السبت، يوليو 05، 2008

!...حسن وحسن ومرقص

سينما صيفي وعيال بتجري وبياع لب غلس وحمامات غيرادميه بس مش مشكله سينما برضه وبحب السيما
شاشه منغمشه وصوت عالي وهوا تلج علي البحر بس مش مهم احسن من البيت وخنقته
الفيلم يبدأ بدايه حلوة وقويه باحد مؤتمرات الوحده الوطنيه المشاركين فيها اثنين من القساوسه وفي طريقهم لدخول المؤتمر كثير من شكاوي الاضطهاد والتضييق في بنا الكنايس وعدم شغل الاقباط للمناصب الهامه وعلي الجانب الاخر اتنين شيوخ بيلعنوا مطالب الاقباط اللامنتهيه وتحويل عيدهم الي يوم اجازةلحد ان السنه كلها بقت اجازة ومحدش بيشتغل... _المهتمين والمشاركين في مجال المشكله الطائفيه قد يكونوا اكثر المتعصبين:))
تتوالي بعد ذلك احداث عن حياه الشيخ حسن والاب بولس اللذان يعانيان من المتطرفين كل منهم من جانبه فيتوصل الامن المصري الي طريقه جهنميه هي ابدال حياه الشيخ بحياه قسيس والقسيس بشيخ زي امريكا بالظبط في حكايه حمايه الشهود لما بيدوهم شخصيات اخري وبطاقات جديده .. تتوالي الاحداث والمفارقات المضحكه علي حياه الاب بولس كشيخ وحياه الشيخ حسن كمرقص افندي ... يذهب القس بولس ليعيش في المنيا لانها بعيده عن المتطرفين المسيحيين !!اللذين يرغبون في قتله ثم فجأه يعود للقاهرة ليقابل مرقص افندي
طبعا محدش يسألني ليه الاتنين في القاهرة اتجمعوا تاني؟!! ... مش هما مفروض مستخبيين من المتطرفين!
المهم يتقابلوا في صدفه غير معقوله للسكن في عمارة واحدة وكثير من المفارقات المضحكه اللتي تقلب الموضوع الي موضوع مسلي عاوز كيس فشار.. الجار السني جاي يبخر شقه حسن عشان البركه والرهبان جايين ياخدوا مرقص العائد من امريكا لزيارة الكنيسه والاعتراف والتناول وبقيه المفردات اليوميه للمسيحي المتدين
وبيعملوا مخبز عيش سوا ويتشاركوا وسط استفهامات العمال عن حقيقه هويه دين كل منهم ودعاوي برضه باضطهاد حسن للعمال المسلمين رغم انه مسيحي وبولس للمسيحيين رغم انه اصلا مسلم ولكن يبدوان الشعور بالتمييز والكراهيه سيطر علي الجميع ..
وكل ومنهما تنقح عليه هويته الدينيه فيذهب للصلاه طب حسن وراح الفجر يصلي في الجامع وبولس راح الكنيسه برضه يصلي{مش عارفه هو المسيحيين عندهم صلاة في الفجر والكنايس بتكون فاتحه؟!!}
المهم تترك الاسرتان القاهرة ويذهبوا الي الاسكندريه {مدينه الفتنه كما اراد الكاتب}كأنهم بيتفسحوا في مصايف الساحل الشمالي من القريه دي للي بعدها... بدون اذن الامن طالما كان الظابط هو عزت ابو عوف المتخلف اللي جارّروراه عسكري اهبل منه يشيله الموبايل!!
المهم تنشأ قصه حب بين جرجس المسيحي و اللي بقاعماد وبين فاطمه اللي بقت مريم وكل واحد فاكر التاني من دينه و كده الدنيا تبدأتقلب والجار المسيحي{اداورد} يصورهم ويفضح القصه.. وتحصل ازمه طائفيه في الشارع يقوم الشيخ في المتطرف بطريقه هبله في اشعالها والقسيس المتطرف اللي بيحض علي العنف في اشعالها برضه من جانبه الاسرتين يقلبوا علي بعض بعد ما كانوا بياكلوا مع بعض ملوخيه بالجمبري ودفيه الباميه وزي الفل...
يشتعل الشارع بمواجهه طائفيه _سببها قصه الحب زي الواقع تماما_وتحترق البيوت وتشتعل السيارات والدم يوصل للركب لكن ينتهي الفيلم بالاسرتين بيخرجوا من الشارع{محدش يسالني رايحيين فين_ ولا الامن الاهبل فين} وماسكين في ايدين بعض بعد ما حسن يغطي مرات بولس بالجاكيت بتاعه وبولس لا يكون اقل شهامه يكسر الباب وينقذ مرات وبنت حسن... والدنيا حواليهم دمار_ضريبه الفتنه ....وكل واحد ياخد ضربه في وشه في وسط الخناق ويكمل طريقه... النهايه حلوة ومؤثره وكمان البدايه بس بصراحه اللي في النص عك جدا وبوظ الدنيا جرعه الكوميديا كانت اوفر علي الموضوع وصدف غير معقوله روح عادل امام مسيطره علي الفيلم من اوله لاخره كأنك بتشوف التجربه الدنماركيه او الارهاب والكباب.. الجميل عمر الشريف كان متهمش بطريقه سافله!!
متلقيش بيه ولا بتاريخه والعيب علي الشركه المنتجه مش المخرج طبعا... الخلاصه
محدش يخش سينما صيفي تاني في البلد دي الا اذا مكنش ضامن الفيلم:))
تحديث.... لكني استمتعت بالفيلم... وليس السينما!!

