الخميس، أغسطس 21، 2008

مني جورج ومني محمود

الو: مساء الخير
الو: وعليكم السلام مني محمود 567 تحت امرك يا افندم
من فضلك عاوزة رقم مستشفي كذا...
..................
الو: السلام عليكم
الو: مساء النور مني جورج 458 معاكي يا افندم اؤمري
عاوزة رقم مسشفي كذا
عاملات خدمه المصريه للاتصالات
.....................
حتي بدون ظهور الهويه الدينيه من اسم الموظفه الاان طريقه رد التحيه تؤكد عد م تنازل اي واحده عن هويتها ولكن الحرص علي اشهارها في وجه المتصل!!ا
......................
يؤكد شيئ من 2 يا اما الشعب زي الفل وحسن حاضن مرقص ووالله لا تاخد فص كبد من عندي!! ومرقص حاضن حسن وبيعزم عليه بالكلي بتاعته وواقفين طابور قدام المستشفيات رافعين شعار عاش الهلال مع الصليب وبيتعازموا علي بعض بالاعضاء ومفبش فتنه ولا احتقان ولا حاجه وحمدي السيد هو اللي ضرب كرسي في الكلوب وأسفّن ما بينهم...ا
وانا اللي نفسيتي وحشه عنصريه ووهابيه انا كمان
يا اما الناس دي مسمعتش عن مافيا خطف الاطفال وقتلهم من اجل سرقه اعضائهم ولا شافوا فيلم الحقونا ولا سمعوا عن بني مزار
كل اللي الراجل قاله بين مختلفي الديانه والجنسيه مفيش تبرع لانهم غالبا... مش قرايب وطبعا محدش بيعزم بجزء من لحمه لحد مش لحمه ودمه لمجرد صداقه مثلا ومنعا من استغلال الاغنياء من الطرفين للفقراء من الطرفين..و في ظل الفساد والاحتقان وسوء اخلاق الناس الوضع ده مش ممكن يكون الا في المدينه الفاضله مش اكتر
.................................
غزاله التي انجبت سبع توائم مبتسره في حاله نادرة... عامله فوضي في دماغي الجزيرة عملت لقاء مع زوجها فلاح اجير بياخد 15 جنيه يوميه ومش بيشتغل كل الايام... الاطفال عاوزين لبن وادويه وملابس... الست من قريه اسمها البرنجات او الدلنجات. واللينك بيقول انها في الاسكندريه.. يا ريت نقدر نوصلها ونساعدها... انا مستعده ازورها واسافر لها لو حد يساعدني اوصل لعنوانها وانهي محافظه لان مفيش قري في الاسكندريه ولا فلاحين يا ريت اللي عنده معلومات يساعدني ارجوكم... في بلاد الفرنجه اللي بتجيب توءم بيدوها ممرضه تساعدها في البيت.... مش معقوله الاطفال يموتوا واحد ورا التاني في قريه بدون امكانيات ولا خدمات
.................................
بأذن الله ها احضر حفل العدد التاني من مدونات مصريه للجيب... يا ريت قراءي وزواري واصدقائي يشرفوا الحفل... فرصه اشوف الجميع

هناك 28 تعليقًا:

Ahmed Kamal يقول...

يبقى فرصة نقابلك ، يا بنت القمر :)

تحياتي لك

عين فى الجنة يقول...

الدلنجات من مراكز محافظة البحيرة

Known as PHYSCO يقول...

بصى أنا اول مرة أسمع عن القرار و مش عارفة يعنى إيه لزمته .. ماهو اللى بيشترى الفقير مش بيهمه إذا كان مسلم و لا مسيحى .. و لا بتفرق .. و لو القرار ده اتطبق هل المسيحى مش هيرضى ياخد من مسيحى زيه و لا المسلم هيحب إنه يقطع من لحم المسلم .. ما أظنش .. يبقى إيه بقى فايدة القرار

عامة انا مقتنعة تمام و جدا إنه من الطبيعى إن كل واحد له ديانته إنه يحافظ على العلامات دى سواء بقى بحجاب و لا بصليب و لا بدقن أو بالسلام عليكم و مساء النور .. بشرط واحد إنى ما أضرش اللى قدامى و ما استفزوش

بالنسبة للست اللى خلفت التوائم ربنا يقدرك دايما على فعل الخير و أنا للأسف ماعندش أى معلومات عنها

بالنسبة بقى لحفل التوقيع فيارب إن شاء الله أحضره أنا كمان مع صاحبتى شيماء صاحبة مدونة همسات دافئة .. إن شاء الله نعرف نشوفك هناك

غير معرف يقول...

