة زي الأول

بنت القمر يقول...

محمد ابراهيم محروس
====================
اشكرك
واتمني المرور مرة اخري

بنت القمر يقول...

تسنيم
===============
طب كويس
:)) نورتيني يا تسنيم

شــــمـس الديـن يقول...

غلطة حواء الازليه انها تبقي مكانها و تنتظر و تنتظر و تنتظر ولا تحاول ان تتفهم طبيعة الرجال

اظن انها غلطتها ان تراهن علي جواد خاسر منذ الوهله الاولي , ان الرجل ان لم يري الانثي في الامراه التي يتعامل معها منذ البداية فلن يراها حتي و ان اشعلت اصابعها العشره !!!! اعتقد انها لابد ان تعدل تفكيرها و تبحث عن مكان اخر بعد ما اصبح الذل و الهوان يتبعان هذا المكان و يتم مناداتها باسمها دون اللقلب الذي باع اباها نصف ما يملك حتي تحصل عليه

لا اريد ان اكون قاسية و لكن الحياة لا تنتظر احداً

قصة مبدعة للغاية و تتناول نفسية جزء كبير من الفتيات