هناك 36 تعليقًا:

Bahz.Baih يقول...

انا كنت لسه هكتب عن الفيلم انهارده فى المدونه ... بس بما ان انتى كاتبه عنه .. فخلاص نشجع الجهود الجماعيه و نبتدى التعليق
أختلف معاكى فى ان عدم الذهاب الى الفيلم هو النصيحه الاخرانيه .. لأن بجد الفيلم ممتع ... أأه فى حبكات فى السيناريو مش مزبوطه ... فى حبكات تانيه هابله ... بس فى النهايه فى متعه هتلاقيها من الفيلم ... تانى حاجه انتى ليه حرقتى الفيلم كده

خمسة فضفضة يقول...

السلام عليكم ورحمة الله وبركاته

ذلونا بقي عشان بتروحوا سينيما واحنا لأ هههههههه
:)))))

بس من غير ماشوف الفيلم حاجه متوقعه جدا ان روح عادل امام تبقي طاغيه وانه يكون هو الشخصيه الاساسيه والفرعيه والثانويه والكومبارس وكل حاجه واي حد معاه يبقي علي هامش الهامش

كنت قريت اثناء التحضير للفيلم ان كذا ممثل رفض القيام بدور عمر الشريف

اعتقد انهم اكيد كانوا عارفين اللي هايحصل انما هو ياعني فالسه جاي من بره بشوكه مش عارف الدنيا ماشيه ازاي

سلام

خمسة فضفضة يقول...

بالنسبه لموضوع الثانويه العامه بتاع البوست اللي فات ايوه علي ايامي كانت الثانويه علمي وادبي بس مافيش علمي رياضه وعلمي علوم هو علمي وخلاص

د ياستي كان سنة 93

وبعدين واعيه ايه وبتاع ايه ما السن مكتوب بالخط العريض في البروفايل
:))))))))))))))
والعداد خلاص عدي الثلاثين وقرب يقلب علي الاربعين
ههههههههههه


سلام

زمان الوصل يقول...

سأؤجّل قراءة البوست لحد ما اشوف الفيلم أمّا أصحابى يرجعوا م الأجازه و نشوفه مع بعض :) بس برافو عليكى انّك شفتيه بسرعه كده يا بختك :)

•√أريـ السمر ـج√• يقول...