مش قادر أعلق لأني بجد حاسس إني منهك
بس قولت آجي أسلم
إزيك

عدى النهار يقول...

بكرة يطلع حد يطالب بقانون موحد للتحية.. كان فى بوست كويس عند شغف عن موضوع التحية

فيكي الخير إنك فكرتي فى الست أرنبة قصدي غزالة :) ربنا يوفقك فى الوصول لها ومساعدتها

مبروك المشاركة فى مدونات الجيب وإنشاء الله تكون أمسية طيبة للجميع

خمسة فضفضة يقول...

السلام عليكم ورحمة الله وبركاته

صراحه القرار ده غريب اوي مش عارفه ايه لزمته في التوقيت ده بالذات والنار مش ناقصه حطب يرموه فيهاوبعد طيب ايه هما مستندين علي ايه في فتواهم دي لاني سمعت برضو ان فيه شيوخ ازهر بيحرموا النقل بين الديانتين

بالنسبة لغزله تخيلي ان الحكومه الموقره قررت تخلي الدعم علي لبن الاطفال جزئي وبعد ما كانت علبة اللبن ب 3 جنيه وكمان الناس مش بيلاقوه لانه بيجيلنا اصلا كل شهر بكميات محدوده اقصاها كرتونه 24 علبه ده لو متوفر

دلوقتي بقت العلبه ب 15 جنيه يعني بيومية زوج غزاله اللي هايكون محتاج في اليوم مش اقل من 3 علب

وعارفه ايه كمان بيقولك هاينزلوا اللبن المدعم اللي ب 3 جنيه علي البطاقات الصحيه بتاع الاطفال بعد ما الطبيب المختص يكشف علي الطفل ويقرر انه محتاج لبن ولا لا
يعني الكوسه هاتشتغل الله ينور

بجد ربنا معاهم وياريت لو فيه وسيله نقدر نساعدهم بيها


اما حفلة التوقيه فيارب اعرف آجي يارب ادعيلي


سلام

blue-wave يقول...

تصدقى غريب اوى الموقف الأول دا؟
غريب الحرص على اظهار الهويه الدينيه
هوا الموضوع بققى فى كدا وبس؟؟
بجد
يعنى الإسلام او المسيحيه بقم مجرد شعارات بنصر عليها وبنرفض نغيرها؟
يعنى لو منى محمود قالت مساء الخير تبقى كفرت؟
ولو منى جورج قالت السلام عليكم ممكن يقتلوها مثلا؟؟
غريبه غريبه بجد

سلام سالم يقول...

انا مش فاهم ايه دخل الفتنة الطائفية والكلام الكبير اللي بيوجع دماغنا دا في الموضوع الدكتور قال قرار لمراعاة الطرفين ان جاز استخدام الكلمة دي لكن التفكير في القرارات بتشنج هو اللي بيسبب المشاكل

يا مراكبي يقول...

بوست ظريف .. كأنك بتعلقي أو بتلخصي لينا مجموعة من الأحداث اللي دايما دايما بتفوتني .. أشكرك إنك بتعرفيني بيها

والعنوان طريف على فكرة

-------

لما كنت في مصر .. كنت مواظب عاى حضور حدث سنوي هو مهرجان الموسيقى العربية في شهر نوفمبر من كل سنة .. وكنت تقريبا لاجئ في الأوبرا المصرية بأحضر أي حفلة علشان أهرب من الواقع لمدة ساعات

دلوقت مابعرفش أهرب من الواقع أبدا غير لما بأنام .. أو لما بأنجح إني أنام

محمد عبد الغفار يقول...

ليس عدم تنازل ولكن تعود وثقافه تبرز غصب عن عين التخين

اى تصريح لأى حد يتحول ألياً الى مزايده بغض النظر عن صحه ما صرح بع من عدمه

الدلنجات مركز فى البحيرة فى منطقه من افقر مناطق الجمهورية و به أربع قري رئيسيه هي الوفائيه و طيبه و كوم زمران و المسين والأم اسمها غزاله خميس

اخطط لأن اكون من الحضور واله المستعان

blackcairorose يقول...

بالضبط يا بنت القمر، لما بتيجى سيرة حذف خانة الديانة بيكون بالاضافة لتساؤلى عن جدوى هذا الحذف، ان الديانة الان بسهولة جدا اكتشافها من التحية والدبلة الذهب للرجال غير طبعا الحجاب بالنسبة للمرأة وهى كلها مؤشرات واضحة جدا فى طبقات عديدة فى المجتمع وليس فى كل الطبقات

أما بالنسبة لموضوع نقل الاعضاء، إذا كان القرار هو فى اطار القضاء على عمليات الشراء والبيع فما دخل الدين؟ اليس مثلا وضع قواعد لانتقال الاعضاء دون ذكر خانة الدين كان أجدى ولا يعطى وجها قبيحا وطائفيا للموضوع؟؟

يعنى لو قلنا مثلا منع انتقال الاعضاء لغير الاقارب، اليس مثل هذا القرار بشكل عام يغطى سواء كان الانتقال من فقير لغنى او من مسلم لمسيحى او او؟؟

هل نقطتى واضحة؟

ومن هنا اعتراضى على هذا القرار وربطه بالدين لأن اعلانه بهذا الشكل لن يحل المسألة ولكنه يفتح الباب امام المزيد من التأويلات الطائفية وحقن الاجواء، بالاضافة الى أنى لم اسمع فى العالم كله عن حل قضية كهذه او شبيه بها من خلال ربطها بديانة أصحابها

يعنى مثلا وبالمرة فى اطار محاربة عمالة الاطفال نمنع تشغيل مسيحى لطفل مسلم والعكس، وفى اطار الختان نمنع ممرضة او حكيمة او داية مسلمة بممارسة الختان للفتيات المسيحيات، وهى كلها يمكن تفسيرها بانها فى اطار محاربة القضية

يعنى مجرد رأى

اما التوائم فبقول انه فى الوقت اللى العالم كله بيتفرج مين حقق اكبر انجاز فى الالعاب الرياضية فى بكين وخيبتنا كالعادة مجلجلة، حققنا انجاز فى عدد التوائم ما شاء الله

عاشــــــ النقاب ـقــــة"نونو" يقول...

السلام عليكم
عارفة بالنسبة لموضوع السلام دة بالذات انا كان ليا معاه تجربة
لقيت منها في نصارى عادي ترد عليكي وبقلب جامد وعليكم السلام ورحمة الله لا وايه وتقولك صلي على النبي وتشوف ابني تقول بسم الله الرحمن الرحيم
على النقيض الاقي واحدة اقول سلام عليكم ترد سلام او تسمي على ابني بسم الصليب
اكتر من مرة ابقى قاصدة اقول سلام عليكم
وترد برضه سلام
لحد ما عرفت منهم برضه مسيحيين بس عشرة ان دة من الوصايا اللي بيتوصوها هيدعولنا يعني ولا ايه
بس الحقيقة مش كلهم
بلاحظ الارثوذوكس افضل في التعامل
وما بيفرقش معاهم دة مش كلهم بس الغالب
موضوع غزالة
يبعتولها ممرضة ضحكتيني وانا مش قلدرة
دة مش بعيد يحاولوا يسممولها العيال علشان النسل
ربنا يقدرها يارب وتراعيهم ويفتكروها كحالة انسانية زي ما افتكروها اعلاميا
والله المفروض كانت طلبت اللي يصور معاها تطلب فلوس لقاء دة
بس اصلها غلبانة اعتقد انه من البحيرة
ربنا يقدرك على فعل الخير
حفل التوقيع للاسف انا وبنتي متوعكين مش هقدر اروح وهيفوتني كتير عارفة
لكن تتعوض باذن الله
مبروك القالب الجديد ظريف اوي
كل عام وانتي الى الله اقرب
اخبار اخوكي ايه ؟؟؟
ربنا يطمنا عليكوا يارب
تحياتي

محمود المصرى يقول...