السينما الصيفى ليها جوها خصوصا مع الفشار :)
أما الفيلم انا ما بدخلش اى فيلم ل عادل امام بشعر قبل دخوله انه معروف مسبقاً انه البطل و المخرج و السينارست .. مش عارفة ليه

دمتى بكل الخير

محمود المصرى يقول...

بسم الله الرحمن الرحيم

بصراحة انا مافهمتش حاجة من الكلام , يعنى مين اللى كان متطرف ومين اللى كان شيخ وبقى قسيس ومين اللى كان قسيس وبقى شيخ ,ولا هما كانوا بيتنكروا بينهم وبين بعض وكل واحد عايش حياة التانى؟
بالنسبة للصلاة عند المسيحيين اعتقد ان عندهم صلاة باكر لكن مش شرط يروح الكنيسة يعنى عموما عباس العبد هايفيدنا فى الحوار دا .
اما الفتنة فسببها مش واحد احب واحدة اعتقد ان فى ميل داخلى للتقسيم اى مشكلة تقلب مسلم ومسيحى , زى ما فى ميل للتقسيم على اساس الصداقة او العائلة او حتى الانتماء للفريق اللى بيشجعه , كذلك بيظهر تعصب للانتماء للدين , جايز تكون زايدة وجايز يكون الاستفزاز اكبر , لكن اللى متأكد منه ان االلى يقول ان تعظيم الانتماء الوطنى هو الحل دا بيهرج لأن ببساطة التقسيم درجات يعنى كلنا عرب ولكن بين العرب ممكن المصريين يتخانقوا مع الجزائريين وكلنا مصريين لكن المسلمين يتخانقوا مع المسيحيين زى بالظبط الاهلاوية ما يتخانقوا مع الزمالكاوية , يبقى الحل ان كل الناس تعرف حقوقها وواجباتها وتربى على حسن المعاملة مع المختلف سواء هذا المختلف كان مسيحيا او زمالكاويا او حتى صعيدى وانت بحراوى وهكذا .
نصبحة اضافة الى نصيحة حضرتك ماحدش يدخل سنيما خالص ولو عاوز تشوف فيلم هاته دى فى دى او استنى لما يتعرض على روتانا بعد كام سنة .
تحياتى

boshra mohamed يقول...

"
وكأنك بتشوف التجربة الدنماركية او الارهاب والكباب

"

ايه اللى جاب القلعة جنب البحر
:}

ماشوفتش الفيلم لسه وغالبا مش حاشوفه لانى بقى عندى حساسية من افلام عادل امام بس عجبنى اوى العنوان
حسن وحسن ومرقص

Ahmed Kamal يقول...

الحمد لله ربنا تاب علي من السينما و الأونطة بتاعتها ، معظم الأفلام اللي من النوعية دي مش بتقدم أي فكر ، كل اللي فيها خلط للأوراق و كوميديا ساذجة . طبعا أنا مقدرش أحكم بنفسي على فيلم ماشفتوش ، لكن العبرة بمئات الأفلام اللي شفتها سابقا و مابقيتش طايق أشوف تاني ، و ثانيا البركة في أصدقائي مثل حضرتك اللي بيعرفوني خلاصة الموضوع ، و أوفر أنا صحتي :) أما عن عادل إمام فأتفق معك تماما إن معظم أفلامه بقت كليشيه واحد .

... يقول...

كدة كأني شفته
النقد بعين المشاهد مش الناقد اللي غالبا مأجور بيبقي ممتع جدا
بجد استمتعت برؤيتك
ممكن اخد لينك التدوينة في جروب بحب السيما -من غير بحب السيما ما يزعل
:D
آه
ميرسي أوي أوي علي اللافندر
بجد انت مش معقولة

ذو النون المصري يقول...

انا بحب عادل امام و افلامه
علي الاقل في اغلبها الواحد بيضحك من قلبه فعلا من غير سخافه
زي التجربه الدانماركيه مثلا لما جاب انيتا البيت و خرج الفنان المغمور -اعتقد اسمه حاجه عيد - من الدولاب و غني و بعدين عياله دخلوا يهللوا و شالوه
اول مره اشوف المشهد ده فطست علي روحي من الضحك
ههههههههه
المهم ان قضية الوحده الوطنيه معلجتها دراميا هيكون سخيف ما لم نتحول الي النظام الديمقراطي و ما لم تعالج قضايا الفقر في البلاد
لان الحكومه ربما معتقده ان المشاكل ناتجه عن سوء فهم كل طرف للاخر و اعتقد ان هذا غير صحيح بالمره
تحياتي

عدى النهار يقول...

أثناء عمل الفيلم قرأت إن عادل إمام كان بيتدخل فى كل شىء فى الفيلم بطريقة فيها تعدّي سخيف على الكل بما فيهم عمر الشريف اللي كان بيتجاهل تصرفاته

متهيألي رد الفعل فى الحالة دى مابيبقاش تجاهل بقدر ما بيكون إرتباط قوي بالمهنة مع عدم وجود فُرص ممارستها

بنت القمر يقول...

Bahz Baih
===========
اهلا بهظ بيه زيارتك الاولي وان شاء الله مش الاخيره
الفيلم متاح للكل وكل واحد ورؤيته
بس عموما انا عملت التحديث الذي لايفهم من اني لم استمتع بالعكس لكن يمكن السينما الصيفي بتفقد الواحد رهبه وجمال القاعات المغلقه...
اما اني حرقت الفيلم فاعتقد مش بالنسبه ليك لانه واضح انك شفته
:))
نورت

بنت القمر يقول...

فضفوضه
=========
ما عاش مين يذلك يا دكتورة
:)
بالنسبه للفيلم لا وكمان شريف عرفه ووائل احسا رفضوا اخراجه لنفس العيوب في السيناريو
عمر الشريف لم يفقد سحر الماضي في رأيي
ولن يفقد:))
نفس العيون القويه والنظرة الساحرة..
نورتي

بنت القمر يقول...

زمان الوصل
============
ماشي يا واعيه
:)))
مش انا جبت عزازيل
!!!
اخر نسخه في اليكس لسه ما بداتش فيها بس علي ضمانتك
:))
لو كنتي جنبي كنا رحنا سينما سوا بس يلا مصر ام الدنيا
نورتيني

بنت القمر يقول...

•√أريـ السمر ـج√•
================= اهلا يا عزيزتي الزيارة الاولي
السينما الصيفي لو كبرت تلاقي عيال بتجري وبياع لب رذل ةناس راحه جايه قدام الشاشه:((
وده بشتتك عن الفيلم
بشأن كلامك عن عادل امام فهو صح ميه الميه
عشان كده سميت البوست حسن وحسن ومرقص
نورتيني

بنت القمر يقول...