بسم الله الرحمن الرحيم

اولا مبروك على الشكل الجديد للمدونة ولو انه غريب شوية

بالنسبة لموضوع السلام دا فى واحدة مسيحية جارتنا لما اقول لها صباح الخير تقولى وعليكم السلام ولما اقول لها سلام عليكم تقولى صباح النور دى بقى نظامها ايه ؟ بس انا بطلت اقول لها سلام عليكم خالص .
موضوع حمدى السيد دا اخد بعد غريب بالنسبة للجماعة بتوع الوحدة الوطنية والغاء الهوية الدينية لصالح الهوية الوطنية والكلام دا كله , لأن ببساطة الراجل بيتكلم من زاوية التشريعات التى تقيد عملية الاتجار بالاعضاء , فمن ضمنها ان الميسحى والمسلم لما يتبرعوا لبعض بيكون احتمال الاتجار فيها مرتفع , بس دا مايمنعش ان هذه النقطة ليست مجال الاتجار الوحيد بل هناك التبرع من الفقير للغنى وهى الجانب الاكبر فى الموضوع ولذلك لابد من تقييدها من هذه الزاوية ,او ان يكون التبرع بالاعضاء فى صورة مختلفة اى ان يجهل المتبرع من يتبرع له الا لو كان قريب من الدرجة الاولى يعنى اب وابنه او اخ واخوه او زوج وزوجته حسب الوضع يعنى , هذا بفرض جواز التبرع بالاعضاء شرعا .
تحياتى

بنت القمر يقول...

احمد كمال
=========
الفرصه الاسعد كانت ليا:))
:
:
:
راجي
=======
وصلت لاسم الدكتور مستشفي الولاده
ها اتابعكم بالاخبار... اشكرك

بنت القمر يقول...

سايكو
=======
الفكرة انه التبرع بين مختلفي الديانه يحمل قدر من الغرابه والمعقوليه وده حقيقه
الحجقيقه دي صدمت البعض
لمجرد انها حقيقه خصوصا في جو محتقن
مسأله الهويه الدينيه بصليب او دقن او غيره طبعا موضوع حريه اولا واخيرا لكن الحرص المبالغ فيه علي توكيده يؤكد ايضا فكرة الاحتقان الطائفي
ولاني برد بعد الحفل
كنت اتمني اشوفك برضه

بنت القمر يقول...

يحي المصري
=======
الف سلامه علي ذهنك
مشكور علي سلامك انا الحمد لله
والحمد لله الذي لا يحمد علي مكروه سواه:))!!

بنت القمر يقول...

عدي النهار
=============
علي رايك!!
غزاله... في الطريق اليها ان شاء الله
الحفل حضرته وكان طيب
وشفت كل الناس اللي انت نفسك تشوفهم
وش غياظ وشرير:))
كنت اتمني تنور الحفل برضه

بنت القمر يقول...

فضفضه
=========
كل اللي حكيت لهم عن غزاله... عاوزين يدفعوا لها اي مبالغ مساعده بس محدش يوجع راسه ويدور عليها!!
انا في الطريق لها
موضوع قرار النقيب بصي عليه في اللينك
ولاني برد بعد الحفل
فاللاسف كنت اتمني اشوفك
تتعوض وترجعي بالسلامه

بنت القمر يقول...

بلو ويف
==============
غريبه فعلا!!
:
:
:
سلام سالم
===========
اسفه مفهمتش تعليقك!!
نورتني

بنت القمر يقول...

مراكبي
==========
الشكر ليك يا افندم
بالنسبه للحفلات فالقاهرة جعبتها لاتفرغ
غير اسكندريه تماما
ربنا يروق لك الحال... ونسختك من العدد التاني عندي.. نورتني

بنت القمر يقول...

محمد عبد الغفار
=========
اولا نورت الحفل
وتانيا انا وصلت لطبيب الولاده والمستشفي وان شاء الله ها احاول اوصل لعنوانها... بالنسبه للتعود والثقافه فاعتقد انها ثقافه جديده
فيها نوع من التحدي والمناطحه.. الناس مكنوش حريصين عليها من سنوات مضت ولا اخدت الشكل الحاد ده
نورتني

بنت القمر يقول...