محمود المصري
=============
اولا منورني
تانيا شوف يا سيدي عادل امام قسيس معتدل .. والمتطرفين المسيحيين وخصوصا بتوع النت عاوزين يموتوه واسمه بولس
تمام كده
عمر الشريف شيخ مسلم معتدل اسمه حسن لكن اخوه متطرف واميرجماعه اخوه ها يموت يقوم المتطرفين يطلبوا من تولي الامارة وهو يرفض و برضوا يقوموا عاوزين يموتوه ويحرقوا محل العطارة بتاعه
الامن المصري عشان يحمي الاتنين دول يديهم بطاقات وشخصيات جديده القس بولس ياخد اسم الشيخ حسن والشيخ حسن ياخد اسم مرقص افندي
ومن هنا بتحصل المفارقات زي الجار اللي بيطلب فتاوي من حسن اللي هو اصلا بولس والعكس المسيحيين يطلبوا من مرقص يروح يتناول ويعترف وهو اصلا حسن وكده
تمام ده الفيلم بالنسبه للجد
هو حكايه الوطنيه والانتماء الديني مش متعارضين ابدا ومش بالضرورة واحدة منهم تكون فرع للتانيه لسببين الاول بسيط الناس زي بعض!!!
بمعني ايماني ببلدي وحبي لها مش زي غيري قد يكون ايماني بديني اقل او ازيد من غيري
اذا كان الجهاد من اساسيات الدين فالجهاد يكون اولا لحمايه الوطن قبل نشر الدين اذن لب الانتماء للدين الحفاظ علي الوطن الذي هو في ذات الوقت حفاظ علي النفس والمال والعرض والعقل والدين وهما الاولويات الخمسه
لكن برضه ارجع اقولك في فترة التردي اللي احنا فيها في ناس ما بقتش عايشه الدين لكن عايشه في الدين لانه مفيش قضيه قوميه ولا وطنيه ولا مشروع تحررو ولا مشروع قومي ولا حتي مشروع توشكي ولا السد العالي!
كله راح كله بقا صفر كبير:((
فاهمني يا استاذنا !!
في حرب اكتوبرلم تحدث سرقات لان الناس كانت مستعيبه{ ومستحرمه} وده مش تعارض بالعكس انا شايفه الوطن الامن يحمي الاديان بداخله والدين القوي باتباعه مؤمنين وعلي خلق يحمي الاوطان
=========
بخصوص روطانا سينما
لا السينما بقا ارحم بدل الفواصل الاعلانيه السخيفه فيها وكمان الدي في دي لا لسه مستعملتوش التكنولوجيا عندي بدائيه شويتين
نورتني يا استاذنا

بنت القمر يقول...

بحب السيما
============
ايه اللي جاب القلعه جنب البحر؟؟!
ان التجربه الدينماركيه والارهاب والكباب مافيهومش عمر الشريف
D:
فهمت قصدي وعشان كده سميت البوست حسن وحسن ومرقص
حسن هو عادل امام في الفيلم
يعني حضورة الي عمر الشريف نسبته 1:2
بس خلاص
نورتني

بنت القمر يقول...

احمد كمال
===========
ماشي يا سيدي وفر انت صحتك برضه
:))
الفيلم مش فيه خلط اوراق الفيلم بس في حاجات مش متركبه صح وفيه نسبه تهريج عاليه علي قضيه جاده لا تحتمل الهزل ده
كمانفي شويه حاجات مش مفهومه وصدف غير ومبررة
وده ممكن اقبله لكن الهزار الاوفر في قضيه مهمه زي الوحده مش مقبول ابدا ممكن مشهد اتنين اكتر من كده
:((
نورتني ... اشكر مرورك

بنت القمر يقول...

بثينه
--------
المدونه واللينكات والصور والفيديوهات علي طبق من دهب ليكي يا صديقتي
انتي من اكتر الناس القريبه علي قلبي براحتك ومن غير استئذان
اللافندر.. سعيده اني منحتك قليل من السعاده!!!!!
تحياتي ودمتي بكل سعاده

بنت القمر يقول...

ذو النون
========== هو من ناحيه الضحك خش الفيلم وها تضحك للركب
بس اعتقد ان القضيه اللي كانت في الفيلم لم تكن تحتاج هذا الكم من التهريج اللذيذ
لعلمك انا كمان كنت ها اموت من الضحك بس القضيه زي الوحدة اكبر من كده
بخصوص...... البلد... اعتقد ان الحكومه ها تسيب الناس تاكل بعض كده
طالما بعيد عن ثوبها... الغير طاهر!!
نورتني يا نون

بنت القمر يقول...

عدي النهار
============= عادل امام البطل وابنهممثل وابنه التاني مخرج لك ان تتخيل مما جعل شريف عرفه مخرج امام المفضل يرفض اخراج الفيلم لان السيناريو مفكك وغير مترابط ولا الاحداث مفهومه
عمر الشريف.. تدبل الورده,, وريحتها فيها ........
لكن بجوار عصابه امام.. صعب تشم الريحه دي الا بجهد جهيد...
نورتني

سبهللة يقول...

كنت متوقعة من الاعلانات انه فيلم مش قد كدة وانتى اكدتيلى

أسوور يقول...

نزلك بوست فى جريدة الأسرة العربية
عدد اليوم
تحياتى

غير معرف يقول...

العزيزة بنت القمر

شاهدت الفيلم .. ماتزعليش منى .. تناول ساذج جدا وسطحى لمشكلة حقيقية فى مصر ..

مافهمته أن عمر الشريف من الواضح انه كان معذور فى قرشين .. وعادل امام لارصيد له من مدةولاجديد فيه .. غير ان الموضوع اصبح فاميلى فينشر له ولاولاده الاثنين الذين لاأرى فى ايهما اى موهبة متفردة غير ان بابى عادل امام ..

كنت متوقع غير كده خالص ..

تحياتى

El - Shandwely يقول...

اول حاجة لفتت نظرى فى الفيلم ..هو الكرو المتكرر ..اللى يخليك تسال نفسك هو مين اللى بيختار الناس دى ..المخرج ولا مساعد المخرج ولا عادل امام لانه مع اختلاف المخرجين سواء على ادريس ولا حتى عمرو عرفة ولا ابنه معظم الممثلين هما هما اللى فى معظم افلام عادل امام ..
...
الفيلم مش سىء ولكن فى نفس الوقت مش فيلم عظيم زى ماصورت الدعاية المعهودة من الشركة ..
كتير من المشاهد العتيهه واللى احيانا ملهاش مبرر قوى .. كعادة افلام يوسف معاطى ..الحبكة ممكن تكون كويسة نوعا ما ..الشخصيات مرسومة كويس ..لكن بيجيله تاتش هطل فى النص متفهمش ليه
...
عادل امام المفروض انه مسيحى وبعد ماعربيته انفجرت على طول غيره هويته ومكان اقامته علشان يحموه من المتطرفين المسلمسن (ده المفروض) طيب عمر الشريف اللى حرق الوكالة بتاعته ولا المحل بتاعه ..هما برده المتطرفين المسلمين اللى كانو عاوزينوا يبقى امير ليهم خلافة لاخوه ..يبقى ايه المبرر انه يتغير هويته لواحد مسيحى ؟؟؟؟؟؟؟
...
يمكن الجزئية دى بالذات كان ممكن يحلها المشهد اللى اتقطع من الفيلم .. المفروض فى مشهد هيجوا الجماعة المتطرفين لبيت عمر الشريف ..والجزء ده نزل فى الاعلان بتاع الفيلم ..ورامى امام قال احنا حذفنا لاننا كنا عاوزين الفيلم ساعة وخمسين دقيقة بالظبط ؟؟؟؟؟؟
...
احسن حاجة عملها يوسف معاطى انه نشر الغسيل الوسخ كله وجاب كل الافكار اللى بتدور فى بال الجهتين عن بعضهم سواء المسيحين وفكرتهم عن المسلمين او المسلمين وفكرتهم عن المسيحين .. وخاول فى نوع من الرمزية انه يوصل ان الفكر الجديد او النظرة الجديدة هى اللى المفروض تسود لما يتولى الشباب فاطمة وجرجس الوقوف ضد الام (الفكر القديم البالى ) والدفاع عن فكرة وجودهم مع بعض فى مكان واحد
...
الفرحة الكبيرة فى الفيلم ده بالنسبة لى هو موسيقى ياسر عبد الرحمن اللى كانت طاغية فى كل مشه د من المشاهد وتحديدا المشهد الاخير

بنت القمر يقول...

اسور
====
شاكرين يا ستي انظري الرد البوست بعد القادم... تحياتي انا كمان

بنت القمر يقول...

شريف
=======
اتفق معك في ان التناول ساذج وانا مقلتش غير كده انظر الردود بتاعتي علي التعليقات
عادل امامه اصبح مكرر ومصر علي امتطاء حصان الكوميديا بلازمه ودون لازمه
احنا مش مختلفين يا عزيزي اعتقد ان موضوع الوحده كان عاوز جديه اكتر من كده
تحياتي

بنت القمر يقول...