بلاك كايرو
============
متفقه معاكي جدا
فعلا محمد او جورج مش محتاجين اننا نلغي خانه الدين عشان نخفي هويتهم
وكمان انا شايفه انه الحل مش الاخفاء لكن الحل هو قبول الاخر اللي بايشارب والللي بصليب
اللي اسمها فاطمه والللي اسمها ماري
بالنسبه لقرار النقيب
قد يكون اجتهاد شخصي
وخانه التوفيق فيه
مع تاكدي برضه انه محدش بيقطع من لحمه ويتبرع الا لقريب درجه اولي
والحل برضه في تقنين عمليات التبرع اللي فيها شبه اتجار
نورتيني

بنت القمر يقول...

نونو
=========
فعلا الموضوع بتاع التحيه ده بقا محير ومخجل ومربك
كنت اتمني طبعا اشوفك في الحفل
الف سلامه عليكي وعلي بنتك
بالنسبه لغزاله ان شاء الله اوصل لها قريب دعواتك... نورتيني

بنت القمر يقول...

محمود المصري
=============
اديني بلعب في التمبليت عشان متزهقوش
بالنسبه لموضوع النقيب
يعني في حاله حدوث اتفاق بيع بين محمد وجورج مختلفي الديانه
وحدوث خلاف بينهما هاياخد شكل جورج الغني اللي بيستغل فقر محمد ويسرق كليته
او الحاج محمد اللي ضحك علي جورج الفقير وخد كليته وما ادالوش باقي تمنها وندخل في قصص ومتاهات المافيا الاسلاميه لسرقه اعضاء المسيحيين او التشكيل العصابي الاسلامي لسرقه اعضاء المسيحيين والدنيا مش ناقصه
الحل انه التبرع يكون مقنن بين اقارب الدرجه الاولي او يكون في شيئ زي كشف حاله لبيان والتحقق من عدم وجود شبهه اتجار... بس انت بتقول لجارتك المسيحيه صباح الخير؟؟؟
يا راااجل طب ما انت حلو اهه:))
وش بيهزر:))
امال بيقولوا عليك متطرف ليه!!
تورتني

^ H@fSS@^ يقول...

حاولت افهم ربطك للامور ببعضها البعض و فشلت
ايش دخل تجارة بيع الاعضاء البشرية و المافيا اللي فيها بقرار غبي و كلام قليل الادب لنقيب الاطباء؟؟
و ده ميعنيش ان الناس بتنكر مافيا بيع الاعضاء و لا انها بتؤكد على عدم حدوث فتنة
اه فيه فتنة و احتقان بين الطرفين
بس ميجيش رمز دولة زي ده و المفروض انه مسؤول عن اقواله و المفروض انه نقيب الجميع من الاطباء و يتفوه بالتفاهات دي و انتي مش عاوزة الناس تتهمه بما هو موجه اليه
ايوة كلامه كان مستفز
ايوة كلامه كان متحيز و بيزود الموضوع نار و احنا مش ناقصينها
يبقى ايه العيب اننا ندينه و نقف ضد قراره و نتهمه الى ان يتراجع عن اللي قاله بانه يمشي من منصبه لان ده ميصحش
و مش معنى ان فيه مافيا بيع اعضاء يبقى ده يخلينا نسكت عن غلط تاني حاصل
اصلاح الخطا ميكونش بخطا تاني و لا بالسكوت عنه
ده خط و ده خط تاني و لو كان قصده عن ان المتبرعين مش حيكونوا قرايب فبرضو مش شايفه علاقة كلامه بالاديان و كان ممكن يقولها بطريقة تانيةمن غير ما يشعلل الدنيا و يزعل فئة من العشب منه
انتي ربطي بين حاجتين ماشيين زي قضبان السكة الحديد
ادخالهم في بعض حيعمل كارثة مالهاش اي لازمة

بنت القمر يقول...

حفصه
========
الامور مرتبطه ببعض ومش ماشيه زي قضبان القطار اولا انتي قلتي انه في احتقان وتحفز وكده جميل لاننا مبدأينا اننا متفقين في النقطه دي عاوزاكي تتخيلي بحياديه تامه لو حدث اتفاق بين شخصين مختلفي الديانه طبعا احتماليه البيع ها تكون عاليه لانه صعب جدا انه حد يتبرع بلحمه لقريب مش درجه اولي مثلا
يعني انا ممكن اساعد صديقه مسيحيه في اقساط بنك كضامنه او اسلفها فلوس او استضيفها في بيت او او... لكن لما الامور تصل الي قطع اللحم اكيد مش ها اعمل كده الا مع امي او اختي او بنتي وهكذا
كنا بنقول ان احتماليه البيع بين مختلفي الديانه ها تكون عاليه
تصوري لو حدث اختلاف في عمليه البيع او بعدها وها انقلك جزء من ردي علي محمود
------------------
-يعني في حاله حدوث اتفاق بيع بين محمد وجورج مختلفي الديانه
وحدوث خلاف بينهما هاياخد شكل جورج الغني اللي بيستغل فقر محمد ويسرق كليته
او الحاج محمد اللي ضحك علي جورج الفقير وخد كليته وما ادالوش باقي تمنها وندخل في قصص ومتاهات المافيا الاسلاميه لسرقه اعضاء المسيحيين او التشكيل العصابي الاسلامي لسرقه اعضاء المسيحيين والدنيا مش ناقصه
-----------------
فهمتي ان ممكن احنا نكون من حيث لا ندري علي برميل بارود
-------------------
حكايه انه فئه من الشعب تزعل انا مش عارفه ليه
المفروض ان القرار للطرفين يعني لا تاخد من المسيحيين ولا ياخدوا مننا يعني تضييق فرصه الاتجار علي الطرفين ومش طرف واحد
الا اذا عاوزة تقولي انه في طرف بس بيدي وطرف بس بياخد
واعتقد ان الفقر متوفر جدا في الطرفين الللي يخليهم يقعوا في مصيبه الاتجار
اللي غايظني ان التعليقات اللي جت في الموضوع عند هاني بتتهم النقيب بالوهابيه
وهابيه ايه بس؟! يعني كل مصيبه نقول وهابيه وعلي رأي صديقه والله السعوديين لازم نديهم فلوس لان كل مصيبه نعلقها علي شماعه الوهابيه!!
يعني القرار ملوش اي صفه تحيز من طرف لطرف هو فقط رصد حاله الاحتقان نتيجه مش سبب
مش زودها قال الحقيقه اللي احنا مش عاوزين نشوفها انه فيه احتقان وتحفز
الراجل قال انه في لامعقوليه ان تكون عمليات النقل بين مختلفي الدين بدون تربح واللي غايظني ان الناس مش عاوزة تصدق ده او مستغرباه... يا ريت تقري تعليقاتي عند هاني علي الفيس بوك وها تعرفي ليه انا قلت كده ومتأكده من اللامعقوليه دي
الاولي فعلا في رأيي انه يكون التبرع بين اقارب الدرجه الاولي عشان يمنع انه كمان المسلم الغني يستغل المسلم الفقير او المسيحي الغني يستغل المسيحي الفقير
ده الاولي من كلمه مختلفي الديانه والجنسيه لانه كده ها يكون اكثر تضييقا في عمليه الاتجار وحفاظا علي الناس
يا ريت اكون واضحه
ونورتيني

غير معرف يقول...

بنت القمر

شرف كبير لى أن تعرفت على تلك العقلية الجميلة التى حيرتنى كثيرا

مبروك الطبعة الثانية وعلى اهدائك .. قد قرأت السيد ميم واعتقد انها من اجمل ماكتبتى ..

اما عن منى ومنى .. فهو موقف مخجل .. اذن كيف يذهب المصريون الى الصين لزرع اكبادهم هناك .. وهل ياترى يمتد ذلك الى نقل الدم؟ هل هناك كرات دم لها دين

الدين فى القلب .. وليس فى الاعضاء ..
احيانا اود أن اهتف كما يقولون
ايها الحرية.. كم من الجرائم ترتكب باسمك .. ولكن بدلا من الحرية اقول الدين

زمان الوصل يقول...

أوّلا مبروك اللوك الجديد بس لون الخلفيه بيصعّب القرايه شويه ؟!!

كان نفسى أحضر الحفل و كنت ناويه آخد لك صور و انتى بتوقّعى الكتاب و تكتبى إهداءاتك للقرّاء بس للأسف كنت على سفر .. ألف مبروك و إن شاء الله الكتاب القادم أكون حاضره ..

البنت بتاعة الدليل كان اسمها "منى محمود" !! أنا باشبّه على الاسم ده !! :)