El - Shandwely
=============
اهلا بيك يا عزيزي مرورك الاول
وان كنت اعتقد ان عادل امام اللي فجر عربيته المتطرفين المسيحيين مش المسلمين
لان ابنه قاله كده في العربيه انت مش عارف بيقوقلو ايه عليك في النت
تقريبا ده اللي فهمته
:))
اتفق معاك انه في جرعه صراحع بما يكنه البعض تجاه الاخر لكن اختلف معاك في حكايح الحبكه خالص
هما ليه راحوا اسكندريه ومصر وازاي بيتحركوا من دماغهم
وليه الامن دورة اهبل كده
وعزت ابوعوف لا يطاق
اعتقد الفيلم مش متظبط خالص
لكن كبدايه عجبتني اوي مشهد القساوسه والشيوخ وهما رايحيين المؤتمر
ومشهد النهايه كمان مؤثر بس الباقي :(عك جدا
عموما نورتني واتمني تكرار الزيارة
تحياتي

قلم جاف يقول...

ليه أمريكا دايماً في دماغ "يوسف معاطي"؟

"معاطي" اتهم قبل كدة كتير بالاقتباس من أفلام أمريكية ، من بينها

meet the parents

back to school

والأخير فيه حاجات أقرب للبيئة الأمريكية والروح الأمريكية منها لما يحدث في مصر.. حتى إن مسلسله "عباس الأبيض" قيل فيه ما قيل في السابقين..

منطق الصدفة هو أحد أكبر نقاط ضعف "يوسف معاطي" .. مبيعرفش يعمل صدف صح ، ومبيعرفش يعمل إيقاع صح ومبيعرفش يتحكم فيه.. اعمل صدفتين هبل تستخدمهم كعوامل ضغط ومناطق حبكة وعيش حياتك وهوة فيه حد واخد باله.. شفتوا الشغلانة بقت سهلة إزاي؟

اللي قارفني حاجتين:

1-دفاع آل أديب عن المباشرة في الفيلم زي ما بان امبارح وحيبان النهاردة في ندوة الفيلم.

2-شعوري بتأفف "إمام" من أفلام عملها زمان على سبيل التغيير ومافهمهاش السوق.. "إمام" اللي في السبعين مش قادر يعمل فيلم زي "الحريف" اللي بيعتبره بعض النقاد أهم أفلامه وأهم حتى من "يعقوبيان"..

"إمام" أكثر واحد محتاج يبعد عن الكوميديا وعن "يوسف معاطي".. يتعلم شوية من أستاذ الكوميديا "عبد المنعم مدبولي" اللي مثل دراما في سنواته الأخيرة فبين قوته الهائلة كممثل تراجيدي..

Layla يقول...

الفيلم زي ما قلتي كان هزلي و كوميدي لدرجة الدموع.. لكن اعتقد ان هو ده المطلوب.. الفيلم كان بيضحكنا من كم التطرف و التعصب الاعمى اللي بقى صايب الناس لدرجة تخليهم يعتقدوا ان قسيس يبقى احد اولياء الله الصالحين

السخرية من التطرف و التعصب و تقديم الموضوع بصورة كوميدية هتكون رسالته اقوى و اعمق في النفوس

مثلا مشهد مؤتمر الوحدة الوطنية انا متأكد ان نص الناس اللي في السنيما بتقول نفس الكلام اللي كان المشايخ و القساوسة بتقوله وهم داخلين ومع ذلك ضحكوا لان المشهد بين لهم قد ايه الموضوع سخيف و هايف ومفتكرش ان في حد هيقول الكلام ده بعد كده والا هيضحك الناس عليه

الفيلم حرق معظم اوراق الطائفية و كشفها بسبب هزليته و كوميديته.. زي ما حصل مع فيلم طيور الظلام بالضبط

بس ضايقني فعلا تهميش دور عمر الشريف بالشكل ده..كان ممكن دوره يكون احسن من كده بكتير لكن نقول ايه..هو ده عيب الشللية في السينما.. يوسف معاطي بيكتب لعادل امام و ابن بيخرج فيلم لابوه كان لازم يطلع دور عمر الشريف بالحجم المؤسف ده

abderrahman يقول...

أنا بقالي مدة عايز ادخله مش عارف
بس واضح انه مش وحش قوي
بشكرك على عرض الفيلم

بنت القمر يقول...

قلم جاف
========
اهلا يا عزيزي مرورك النادر
طبيعي ال اديب يشهدوا للفيلم
مين يشهد للعروسه!!؟
الاقتباس مش عيب بس ميكونش حرفي زي في عريس من جهه امنيه
مش دي المشكله لكن افضل شئ
======================
إمام" أكثر واحد محتاج يبعد عن الكوميديا وعن "يوسف معاطي".. يتعلم شوية من أستاذ الكوميديا "عبد المنعم مدبولي" اللي مثل دراما في سنواته الأخيرة فبين قوته الهائلة كممثل تراجيدي..
-------------------
حقيقي هو ده اللي كنت عاوزة اقوله تماما
مش اي موضوع يتحمل الهزل
ولا اي قضيه
ممكن تهمش لبلبله تو حسن داوود
لكن تهمش عمر الشريف عيب جدا
وجود اسره امام حوله جعله يتسيد الفيلم
او تقدر تقول هو تسيد الفيلم فجاب اسرته كلها:))
تحياتي
ونورتني

بنت القمر يقول...

مارفيل
==========
يا عزيزي المشكله مش انك تكشف اوراق الطائفيه باي طريقه وخلاص
المهم تتحط في سياق مقبول ومقنع
تكون الحبكه والصدف مكتوبه بصنعه
مش تجيب ناس مطارده بيحطوا عفشهم علي عربيه وعمالين يتفسحوا بيه كانهم بيدوروا علي شقه مصيف!!
اعتقد ان الموضوع كان عاوز شويه ضبط طبعا متفقين علي تهميش عمر الشريف
وعلي ان بدايه الفيلم كانت جيده جدا
نورتني يا عزيزي

بنت القمر يقول...

عبدو باشا
==========
مش وحش ومش حلو
الجريده غير مسئوله بين البائع والمشتري
:))
نورت

زمان الوصل يقول...

:)
بجد مش ممكن
أنا كتبت بوست عندى من شويه بعد مشاهدة الفيلم و قلت بقى آجى أشوف أخيرا البوست بتاعك اللىّ مأجّلاه من زمن .. و اندهشت من تفكيرنا فى موضوع برنامج حماية الشهود !! أصلها كانت فكره أوفر شويه مش بتاعة الأمن المصرى اللىّ لم يبيّن فى الفيلم أى كرامه !!

الحمد لله إنّك بتتكلّمى عن الصدف الغير معقوله .. أصحابى اللىّ شفت الفيلم معاهم كانوا عاجبهم جدّا و مش شايفين أى شئ غير منطقى و أنا تعبت أحاول أوصّل لهم الفكره مش مقتنعين :(

الله أكبر نفس التساؤل عن صلاة الفجر عند المسحيين .. يحيا العدل ينصر دينك يا أستاذ "خليفه" :) و نفس الكلام عن سهولة التنقّل ولا فيش حس ولا خبر للأمن !!

روحى يا بنتى ربنا ينوّر طريقك .. دلوقت أقدر أنام و ضميرى مرتاح .. لقد أثلجتى صدرى

زمان الوصل يقول...

إيه ده جبتى "عزازيل" !! وااااااااااو ..
يا رب استر أحسن باخاف جدّا أنصح حد بحاجه و ماتعجبوش ..
ابقى قولى بقى إيه الأخبار أمّا تخلّصيها :)